Bazali, Yoliswani Ngabantwana Benu
“Makavuye uyihlo nonyoko.”—IMIZEKELISO 23:25.
1. Yintoni eya kwenza abazali bayoliswe ngabantwana babo?
HAYI indlela ekuvuyisa ngayo ukubona igatya likhula lize libe ngumthi omkhulu obukekayo nonik’ umthunzi—ngokukodwa ukuba lalityalwe laza lanyanyekelwa nguwe! Ngokufanayo, abazali abanabantwana abakhulela ekubeni ngabakhonzi bakaThixo bafumana uyolo olukhulu ngenxa yabo, njengoko umzekeliso weBhayibhile usitsho: “Ugcoba kakhulu uyise welungisa; ozele isilumko uyavuya ngaso. Makavuye uyihlo nonyoko, agcobe umfazi owakuzalayo.”—IMizekeliso 23:24, 25.
2, 3. (a) Abazali banokuyiphepha njani intlungu nobukrakra? (b) Amagatya nabantwana bafuna ntoni ukuze babe ngumthombo woyolo?
2 Sekunjalo, akwenzeki ngamabona-ndenzile ukuba umntwana abe ‘lilungisa’ yaye abe ‘sisilumko.’ Kufuneka umgudu omkhulu ukuze abaselula bangabi ngumthombo ‘wesingqala nobukrakra,’ kanye njengokuba kungumsebenzi ukukhulisa igatya libe ngumthi omkhulu. (IMizekeliso 17:21, 25) Ngokomzekelo, ukusekela igatya ngezinti kunokulenza likhule limi nkqo yaye lomelele. Ukulinkcenkceshela rhoqo igatya kubalulekile, ibe kusenokufuneka likhuselwe kwimibungu. Ekugqibeleni, ukulithena kunokulenza likhule libe ngumthi omhle.
3 ILizwi likaThixo libonisa ukuba kufuneka abantwana bafumane uqeqesho lobuthixo, basezwe amanzi enyaniso yeBhayibhile, bakhuselwe ekuxhatshazweni, yaye bafumane uqeqesho lothando oluya kushenxisa iimpawu ezimbi. Ukuze kuphunyezwe oko, oobawo babongozwa ngokukodwa ukuba bakhulise abantwana babo “kwingqeqesho nasekweyiselweni kwengqondo kuYehova.” (Efese 6:4) Kubandakanya ntoni oku?
Ukubethelela ILizwi LikaYehova
4. Abazali banayiphi imbopheleleko ngokuphathelele abantwana babo, yaye yintoni efunekayo ngaphambi kokuba bayizalisekise?
4 ‘Ukweyisela kwengqondo kuYehova’ kuthetha ukuvisisanisa indlela esicinga ngayo nokuthanda kukaYehova. Ngoko, abazali bamele bafundise abantwana babo indlela uYehova ayijonga ngayo imibandela ethile. Kwakhona, bamele baxelise umzekelo kaThixo wokuqeqesha ngemfesane, okanye babaqeqeshe ngenjongo yokubenza baphucule. (INdumiso 103:10, 11; IMizekeliso 3:11, 12) Kodwa ngaphambi kokuba abazali benjenjalo, bamele bazondle ngamazwi kaYehova, njengoko umprofeti kaThixo uMoses waluleka amaSirayeli amandulo esithi: “La mazwi [avela kuYehova] ndikuwisela umthetho ngawo namhlanje, aze abe sentliziyweni yakho.” (Akekeliswe sithi.)—Duteronomi 6:6.
5. Abazali abangamaSirayeli babefanele babafundise nini yaye njani abantwana babo, yaye kuthetha ukuthini ‘ukutsolisa’?
5 Ukuyifundisisa rhoqo iBhayibhile, ukucamngca nokuthandaza kwenza abazali bakuxhobele ukuphumeza umyalelo kaMoses olandelayo: “Uze uwatsolise [amazwi kaYehova] koonyana bakho, uthethe ngawo ekuhlaleni kwakho endlwini yakho, nasekuhambeni kwakho ngendlela, nasekulaleni kwakho, nasekuvukeni kwakho.” (Akekeliswe sithi.) Igama lesiHebhere eliguqulelwe ngokuthi “uwatsolise” lithetha “ukuphinda,” “ukuthetha into ngokuphindaphindiweyo,” “ukuyibethelela ngamandla.” Phawula indlela uMoses awayibethelela ngayo imfuneko yokugcina amazwi kaYehova kwindawo yokuqala: “Uwabophe esandleni sakho abe ngumqondiso, abe zizikhumbuzo phakathi kwamehlo akho; uwabhale emigubasini yendlu yakho, nasemasangweni akho.” Kucacile ukuba uYehova ufuna ukuba abazali banikele ingqalelo eshukunyiswa luthando kubantwana babo!—Duteronomi 6:7-9.
6. Ziintoni ababefanele bazitsolise ebantwaneni abazali, yaye yayiza kuba yintoni ingenelo yoko?
6 Ngawaphi “la mazwi” kaYehova ababefanele abazali bawatsolise ebantwaneni babo? UMoses wayesandul’ ukubafundela oko kubizwa ngokuba yiMithetho Elishumi, kuquka umthetho wokungabulali, wokungakrexezi, wokungebi, wokunganikeli ubungqina bobuxoki, nowokungakhanuki. Loo mithetho yokuziphatha, kuquka umthetho ‘wokuthanda uYehova uThixo wakho ngentliziyo yakho yonke, nangomphefumlo wakho wonke nangamandla akho onke,’ ngokusisiseko yayikoko abazali abangamaSirayeli ababefanele bakutsolise ebantwaneni babo. (Duteronomi 5:6-21; 6:1-5) Ngaba akuvumi na ukuba olu luhlobo lwengqeqesho efunekayo kubantwana banamhlanje?
7. (a) Abantwana babefaniswa nantoni eBhayibhileni? (b) Yintoni esiza kuyihlolisisa ngoku?
7 Ubawo ongumSirayeli waxelelwa oku: “Umka-kho woba njengomdiliya oqhamayo endlwini yakho ngaphakathi; oonyana bakho babe njengezithole zomnquma ngeenxa zonke esithebeni sakho.” (INdumiso 128:3) Noko ke, ukuze abazali bayoliswe “ngamagatya” abo kunokuba babe sentlungwini ngenxa yawo, bamele babonakalise umdla kubantwana babo imihla ngemihla. (IMizekeliso 10:1; 13:24; 29:15, 17) Makhe sihlolisise indlela abazali abanokubaqeqesha ngayo, babankcenkceshele ngokomoya, babakhusele, yaye babaqeqeshe ngokunothando ngayo abantwana babo ukuze babe ngumthombo woyolo lokwenene.
Ukubaqeqesha Kwasebusaneni
8. (a) Ngoobani ababa njengezinti zoqeqesho kuTimoti? (b) Lwaqalisa nini olo qeqesho, yaye waba yintoni umphumo?
8 Cinga ngoTimoti, ngokungathi kunjalo, owasekelwa ngezinti zoqeqesho ezimbini eziqinileyo—unina nonina-khulu. Ekubeni ubawo kaTimoti wayengumGrike ibe ngokucacileyo engelilo ikholwa, ngunina ongumYuda, uYunike nomama wakhe, uLoyisi, abamqeqesha ‘ngemibhalo engcwele ukususela ebusaneni.’ (2 Timoti 1:5; 3:15; IZenzo 16:1) Imigudu yabo yokufundisa uTimoti—kwasebusaneni—‘ngemisebenzi ebalulekileyo eyenziwa nguYehova’ yavuzwa ngokutyebileyo. (INdumiso 78:1, 3, 4) UTimoti waba ngumvangeli wasemazweni, mhlawumbi ngoxa wayesekwishumi elivisayo, ibe wayenegalelo elikhulu ekomelezeni amabandla amaKristu okuqala.—IZenzo 16:2-5; 1 Korinte 4:17; Filipi 2:19-23.
9. Abaselula banokukufunda njani ukuphepha imigibe yezinto eziphathekayo?
9 Bazali, luhlobo luni loqeqesho enilunika abantwana benu? Ngokomzekelo, ngaba nifuna abantwana benu babe nemvo elungeleleneyo ngezinto eziphathekayo? Ngoko nimele nimisele umzekelo omhle ngokungasukeli izixhobo zakutshanje okanye ezinye izinto ezingeyomfuneko. Ukuba nikhetha ukusukela izinto eziphathekayo, nifanele ningothuki xa abantwana benu besenza okufanayo. (Mateyu 6:24; 1 Timoti 6:9, 10) Ngenene, ukuba izinti ezisekele igatya azimanga nkqo, linokukhula njani kakuhle?
10. Abazali bafanele bafune ulwalathiso lukabani, yaye sisiphi isimo sengqondo abafanele babe naso?
10 Abazali abayoliswayo ngabantwana babo baya kuhlala belufuna uncedo lukaThixo ekubaqeqesheni, ngalo lonke ixesha bahlala bezikhathaza ngoko kuyifaneleyo impilo yokomoya yabantwana babo. Omnye umama onabantwana abane wathi: “Kwangaphambi kokuba sibe nabantwana, sasithandaza rhoqo kuYehova ukuze asincede sibe ngabazali abalungileyo, sikhokelwe liLizwi lakhe, yaye silisebenzise nasebomini bethu.” Wongezelela: “Ibinzana elithi ‘uYehova uza kuqala’ yayingelobinzana nje elingenantsingiselo kodwa yayiyindlela esasiphila ngayo.”—ABagwebi 13:8.
Ukubaseza “Amanzi” Rhoqo
11. Yintoni efunekayo ukuze amagatya nabantwana bakhule?
11 Amagatya akufuna ngokukodwa ukunkcenkceshelwa rhoqo, njengoko kuboniswe yindlela ekhula kakuhle ngayo imithi esecaleni komlambo. (Thelekisa ISityhilelo 22:1, 2.) Neentsana ziya kukhula ngokomoya ukuba ziwafumana rhoqo amanzi enyaniso yeBhayibhile. Kodwa abazali kufuneka baqonde ukuba umntwana wabo unokunikela ingqalelo kangangexesha elithile kuphela. Mhlawumbi kunokuba kuhle ngakumbi ukuchitha ixesha elifutshane izihlandlo eziliqela umfundisa, kunokuchitha ixesha elide izihlandlo ezimbalwa. Musa ukuwathabatha lula loo maxesha mafutshane. Ukuchitha ixesha kunye kubalulekile ukuze kubekho ulwalamano olomeleleyo phakathi komzali nomntwana, ukusondelelana okukhuthazwa izihlandlo ezininzi eZibhalweni.—Duteronomi 6:6-9; 11:18-21; IMizekeliso 22:6.
12. Kubaluleke kangakanani ukuthandaza nabantwana?
12 Mhlawumbi abantwana basenokufundiswa ngasekupheleni kosuku. Omnye oselula ukhumbula oku: “Abazali bam babedla ngokuhlala ebhedini yethu busuku ngabunye baze bamamele ngoxa sizithandazela.” Ngendlela okubaluleke ngayo oku, omnye wathi: “Oko kwandenza ndakuqhela ukuthandaza kuYehova busuku ngabunye ngaphambi kokuba ndilale.” Xa abantwana bebeva mihla le abazali babo bethetha ngoYehova yaye bethandaza kuye, uba ngumntu wokwenene kubo. Omnye umfana wathi: “Xa ndithandaza kuYehova ndandicimela ndize ndibone umntu ofana notatomkhulu wokwenene. Abazali bam bandifundisa ukuba ndibone ukuba yonke into esiyenzayo nesiyithethayo iyamchaphazela uYehova.”
13. Yintoni enokuqukwa kucwangciso lokufundisisa rhoqo?
13 Njengendlela yokunceda abaselula bafunxe amanzi enyaniso yeBhayibhile, abazali banokusebenzisa izinto ezininzi zokoqobo ukubafundisa. Abazali babantwana ababini abangaphantsi kwiminyaka yeshumi elivisayo bathi: “Abantwana bethu saqalisa ukubafundisa ukuzinza eHolweni yoBukumkani ngoxa babeseneeveki ezimbalwa bezelwe.” Ubawo wachaza oko intsapho yakhe yayikwenza: “Sasibhala zonke iincwadi zeBhayibhile kumaqweqwana amancinane size sizame ukuzibeka ngokokulandelelana kwazo, sonke sisiba nenxaxheba. Abantwana babesoloko bekhangele phambili ekwenzeni oku.” Iintsapho ezininzi zinocwangciso lokufunda ixesha elifutshane mhlawumbi ngaphambi okanye emva kwesidlo. Omnye ubawo wathi: “Ixesha lesidlo sangokuhlwa ibilixesha elihle lokuhlolisisa itekisi yosuku ethatyathwe eBhayibhileni.”
14. (a) Ziintoni ekunokwabelwana nabantwana ngazo nezinokubakha ngokomoya? (b) Ngawaphi amandla okufunda abanawo abantwana?
14 Kwakhona abantwana bayakunandipha ukuphulaphula amabali eBhayibhile amnandi akwiNcwadi Yam Yamabali EBhayibhile.a Esinye isibini sathi: “Xa abantwana bethu babeselula, sasidla ngokugubungela isifundo kwincwadi Yamabali EBhayibhile, yaye emva koko abantwana babedla ngokufaka izinxibo baze badlale iinxalenye ezahlukahlukeneyo kuhlobo oluthile lomdlalo omncinane. Babekuthanda oku yaye ngokufuthi babedla ngokusibongoza ukuba singafundi ibali elinye kuphela ngemini.” Musa ukucinga ukuba ingqondo yomntwana wakho ayikakulungeli ukufunda! Abanye abantwana abaneminyaka emine baye bafundiswa ukuzicengceleza ngokupheleleyo izahluko zencwadi Yamabali EBhayibhile yaye baye bafundiswa nokufunda iBhayibhile! Omnye oselula ukhumbula ukuba xa wayeneminyaka emithathu enesiqingatha ubudala, wayengakwazi ukulibiza kakuhle ibinzana elithi “izigqibo zesigwebo,” kodwa uyise wayemkhuthaza ukuba aqhubeke ezama.
15. Yiyiphi imibandela enokuqukwa kwiingxubusho nabantwana, yaye bubuphi ubungqina obubonisa ukuba iingxubusho ezinjalo zibalulekile?
15 Amaxesha okufundisa abantwana bakho akwanokwenziwa amathuba okubalungiselela ukuba babelane nabanye ngamanzi enyaniso, njengokugqabaza ezintlanganisweni. (Hebhere 10:24, 25) Omnye oselula ukhumbula oku: “Ebudeni bamaxesha ethu okulungiselela, kwakuye kufuneke ndigqabaze ngamazwi am. Ndandingavunyelwa ukuba ndifunde nje into endingayiqondiyo.” Ukongezelela, abantwana banokuqeqeshelwa ukuba nesabelo ngokuzeleyo kubulungiseleli basentsimini. Elinye ibhinqa elikhuliswe ngabazali aboyik’ uThixo liyachaza: “Sasingeyomisila elandela emva kwabazali bethu xa besenza umsebenzi wabo. Sasisazi ukuba sasifanele sibe nenxaxheba, enoba sasiza kunkqonkqoza size sishiye iphecana. Ngokulungiselela kakuhle ngaphambi kokuqalisa umsebenzi wangempela-veki, sasiyazi into esasiza kuyithetha. Sasingaze sivuke ngentsasa yangoMgqibelo sibuza enoba siza kuya kusini na kubulungiseleli. Sasisazi ukuba siyaya.”
16. Kutheni kubalulekile ukusiqhuba rhoqo isifundo sentsapho nabantwana?
16 Kubaluleke gqitha ukubaseza rhoqo amanzi enyaniso yeBhayibhile abantwana, nto leyo ethetha ukuba isifundo seBhayibhile sentsapho sibalulekile. Uyise wabantwana ababini uthi “eyona nto ibacaphukisayo abantwana kukuthetha uze ungenzi.” (Efese 6:4) Wathi: “Mna nenkosikazi yam sakhetha usuku nexesha saza sasiqhuba rhoqo isifundo sentsapho ngokuvisisana nolo cwangciso. Kungadlulanga xesha lide abantwana baliqhela elo lungiselelo.” Yonke loo ngqeqesho yasebusaneni ibalulekile, kanye njengokuba esinye isaci sisithi, ‘Umthi ugotywa uselula.’
17. Yintoni ebaluleke njengokondla abantwana bakho ngeenyaniso zeBhayibhile?
17 Ukondla abantwana ngeenyaniso zeBhayibhile kubalulekile, kodwa kubalulekile nokuba abazali bamisele umzekelo. Ngaba abantwana bakho bayakubona ufundisisa, usiya rhoqo kwiintlanganiso, usiba nesabelo kubulungiseleli basentsimini, ewe, uvuyiswa kukwenza ukuthanda kukaYehova? (INdumiso 40:8) Kubalulekile ukuba kube njalo. Okubangel’ umdla kukuba, enye intombazana yathetha oku ngonina, owanyamezela inkcaso yomyeni wakhe nowakhulisa abantwana abathandathu ukuba babe ngamaNgqina athembekileyo: “Eyona nto yayisichukumisa yayingumzekelo kaMama—wayengathethi aze angenzi.”
Ukukhusela Abantwana
18. (a) Abazali banokubanika njani abantwana inkuseleko abayifunayo? (b) Luhlobo luni lwemfundo eyayifunyanwa ngabantwana bakwaSirayeli ngokuphathelele amalungu omzimba okuzala?
18 Njengoko ngokufuthi amagatya efuna ukukhuselwa kwimibungu eyingozi, kule nkqubo yezinto ingendawo, abantwana bafuna ukukhuselwa ‘kubantu abangendawo.’ (2 Timoti 3:1-5, 13) Abazali banokubakhusela njani? Ngokubanceda bazuze ubulumko bobuthixo! (INtshumayeli 7:12) UYehova wayalela amaSirayeli—kuquka “nabantwana”—ukuba baphulaphule ngoxa kwakufundwa uMthetho wakhe, owawuquka ukwahlukaniswa kwehambo engokwesini efanelekileyo nengafanelekanga. (Duteronomi 31:12, akekeliswe sithi; Levitikus 18:6-24.) Akhankanywa ngokufuthi amalungu okuzala, kuquka ‘amasende’ ‘namalungu esini.’ (Levitikus 15:1-3, 16, NW; Lev 21:20; 22:24; Numeri 25:8; Duteronomi 23:10) Ngenxa yokonakala okugqithiseleyo kwehlabathi lanamhlanje, abantwana bafanele bayazi indlela efanelekileyo nengafanelekanga yokusebenzisa loo malungu omzimba ayinxalenye yendalo awathi uThixo ‘ilungile kunene.’—Genesis 1:31; 1 Korinte 12:21-24.
19. Ziintoni ekubalulekileyo ukuba abantwana bafundiswe ngazo neziphathelele amalungu abo omzimba angasese?
19 Abazali bobabini, okanye umntu ngamnye onembopheleleko yokukhulisa umntwana, ufanele amchazele umntwana ngamalungu akhe angasese. Emva koko ufanele amchazele ukuba akafanele avumele namnye umntu ukuba awachukumise la malungu. Ekubeni abantu abaxhaphaza abantwana ngokwesini ngokufuthi bevavanya indlela abasabela ngayo xa bebaphatha-phatha, umntwana ufanele afundiswe ukuba angavumi kwaphela aze athi, “Ndiza kukuxela!” Bafundise abantwana bakho ukuba ngalo lonke ixesha bafanele bamxele nawuphi na umntu ozama ukubachukumisa ngendlela abangayithandiyo, enoba uboyikisa esithini na.
Ukudlulisela Uqeqesho Ngothando
20. (a) Uqeqesho lufana njani nokuthena umthi? (b) Luba njani uqeqesho ekuqaleni, kodwa iba yintoni imiphumo?
20 Abantwana bayangenelwa kuqeqesho oludluliselwa ngothando, njengoko umthi ukhula kakuhle xa uthenwa. (IMizekeliso 1:8, 9; 4:13; 13:1) Xa amasebe amabi enqunyulwe, oko kwenza amanye akhule kakuhle. Ngoko ke ukuba abantwana bakho banikela ingqalelo kwizinto eziphathekayo okanye banengxaki yonxulumano olubi okanye yokuzonwabisa okuyingozi, izinto ezinjalo zifana namasebe afanele anqunyulwe. Ukuba uyawashenxisa, abantwana bakho baya kukwazi ukukhula ngokomoya. Ekuqaleni uqeqesho olunjalo lusenokubonakala lungekho mnandi, kanye njengokuba umthi usenokuphazamiseka xa uthenwa. Kodwa imiphumo emihle yengqeqesho iba kukukhula ngokutsha ngendlela ofuna akhule ngayo umntwana wakho.—Hebhere 12:5-11.
21, 22. (a) Yintoni ebonisa ukuba akukho mnandi ukudlulisela nokufumana uqeqesho? (b) Kutheni abazali bengafanele barhoxobise ekuqeqesheni?
21 Kuphawuleka lula ukuba akukho mnandi ukudlulisela okanye ukufumana uqeqesho. Omnye ubawo wathi: “Unyana wam wayechitha ixesha elininzi nomnye umfana abadala ababendilumkisile ngaye besithi akasosinxulumani sihle. Ngendandisabele ngokukhawuleza ngakumbi kunokuba ndenzayo. Nangona unyana wam engazange abandakanyeke kwisono esinzulu, kwathabatha ixesha ukulungisa indlela yakhe yokucinga.” Lo nyana wathi: “Xa ndahlukaniswa nomhlobo wam omkhulu, ndakhathazeka gqitha.” Kodwa wongezelela esithi: “Esi yayisisigqibo esihle, kuba kungadlulanga xesha lide wasuswa kubudlelane.”
22 ILizwi likaThixo lithi: “Ziyindlela yobomi izohlwayo eziqeqeshayo.” Ngoko enoba kunzima kangakanani na ukudlulisela uqeqesho, musa ukurhoxobisa ekuqeqesheni abantwana bakho. (IMizekeliso 6:23; 23:13; 29:17) Ekuhambeni kwexesha, baya kukubulela ngokubabuyisela endleleni. Omnye oselula ukhumbula oku: “Ndikhumbula ukuba ndandidla ngokucaphuka xa abazali bam bendiqeqesha. Ngoku ngendicaphuka ngakumbi ukuba abazali bam babengazange bandinike olo qeqesho.”
Umvuzo Ofanelwe Ngumgudu
23. Kutheni ingqalelo edluliselwa ngothando enikelwa ebantwaneni ingumgudu ofanelekileyo?
23 Ngokungathandabuzekiyo, abantwana abangumthombo wovuyo kubazali babo nakwabanye abantu babakho ngenxa yokufumana ingqalelo eqhutywa luthando imihla ngemihla. Noko ke, wonke umgudu owenziwayo ngenxa yabo—enoba baya kuba ngabantwana bokwenyama okanye bokomoya—uwufanele umvuzo onokufumaneka kamva. Umpostile uYohane owalupheleyo wakuchaza oku xa wabhala: “Akukho nobangela mkhulu ngakumbi ndinaye wokuba nombulelo kunezi zinto, zokuba ndibe ndingeva ukuba abantwana bam bayaqhubeka behamba enyanisweni.”—3 Yohane 4.
[Umbhalo osemazantsi]
a Ipapashwe yiWatchtower Bible and Tract Society of New York, Inc.
Uyakhumbula Na?
◻ Yintoni efunekayo ukuze amagatya nabantwana babe kwimeko entle?
◻ Eneneni, abazali banokuphumelela njani ekunikeleni uqeqesho?
◻ Yintoni enokuqukwa kumathuba okufundisa abantwana, yaye yintoni abafanele bafundiswe ukuyixhathisa?
◻ Uqeqesho luyingenelo njani emntwaneni, kanye njengokuba kuyingenelo ukuthena umthi?
[Inkcazelo Ngomfanekiso okwiphepha 10]
Courtesy of Green Chimney’s Farm