Ukuthetha Ngendlela Oqhele Ukuthetha Ngayo

UKUTHETHA ngendlela oqhele ukuthetha ngayo kukunceda ufumane intembelo yabanye. Ngaba ubunokuba nentembelo kwinto ethethwa ngumntu ofake isigqubuthelo ebusweni bakhe? Ngaba ibiya kwenza umahluko into yokuba ubuso azigqubuthele ngabo bebubuhle ngaphezu kobuso baloo mntu uthethayo? Unotshe. Ngoko, kunokuba uzenze mntu wumbi, yiba nguwe.

Ukuthetha ngendlela oqhele ukuthetha ngayo akufanele kubhidaniswe nokungathakhali. Ukwaphula imigaqo yentetho, ubizo-magama oluphosakeleyo kunye nokushwantshwatha amagama akufanelekanga. Intetho yasesitratweni imele iphetshwe. Ngalo lonke ixesha sifuna ukubonakalisa isidima esifanelekileyo, kwindlela esithetha ngayo nesiziphatha ngayo. Umntu othetha ngendlela aqhele ukuthetha ngayo akabambi cwangco ngokugqithiseleyo okanye athi swi kukucel’ injezu.

Kubulungiseleli Basentsimini. Ngaba uye uzive usoyika xa usondela endlwini okanye kumntu okwindawo kawonke-wonke unenjongo yokunikela ubungqina kuye? Inkoliso yethu iyoyika, kodwa ke kwabanye le mvakalelo iba namandla kunakwabanye. Ukubamb’ umzimba kunokwenza ilizwi likrase okanye lingcangcazele, okanye ukoyika kunokuzibonakalisa ngeentshukumo ezingaqhelekanga zezandla okanye intloko.

Umvakalisi unokuba nale ngxaki ngenxa yezizathu eziliqela. Mhlawumbi ucinga ngendlela abaza kumjonga ngayo okanye uyazibuza enoba intshumayelo yakhe iza kuphumelela kusini na. Zonke ezi zizathu ziqhelekile, kodwa iingxaki ziye ziphakame xa kunikelwa ingqalelo ebaxiweyo kwezo zinto. Ukuba uye woyike ngaphambi kokuba ube nesabelo kubulungiseleli, yintoni enokukunceda? Kukulungiselela ngenyameko nokuthandaza ngokunyanisekileyo kuYehova. (IZe. 4:29) Cinga ngenceba enkulu eyenziwe nguYehova ngokumema abantu ukuba banandiphe impilo egqibeleleyo nobomi obungunaphakade eParadesi. Cinga ngabo uzabalazela ukubanceda uze ucinge nangokufuna kwabo ukuva iindaba ezilungileyo.

Kwakhona khumbula ukuba abantu banenkululeko yokuzikhethela, ngoko banokusamkela okanye basikhabe isigidimi. Kwakunjalo naxa uYesu wayenikela ubungqina kuSirayeli wamandulo. Isabelo sakho kukushumayela nje kuphela. (Mat. 24:14) Kwanaxa abantu bengakuniki ithuba lokuba uthethe, ubukho bakho nje bubodwa buya kunikela ubungqina. Uya kuba uphumelele kuba uvumele uYehova wakusebenzisa ukuze aphumeze ukuthanda kwakhe. Ngezo zihlandlo uya kufumana ithuba lokuthetha, yintoni eya kubalasela ngayo loo nto uyithethayo? Ukuba ufunda ukujolisa iingcamango zakho kwiimfuno zabanye, loo nto uyithethayo iya kuba nomtsalane kwaye uya kuyithetha ngendlela oqhele ukuthetha ngayo.

Xa unikela ubungqina, ukuba wenza izinto uze uthethe ngendlela oqhele ukuthetha ngayo imihla ngemihla, loo nto iya kwenza abaphulaphuli bakho bakhululeke. Banokuzamkela nangakumbi iingcamango zeZibhalo ofuna ukwabelana ngazo nabo. Kunokuba unikele intetho kubo, ncokola nabo. Yiba nobuhlobo. Yiba nomdla kubo, uze ubakhuthaze ukuba bagqabaze. Kakade ke, xa ulwimi okanye isithethe sasekuhlaleni sifuna ukuba wenze nto ithile ukuze ubonise imbeko xa uthetha nabantu ongabaziyo, yenze loo nto. Kodwa unokuhlala ulungile ngalo lonke ixesha unobuso obukhululekileyo.

Eqongeni. Xa uthetha neqela, ukuthetha ngendlela oqhele ukuthetha ngayo nebuncoko kudla ngokuba yeyona ndlela ilungileyo. Kakade ke, xa abaphulaphuli bakho bebaninzi, kufuneka uliphakamise nangakumbi ilizwi lakho. Ukuba uzama ukuyinkqaya intetho yakho okanye amanqaku akho ahlengahlengiswe ngokugqithiseleyo, mhlawumbi ukuxhalabele ngokugqithiseleyo ukusebenzisa amagama afanelekileyo. Ewe kubalulekile ukusebenzisa amagama afanelekileyo, kodwa xa kunikelwa ingqalelo kakhulu kuwo, intetho ayikhululeki. Ayinikelwa ngendlela isithethi esiqhele ukuthetha ngayo. Iingcamango zakho zifanele zicingisiswe kakuhle kusengaphambili, kodwa nikela ingqalelo kwiingcamango, kungekhona kumagama afanelekileyo.

Kunjalo ke naxa ukudliwano-ndlebe ezintlanganisweni. Lungiselela kakuhle, kodwa ungazifundi okanye uzinkqaye iimpendulo zakho. Phendula ngendlela oqhele ukuthetha ngayo ukuze amagqabaza akho abe nomtsalane yaye asuke entliziyweni.

Kwaneempawu zentetho ezithandekayo ziye zivakale zingeyondlela eqhelekileyo yokuthetha xa zibaxwa. Ngokomzekelo, ufanele uvakale xa uthetha yaye uwabize kakuhle amagama, kodwa oko akumele kubangele ukuba intetho yakho ingakhululeki okanye ungathethi ngendlela oqhele ukuthetha ngayo. Izimbo zomzimba zokugxininisa okanye zokuchaza, xa zisenziwa kakuhle, zinokuyenza iphile intetho yakho, kodwa izimbo zomzimba ezingakhululekanga okanye ezibaxiweyo ziya kuyenza ingavakali loo nto uyithethayo. Ilizwi lakho malivakale ngokwaneleyo, kodwa ke ungangxoli. Kuhle ukunikela intetho ngehlombe, kodwa ufanele uphephe ukugqekreza ngamagama. Ukuguquguqula ilizwi, ukuba nehlombe nokuba nemvakalelo akufanele kusetyenziswe ngendlela etsalela ingqalelo kwisiqu sakho okanye eyenza abaphulaphuli bakho bangakhululeki.

Abanye abantu bangamaciko emvelo, kwanaxa benganikeli intetho. Abanye bayakwazi ukuncokola. Eyona nto ibalulekileyo kukuthetha ngendlela efanelekileyo mihla le nokuziphatha ngesidima sobuKristu. Uya kuthi ke, xa useqongeni, ukufumanise kulula ukuthetha nokwenza izinto ngendlela enomtsalane oqhele ukwenza ngayo.

Xa Ufunda Esidlangalaleni. Ukuthetha ngendlela oqhele ukuthetha ngayo xa ufunda esidlangalaleni kufuna ubani enze umgudu. Ukuze ukwazi, kufuneka ufumane iingcamango eziziintloko kumbandela oza kuwufunda, uze uqwalasele indlela ezibekwa ngayo. Mazicace engqondweni yakho; kungenjalo, uya kufunda nje amagama. Khangela indlela abizwa ngayo amagama ongawaqhelanga. Qhelisela ukufunda ngokuvakalayo ukuze ulungelelanise ilizwi lakho yaye uwahlengahlengise kakuhle amagama ukuze iingcamango zicace. Funda kwakhona de ukwazi ukufunda ngokutyibilikayo. Wuqhele loo mbandela kangangokuba xa ufunda ngokuvakalayo, uvakale ngathi uncokola ngodlamko. Nantso ke into ethethwa kukufunda ngendlela oqhele ukuthetha ngayo.

Kakade ke, inkoliso yofundo lwethu lwasesidlangalaleni ithatyathwa kwiimpapasho zethu ezisekelwe eBhayibhileni. Ukongezelela kwizabelo zokufunda zeSikolo Sobulungiseleli Sobuthixo, siye sifunde izibhalo kubulungiseleli basentsimini xa sinikela iintetho eqongeni. Abazalwana baye babelwe ukufunda umbandela oxutyushwayo kwiSifundo seMboniselo nakwiSifundo Sencwadi Sebandla. Abanye abazalwana abafanelekayo bafumana izabelo zokufunda imibhalo-ngqangi phambi kwabaphulaphuli abeze endibanweni. Enoba ufunda iBhayibhile okanye ezinye iincwadi, funda iinxalenye eziqulethe iingcaphulo ngendlela ezenza zivakale ziphilile. Xa kudweliswe amagama abantu aliqela, liguquguqule ilizwi lakho kwigama ngalinye. Nasi isilumkiso: Yiba nehlombe eliqhelekileyo kodwa ungabaxi izinto.

Ukufunda ngendlela oqhele ukuthetha ngayo kuthetha ukufunda ngathi uyancokola. Akuvakali ngathi loo mntu uyazenzisa, kodwa ufunda ngendlela ebonisa ukweyiseka.