Sebenzisa Iziganeko Zakutshanje Ukuze Uvuse Umdla
1 Ngaba ubungathanda ukuba nezimvo eziya kubenza ubulungiseleli bakho bube mnandi yaye buvuse umdla wabantu kwisigidimi seBhayibhile? Sebenzisa oko kwenzekayo ehlabathini nakwindawo ohlala kuyo ukuze uqalise iincoko. Unokusebenzisa iziganeko zasekuhlaleni nezelizwe lakho okanye ezenzeka kwamanye amazwe. Ezi zinto zitshintsha umhla nezolo. (1 Kor. 7:31) Khawuqwalasele le mizekelo ilandelayo.
2 Iingxaki zezoqoqosho neendleko zokuphila zizinto ezibaxhalabisa ngokwenene abantu. Ngaloo ndlela, unokuthi:
◼ “Ngaba uvile ezindabeni ukuba amaxabiso [khankanya loo nto] aza kunyuka kwakhona?” Okanye ungathetha ngokungaqeshwa kwabantu ukuba kwinkampani ethile enkulu kuye kwakhethwa abasebenzi abaninzi. Kuxhomekeka kwindlela ofuna ukuyiqhuba ngayo loo ngxubusho, usenokuqhubeka ubuze uthi “Ngaba wakha wazibuza ngesizathu sokuba kube nzima kangaka ukuphila”? okanye “Ngaba ucinga ukuba kuya kusoloko kunzima ukuphila?”
3 Iingxelo zogonyamelo ezinjengoqhushululu lwentsapho okanye lwabafundi, zisinika enye indlela yokuqalisa ingxubusho. Usenokubuza:
◼ “Ngaba ubukhe wafunda kwiphephandaba ukuba [chaza isiganeko sasekuhlaleni]?” Wandule ke ubuze uthi “Ucinga ukuba yintoni unobangela wogonyamelo olungaka ehlabathini?”okanye “Ngaba ucinga ukuba liya kuze lifike ixesha lokuba sizive sikhuselekile?”
4 Iindaba ezingemikhukhula etshabalalisayo, iinyikima zomhlaba, okanye ukungazinzi kwabantu kwiindawo ezahlukeneyo zomhlaba nako ngumbandela ovusa umdla. Ngokomzekelo, usenokubuza:
◼ “Ingaba uThixo ngunobangela [chaza intlekele yemvelo]?” Okanye unokwalatha kwisiganeko sakutshanje soqhushululu lwasekuhlaleni uze uthi: “Ukuba wonke umntu ufuna uxolo, kutheni kunzima kangaka ukulufumana?”
5 Ziphaphele iziganeko zakutshanje onokuzisebenzisa kwintshayelelo yakho. Amacebiso aluncedo afumaneka ngaphantsi komxholo othi “Iziganeko Ezikhoyo,” kwiphepha 11-12, kwincwadi ethi Ukuqiqa. Noko ke, kuphephe ukuthabatha icala kwiimbambano zobupolitika okanye ezentlalo. Kunoko, tsalela ingqalelo eZibhalweni nakuBukumkani bukaThixo njengobukuphela kwesicombululo esisisigxina kwiingxaki zoluntu.