UmTshato

Ingcaciso: Kukumanyana kwendoda nomfazi ukuze bahlale kunye njengomyeni nenkosikazi ngokomlinganiselo owandlalwe kwiZibhalo Ezingcwele. Umtshato ulumanyano lobuthixo. Ubangela kubekho ulwalamano olusenyongweni phakathi kwendoda nomfazi kunye nokuziva unqabisekile ngenxa yokuba kukho uthando nangenxa yokuba ukuzibophelela kobuqu kwenziwe liqabane ngalinye. Xa wayemisela umtshato, uYehova wenjenjalo kungekhona nje ukulungiselela iqabane elisondeleyo elaliya kuba ngumphelelisi wendoda kodwa kwakhona wenza ilungiselelo lokuveliswa kwabantu abangakumbi ibe oko kuqhutywa kwilungiselelo lentsapho. Ukubhaliswa ngokwasemthethweni kolwalamano lomtshato olwamkelekileyo kwibandla lamaKristu kuyimfuneko naphi na apho kunokwenzeka.

Ngaba ngokwenene kubalulekile ukutshata ngokuvisisana neemfuneko zomthetho?

Tito 3:1: “Bakhumbuze ukuba bathobele oozilawuli noomagunya.” (Xa abantu beyithobela le miyalelo, igama labo bazimanyayo ligcinwa lingagculelwa, ibe nabantwana bayasinda kugculelo oluba kwabo banabazali abangatshatanga. Ukongezelela, ukuwubhalisa ngokwasemthethweni umtshato kukhusela amalungelo okuba nezinto kwamalungu entsapho ngexesha lokufa kwelinye lamaqabane.)

Heb. 13:4: “Umtshato mawubekeke ngeendlela zonke, nesilili masingadyojwa; ke abenza umbulo [abahenyuzayo, NW] nabakrexezi, uThixo uya kubagweba.” (Ukutshata ngokwasemthethweni kunendima ebalulekileyo ekubeni umtshato wamkeleke ‘njengobekekileyo.’ Xa sichaza igama elithi ‘ukuhenyuza’ nelithi ‘ukukrexeza,’ simele sikhumbule oko kuchazwe kuTito 3:1, ocatshulwe ngasentla.)

1 Pet. 2:12-15: “Ihambo yenu mayibe ntle phakathi kweentlanga; ukuze kuloo nto bathetha okubi ngani, ngathi ningabenzi bokubi, bathi ngokubona imisebenzi yenu emihle, bamzukise uThixo ngomhla wokuvelelwa. Wuthobeleni ngoko wonke ummiso ongowomntu, ngenxa yayo iNkosi; nokuba ngukumkani, njengowongamileyo; nokuba ngabalawuli, njengabathunyiweyo nguye, ukuze baphindezele okunene kubenzi bokubi, badumise abenzi bokulungileyo. Ngokuba ukuthanda kukaThixo kukuba nithi, ngokwenza okulungileyo, nibethe ithi cwaka intswela-kwazi yabantu abaziintsweli-kuqonda.”

Ngaba kwakukho naziphi na “iinkqubo ezingokomthetho” xa uAdam noEva bathi baqalisa ukuhlala kunye?

Gen. 2:22-24: “UYehova uThixo walwakha ubambo abeluthabathe kuAdam, lwaba ngumfazi; wamzisa kuAdam. Wathi uAdam, Eli ke ngoku lithambo lasemathanjeni am, yinyama yasenyameni yam; lo yena ukubizwa kothiwa ngumfazi, ngokuba ethatyathwe endodeni. Ngenxa yoko indoda yomshiya uyise nonina, inamathele kumkayo, babe nyama-nye ke.” (Phawula ukuba yayinguYehova uThixo ngokwakhe, uMongami Wendalo Iphela, owamanyanisa uAdam noEva. Lo yayingengomcimbi nje wokugqiba kwendoda nomfazi ukuhlala kunye bengalikhathalelanga igunya elingokomthetho. Kwakhona, phawula ukugxininisa kukaThixo ekuqhubekeni kolu manyano lukho ngokusisigxina.)

Gen. 1:28: “Wabasikelela uThixo [uAdam noEva], wathi kubo uThixo, Qhamani, nande, niwuzalise umhlaba niweyise; nibe nobukhosi ezintlanzini zolwandle, nasezintakeni zezulu, nasezintweni zonke eziphilileyo ezinambuzelayo emhlabeni.” (Apha kolu manyano kwavakaliswa intsikelelo yelona Gunya liphakamileyo lingokomthetho, bagunyaziswa ukuba neentlobano zesini ibe banikwa isabelo esasiza kwenza ubomi babo bube nentsingiselo.)

Ngaba umntu anganesithembu ukuba umthetho wasekuhlaleni uyakuvumela oko?

1 Tim. 3:2, 12: “Umveleli ngoko umelwe kukuthi abe ngongenakukhalazelwa eyindoda yamfazi mnye, . . . Abalungiseleli mababe ngamadoda abafazi ngabanye.” (La madoda ayengaphathiswanga nje imbopheleleko kodwa ayekwayimizekelo eyayimele ixeliswe ngabanye kwibandla lamaKristu.)

1 Kor. 7:2: “Ngenxa yoomibulo, elowo makabe nowakhe umfazi, athi elowo abe neyakhe indoda.” (Apha akuvunyelwa ukuba umntu abe neqela lamaqabane enoba uyindoda okanye ungumfazi.)

Kutheni le nto uThixo wavumela uAbraham, uYakobi noSolomon ngamnye kubo abe nomfazi ongaphezu komnye?

UYehova akangomyili wesithembu. Wanika uAdam umfazi omnye kuphela. Kamva, uLameki, owayeyinzala kaKayin, wazithabathela abafazi ababini. (Gen. 4:19) Ekuhambeni kwexesha abanye baxelisa umzekelo wakhe, ibe bambi bathabatha iintombi ezingamakhoboka njengamashweshwe. UThixo walunyamezela olu qheliselo, ibe phantsi koMthetho kaMoses wade wayila imilinganiselo yokuqinisekisa ukuphathwa ngokufanelekileyo kwabafazi ababe nolwalamano olunjalo. Oku wakwenza de kwamiselwa ibandla lamaKristu, kodwa ke wayefuna ukuba abakhonzi bakhe babuyele kumlinganiselo awathi wawumisela ngokwakhe e-Eden.

Ngokubhekisele kuAbraham, wathabatha uSarayi (uSara) njengomkakhe. Xa wayemalunga nama-75 eminyaka ubudala waza wacinga ukuba wayengena kuze abe nomntwana, yena wacela umyeni wakhe ukuba abe neentlobano nomkhonzazana wakhe ukuze uSarayi abe nomntwana ongokwasemthethweni ngalo mkhonzazana. UAbraham wenjenjalo, kodwa oku kwakhokelela kwingxabano embi kwindlu yakhe. (Gen. 16:1-4) UYehova walizalisekisa idinga lakhe kuAbraham ‘elingembewu’ ngokuthi kamva ngokungummangaliso abangele uSara akhulelwe. (Gen. 18:9-14) UAbraham akazange athabathe omnye umfazi de kwasemva kokufa kukaSara.—Gen. 23:2; 25:1.

UYakobi waba nesithembu ngenxa yenkohliso kayisezala. UYakobi akazange acinge ngaloo nto xa wemkayo ukuya kufuna umfazi ePadan-aram. Ingxelo yeBhayibhile ngokweenkcukacha ezininzi ibalisa ngosukuzwano olungonwabisiyo olwaluphakathi kwabafazi bakhe.—Gen. 29:18–30:24.

Kuyinto eyaziwa kakuhle ukuba uSolomon wayenabafazi abaninzi kwanamashweshwe. Kodwa asimntu wonke oqondayo ukuba, ngokwenjenjalo, wayevukela umyalelo kaYehova ochazwe ngokucacileyo wokuba uKumkani umele “angazandiseli bafazi, ize ityeke intliziyo yakhe.” (Dut. 17:17) Kwakhona kumele kuqondwe ukuba, ngenxa yempembelelo yabafazi bakhe basemzini, uSolomon waphethukela ekunquleni oothixo bobuxoki waza “wenza okubi emehlweni kaYehova; . . . UYehova ke waba nomsindo kuSolomon.”—1 Kum. 11:1-9.

Ukuba amaqabane akanakuhlala kunye nje eluxolweni, ngaba ukwahlukana kuvumelekile?

1 Kor. 7:10-16: “Ke kaloku abazekileyo nabendileyo ndiyabathethela, phofu ingendim, iyiNkosi; ndithi, Umfazi makangahlukani nendoda (ke ukuba uthe wahlukana nayo, makahlale angendi, okanye makaxolelaniswe nendoda yakhe); indoda mayingamali umfazi wayo. Ke kaloku kwabanye ndithi mna, akutsho iNkosi [kodwa, njengoko indinyana 40 ibonisa, uPawulos wayelathiswe ngumoya oyingcwele], Ukuba kukho mzalwana uthile unomfazi ongakholiweyo, aze umfazi lowo athande ukuhlala naye, makangamali. Nomfazi onendoda engakholiweyo, ize yona ithande ukuhlala naye, makangayali. Kuba indoda leyo ingakholiweyo ingcwalisiwe nguye umfazi, nomfazi lowo ungakholiweyo ungcwalisiwe yiyo indoda; okanye abantwana benu ngebeba baziinqambi; kungoku ke bangcwele. Kodwa ke ukuba lowo ungakholiweyo uyahluka, makahluke; umzalwana nokuba ngudade akabotshelelwe, xa kunjalo; ke uThixo usibizele eluxolweni. Kuba, wazi ngani na, mfazi, ukuba woyisindisa indoda yakho? Wazi ngani na, ndoda, ukuba womsindisa umfazi wakho?” (Kutheni le nto ikholwa beliya kubunyamezela ubunzima lize ngokunyanisekileyo lizabalazele ukumanyanisa umtshato? Kungenxa yokuhlonela imvelaphi engokobuthixo yomtshato nokuba nethemba lokuba ongakholwayo usenokuthi ekuhambeni kwexesha ancedwe abe ngumkhonzi kaThixo oyinyaniso.)

Iyintoni imbono yeBhayibhile ngoqhawulo-mtshato ngokufuna ukuphinda utshate?

Mal. 2:15, 16: “Wugcineni ngoko umoya wenu, ungamnginizeli umfazi wobutsha bakho; kuba ndikuthiyile ukwala, utsho uYehova, uThixo kaSirayeli.”

Mat. 19:8, 9: “Athi kubo [uYesu], UMoses ngenxa yobulukhuni beentliziyo zenu wanivumela ukuba nibale abafazi benu; ke ekuqalekeni bekungenjalo. Ndithi ke kuni, Othe wamala umfazi wakhe, kungengaluhenyuzo [iintlobano zesini ezingaphandle komtshato], wazeka omnye, uyakrexeza.” (Ngoko iqabane elimsulwa livumelekile, kodwa akunto eyimfuneko, ukuqhawula umtshato neqabane ‘elihenyuzileyo.’)

Roma 7:2, 3: “Umfazi owendileyo, ubotshiwe ngumthetho kwindoda yakhe, lo gama idla ubomi; ukuba ke ithe yafa indoda, ukhululekile kuwo umthetho ombophe endodeni. Ngoko ke, ukuba uthe waba kuyimbi indoda, yakubon’ ukuba indoda yakhe isadla ubomi, kothiwa ngumkrexezikazi. Ke ukuba ithe yafa indoda yakhe, woba ukhululekile kuwo umthetho, ukuba angabi mkrexezikazi, ethe waba kuyimbi indoda.”

1 Kor. 6:9-11: “Musani ukulahlekiswa; abenza umbulo [uhenyuzo, NW], nabakhonzi bezithixo, nabakrexezi, nezifebe, namadoda alalanayo, . . . abayi kubudla ilifa ubukumkani bukaThixo. Naye ninjalo ke inxenye yenu; kuloko nahlanjululwayo, kuloko nangcwaliswayo, kuloko nagwetyelwayo egameni leNkosi uYesu, nangoMoya kaThixo wethu.” (Oku kugxininisa ubunzulu balo mcimbi. Abakrexezi abangaguqukiyo abayi kuba nasabelo kuBukumkani bukaThixo. Kanti, abantu ababekade bekrexeza, mhlawumbi bade batshate ngokungafanelekileyo, banokuxolelwa nguThixo baze babe nokuma okucocekileyo kunye naye ukuba baguquka ngokwenyaniso baze babe nokholo kwixabiso ledini likaYesu elihlawulela izono.)

Kutheni le nto uThixo wayevumela umtshato ophakathi komzalwana wokwenyama nodade wabo kwixa elidluleyo?

Ingxelo yeBhayibhile ibonisa ukuba uKayin watshata omnye woodade wabo (Gen. 4:17; 5:4), okanye ngokunokwenzeka umtshana wakhe, yaye uAbram watshata udade wabo ngoyise. (Gen. 20:12) Kodwa kamva, kuMthetho owanikelwa ngoMoses, umanyano lomtshato onjalo lwalwalelwe ngokungqalileyo. (Lev. 18:9, 11) Aluvunyelwanga phakathi kwamaKristu anamhlanje. Kungangenkankulu ukuba kumtshato wezalamane ezisondeleyo kungabikho imizila yemfuza eyonakalisayo eya kudluliselwa kwinzala yabo.

Kutheni le nto umtshato phakathi komzalwana wenyama nodade wawufanelekile nje ekuqalekeni kwembali yoluntu? UThixo wadala uAdam noEva befezekile waza wanenjongo yokuba lonke uluntu luphume kubo. (Gen. 1:28; 3:20) Ngokucacileyo ukutshata kwezalamane ezithile ezisondeleyo, ingakumbi kwizizukulwana ezimbalwa zokuqala, kwakuya kuba yinto eyenzekayo. Nasemva kokuba isono sibonakele, ngokwentelekiso kwakukho ingozi engenkulu kangako yeziphene eziphawulekayo ebantwaneni ebudeni bezizukulwana zokuqala, kuba uhlanga loluntu lwalusondele ngakumbi kwimfezeko eyayinanditshwe nguAdam noEva. Oko kungqinwa lithuba elide elaliphilwa ngabantu ngoko. (Bona iGenesis 5:3-8; 25:7.) Kodwa malunga neminyaka engama-2 500 emva kokuba uAdam wonayo, uThixo wawalela umtshato wombulo. Oku kwalondoloza inzala ibe kwawuphakamisa umlinganiselo wokuziphatha kakuhle ngokwesini kwabakhonzi bakaYehova wangaphezu kowabantu ababebangqongile nababesithi ngelo thuba babandakanyeke kuzo zonke iintlobo zoqheliselo olonakeleyo.—Bona iLevitikus 18:2-18.

Yintoni enokunceda ukuphucula umtshato?

(1) Kukufundisisa iLizwi likaThixo kunye ngokuthe rhoqo nize nithandaze kuThixo nifuna uncedo lokucombulula iingxaki.—2 Tim. 3:16, 17; IMize. 3:5, 6; Fil. 4:6, 7.

(2) Kukuwuxabisa umgaqo wobuntloko. Oku kubeka imbopheleleko enzima kwindoda. (1 Kor. 11:3; Efe. 5:25-33; Kol. 3:19) Kwakhona kufuna umgudu wokunyaniseka emfazini.—Efe. 5:22-24, 33; Kol. 3:18; 1 Pet. 3:1-6.

(3) Kukuba ube nomdla wesini kwiqabane lakho kuphela. (IMize. 5:15-21; Heb. 13:4) Inkxalabo enothando ngeentswelo zeqabane likabani inokunceda ukulondoloza loo mntu nxamnye nesilingo sokwenza okuphosakeleyo.—1 Kor. 7:2-5.

(4) Kukuthetha ngobubele, ngendlela yolwazelelelo omnye komnye; kuphetshwa ukudubula komsindo, ukuba nochuku, namazwi arhabaxa okugxeka.—Efe. 4:31, 32; IMize. 15:1; 20:3; 21:9; 31:26, 28.

(5) Kukukhuthala uze uthembeke ekunyamekeleni indawo yokuhlala intsapho nesinxibo, nasekulungiseleleni izidlo ezinik’ impilo.—Tito 2:4, 5; IMize. 31:10-31.

(6) Kukusisebenzisa ngokuthobekileyo isiluleko seBhayibhile enoba unoluvo lokuba omnye wenza yonk’ into amele ayenze okanye akenjinjalo.—Roma 14:12; 1 Pet. 3:1, 2.

(7) Kukunikela ingqalelo ekukhuleni kweempawu zokomoya ngokobuqu.—1 Pet. 3:3-6; Kol. 3:12-14; Gal. 5:22, 23.

(8) Kukunikela uthando oluyimfuneko, uqeqesho, nemfundiso ebantwaneni, ukuba bakho.—Tito 2:4; Efe. 6:4; IMize. 13:24; 29:15.