UmThendeleko
Ingcaciso: Njengoko kwachazwa liBandla Elingcwele Lezithethe leCawa yamaRoma Katolika, uMthendeleko “—Ulidini apho iDini lomNqamlezo likhuthazwa khona;—Usisikhumbuzo sokufa nokuvuka kweNkosi, eyathi ‘oku kwenzeleni ukundikhumbula’ (Luka 22:19);—Usisidlo esingcwele ekuthi, ngokuhlanganisa uMzimba neGazi leNkosi, Abantu bakaThixo bafumane iingenelo zeDini lePasika, bahlaziye uMnqophiso Omtsha athe uThixo wawenza nomntu ewenzela amathuba onke ngeGazi likaKristu, baze ngokholo nethemba bafanekisele kwangaphambili yaye balindele isidlo sokugqibela kwimbali yoluntu kubukumkani bukaBawo, bevakalisa ukufa kweNkosi ‘kude kube kukufika Kwayo.’” (Eucharisticum Mysterium, Meyi 25, 1967) Le yindlela iCawa yamaKatolika ekwenza ngayo oko ikuqonda kuyinto eyenziwa nguYesu Kristu kwiSidlo Sokugqibela.
Ngaba isonka newayini ngokwenene ziguqulelwa ekubeni ngumzimba negazi likaKristu?
“KuVakaliso Olupheleleyo Lokholo” olwalungoJuni 30, 1968, uPopu Paul VI wavakalisa oku: “Sikholelwa kwelokuba njengoko isonka newayini zadluliswa yiNkosi kwiSidlo Sokugqibela zaguqulelwa ekubeni nguMzimba Wakhe neGazi Lakhe ezazimele zinikelwe ngenxa yethu emnqamlezweni, ngoko isonka newayini ezinikelwa ngumfundisi ziyaguquka zibe nguMzimba neGazi likaKristu ohlaliswe etroneni ngendlel’ ezukileyo ezulwini, ibe Thina sikholelwa kwelokuba ubukho obufihlakeleyo beNkosi, ngokubonakala kwezo nto ezithi kwiingqiqo zethu zibonakale zifana ngasemva nangaphambi Kokuhanjiswa Kwazo, buyinyaniso, bobokwenene yaye bukho ngokupheleleyo. . . . Le nguqulelo ifihlakeleyo ngokufaneleke gqitha iCawa iyibiza ngokuthi yitransubstantiation.” (Official Catholic Teachings—Christ Our Lord, Wilmington, N.C.; 1978, Amanda G. Watlington, iphe. 411) Ngaba iZibhalo Ezingcwele ziyavumelana naloo nkolelo?
Wayethetha ukuthini uYesu xa wathi, “Ngumzimba wam lo,” “Ligazi lam eli”?
Mat. 26:26-29: “Bakubon’ ukuba bayadla ke, uYesu wasithabatha isonka, wathi akusikelela waqhekeza, wanika abafundi, wathi, Thabathani nidle; ngumzimba wam lo. Wayithabatha nendebe, wabulela, wabanika, esithi, Selani kuyo nonke; kuba ligazi lam eli lomnqophiso omtsha, eliphalala ngenxa yabaninzi, ukuze kuxolelwe izono. Ndithi ke kuni, Andisayi kusela kwesi siqhamo somdiliya, kuthabathela kweli xesha, kude kube yiloo mini sukuba ndisisela nani sisitsha ebukumkanini bukaBawo.”
Ngokubhekisele kwibinzana elithi “ngumzimba wam lo” nelithi “ligazi lam eli,” okulandelayo kuyinto ephawulekayo: EkaMo ifundeka ngokuthi, “oku kuthetha umzimba wam,” “oku kuthetha igazi lam.” (Akekeliswe sithi.) INW ifundeka ngokufanayo. ILEF la mabinzana iwaguqulela ngokuthi, “oku kumela umzimba wam,” “oku kumela igazi lam.” (Akekeliswe sithi.) Ezi nguqulelo ziyavumelana noko kuchazwe kumongo, kwindinyana 29, kwiindidi ezahlukahlukeneyo zohlelo lwamaKatolika. IBX ifundeka ngolu hlobo: “Andisayi kusela kwesi siqhamo somdiliya, kuthabathela kweli xesha, kude kube yiloo mini sukuba ndisisela nani sisitsha ebukumkanini bukaBawo.” (Akekeliswe sithi.) ICC, NAB, Dy nazo zibonisa uYesu ebhekisela koko kwakukwindebe ‘njengesi siqhamo somdiliya,’ ibe oko kwenzeka emva kokuba uYesu wayethe, “Ligazi lam eli.”
Qwalasela ibinzana elithi “ngumzimba wam lo” nelithi “ligazi lam eli” ngokuvisisana nolunye ulwimi olucacileyo olusetyenziswa eZibhalweni. UYesu wakwathi, “Ndim ukhanyiselo lwehlabathi,” “Ndim isango lezimvu,” “Mna ndingumdiliya wenyaniso.” (Yoh. 8:12; 10:7; 15:1) Ngaba kukho nalinye kula mabinzana elalithetha inguqulelo engummangaliso?
Kweyoku-1 yabaseKorinte 11:25, umpostile uPawulos wabhala oku ngeSidlo Sangokuhlwa Sokugqibela waza wavakalisa kwaiingcamango ezifanayo ngamazwi ahluke nje kancinane. Kunokuba acaphule uYesu njengothetha oku ngendebe, “Selani kuyo nonke; kuba ligazi lam eli lomnqophiso,” wakuchaza ngale ndlela: “Le ndebe ingumnqophiso omtsha osegazini lam.” Ngokuqinisekileyo oko akuzange kuthethe ukuba indebe ngandlela ithile yayiguqulwe ngokungummangaliso yaza yaba ngumnqophiso omtsha. Ngaba akufanelekanga ngakumbi ukugqiba ngelokuba okwakukwindebe kwakumela igazi likaYesu ekwathi ngalo umnqophiso omtsha waba ngogunyazisiweyo?
Wayethetha ukuthini uYesu ngamazwi akhe akuYohane 6:53-57?
“Wathi ngoko uYesu kuwo, Inene, inene, ndithi kuni, Ukuba anithanga niyidle inyama yoNyana woMntu, nilisele igazi lakhe, aninabo ubomi kuni. Lowo uyidlayo eyam inyama, alisele elam igazi, unobomi obungunaphakade; ndaye mna ndiya kumvusa ngomhla wokugqibela. Kuba inyama yam ikukudla, inyaniso; negazi lam liluselo, inyaniso. Lowo uyidlayo eyam inyama, alisele elam igazi, uhleli kum, nam ndihleli kuye. Njengoko uBawo ophilileyo wandithumayo, ndibe nam ndiphilile ngenxa enoBawo, lowo undidlayo kwayena uya kuphila ngam.”—Yoh. 6:53-57.
Ngaba oku kumele kuqondwe njengokuthetha ukuba ngokoqobo kwakumele badle inyama kaYesu baze basele negazi lakhe? Ukuba kunjalo, uYesu makube wayemela into eyayikukuvukelwa koMthetho uThixo awayewunike uSirayeli ngoMoses. Loo Mthetho wakwalela ukudliwa kwalo naluphi na uhlobo lwegazi. (Lev. 17:10-12) Ngokwahlukileyo ekumeleni into enjalo, uYesu wathetha ngamandla ngokuchasene nokwaphulwa kwazo naziphi na izinto ezifunekayo zoMthetho. (Mat. 5:17-19) Ngoko into uYesu awayeyicinga kumele ukuba yayikukudliwa nokuselwa kwesonka newayini ngokufuziselayo, ngokuba nokholo kwixabiso ledini awalinikela njengomntu ofezekileyo.—Thelekisa uYohane 3:16; 4:14; 6:35, 40.
Ngaba uYesu wafundisa abafundi bakhe ukuba bangakhumbuli nje ukufa kwakhe kodwa benze isithethe esasiza kuthi ngokwenene sihlaziye idini lakhe?
Ngokutsho kweThe Documents of Vatican II: “KwiSidlo Sangokuhlwa Sokugqibela, ngobusuku Awangcatshwa ngabo, uMsindisi wethu wamisela iDini loMthendeleko eyayileloMzimba neGazi Lakhe. Oku wakwenza ukuze akhuthaze idini loMnqamlezo . . . ”—(New York, 1966), yahlelwa nguW. M. Abbott, S. J., iphe. 154; akekeliswe sithi.
IThe Catholic Encyclopedia ithi: “ICawa icinga ukuba uMthendeleko umele ujongwe ‘njengedini lokwenyaniso nelifanelekileyo’ . . . Noko ke, umthombo oyintloko wemfundiso yethu, sisithethe, esathi kwakumaxesha akuqala sabonakalisa ukuba iDini loMthendeleko linamandla okwenza isicelo.”—(1913), Umqu. X, iphe. 6, 17.
UYesu wathi: “Oku kwenzeleni ukundikhumbula.” (Luka 22:19; 1 Kor. 11:24) KuLuka 22:19, iTE neBX zifundeka ngolu hlobo: “Oku kwenzeleni ukundikhumbula.” IAP ifundeka ngolu hlobo: “Kwenzeni oku kube kukukhunjulwa kwam.” UYesu akazange athi into awayenzayo kwiSidlo Sangokuhlwa Sokugqibela kwakulidini lakhe okanye akazange athi abafundi bakhe babemele bahlaziye idini lakhe.
Heb. 9:25-28: “Kananjalo akangenanga ukuze azisondeze futhi, njengokuba umbingeleli omkhulu [ongumYuda] ebengena kweyona ngcwele iminyaka ngeminyaka, enegazi lenye into; okanye ange emelwe kukuba abe ebeve ubunzima futhi, kuseloko lasekwayo ihlabathi. Ke uthe ngoku, . . . wabonakalaliswa kwaba kanye [kwakanye yaye ebonakalela amaxesha onke, JB], ukuba atshitshise isono ngelilelakhe idini. Ke kwanjengokuba ke abantu bemiselwe ukuba bafe kube kanye, ize ke emveni koko ibe ngumgwebo: ngokunjalo uKristu, [usondezwe] kwaba kanye.”
Ngaba konke ‘kuyimfihlelo nje engenakuqondakala’?
IBhayibhile iyathetha ngeemfihlelo zikaThixo, okanye iimfihlelo ezingcwele. Kodwa akukho nanye yezi engqubanayo neenyaniso zeZibhalo ezichazwe ngokucacileyo. Ethetha ngabo babeka izithethe zabo phambi kweZibhalo, uYesu wathi: “Bahanahanisindini, watyapha ukuprofeta ngani uIsaya, esithi, Aba bantu basondela kum ngomlomo wabo, bandibeke ngemilebe yomlomo wabo; kanti intliziyo yabo ikude lee kum; bafumana ke bendihlonela, befundisa iimfundiso eziyimithetho yabantu.”—Mat. 15:7-9.
Ngaba uYesu wayethetha ukuba esi sikhumbuzo sasimele sigcinwe mhlawumbi yonk’ imihla okanye veki zonke?
IBasic Catechism ithi: “Imisebenzi Ekhethekileyo YamaKristu angamaKatolika” iquka “ukuba nesabelo kuMthendeleko ngazo zonke iiCawa nangeentsuku ezingcwele ezizezemfanelo.” (Boston, 1980, iphe. 21) “Enyanisweni abathembekileyo bakhuthazelwa ukuba nesabelo kuMthendeleko baze bawufumane rhoqo, nangazo zonke iintsuku.” The Teaching of Christ—A Catholic Catechism for Adults, Uhlelo olushwankathelweyo (Huntington, Ind.; 1979), iphe. 281.
Ngaba zonke iimbekiselo zeZibhalo ezithetha “ngokuqhekezwa kwesonka” zibonisa ukuba kwakusenziwa isikhumbuzo sokufa kukaKristu? (Ize. 2:42, 46; 20:7) UYesu ‘wasiqhekeza isonka’ xa kwakusabiwa ukudla esidlweni kwanangaphambi kweSidlo Sangokuhlwa Sokugqibela. (Marko 6:41; 8:6) Isonka esasisetyenziswa ngamaYuda ngelo xesha yayingesiso eso abantu abaninzi abaqheleneyo naso namhlanje. Xa besidla, bebedla ngokuqhekeza inxalenye ethile.
UYesu akazange ayithethe ngokungqalileyo into yokuba iSikhumbuzo sokufa kwakhe sasimele sigcinwe ngokufuthi kangakanani na. Noko ke, wasimisela ngomhla wePasika yamaYuda, ekwathi endaweni yayo abafundi bakhe bagcina iSikhumbuzo sokufa kukaKristu. IPasika yayisisiganeko saminyaka le, esasisenziwa ngoNisan 14. Ngokufanayo, uMthendeleko wamaYuda Wezonka Ezingenagwele, uMthendeleko Weeveki Ngeeveki (iPentekoste), uMthendeleko Weminquba okanye Wokuhlanganisa, noMhla Wentlawulelo yonke yayiqhutywa kanye ngonyaka.
Ngaba amazwi oMthendeleko ayayikhulula imiphefumlo kwintlambululo-miphefumlo?
IThe Teaching of Christ—A Catholic Catechism for Adults ithi: “Igama elithi ‘intlambululo-miphefumlo’ alikho eBhayibhileni, ibe nemfundiso yentlambululo-miphefumlo ayifundiswa ngokupheleleyo apho. . . . Imisebenzi yaBaseki becawa ineembekiselo ezininzi kungekuphela nje kubukho bendawo yentlambululo-miphefumlo, kodwa ikwabhekisela nakwisibakala sokuba lowo ufe ethembekile unokuncedwa ngemithandazo yabaphilileyo, ingakumbi liDini loMthendeleko.”—Iphe. 347, 348.
Zithetha ngemeko yabafileyo, iZibhalo Ezingcwele zithi: “Abadla ubomi bayazi ukuba baya kufa; ke bona abafileyo abazi lutho.” (INtshu. 9:5) “Umphefumlo [“umphefumlo,” Kx; “umntu,” JB] owonayo, kuya kufa wona.” (Hez. 18:4) (Bona kwanephepha 106, 107, phantsi komxholo othi “UkuFa.”)