Ngaba Uyazilazila?
Uzilazila ukwenza ntoni? Ukuzalisa ikhadi leDPA (durable power of attorney) elenzelwe amaNgqina abhaptiziweyo. Ekubeni ‘ungakwazi oko ubomi bakho buya kuba kuko ngomso,’ kubalulekile ukuba wenze isigqibo ngonyango nangeendlela zokunyanga oza kuzamkela xa kuvela ingozi, uze uzibhale phantsi. (Yak. 4:14; IZe. 15:28, 29) Ividiyo ethi Transfusion-Alternative Health Care—Meeting Patient Needs and Rights yenzelwe ukukunceda kulo mba. Yibukele usebenzisa le mibuzo ingezantsi uze uthandaze.—Phawula: Ekubeni le vidiyo ineendawo apho kuboniswa abantu abatyandwayo, abazali bafanele balumke xa beyibukela nabantwana babo abancinane.
(1) Kutheni abezonyango bekuhlola ngokutsha ukutofelwa kwegazi? (2) Chaza imizekelo ibe mithathu yotyando olunzima olunokwenziwa ngaphandle kokutofelwa igazi. (3) Bangaphi oogqirha nabatyandi ehlabathini abaye bavuma ukunyanga abantu ngaphandle kokubatofela igazi? Kutheni bevuma nje? (4) Yintoni etyhilwe luhlolisiso olwenziwe kwizibhedlele kutshanje ngokusetyenziswa kwegazi? (5) Ziziphi iingozi ezinxulunyaniswa nokutofelwa igazi? (6) Ziziphi izigqibo eziye zafikelela kuzo iingcali ngokuphathelele ezinye iindlela zonyango ezingasebenzisi utofelo-gazi? (7) Ubangelwa yintoni umlambo (anemia)? Abantu banokuwunyamezela ukusa kuwuphi umlinganiselo? Yintoni enokwenziwa ukuze kuhlangatyezwane nawo? (8) Yintoni enokwenziwa ukuze umzimba womguli uvelise iiseli ezibomvu ezingakumbi? (9) Ngawaphi amacebo asetyenziswayo ukuze kuthintelwe ukopha kakhulu ebudeni botyando? (10) Ngaba iindlela zonyango ezingasebenzisi utofelo-gazi zinokusebenza kubantwana abancinane okanye kubantu abagula kakhulu? (11) Nguwuphi omnye wemigaqo ephambili yonyango olusemagqabini? (12) Kutheni kubalulekile ukuba amaKristu azikhethe kusengaphambili iindlela zonyango aza kuzamkela? Sinokukwenza njani oko?
Ukwamkela iindlela zonyango eziboniswe kule vidiyo kuxhomekeke emntwini nakwisazela sakhe esiqeqeshwe yiBhayibhile. Ngaba sele ugqibile ngendlela yonyango engasebenzisi utofelo-gazi oya kuyamkela wena nabantwana bakho? Ukuze ufumane ingcombolo ngalo mba, bona “Imibuzo Evela Kubafundi” ekwiMboniselo kaJuni 15, 2004, nekaOktobha 15, 2000, nesihlomelo esithi “Ndifanele Ndizijonge Njani Izinto Ezitsalwe Egazini Neendlela Zokunyanga Ezisebenzisa Igazi Lam?” esikuBulungiseleli Bethu BoBukumkani bukaJanuwari 2007. Ufanele ucacisele amalungu entsapho yakho angengomaNgqina kunye nabameli bakho ngezigqibo zakho.