Yenza Okulungileyo!

¹ Njengoko sikwixesha leSikhumbuzo sowama-2003, sinezizathu ezininzi ‘zokwenza okulungileyo.’ (1 Pet. 3:13) Esona sizathu sibalulekileyo kwezi lidini lentlawulelo likaYesu Kristu. (Mat. 20:28; Yoh. 3:16) Ethetha ngalo, umpostile uPetros wabhala wenjenje: “Niyazi ukuba anihlangulwanga ngezinto ezinokonakala, njengesilivere okanye igolide, kwihambo yenu engenasiqhamo. . . . Kodwa kwakungegazi elixabisekileyo, njengelo lemvana engenasiphako nengenabala, elikaKristu kanye.” (1 Pet. 1:18, 19) Umbulelo esinawo ngolu thando lungenakuthelekiswa nanto usibangela ukuba sixakeke ekwenzeni okulungileyo, siqonda ukuba uYesu ‘wazinikela ngenxa yethu ukuze asihlangule kulo lonke uhlobo lokuchasa umthetho aze azihlambululele isizwana esisesakhe ngokukhethekileyo, esizondelela imisebenzi emihle.’—Tito 2:14; 2 Kor. 5:14, 15.

² Ukuba siyamkholisa uThixo, siba nolwalamano oluhle naye aze amehlo akhe ahlale ephezu kwethu. UPetros wongezelela ngelithi: “Lowo uthanda ubomi nokubona imihla elungileyo, . . . makakhwebuke kokubi, enze okulungileyo; makafune uxolo, aluphuthume. Kuba amehlo kaYehova aphezu kwabo bangamalungisa, neendlebe zakhe zisingisele esikhungweni sabo.” (1 Pet. 3:10-12) Hayi indlela ekuyintsikelelo ngayo ukwazi ukuba amehlo kaYehova ahlala ephezu kwethu yaye ukulungele ukusikhusela ‘nokusilondoloza njengokhozo lweliso lakhe’ kula maxesha ayingozi.—Dut. 32:10; 2 Kron. 16:9.

³ Nangona ayejamelene nezilingo, amaKristu enkulungwane yokuqala awayebhalelwe nguPetros ayesitsha ziintambo, yaye azivakalisa iindaba ezilungileyo ngomkhamo omkhulu. (1 Pet. 1:6; 4:12) Kunjalo nakubantu bakaThixo abaphila kweli xesha. Nangona siphila ‘kumaxesha amanqam ekunzima ukujamelana nawo,’ ukuba noxabiso ngokulunga kukaYehova kusibangela ukuba senze ukuthanda kukaThixo ngenzondelelo. (2 Tim. 3:1; INdu. 145:7) Makhe siqwalasele eminye imisebenzi emihle esiza kuxakeka yiyo kweli xesha leSikhumbuzo.

⁴ Memela Abanye KwiSikhumbuzo: Ekuphela kwendlela esinokubonisa ngayo umbulelo esinawo ngesipho sedini esingenakulinganiswa nanto kukubakho kwiSikhumbuzo saminyaka le sokufa kukaYesu, esiya kuba ngoLwesithathu, Aprili 16, emva kokutshona kwelanga. (Luka 22:19, 20) Kulo nyaka uphelileyo, kumabandla angama-94 600 asehlabathini lonke, bekukho isimbuku sabali-15 597 746! Bebengaphezulu ngama-220 000 kwabo bebekho kunyaka ongaphambi kwalowo.

⁵ Bangaphi abaza kubakho kulo nyaka? Kuya kuxhomekeka ekuzibhokoxeni kwethu sikhuthaza abanye ukuba basithelele. Qala ngokwenza uludwe lwabo bonke ofuna ukubamema. Umele uqale ngamalungu entsapho yakho. Ukuba iqabane lakho alikholwa, lichazele indlela obunokuvuya ngayo xa ninokuhamba kunye. Omnye umyeni ongakholwayo wathi uye waya kwiSikhumbuzo salo nyaka uphelileyo kuba wabona indlela umfazi wakhe awayeza kubuxabisa ngayo ubukho bakhe. Kuludwe lwakho kufanele kulandele izalamane, abamelwane, abantu osebenza kunye nabo okanye ofunda nabo. Qiniseka ngokumema izifundo zakho zeBhayibhile.

⁶ Emva kokuba uzenzele uludwe lwabantu oza kubamema, zibekele ixesha oza kuya ngalo kuye ngamnye. Sebenzisa izimemo zeSikhumbuzo ezishicilelweyo. Ukuze abantu bakhumbule ixesha kunye nendawo esiza kuqhutyelwa kuyo iSikhumbuzo, yibhale kumazantsi ephepha lesimemo loo nkcazelo. Xa kusondela uAprili 16, khumbuza abo ubamemileyo, ngokuya kubo okanye ngomnxeba. Masincede abaninzi kangangoko kunokwenzeka ukuba babekho kwesi sihlandlo sisesona singcwele.

⁷ Nceda Abo Bezileyo ESikhumbuzweni: Ubusuku beSikhumbuzo busoloko busisihlandlo esichulumancisayo. Siba nelungelo lokwamkela abantu abangaqhelanga ukuza kwiintlanganiso. Lungiselela ukufika kuselithuba uze ungangxameli ukugoduka, ukuba iimeko zasekuhlaleni ziyavuma. Musa ukulindela ukuba abo batsha bezileyo beze kuzazisa kuwe. Yiba nobuhlobo uze ube nobubele.—Rom. 12:13.

⁸ Ngaba kunokuncedwa abaninzi abezileyo eSikhumbuzweni ukuba benze inkqubela engakumbi ngokomoya ngokuqhutyelwa isifundo seBhayibhile? Zabalazela ukufumana amagama needilesi zabo nabaphi na abaziindwendwe abangenamntu ubatyelelayo ukuze ubancede. Ngoncedo olwenziwa ngothando, bambi kwaba basenokwenza inkqubela ukusa kwinqanaba lokuba bakufanelekele ukuba ngabavakalisi abangabhaptizwanga ngaphambi kokufika kwexesha leSikhumbuzo sonyaka ozayo. Xa ubuyela abo bebeze eSikhumbuzweni, bamemele intetho ekhethekileyo eya kuba ngoAprili 27.

⁹ Ngaba Unokuba Nguvulindlela Ongumncedani Kulo Nyaka? Nyaka ngamnye inzondelelo esinayo ngoYehova isishukumisela ukuba sizibhokoxe kubulungiseleli kwiinyanga zomsebenzi wobuthixo okhethekileyo. NgoMatshi nangoAprili 2002, apha eMzantsi Afrika nakumazwe aphantsi kwesebe lethu bekukho oovulindlela abali-14 186. Eli nani aliyoncopho nje kodwa libonisa umgudu omanyeneyo wenzondelelo anawo onke amabandla ekushumayeleni iindaba ezilungileyo kwixesha leSikhumbuzo.

¹⁰ Elinye ibandla elinabavakalisi abali-107 noovulindlela abali-9 lanikela ingxelo yokuba uAprili wonyaka odluleyo ‘ibiyinyanga ebalaseleyo’ kulo, kuba belinoovulindlela abangabancedani abangama-53, kuquka nabadala kunye nezicaka zolungiselelo. Abadala benza njani ukuze abantu babe nomdla wokuba ngoovulindlela abangabancedani kuloo nyanga? Baqalisa kuselithuba ukukhuthaza abaninzi kangangoko kunokwenzeka ukuba babhalise njengoovulindlela. Iintlanganiso zenkonzo yasentsimini zaziqhutywa ngamaxesha awahlukeneyo ngosuku ukuze bonke abasebandleni babe nenxaxheba. Ukushumayela ngomnxeba kwagxininiswa ngokukhethekileyo, ngokukodwa kwabo baneziphene.

¹¹ Omnye udade oneminyaka engama-86 ubudala ongakwaziyo ukuhamba ngenxa yeengxaki zempilo wabhalisa njengovulindlela ongumncedani. Eqalisa kwakusasa, wayesebenza iiyure ezininzi eshumayela ngomnxeba ngoxa ehleli ekhitshini, wayephumla iiyure ezimbalwa, aze abuye enze ezingakumbi. Omnye umntu awathetha naye wayefelwe ngumyeni kunye noonyana bakhe ababini abakwishumi elivisayo kwiminyaka emibini edluleyo yaye wayengasiqondi isizathu sokuba uThixo avumele izinto ezimbi ngolo hlobo ukuba zenzeke. Washumayela ngokucokisekileyo, waza waqalisa isifundo seBhayibhile. Ukushumayela ngomnxeba ngamarhatya nangamanye amaxesha yindlela ephumelelayo yokuthetha nabantu abahlala kwizakhiwo okanye kwimimandla ekunzima ukungena kuyo. Kwakhona kubangela ukuba abavakalisi bakwazi ukuthetha nabantu abangafumanekiyo emakhaya ebudeni bemini.

¹² Aba badala baqukumbela ingxelo yabo ngala mazwi: “Sibe nethuba elichulumancisa ngokwenene yaye siyawaxabisa amalungelo kunye neentsikelelo uYehova azinike ngamnye wethu.” Ukuba ibandla lakho licebe kakuhle, nalo linokunandipha iintsikelelo ezinjalo.

¹³ Zabalazela Ukuba Nenxaxheba Ngokupheleleyo Kubulungiseleli: Indlela esimthanda ngayo uThixo nabamelwane bethu isibangela ukuba nyanga nganye sizithengele ixesha lokwabelana nabanye ngeendaba ezilungileyo. (Mat. 22:37-39) Abaveleli beSifundo Sencwadi Sebandla kunye namasekela abo bafanele bazabalazele ukunceda abo bakumaqela abo ukuba babe nenxaxheba kubulungiseleli nyanga nganye. Eyona ndlela ilungileyo abangakwenza ngayo oku kukwenza amalungiselelo okusebenza nabantu abathile abakumaqela abo entsimini kuselithuba. Kunokulinda de kuphele inyanga ngaphambi kokuba nikwenze oku, qalisani kuselithuba. Oku kuya kunivulela amathuba angakumbi okunikela uncedo ngothando.

¹⁴ Ngaba kukho abavakalisi abaneziphene kwiqela lakho lesifundo sencwadi ekunzima ukuba babe nenxaxheba kwinkonzo yasentsimini? Ukuba abathile kubo bahlala kumakhaya okunyamekela abagulayo okanye abakwazi ukuphuma emakhayeni abo, kuyaqondakala ukuba amathuba abanawo okuya kushumayela alinganiselwe. Kodwa ukuba loo mathuba abo alinganiselweyo asetyenziswa kakuhle ukuze bakhanyise ukhanyiselo lwabo, basenokukhuthaza abo babona imisebenzi yabo emihle ukuba babe nomdla enyanisweni. (Mat. 5:16) Abaveleli besifundo sencwadi bafanele baqiniseke ukuba abantu abanjalo bayazi ukuba banokuyifaka ingxelo yomsebenzi wabo wokushumayela yemizuzu eli-15. Xa aba bavakalisi bathembekileyo bekwazi ukunikela ingxelo yexesha abashumayele ngalo bayakhuthazeka yaye bafumane uvuyo nolwaneliseko. Kwakhona oku kunceda ekubeni kuqinisekiswe ukuba ingxelo yehlabathi lonke yomsebenzi wabantu bakaThixo ichanile.

¹⁵ Ulutsha Oluxakekileyo Lusenza Okulungileyo! Hayi indlela ekuhlaziya ngayo ukuba ulutsha olungamaKristu lusebenzise amandla alo kwinkonzo kaYehova! (IMize. 20:29) Ukuba uselula, unokuyibonisa njani inzondelelo onayo ngoYehova kwezi nyanga zikhethekileyo?

¹⁶ Ukuba akukabi ngumvakalisi ongabhaptizwanga ebandleni, ngaba unokulizabalazela elo lungelo? Zibuze le mibuzo ilandelayo: ‘Ngaba ndiyazazi iinyaniso zeBhayibhile ezisisiseko? Ngaba ndiyafuna ukuba nesabelo kwinkonzo yoBukumkani? Ngaba ihambo yam ingumzekelo? Ngaba ndiyakwazi ukuluvakalisa ngokobuqu ukholo lwam ngokuthetha nabanye ngeendaba ezilungileyo? Ngaba intliziyo yam indishukumisela ukuba ndenjenjalo?’ Ukuba loo mibuzo unokuyiphendula ngokuthi ewe, xelela abazali bakho ngomnqweno onawo wokuba ngumvakalisi. Abazali bakho banokuthetha nomnye wabadala abakwikomiti yenkonzo.

¹⁷ Ukuba sele ungumvakalisi weendaba ezilungileyo, ngaba unokusebenzisa ithuba laxa izikolo zivaliwe ukuze wandise isabelo sakho kubulungiseleli? Ngenxa yokucwangcisa kakuhle nangokuncedwa ngabazali nangabanye, ulutsha oluninzi olubhaptiziweyo luye lwakwazi ukuba ngoovulindlela abangabancedani. Ukuba oko akunakwenzeka, zimisele ukwandisa isabelo sakho entsimini. Zibekele usukelo. Ukongezelela kusukelo onalo lokusebenza iiyure ezithile entsimini, zibekele olunye usukelo lomgangatho wakho wokushumayela. Mhlawumbi unokuzabalazela ukufunda umbhalo kwindlu nganye ongena kuyo, uphucule umgangatho wakho ekwenzeni amabuyelo, uqalise isifundo seBhayibhile, okanye wandise ubulungiseleli bakho ngokushumayela ngomnxeba okanye ngezinye iindlela zokushumayela. Kuthekani ngosukelo lokumemela ummelwane, lowo ufunda naye, okanye isalamane kwiSikhumbuzo salo nyaka? Uya kuvuzwa ngokuba nesabelo ngokuzeleyo kwimisebenzi yobuthixo yaye ngokuqinisekileyo uya kubakhuthaza nabanye ebandleni.—1 Tes. 5:11.

¹⁸ Nceda Abasebatsha Benze Inkqubela: Kulo nyaka udlulileyo wenkonzo, eMzantsi Afrika, eBotswana, eLesotho, eNamibia, eSt Helena naseSwazini kuye kwaqhutywa izifundo zeBhayibhile ezikumlinganiselo wama-90 000. Ekuhambeni kwexesha, uninzi lwaba bafundi luya kwenza inkqubela de lufikelele kwinqanaba lokuba luzahlulele luze lubhaptizwe. Noko ke, ngaphambi kokuba lufikelele olo sukelo, kufuneka siluncede ukuze lufaneleke njengabavakalisi beendaba ezilungileyo. Eli linyathelo elibalulekileyo lokufundisa abasebatsha ukuba babe ngabalandeli bakaYesu Kristu. (Mat. 9:9; Luka 6:40) Ngaba unaye umntu omfundela iBhayibhile osele ekulungele ukuthabatha elo nyathelo?

¹⁹ Ukuba akuqinisekanga ngenkqubela yalowo umfundelayo, cela uncedo lomveleli wesifundo sencwadi okuso okanye lomveleli wenkonzo. Mhlawumbi unokumcela ukuba ahambe nawe xa usiya kuso. Aba bazalwana banamava anokusetyenziswa ukuze kuqondwe inkqubela yokomoya yomfundi. Basenokunikela amacebiso aya kunceda umfundi lowo ukuba aqhubeke esenza inkqubela ngokomoya.

²⁰ Xa lowo umfundelayo esiba nomdla wokuba ngumvakalisi ongabhaptizwanga yaye umbona ukuba uqinisekile ukuba uyafaneleka, thetha nomveleli owongamelayo. Uya kulungiselela ukuba wena kunye nomfundi lowo nidibane nabadala ababini ukuze baqonde ukuba uyafaneleka ngokwenene na, besebenzisa inkcazelo ekwincwadi ethi Ubulungiseleli Bethu, iphepha 98-9. (Bona IMboniselo kaNovemba 15, 1988, iphepha 17.) Ukuba umfundi uye wanconyelwa njengomvakalisi, ufanele uqalise ukumqeqesha ngoko nangoko. Akuba efake ingxelo yakhe yasentsimini, uya kwaziswa ebandleni njengomvakalisi ongabhaptizwanga. Sinethemba lokuba amawaka abavakalisi abatsha, abadala nabancinane, anokuzabalazela ukufikelela eli nyathelo libalulekileyo kwezi nyanga zimbini zikhethekileyo zenkonzo.

²¹ Ukuceba Kuyanceda Ukuze Ufeze Okulungileyo: Ukuceba kusengaphambili kuya kufak’ isandla kwimpumelelo yomsebenzi wethu wobuthixo kweli xesha leSikhumbuzo. (IMize. 21:5) Zininzi izinto ezifuna ingqalelo yabadala.

²² Ukuze bancede ibandla lifeze okuninzi ngakumbi entsimini, abadala bafanele benze amalungiselelo aya kusebenziseka eentlanganiso zenkonzo yasentsimini eziya kuqhutywa iveki yonke nangeempela-veki. Umveleli wenkonzo ufanele akhokele ekwenzeni la malungiselelo. Ngaba kunokulungiselelwa iintlanganiso ezongezelelekileyo eziya kuba sekuseni kakhulu, emva kwemini okanye ngorhatya? La malungiselelo afanele aziswe ebandleni. Kuya kuba kuhle ukuba olo cwangciso lubekwe kwibhodi yezaziso.

²³ Abadala bafanele baqiniseke ukuba amalungiselelo eSikhumbuzo bawazisa kuselithuba ngaphambi kuka-Aprili 16. Oku kuquka ukusebenzisa iHolo yoBukumkani namanye amabandla aza kuyisebenzisa, ukucoca iHolo yoBukumkani, ukukhetha abalindi nabo baza kuhambisa imifuziselo, nendlela yokufumana imifuziselo. Ibandla lifanele laziswe ngexesha nendawo esiza kuba kuyo iSikhumbuzo kunye naluphi na uhlengahlengiso olwenziweyo kucwangciso lweentlanganiso zeveki. Ukuzenza ngenkuthalo ezi zinto kuya kubangela ukuba iSikhumbuzo ‘senzeke ngokundilisekileyo nangolungelelwano.’—1 Kor. 14:40.

²⁴ Iintloko-ntsapho zisenokusebenzisa inxalenye yexesha lesifundo sentsapho ukuze kuxutyushwe indlela intsapho enokuba nesabelo ngayo kumsebenzi owandisiweyo wexesha leSikhumbuzo. Ngaba nonke kwintsapho yakho ninokuba ngoovulindlela abangabancedani? Okanye ngaba intsapho inokulixhasa ilungu elinye okanye amabini ekubeni ngoovulindlela? Ukuba akunakwenzeka oko, zimiseleni usukelo olukhethekileyo lokusebenza ixesha elingakumbi entsimini njengentsapho. Ngaba kukho ilungu lentsapho eliselula eliye lakhuthazwa laza lancedwa ukuze likufanelekele ukuba ngumvakalisi ongabhaptizwanga? Intsapho yakho inokumema abantu abangaphi ukuba beze eSikhumbuzweni kulo nyaka? Ukuceba kakuhle kuya kuyizisela iintsikelelo novuyo olungakumbi intsapho yakho.

²⁵ Lisebenzise Ngokuzeleyo Eli Xesha Lisaseleyo: UPetros wabhalela amaKristu enkulungwane yokuqala ewakhumbuza ngokungxamiseka kwamaxesha kuba isiphelo senkqubo yezinto yamaYuda sasisemnyango. (1 Pet. 4:7) Namhlanje bonke ubungqina bubonisa ukuba ixesha lale nkqubo yehlabathi yezinto lixhatshwe yinja. Suku ngalinye, indlela esibuphila ngayo ubomi ifanele ibonise ukuba siyakukholelwa oko. Njengabakhonzi bakaYehova abanenzondelelo, sifanele sitsolise amehlo ethu ekungxamisekeni komsebenzi wokuvakalisa iindaba ezilungileyo.—Tito 2:13, 14.

²⁶ Ngoku lixesha lokuba sibe nenzondelelo size sifikelele esenzweni! Camngca ngoko uYehova akwenzele kona wena, intsapho yakho, kunye nebandla. Nangona singenakukwazi ukubuyisela uYehova ngezinto ezininzi asenzele zona, sinokumnqula ngeentliziyo ezipheleleyo. (INdu. 116:12-14) Ukuzibhokoxa kwethu kuya kuvuzwa ngeentsikelelo ezivela kophezulu. (IMize. 10:22) Ngamana sonke ‘singenza okulungileyo’ kweli xesha likhethekileyo lomsebenzi owandisiweyo, “ukuze kuzo zonke izinto uThixo azukiswe ngoYesu Kristu.”—1 Pet. 3:13; 4:11.

[Ibhokisi ekwiphepha 3]

Abezileyo KwiSikhumbuzo Ehlabathini Lonke

Ngowe-1999 14 088 751

Ngowama-2000 14 872 086

Ngowama-2001 15 374 986

Ngowama-2002 15 597 746

[Ibhokisi ekwiphepha 4]

Ngubani Oya Kummemela ESikhumbuzweni?

□ Intsapho esondeleyo nezalamane

□ Abamelwane nezihlobo

□ Abo usebenza nabo kunye nabo ufunda nabo

□ Amabuyelo nezifundo zeBhayibhile

[Ibhokisi ekwiphepha 5]

Nceda Abezileyo ESikhumbuzweni

□ Bamkele ngokufudumeleyo

□ Buyela kubo

□ Cela ukubaqhubela isifundo seBhayibhile

□ Bamemele intetho ekhethekileyo

[Ibhokisi ekwiphepha 6]

Luyintoni Usukelo Lwakho Kweli Xesha LeSikhumbuzo?

□ Kukumema othile ukuba abekho eSikhumbuzweni

□ Kukufanelekela ukuba ngumvakalisi weendaba ezilungileyo

□ Kukusebenza iiyure ezithile entsimini

□ Kukuphucula kwinkalo ethile entsimini

□ Kukuba nguvulindlela ongumncedani