Nceda Izifundo ZeBhayibhile Zibe Ngabavakalisi Beendaba Ezilungileyo ZoBukumkani
1 Uthumo uYesu awalunika abafundi bakhe oluchazwe kuMateyu 28:19, 20 lwalulukhulu. Abafundi bakaKristu bayalelwa ukuba benze abafundi ababeya kuthi nabo baqhubeke nomsebenzi wokwenza abafundi. Kwakuya kubekwa isiseko esiluqilima sokuvakaliswa kweendaba ezilungileyo zoBukumkani bukaThixo ehlabathini liphela kweli xesha lesiphelo siphila kulo.—Mat. 24:14.
2 Izifundo zethu zeBhayibhile zisenokuba ngabantwana bethu okanye abanye abantu abafuna ukufunda iBhayibhile kunye nathi. Sikulangazelela ngokwenene ukunceda abantu abanjalo ukuba bayamkele imbopheleleko yokunceda abantu babe ngabafundi bakaYesu Kristu.—Luka 6:40.
3 Bancede Bakwazi Ukushumayela: Khuthaza izifundo zakho ukuba zixelele abantu ngezinto ezizifundayo. Zibalisele amava akhuthazayo asentsimini. Baqeqeshe besebancinane abantwana bakho ukuba baye entsimini benenjongo yokuphumeza okuthile ngokwamandla abo. (INdu. 148:12, 13) Babonise ngokuthetha nangezenzo ukuba intsimi ibalulekile kuwe.—1 Tim. 1:12.
4 UYehova usebenzisa kuphela abo bayamkelayo nabayithobelayo imilinganiselo yakhe yobulungisa. Kakade ke, abavakalisi abatsha abanalwazi njengabavakalisi boBukumkani abanamava, abazahluleleyo nababhaptiziweyo, kodwa bamele bazikholelwe baze bakwazi ukuzichaza iimfundiso ezisisiseko zeBhayibhile. (Bona incwadi ethi Ulungelelwano, iphepha lama-79 ukuya kwelama-82.) Ekubeni sele bezahlule ngokupheleleyo ‘kwiBhabhiloni Enkulu’ nakwiipolitiki, bafanele baye kwiintlanganiso zebandla rhoqo.—ISityhi. 18:2, 4; Yoh. 17:16; Heb. 10:24, 25.
5 Wakuba uqinisekile ukuba esinye sezifundo zakho siyafaneleka ukuba ngumvakalisi ongabhaptizwanga, chazela umveleli owongamelayo. Uya kulungiselela ukuba abadala ababini badibane nawe kunye nesifundo sakho ukuze kugqitywe enoba siyafaneleka kusini na ukuba ngumvakalisi ongabhaptizwanga weendaba ezilungileyo zoBukumkani kunye nebandla. Emva koko uya kuba nelungelo lokuqhubeka uqeqesha isifundo sakho njengoko uhamba naso entsimini.