Qhubeka Uxela Imisebenzi KaYehova Emangalisayo

1. Yiyiphi imisebenzi kaYehova emangalisayo oyixabisa ngokukhethekileyo?

¹ Akukho namnye onokuthelekiswa noThixo wethu omkhulu uYehova! UDavide wabhala wenjenje: “Zininzi izinto ozenzileyo, Owu Yehova Thixo wam, kwanemisebenzi yakho emangalisayo neengcamango zakho kuthi; akukho namnye onokuthelekiswa nawe.” (INdu. 40:5) Imisebenzi kaYehova emangalisayo iquka indalo yakhe, uBukumkani obungoMesiya, ububele bothando abenzela abantu bakhe, nomsebenzi wokushumayela owenziwa ehlabathini lonke. (INdu. 17:7, 8; 139:14; Dan. 2:44; Mat. 24:14) Ukuthanda uYehova nokuba noxabiso ngazo zonke izinto azenzileyo kusibangela ukuba sixelele abanye ngaye. (INdu. 145: 5-7) NgoMatshi, ngoAprili nangoMeyi siza kukwenza ngokuphelele ngakumbi oku. Ekubeni uMatshi noAprili iziinyanga ezineentsuku ezininzi, ngokukodwa uMatshi, kwiminyaka embalwa edluleyo abaninzi baye baba ngoovulindlela abangabancedani. Kulo nyaka sineempela-veki ezintlanu ngoMeyi, nto leyo eya kuba luncedo kwabo bafumana ixesha lokuya entsimini ngeempela-veki.

2. Singenelwa njani xa singoovulindlela abangabancedani?

² Njengovulindlela Ongumncedani: Ngaba unokuzenzela ucwangciso lokuba sentsimini iiyure ezingama-50 kwinyanga enye okanye ezingakumbi kwezi zomsebenzi okhethekileyo? Ngokuqinisekileyo kuza kufuneka uhlengahlengise izinto oqhele ukuzenza. (Efe. 5:16) Abaninzi bafumanise ukuba, ukuba ngoovulindlela abangabancedani kuyabanceda baphucule entsimini. Bayakhululeka xa bethetha nabaninimzi yaye bafumana ixesha elingakumbi lokusebenzisa iBhayibhile. Kuba lula ukulandela abanomdla ngenxa yokuba banexesha elininzi entsimini, yaye abanye abebengenazo izifundo zeBhayibhile baye baqalisa ukuqhuba izifundo ngoxa bengoovulindlela abangabancedani. Ukuba nguvulindlela ongumncedani kuyavuyisa kuba kubangela ukuba senze umgudu wokunceda abanye.—IZe. 20:35.

3. Abanye baye bakwazi njani ukuba ngoovulindlela abangabancedani nakuba beneengxaki?

³ Ungakhawulezi ugqibe kwelokuba iimeko zakho azikuvumeli ukuba ube nguvulindlela ongumncedani. Omnye umdala obenguvulindlela ongumncedani kulo nyaka uphelileyo unabantwana ababini yaye usebenza ixesha elizeleyo. Lo mzalwana uxakeke ngolu hlobo uye wenza njani? Ekubeni esebenza phakathi evekini, wazenzela ucwangciso lokuba ngeempela-veki achithe ixesha elide entsimini, wayeqala kumsebenzi wamaphephancwadi ngeye-7:00 kusasa ngeMigqibelo. Abaninzi ebandleni ababekwimeko efanayo nabo baba ngoovulindlela, yaye bebekhuthazana. Kwelinye ibandla, udade oneminyaka engama-99 ubudala wagqiba kwelokuba abe nguvulindlela ngoMeyi emva kokuba ecelwe yintombi yakhe ukuba aze kusebenza nayo. Lo dade wayencedwa ngabanye ebandleni ngokumqhuba ngesitulo sakhe sabagulayo xa esiya kwindlu ngendlu nasezifundweni. Wayeshumayela nangomnxeba, esiya kumsebenzi wamaphephancwadi yaye eshumayela ngokubhala iileta. Weyisekile kukuba oku wayengakwenzi ngamandla akhe kodwa kwakungoncedo lukaYehova.—Isa. 40:29-31.

4. Ziziphi izinto esimele sicinge ngazo xa sizenzela ucwangciso lokuba ngoovulindlela abangabancedani?

⁴ Zama ukubhala phantsi ucwangciso oluvumelana neemeko zakho. Ucwangciso olungumzekelo olukule nkupho lunokukunceda. Ngaba usebenza ixesha elizeleyo okanye usesikolweni? Ukuzenzela ucwangciso lokuba sentsimini ngeempela-veki kuya kukulungela ngakumbi. Ukuba ukhathazwa yimpilo yaye akunakukwazi ukuba sentsimini ixesha elide, ukuzenzela ucwangciso lokuba sentsimini ixesha nje elincinane kulunge ngakumbi. Xelela abanye ngomnqweno onawo wokuba nguvulindlela ongumncedani. Mhlawumbi nabo baya kuzenzela usukelo lokuba ngoovulindlela.

5. Luluphi usukelo olunokuzibekela lona ulutsha kwinyanga kaMatshi, ka-Aprili, nekaMeyi?

⁵ Iindlela Olunokuba Nenxaxheba Ngazo Ulutsha: UYehova uyavuya xa abaselula bexela ngemisebenzi yakhe emangalisayo. (INdu. 71:17; Mat. 21:16) Ukuba uselula yaye ubhaptiziwe, mhlawumbi unokuba nguvulindlela ongumncedani xa izikolo zivaliwe. Ukuba akunakuba nguvulindlela ongumncedani, ngaba unokuzibekela usukelo olukhethekileyo lokusebenza ixesha elingakumbi entsimini nelokuphucula kumsebenzi wakho wentsimi kwezi nyanga? Ukuba ubusiya entsimini nabazali bakho kodwa akukabhaptizwa, ngoku lixesha elihle lokuba uzame ukufanelekela ukubhaptizwa. Ungacingi ukuba ufanele uzazi zonke iimpendulo zemibuzo yeBhayibhile okanye umele ube nolwazi olufana nolomntu omdala obhaptiziweyo. Ngaba uyaziqonda iimfundiso zeBhayibhile ezisisiseko? Ngaba ubambelela kwimilinganiselo yokuziphatha echazwe eBhayibhileni? Ngaba uyafuna ukwaziwa ukuba uliNgqina likaYehova? Thetha nabazali bakho. Banokuthetha nabadala ukuze bakuhlole enoba uyafaneleka kusini na.—Bona incwadi ethi Ubulungiseleli Bethu, iphepha 98-9.

6. Sinokubanceda njani abantu esibafundela iBhayibhile babe ngabavakalisi beendaba ezilungileyo?

⁶ Ukunceda Abanye Bashumayele: Abantu esibafundela iBhayibhile abanenkqubela banokukufanelekela ukusithelela njengabavakalisi kwezi nyanga zizayo zomsebenzi okhethekileyo. Ukuba unomntu omfundela iBhayibhile owenza inkqubela, cela uncedo kumveleli wesifundo sencwadi okuso okanye kumveleli wenkonzo. Omnye wabo unokuhamba nawe xa usiya kuye ukuze ahlole inkqubela yakhe. Ukuba loo mntu uyafaneleka yaye unqwenela ukuba ngumvakalisi, umveleli owongamelayo unokulungiselela ukuba abadala ababini badibane nawe kunye naye. (Bona IMboniselo kaNovemba 15, 1988, iphepha 17.) Xa beye bamncomela, ungaphozis’ amaseko ekumqeqesheleni intsimi.

7. Banokuncedwa njani abavakalisi abangezi rhoqo ezintlanganisweni nabapholileyo?

⁷ Umveleli wesifundo sencwadi ufanele anikele ingqalelo ekhethekileyo kubo bonke abapholileyo okanye abangezi rhoqo ezintlanganisweni. Bameme ukuba basebenze nawe entsimini. Ukuba sekulithuba bepholile, kucetyiswa ukuba baqale badibane nabadala ababini ukuze babone enoba bayafaneleka kusini na. (Bona Isingxobo Semibuzo esikuBulungiseleli Bethu BoBukumkani bukaNovemba 2000.) Inzondelelo yebandla kwezi nyanga zikhethekileyo inokulikhuthaza ukuba intsimi liphinde liyenze eyalo.

8, 9. Abadala banokwenza njani ukuze kubekho ihlombe ngomsebenzi okhethekileyo?

⁸ Wulungiselele Ngoku Umsebenzi Owandisiweyo: Badala, qalisani ngoku ukulikhuthazela ubuvulindlela obuncedisayo ibandla. Ninokwenza okungakumbi ngamagqabaza enu akhuthazayo nokumisela umzekelo omhle. (1 Pet. 5:3) Kwixa elidluleyo babebangaphi oovulindlela abancedisayo ebandleni? Ngaba kulo nyaka inani linokuthi chatha? Abaveleli besifundo sencwadi kunye nabancedisi babo bafanele babakhuthaze bonke abakwiqela labo ukuba bandise ubulungiseleli babo. Abaveleli benkonzo basenokwenza ucwangciso lweentlanganiso zenkonzo yasentsimini ezongezelelekileyo. Lixeleleni kusengaphambili ibandla ngamalungiselelo enziweyo. Qinisekani ukuba ninika abavakalisi abafanelekayo isabelo sokuba bakhokele nokuba iintlanganiso zenkonzo yasentsimini ziqalisa zize ziqukunjelwe kwangethuba. (Bona Ibhokisi Yemibuzo yoBulungiseleli Bethu BoBukumkani bukaSeptemba 2001.) Kwakhona umveleli wenkonzo ufanele alungiselele ukuba kubekho intsimi eyaneleyo ekuza kusetyenzwa kuyo, amaphephancwadi kunye noncwadi olwaneleyo.

⁹ Kunyaka ophelileyo abadala belinye ibandla baba nehlombe kangangokuba baqalisa kusengethuba ukukhuthaza ubuvulindlela bobuncedani, nto leyo eyabangela ukuba abaninzi bafake izicelo. Balungiselela ukuba kubekho iintlanganiso ezongezelelekileyo zenkonzo yasentsimini—enye yayinge-5:30 kusasa kulungiselelwa ukuya kumsebenzi wokuhambisa amaphephancwadi esitratweni, enye ingeye-3:00 emva kwemini ukwenzela abantwana besikolo, yaye enye yayingeye-6:00 emva kwemini ukwenzela abasebenzayo. Ukongezelela, balungiselela ukuba kubekho iintlanganiso ezintathu zenkonzo yasentsimini ngeMigqibelo. Kwelo bandla kwabhalisa abangama-66 njengoovulindlela abangabancedani ngoAprili!

10. Iintsapho zinokulungiselela njani ukwandisa umsebenzi wazo?

¹⁰ Kwisifundo sentsapho esilandelayo kutheni ningabekeli ecaleni ixesha lokuba nizibekele usukelo loko niza kukwenza kwiinyanga ezizayo? Xa nisebenzisana yaye nicebe kakuhle, abathile okanye nonke entsatsheni ninokuba ngoovulindlela abangabancedani. Ukuba aninakukwazi, zibekeleni usukelo lokwandisa umsebenzi wenu ngokwandisa ixesha enidla ngokulisebenza entsimini okanye ngokuya kushumayela ngezihlandlo ezongezelelekileyo. Kuthandazeleni oku njengentsapho. Qinisekani ukuba uYehova uya kuyisikelela imigudu yenu.—1 Yoh. 3:22.

11. (a) Ziziphi izinto ezibalaseleyo ezafezwa lidini lentlawulelo likaKristu? (b) Kwibandla lenu iSikhumbuzo siya kuqhutywa ngaliphi ixesha yaye siqhutyelwa phi?

¹¹ Owona Msebenzi KaThixo Umangalisayo: Eyona ndlela ibalaseleyo uYehova awalubonakalisa ngayo uthando lwakhe kuthi sisipho soNyana wakhe owasihlawulelayo. (1 Yoh. 4:9, 10) Idini lentlawulelo sisizinzi esisemthethweni sokuhlawulela uluntu esonweni nasekufeni. (Roma 3:23, 24) Igazi likaYesu elaphalalayo laliza kuwenza usebenze umnqophiso omtsha, abantu abangafezekanga batsho bakwazi ukwamkelwa njengoonyana bakaThixo benethemba lokulawula kuBukumkani basezulwini. (Yer. 31:31-34; Marko 14:24) Okubaluleke ngakumbi kukuba, ikhondo likaYesu lokuthobeka lalingcwalisa igama likaYehova. (Dut. 32:4; IMize. 27:11) NgeCawa, ngoAprili 4, emva kokutshona kwelanga, ehlabathini lonke kuza kube kukhunjulwa ukufa kukaKristu.

12. Ukubakho kwiSidlo SeNkosi Sangokuhlwa kunokuba yingenelo njani kubantu abanomdla?

¹² ISidlo SeNkosi Sangokuhlwa sibalaselisa imisebenzi kaYehova emangalisayo. Intetho yaso isibangela ukuba sibe noxabiso ngentlawulelo esayilungiselelwa nguYehova. Abantu abanomdla abaza kube bekho baza kutsho baqonde neminye imisebenzi kaThixo emangalisayo. Baza kubona umanyano kwanothando uYehova afundise abantu bakhe ukuba balubonise. (Efe. 4:16, 22-24; Yak. 3:17, 18) Ukubakho kwesi sihlandlo sibalulekileyo kunokuba negalelo lokwenene kwindlela ubani acinga ngayo, ngoko sifuna kubekho abantu abaninzi kangangoko kunokwenzeka.—2 Kor. 5:14, 15.

13, 14. Ngoobani esifanele sibamemele eSikhumbuzweni, yaye ngoba?

¹³ Ukumema Abanye Ukuba Babekho: Qalisa kwangoku ukwenza uludwe lwabantu oza kubamema. Kuludwe lwakho kumele kubekho amalungu entsapho angakholwayo, abamelwane, abantu osebenza nabo okanye ofunda nabo, abantu owawukade ubafundela iBhayibhile nabo ubafundelayo ngoku kunye namabuyelo. Abaveleli bezifundo zencwadi banokuquka abavakalisi abapholileyo kuludwe lwabo.

¹⁴ Sebenzisa izimemo ezishicilelweyo uze uchwetheze okanye ubhale kuzo ngendlela ecocekileyo ixesha kunye nendawo esiza kuqhutyelwa kuyo iSikhumbuzo. Okanye usenokusebenzisa isimemo esikwiphepha elingemva leMboniselo kaMatshi 15, 2004 okanye likaVukani! ka-Aprili 8, 2004. Xa uAprili 4 esondela, khumbuza abo bakuludwe lwakho, mhlawumbi uye kubo okanye ubatsalele umnxeba.

15. Sinokuzibuka njani iindwendwe ngobusuku beSikhumbuzo?

¹⁵ ESikhumbuzweni: Zama ukufika kwangethuba ngobusuku beSikhumbuzo. Buk’ iindwendwe ngokububulisa ngokufudumeleyo ubuso obutsha. (Roma 12:13) Unembopheleleko ekhethekileyo kwiindwendwe ozimemileyo. Benze bazive besekhaya uze ubazise kwabanye abasebandleni. Mhlawumbi unokude uhlale nabo. Yaye ukuba abanayo iBhayibhile okanye iculo, fundani kweyakho okanye ucele omnye ukuba abafundise kweyakhe. Emva kwale ntlanganiso, yibakho ukuze uphendule nayiphi na imibuzo abanayo. Ukuba abanye bayaqala ukubakho, babuze enoba bebengathanda kusini na ukufunda okungakumbi ngeLizwi likaThixo nangenjongo yakhe. Cela ukubaqhubela isifundo seBhayibhile.

16. Banokuncedwa njani abezileyo ukuze benze inkqubela ngokomoya?

¹⁶ Qhubeka Unceda Abo Bezileyo: Kwiiveki ezilandela eyeSikhumbuzo, aba bebezile basenokufuna uncedo olungakumbi. Aba baquka abo babekhe beza ezintlanganweni, abangaseziyo ngoku. Abadala baya kuqiniseka ukuba abanjalo abatyeshelwa, bazame ukuqonda isizathu sokuba bayeke ukwenza inkqubela ngokomoya. Babethelele ukungxamiseka kwamaxesha. (1 Pet. 4:7) Bancedeni bonke babone iingenelo zokuthobela isibongozo esiseZibhalweni sokuhlanganisana rhoqo nabantu bakaThixo.—Heb. 10:24, 25.

17. Kutheni sifanele siqhubeke sithetha ngemisebenzi kaYehova emangalisayo?

¹⁷ Imisebenzi kaYehova ingummangaliso kakhulu ukuba singayiqonda ngokupheleleyo kwanaxa siphila ngonaphakade. (Yobhi 42:2, 3; INtshu. 3:11) Ngoko ke, asinakuphelelwa zizinto ezibangela ukuba simdumise. Kweli xesha leSikhumbuzo sinokubonisa ukuba siyayixabisa imisebenzi kaYehova emangalisayo ngokwenza umgudu okhethekileyo wokwandisa ixesha lobulungiseleli bethu.

[Isicangca esikwiphepha 5]

Ngaba Unokuba Nguvulindlela Ongumncedani Usebenzisa Olu Cwangciso?

Matshi Su M* Tu* W* Th F Sa Isimbuku

Ngosuku 2 1 1 1 1 1 5 51

Ngezimbini 0 5 0 5 0 0 0 50

Ngeempelaveki 5 0 0 0 0 0 8 52

Aprili Su M Tu W Th* F* Sa Isimbuku

Ngosuku 2 1 1 1 1 1 5 50

Ngezimbini 0 0 0 0 5 5 0 50

Ngeempelaveki 5 0 0 0 0 0 8 52

Meyi Su* M* Tu W Th F Sa* Isimbuku

Ngosuku 2 1 1 1 1 1 4 51

Ngezimbini 0 5 0 0 0 0 5 50

Ngeempelaveki 3 0 0 0 0 0 7 50

* Ezi iintsuku Zintlanu Kule Nyanga