“Amazwi Enu Makasoloko . . . Enongwe Ngetyuwa”
1. Kuthetha ntoni ‘ukunonga amazwi ethu ngetyuwa’?
1 “Amazwi enu makasoloko ekholekile, enongwe ngetyuwa, ukuze nikwazi ukuphendula bonke ngabanye.” (Kol. 4:6) Ukunonga amazwi ethu ngetyuwa kuthetha ukuwakhetha amazwi esiwathethayo kwaye sithethe ngendlela eya kuvakala kamnandi kumntu ophulaphuleyo. Kubaluleke kakhulu ukwenjenjalo xa sisentsimini.
2. UYesu wakwazi njani ukushumayela kumSamariyakazi?
2 Umzekelo KaYesu: Xa wayephumle ngasequleni, uYesu washumayela kumSamariyakazi owayeze kukha amanzi. Ebudeni bencoko, eli bhinqa lathetha ngobutshaba obabuphakathi kwamaYuda namaSamariya. Kwakhona eli bhinqa lathi likholelwa ukuba amaSamariya aphuma kumnombo kaYakobi, ngoxa amaYuda ayekholelwa ukuba amaSamariya akaphumi kumnombo wawo. Kunokuba aphikise yonk’ into eliyithethayo, uYesu waqhubeka encokola kakuhle nalo. Ngenxa yoko wakwazi ukushumayela kulo nokulinceda lona nabantu besixeko salo.—Yoh. 4:7-15, 39.
3. Sinokuwulandela njani umzekelo kaYesu xa sisentsimini?
3 Xa sishumayela simele sikhumbule injongo yethu—‘ekukuvakalisa iindaba ezilungileyo zezinto ezilungileyo.’ (Roma 10:15) Sifuna ukuxelela umninimzi into ebangela umdla neyakhayo eseBhayibhileni, singamenzi avakalelwe kukuba sigxibha iinkolelo zakhe. Akuyomfuneko ukuba simphikise xa enembono engachananga. Kwizinto azithethayo, ngaba ikho into enivumelana ngayo onokuyincoma? Mhlawumbi sinokutshayelela isibhalo ngokuthi, “Ngaba wakha wacinga ukuba inokwenzeka le nto?”
4. Sifanele senze ntoni xa umninimzi esithuka?
4 Kuthekani ukuba umninimzi uyakuthuka okanye uzimisele ukuphikisana nawe? Sifanele siqhubeke simthantamisa yaye sithetha ngobulali. (2 Tim. 2:24, 25) Xa umntu engawuthandi umyalezo woBukumkani, koba kuhle ukuba sicel’ indlela ngesihle.—Mat. 7:6; 10:11-14.
5. Omnye udade waphumelela njani ngokuphendula ngendlela echubekileyo?
5 Imiphumo Emihle: Xa omnye udade wazama ukushumayela kwibhinqa elingummelwane, lamphendula rhabaxa, lamthi bhutyu ngentlamba. Udade wethu waphendula ngomoya omhle, esithi: “Ndicela uxolo ngokukwenza uvakalelwe ngolu hlobo. Sala kakuhle.” Kwiiveki ezimbini kamva, eli bhinqa laya kunkqonkqoza endlwini yalo dade, lacela uxolo ngendlela eliye laziphatha ngayo, laza lathi linomdla wokuva into awayeza kuyithetha. Ukuphendula ngendlela echubekileyo kuba nemiphumo emihle!—IMize. 15:1; 25:15.
6. Kutheni kubalulekile ukuba siyinonge intetho yethu xa sisentsimini?
6 Zama ukuyinonga intetho yakho xa ushumayela iindaba ezilungileyo. Kwanokuba umninimzi akakwamkeli, mhlawumbi uya kuwamkela amaNgqina kaYehova xa ephinda esiza endlwini yakhe.