Intsikelelo KaYehova Iyasityebisa
1 Impumelelo yomntu idla ngokujongwa ngobungakanani bemali ayamkelayo. Kungenxa yoko lento abantu abaninzi bebajonga abo banemali njengabona bantu bonwabileyo nabonelisekileyo. Noko ke, abantu abavakalelwa kukuba imali ingathenga ulonwabo bayaphazama. (INtshu. 5:12) Alukho ulonwabo oluhlala luhleli kwabo “bazimisele ukuba zizityebi” ngezinto eziphathekayo. (1 Tim. 6:9) Ngokwahlukileyo koko, abakhonzi bakaYehova bavuya ngokwenene kwaye bangabona bantu bazizityebi kweli hlabathi. (IMize. 10:22; ISityhi. 2:9) Yenzeka njani loo nto?
2 Ubungqina Bobutyebi Bethu: Sinobutyebi bokuqonda izinto zokomoya neLizwi likaThixo, iBhayibhile. Ngentlangano yakhe yasemhlabeni, uYehova usifundisa ngaye noNyana wakhe ngokuqhubekayo, ukuze singenelwe ngokungenasiphelo. Ukuqonda okuchanileyo kusenza sikwazi ukusondela kuYehova size sinandiphe ulwalamano olusenyongweni naye. (Yak. 4:8) Siqonde phakathi kokulungileyo nokubi, ukulandela imithetho kaThixo kuyasikhusela kwizifo ezithile nakwiingozi. Sinentembelo yokuba uYehova uya kusilungiselela, oko kuphumela kulwaneliseko lobuthixo nakuxolo lwengqondo.—Mat. 6:33.
3 Sinandipha uxolo nomanyano nabazalwana bethu bokomoya kuba sihlakulela isiqhamo somoya kaThixo. Simanyaniswe liqhina elomeleleyo lothando, asifanele kukuvakalelwa kukuba sishiyiwe nguThixo okanye ngabazalwana bethu ngamaxesha eentlekele.—Gal. 6:10.
4 Ubomi bethu bunenjongo nentsingiselo yokwenene. Siligqala ililungelo elikhulu ukuba nesabelo ekushumayeleni iindaba ezilungileyo ehlabathini lonke. Oku kuzisa uvuyo oluhlala luhleli njengokuba sinceda abanye ukuba babe nolwalamano oluhle noThixo baze bakhonze nathi ngokumanyeneyo kunqulo olunyulu. Ubutyebi bethu bobulungiseleli obungenakulinganiswa nanto buzisa uzuko kuYehova buze businike ulwaneliseko lokuba negalelo ekungcwalisweni kwegama lakhe. Sinesimo sengqondo esihle, kuba siyazi ukuba ithemba lethu ngekamva liza kuzalisekiswa kungekudala.
5 Ukubonisa Uxabiso Lwethu: Ngamana singasoloko sinoxabiso ngeentsikelelo zikaYehova, ezisenza sibe ngabona bantu bazizityebi emhlabeni. (IMize. 22:4) Ukuba nexesha lokucamngca suku ngalunye ngezinto esinazo kusishukumisela ukuba simbulele uYehova ngothando lwakhe lwesisa nokuba siqhubeke sizinikela kuye ngokupheleleyo.