Isixhobo Esitsha Sokunceda Abantu Bafunde Oko Kufunwa NguThixo
“UKUBHALWA kwayo ngendlela elula, engqalileyo nethantamisayo kuya kuba nemiphumo engaphaya kwelindelweyo. Imixholo ibekwe ngendlela engantsonkothanga nemnandi kangangokuba nawuphi na umntu onyanisekileyo, ofunisayo uya kushukunyiselwa ekubeni athi, ‘Ngokwenene uThixo uphakathi kwenu.’” (1 Korinte 14:25) Watsho njalo omnye wamaNgqina kaYehova waseThailand xa wayechaza incwadana entsha enemifanekiso ethi, Yintoni UThixo Ayifunayo Kuthi? Iye yakhutshwa yiWatch Tower Society kwiiNdibano ZeSithili “Zabathunywa Boxolo Lobuthixo” ebudeni bowe-1996 nowe-1997.
Le ncwadana enemifanekiso emibalabala nenamaphepha angama-32, yenzelwe ukuqhuba izifundo zeBhayibhile. Igubungela iimfundiso ezisisiseko zeBhayibhile. Kusetyenziswe ulwimi olulula nolungqalileyo, icacisa kakuhle oko uThixo akufunayo kuthi. Abafundi abafanele babe nengxaki ekuyiqondeni. Unokusiqhuba njani isifundo seBhayibhile ngale ncwadana intsha?
Sebenzisa imibuzo. Kukho imibuzo ekuqaleni kwesifundo ngasinye. Emva kombuzo ngamnye, uya kufumana inani elingaphakathi kwezibiyeli elibonisa iziqendu ezifumaneka kuzo iimpendulo. Le mibuzo isenokusetyenziswa njengembula-mbethe ize incede ekwenzeni impinda. Ngokomzekelo, xa uqalisa isifundo seBhayibhile sekhaya, usenokubuza le mibuzo kumfundi ukuze uve amagqabaza akhe. Kunokuba umlungise ngoko nangoko kuzo naziphi na iimpendulo ezingachananga, usenokuqhubeka nesifundo. Ekupheleni kwesifundo, unokubuyela kuloo mibuzo ukuze ubone enoba umfundi uyakwazi ukuyiphendula ngokuvisisana neBhayibhile kusini na.
Hlola izibhalo. Kwisifundo ngasinye, amabinzana amafutshane eenyaniso zeBhayibhile alandelwa zizibhalo eziwaxhasayo. Ekubeni inkoliso yezibhalo ibhaliwe, ayacatshulwa, kubalulekile ukukhuthaza umfundi ukuba ahlole ezo ndinyana kweyakhe iBhayibhile. Kufuneka afunde aze acamngce ngeLizwi likaThixo ngaphambi kokuba alisebenzise ebomini bakhe.—Yoshuwa 1:8.
Balaselisa imifanekiso. Le ncwadana inemifanekiso nemizobo emininzi—engaphezu kwama-50 xa iyonke. Le mifanekiso ayilungiselelwanga ukwenza ibonakale inomtsalane kuphela kodwa ikwaluncedo ekufundiseni. Ngokomzekelo, izifundo ezibini ezisekugqibeleni (ngasinye esithabatha iphepha elinye, zikumaphepha ajongeneyo) zinomxholo othi “Ukunceda Abanye Benze Ukuthanda KukaThixo” nothi “Isigqibo Ofanele Usenze Sokukhonza UThixo.” Imifanekiso exananaze kuloo maphepha mabini ibonisa inkqubela yokomoya yomntu omnye, imbonisa enikela ubungqina obungacwangciswanga, enesabelo kumsebenzi wendlu ngendlu, ezahlulela yaye ekugqibeleni ebhaptizwa. Ngokwalathisela ingqalelo yomfundi kule mifanekiso, uyamnceda ukuze abone amanyathelo ayimfuneko ukuze akhonze uThixo.
Kuthekani ukuba umntu onomdla akakwazi kufunda kakuhle okanye akakwazi kwaukufunda oko? UMbutho wenza le ncwadana intsha ifumaneke ngekhasethi ngeelwimi eziliqela. Le khasethi iqulethe umongo wale ncwadana inemifanekiso kunye nezibhalo ezininzi ezicatshuliweyo. Ishicilelwe ngolu hlobo: Kufundwa umbuzo wokuqala, kulandele ukufundwa kwesiqendu (okanye iziqendu) eziwuphendulayo, kunye nezinye izibhalo ezicatshuliweyo. Emva koko kufundwa umbuzo olandelayo, kulandele umongo nezibhalo eziwuphendulayo, njalo njalo. Umfundi unokuphulaphula le khasethi ngoxa elungiselela isifundo. Le khasethi ikwanokusetyenziswa xa kuqhutywa isifundo.
Abo babezile endibanweni babezimisele ukuyisebenzisa le ncwadana inemifanekiso intsha kubulungiseleli basentsimini. Ngokomzekelo, emva kweentsuku ezimbalwa befumene le ncwadana inemifanekiso, oovulindlela ababini (abahambisi bevangeli bexesha elizeleyo) baseUnited States bayihambisa kwisibini esiselula ababeman’ ukusityelela. Xa esi sibini sahlola iziqulatho, ingqalelo yaso yatsalwa sisifundo esinomxholo othi “Izenzo Azithiyileyo UThixo.” Eli bhinqa liselula lathi: “Bendisoloko ndifundiswa ukuba uThixo akanakuze athiye nto—uluthando wonke. Ndiza kufunda sona kuqala.” Xa aba vulindlela babini babuyela kwiveki elandelayo, elo bhinqa liselula lathi: “Bendifunda le ncwadana inemifanekiso intsha. Kunzima gqitha ukwenza zonke izinto ethi sifanele sizenze. UYehova akakholiswa sithi—asitshatanga. Kodwa senze isigqibo. Senze amalungiselelo okuba sitshate kuLwesihlanu ozayo.” Besanga isibini esingoovulindlela, bongezelela besithi: “Siyaxolisa ngokungabi nesifundo esithe rhoqo, kodwa oku kusizisele isiqabu.”
Ngandlela zonke, yisebenzise le ncwadana entsha enemifanekiso ethi Okufunwa NguThixo. Isisixhobo esihle sokunceda abanye baqonde oko uThixo akufunayo.
[Pictured On Page 17]
Uza kuyisebenzisa njani incwadana entsha enemifanekiso?