“Namkele Ngesisa, Yiphani Ngesisa”

“NAMKELE ngesisa, yiphani ngesisa.” (Mateyu 10:8) UYesu wabanika lo myalelo abapostile bakhe xa wabathumela ukuba bashumayele iindaba ezilungileyo. Ngaba abapostile bawuthobela lo myalelo? Bawuthobela, yaye baqhubeka besenjenjalo kwanaxa uYesu wayesele emkile emhlabeni.

Ngokomzekelo, xa uSimon owayesakuba ngumkhafuli wabona amandla amangalisayo umpostile uPetros noYohane ababenawo, wathi angabahlawula ukuba banokumnika loo mandla. Kodwa uPetros wamkhalimela uSimon, esithi: “Ngamana isilivere yakho ingabhanga kunye nawe, ngenxa yokuba ubucinga ukufumana isipho sesisa sikaThixo ngemali.”—IZenzo 8:18-20.

Umpostile uPawulos wabonakalisa umoya onjengokaPetros. UPawulos ngewaba ngumthwalo ngokwezinto eziphathekayo kubazalwana bakhe abangamaKristu baseKorinte. Kunoko, wayesebenzisa izandla zakhe ukuze azixhase. (IZenzo 18:1-3) Ngaloo ndlela, ngesibindi wayenokuthi uzishumayele iindaba ezilungileyo kwabaseKorinte “ngaphandle kweendleko.”—1 Korinte 4:12; 9:18.

Okubuhlungu kukuba, abaninzi abathi bangabalandeli bakaKristu abakhange babonakalise umoya ofanayo ‘wokupha ngesisa.’ Eneneni, iinkokeli zonqulo ezininzi kwiNgqobhoko ‘ziyalela nje ngenxa yexabiso.’ (Mika 3:11) Ezinye iinkokeli zonqulo ziye zazizityebi ngemali eziyiqokelele kwimihlambi yazo. Ngowe-1989, omnye umhambisi wevangeli waseUnited States wagwetywa iminyaka engama-45 entolongweni. Kwakutheni ukuze avalelwe? “Wayeqhatha abaxhasi bakhe ngezigidi zeedola yaye esebenzisa enye yale mali ukuthenga izindlu, iimoto, esiya kwiiholide yaye nenja yakhe yayinendlu enesixhobo sokupholisa nokufudumeza.”—People’s Daily Graphic, Oktobha 7, 1989.

EGhana, ngokutsho kweGhanaian Times kaMatshi 31, 1990, umfundisi ongumRoma Katolika wathabatha imali eyayiqokelelwe ebudeni benkonzo waza wagibisela ngayo amarhamente. Eli phephandaba lithi: “Isizathu sokuba enjenjalo kukuba, njengabantu abadala, kwakulindelwe ukuba banikele ngemali eninzi.” Akumangalisi ke ngoko ukuba, iicawa ezininzi zide zizame ukwenza amalungu azo abawe, zikhuthaze ukungcakaza nokwenziwa kwezinye izinto ukuze kuqokelelwe imali.

Ngokwahlukileyo koko, amaNgqina kaYehova azabalazela ukuxelisa uYesu nabafundi bakhe bokuqala. Akanamfundisi uhlawulwayo. Ngqina ngalinye lingumlungiseleli onembopheleleko yokushumayela ‘iindaba ezilungileyo zobukumkani’ kwabanye. (Mateyu 24:14) Ngoko ke, njengoko engaphezu kwezigidi ezithandathu ehlabathini lonke aba nenxaxheba yokuzisa “amanzi obomi” ngesisa ebantwini. (ISityhilelo 22:17) Ngale ndlela, nabo “bangenamali” banokuzuza kwisigidimi seBhayibhile. (Isaya 55:1) Nangona umsebenzi wawo uxhaswa yiminikelo yokuzithandela, akaceli nkongozelo. Njengabalungiseleli bakaThixo bokwenyaniso, ‘akangobathengisi belizwi likaThixo,’ kodwa athetha “ngokunyaniseka, . . . njengabathunywa bakaThixo.”—2 Korinte 2:17.

Noko ke, kutheni amaNgqina kaYehova ekulungele ukunceda abanye, ekwenza oku ngeendleko zawo? Yintoni ewashukumisayo? Ngaba ukupha ngesisa kuthetha ukwenjenjalo ngaphandle kokuba avuzwe ngenxa yemigudu yawo?

Ukuphendula Imbambano Eyaphakanyiswa NguSathana

AmaKristu okwenyaniso namhlanje ashukunyiswa ngokuyintloko ngumnqweno wokufuna ukukholisa uYehova—kungekhona ukuba abe zizityebi. Ngaloo ndlela ayakwazi ukunikela impendulo kwimbambano eyaphakanyiswa nguSathana uMtyholi kwiinkulungwane ngaphambili. Ngokuphathelele indoda elilungisa uYobhi, uSathana waphakamisa imbambano kuYehova esithi: “UYobhi umoyikela ilize na uThixo?” USathana wayesithi uYobhi umkhonza uThixo kuphela ngenxa yokuba emkhusela. USathana wathi, ukuba uYobhi wayenokohluthwa izinto eziphathekayo, wayeya kumqalekisa uThixo ebusweni bakhe!—Yobhi 1:7-11.

Ukuze aphendule le mbambano, uThixo wavumela uSathana avavanye uYobhi, esithi: “Yonke into anayo isesandleni sakho.” (Yobhi 1:12) Waba yintoni umphumo? UYobhi wamngqina elixoki uSathana. Kuzo naziphi iinkxwaleko awajamelana nazo, uYobhi wahlala enyanisekile. Wathi: “Ndide ndibhubhe andiyi kuyisusa kum ingqibelelo yam!”—Yobhi 27:5, 6.

Abanquli bokwenyaniso namhlanje babonakalisa isimo sengqondo esifanayo nesikaYobhi. Abamkhonzi uThixo kuba bexhalabele izinto eziphathekayo.

Isipho Sesisa SikaThixo Sobubele Obungasifanelanga

Esinye isizathu esenza amaKristu okwenyaniso akunqwenele ‘ukupha ngesisa’ kukuba nawo aye ‘amkela ngesisa’ kuThixo. Uluntu lusebukhobokeni besono nokufa ngenxa yesono sikakhokho wethu uAdam. (Roma 5:12) Ngothando, uYehova walungiselela uNyana wakhe ukuba azincame ngokusifela—nto leyo eyaba yilahleko enkulu kuThixo. Ngokuqinisekileyo uluntu alukufanelekelanga oku. Ewe, sisipho esivela kuThixo.—Roma 4:4; 5:8; 6:23.

Njengokuba kubhalwe kwabaseRoma 3:23, 24, ngaloo ndlela uPawulos wathi kumaKristu athanjisiweyo: “Bonke bonile baza basilela kuzuko lukaThixo, yaye kunjengesipho sesisa ukuvakaliswa kwabo bengamalungisa ngobubele bakhe obungasifanelanga ngako ukukhululwa ngentlawulelo ngoKristu Yesu.” Abo banethemba lokuphila ngonaphakade emhlabeni ngokufanayo bayazuza ‘kwisipho sesisa.’ Esi sipho siquka ilungelo lokuvakaliswa njengabahlobo bakaYehova.—Yakobi 2:23; ISityhilelo 7:14.

Kwakhona idini lentlawulelo likaKristu libangela ukuba onke amaKristu akhonze njengabalungiseleli bakaThixo. Umpostile uPawulos wabhala: “Ndaba ngumlungiseleli wako oku [imfihlelo engcwele] ngenxa yesipho sesisa sobubele obungasifanelanga bukaThixo.” (Efese 3:4-7) Kuba beyalelwe ukuba bafeze ubulungiseleli ngento ebingabafanelanga okanye ababengenako ukuyithenga, abalungiseleli bokwenyaniso bakaThixo abanakulindela ukuhlawulwa imali ngokushumayela kwabo ngeli lungiselelo kwabanye.

Ithemba Lobomi Obungunaphakade—Ngaba Likhuthaza Ukuzingca?

Ngoko ke, ngaba oku kuthetha ukuba uThixo ulindele amaKristu amkhonze ngaphandle kwethemba lomvuzo? Akunjalo, kuba umpostile uPawulos wathi kwamanye amakholwa: “UThixo akanantswela-bulungisa ukuba angawulibala umsebenzi wenu nothando enalubonisayo ngegama lakhe.” (Hebhere 6:10) Yaye uYehova usesikweni. (Duteronomi 32:4) Eneneni, uYehova “ungumvuzi wabo bamfuna ngenyameko.” (Hebhere 11:6) Kodwa ngaba ayikokuzingca ukulangazelela ubomi obungunaphakade eParadesi?—Luka 23:43.

Akunjalo. Esinye isizathu kukuba, umnqweno wokuphila ngonaphakade kwiParadesi esemhlabeni uvela kuThixo ngokwakhe. Nguye owanikela eli themba kwisibini sokuqala esingabantu. (Genesis 1:28; 2:15-17) Kwakhona wathi eli themba, elalahlwa nguAdam noEva, linokuzaliseka kwinzala yabo. Ngaloo ndlela, uThixo wathembisa kwiLizwi lakhe ukuba “nayo indalo ngokwayo iya kukhululwa ekukhotyokisweni kukonakala ize ibe nenkululeko ezukileyo yabantwana bakaThixo.” (Roma 8:21) Ngoko ke kufanelekile ngamaKristu namhlanje, njengoMoses wamandulo, ukuba akhangele “ngenyameko emvuzweni.” (Hebhere 11:26) UThixo akasinyobi ngalo mvuzo. Ubangelwa luthando lokwenene ngabo bamkhonzayo. (2 Tesalonika 2:16, 17) Ngenxa yoko, “sinalo uthando, kuba wasithanda kuqala.”—1 Yohane 4:19.

Injongo Efanelekileyo Yokukhonza UThixo

Sekunjalo, amaKristu namhlanje amele ahlale ehlolisisa isizathu sokukhonza kwawo uThixo. KuYohane 6:10-13, sifunda ukuba ngommangaliso uYesu wondla isihlwele esingaphezu kwamawaka amahlanu. Ngenxa yoko, abanye baqalisa ukulandela uYesu ngenxa yokuzingca. UYesu wathi kubo: “Nindifuna . . . ngenxa yokuba nadla ezonkeni naza nanela.” (Yohane 6:26) Kumashumi eminyaka kamva amanye amaKristu azahluleleyo ayekhonza uThixo kodwa “kungekhona ngentshukumisa esulungekileyo.” (Filipi 1:17) Abanye ‘ababengahambisani namazwi aphilileyo kaYesu Kristu’ babede banxulumane namanye amaKristu ukuze bawaxhaphaze.—1 Timoti 6:3-5.

Namhlanje, umKristu okhonza kuphela nje kuba efuna ukuphila ngonaphakade eParadesi, naye ukhonza ngeenjongo zokuzingca. Ekuhambeni kwexesha, oku kunokuphumela ekubeni afe ngokomoya. Kuba le nkqubo yezinto kaSathana ibonakala ihleli ixesha elide kunokuba bekulindelwe, unokude ‘adinwe,’ evakalelwa kukuba isiphelo sikude. (Galati 6:9) Usenokude acaphuke ngenxa yokuncama izinto eziphathekayo. UYesu uyasikhumbuza: “Uze umthande uYehova uThixo wakho ngentliziyo yakho iphela nangomphefumlo wakho uphela nangengqondo yakho iphela.” (Mateyu 22:37) Ewe, umntu okhonza uYehova ngokuyintloko ngenxa yothando uzimisela ukumkhonza ngonaphakade! (Mika 4:5) Akazisoli ngako nakuphi na ukuzincama kwakhe ekukhonzeni uThixo. (Hebhere 13:15, 16) Ukuthanda uThixo kumenza afune ukubeka izilangazelelo zikaThixo kuqala ebomini bakhe.—Mateyu 6:33.

Namhlanje, ngaphezu kwezigidi ezithandathu zabanquli bokwenyaniso ‘zizinikela ngokuvumayo’ enkonzweni kaYehova. (INdumiso 110:3) Ngaba ungomnye wazo? Ukuba akunjalo, camngca ngoko uThixo akupha kona: ulwazi olusulungekileyo lwenyaniso; (Yohane 17:3) ukukhululeka kubukhoboka beemfundiso zonqulo ezibubuxoki; (Yohane 8:32) ithemba lokuphila ngonaphakade. (ISityhilelo 21:3, 4) AmaNgqina kaYehova anokukunceda ufunde indlela onokukufumana ngayo konke oku kuThixo—ngesisa.

[Amagama acatshulweyo akwiphepha 22]

AmaKristu okwenyaniso namhlanje ashukunyiswa ngokuyintloko ngumnqweno wokufuna ukukholisa uYehova—kungekhona ukuba abe zizityebi

[Umfanekiso okwiphepha 21]

Isipho sikaThixo sesisa sentlawulelo sishukumisela amaKristu ukuba ashumayele iindaba ezilungileyo ngesisa