Isigqibo Sethu—Sokuzabalazela Ukuphila Ngendlela KaYehova
1 Imbalasane zeendibano ‘Zokuphila Ngendlela KaThixo’ sisigqibo esamkelwayo kwintetho yokuqukumbela. Yaqala ngesindululo esithi: “Thina . . . ngeentliziyo ezipheleleyo siyavuma ukuba indlela kaThixo kuphela kwendlela yokuphila.” Khumbula iingongoma ezibalaseleyo zesosigqibo esathi kuso, “EWE!”
2 Sisigqibo sethu ukuba sihlale sicocekile phambi koYehova, singenabala ehlabathini. Siya kuqhubeka sikubeka kuqala ukuthanda kukaThixo ebomini bethu. Sisebenzisa iLizwi lakhe, iBhayibhile, njengokhokelo lwethu, asisayi kuphambukela ngasekunene okanye ngasekhohlo, ngaloo ndlela siqinisekisa ukuba indlela kaThixo yokuphila iyigqwesa lee indlela yehlabathi.
3 Ihlabathi ngokubanzi alikunanzanga ukuphila ngendlela kaThixo yaye livuna imiphumo. (Yer. 10:23) Ngoko ke simele siqhubeke sifundiswa nguMyaleli wethu Ozukileyo, uYehova, othi: “Nantsi indlela; hambani ngayo.” (Isa. 30:21) Ukuphila ngendlela kaYehova, njengoko yandlalwe eZibhalweni, igqwesa kuzo zonke iinkalo. Ukuze sizabalazele ukuphila ngaloo ndlela, kufuneka sikusebenzise konke uYehova asifundisa kona.
4 Ucwangciso Olugqwesileyo LukaYehova Lokufundisa: UYehova usifundisa injongo yokwenene yobomi neyona ndlela isemagqabini yokusebenzisa ubomi bethu. Usifundisa indlela yokuphucula ubomi bethu ngokwasengqondweni, ngokwemilinganiselo yokuziphatha, nangokomoya. Usifundisa indlela yokuphila ngoxolo nabazalwana bethu, neentsapho zethu, nabamelwane bethu. Oku ukwenza ngencwadi yakhe yesikhokelo, iBhayibhile, nangentlangano yakhe.
5 Iintlanganiso zethu zebandla zibaluleke kakhulu kule nkalo. Njengokuba sisibakho rhoqo yaye sisiba nenxaxheba kuzo zontlanu ezi ntlanganiso, sifumana uqeqesho olusemagqabini njengabalungiseleli beendaba ezilungileyo nemfundo elungeleleneyo yokuphila kwamaKristu. (2 Tim. 3:16, 17) UMyaleli wethu Ozukileyo ulungiselela imfundo engakumbi ngeendibano ezincinane nezinkulu. Usukelo lwethu kukungaze siphoswe yintlanganiso okanye lucwangciso ukuba impilo neemeko zethu ziyasivumela ukuba sibekho.
6 Kwanga singaqhubeka sizabalazela ukuphila ngendlela kaThixo kule mihla isaseleyo, ukuze kudunyiswe uYehova size nathi sizuze ngonaphakade!—Isa. 48:17.