Isingxobo Semibuzo

◼ Yiyiphi inkcazelo efanele ixutyushwe kwintlanganiso yenkonzo yasentsimini?

Injongo yentlanganiso yenkonzo yasentsimini kukusinceda emsebenzini esiya kuwo—ubulungiseleli. Ngoko ke, umqhubi ufanele alungiselele kakuhle aze akulungele ukwabelana nabanye ngento enokubakhuthaza, engqalileyo nesebenzisekayo. Ukuba itekisi yosuku ixubusha ngomsebenzi wokushumayela ngokungqalileyo, inokufundwa ize ixutyushwe ngokufutshane. Noko ke, intlanganiso ifanele igxininise kumsebenzi oza kwenziwa, ibancede bonke abaya kubulungiseleli ngolo suku balungele ukunikela ubungqina.—2 Tim. 4:5.

Iingongoma ezikuBulungiseleli Bethu BoBukumkani zinokuxutyushwa ukuze bonke bazazi iimpapasho ezihanjiswayo nendlela yokuzihambisa. NgoSuku Lwamaphephancwadi kunokwenziwa umboniso ngentshumayelo ethi “Oko Unokukuthetha Ngamaphephancwadi.” Ngamanye amaxesha, kunokubalaseliswa intshayelelo enye okanye ezimbini ezikwincwadi ethi Ukuqiqa ezilungele intsimi yasekuhlaleni. Inxalenye ethile yobulungiseleli inokuxutyushwa okanye kwenziwe umboniso ngayo, njengokubonisa indlela yokusebenzisa iBhayibhile emizini yabantu, indlela yokuqhubana nomntu ofuna ukuthintela incoko, indlela yokucela isifundo seBhayibhile okanye indlela yokubuyela emntwini obonise umdla.

Iintlanganiso zenkonzo yasentsimini azifanele zidlule kwimizuzu eli-10 ukusa kweli-15, nto leyo equka ukulungelelanisa amaqela, ukwaba intsimi eza kusetyenzwa nomthandazo. Xa kuhanjwa, bonke abakhoyo bafanele bamazi umntu abahamba naye nendawo abaya kuyo, yaye bafanele baphume bonke baye entsimini ngaphandle kokuzilazila. Ngenxa yokuba mfutshane kwale ntlanganiso, kubalulekile ukuba bonke bafike ngexesha. Ukuba intlanganiso yenkonzo ilandela emva kwentlanganiso yebandla, enjengeSifundo seMboniselo, ifanele ibe mfutshane. Akuyomfuneko ukuxubusha itekisi yosuku, ekubeni sele kunanditshwe ingxubusho emyoli yeZibhalo. Noko ke, bekungayi kufaneleka ukungayiqhubi intlanganiso yenkonzo yasentsimini okanye ukuyihlanganisa neSifundo seMboniselo.

Abazalwana abafanelekayo ababhaptiziweyo bafanele babelwe kwangaphambili ukuba baqhube intlanganiso yenkonzo yasentsimini. Ukuba akakho okhoyo oza kukhokela ngolo suku, abadala bafanele batyumbe oodade ababhaptiziweyo abanokukhokela xa kukho imfuneko. Udade uya kuqhuba loo ngxubusho yeqela yetekisi yosuku okanye eminye imibandela ehleli phantsi, yaye awagcine amagqabaza akhe emafutshane. Uya kuthwala entloko.

Iintlanganiso zenkonzo yasentsimini ngamathuba amahle okukhuthazwa nokwakhiwa ukuze sibe nesabelo kubulungiseleli. Xa umqhubi elungiselele kakuhle, kokukhona beya kungenelwa bonke abakhoyo.