Kutheni Ufanele Ucinge Ngokuba Nentsimi Yakho?
1. Kuthetha ukuthini ukuba nentsimi yakho?
1 Kuthetha ukuthini ukuba nentsimi yakho? Ukuba ukwibandla elinentsimi enkulu, usenokunqwenela ukuba nentsimi yakho, mhlawumbi ekufutshane nalapho uhlala khona. Incwadi ethi Ulungelelwano kwiphepha 103, ithi: “Ukuba nentsimi ekwindawo onokuyifikelela lula kuya kukwenza ukwazi ukulisebenzisa kakuhle ixesha olinikela kwinkonzo yasentsimini. Kwaye unokucela nomnye umvakalisi ukuba asebenze nawe kuloo ntsimi yakho.”
2. Unokuyisebenza njani intsimi yakho ngoxa uxhasa iqela oshumayela nalo?
2 Ukuxhasa Iqela Oshumayela Nalo: Ukuba intsimi yakho ikufutshane nendawo osebenza kuyo, unokushumayela kuyo ngexesha lesidlo sasemini okanye ngaphambi kokuba ugoduke, mhlawumbi nomnye umvakalisi osebenza kufutshane nendawo osebenza kuyo. Ukuba ikufutshane nekhaya lakho, unokushumayela kuyo nentsapho yakho ngorhatya. Kakade ke, ukuba akukwazi ukubakho kwintlanganiso yenkonzo yasentsimini, ufanele uthandaze kuYehova ngaphambi kokuba uqalise ukushumayela. (Fil. 4:6) Ngaphezu koko, ufanele ulilungelelanise kakuhle ixesha olichitha kwintsimi yakho nelo ulichitha uxhasa iqela lebandla. Ngokukodwa ngeempela-veki, xa abantu abaninzi beza kuya entsimini, kuhle ukuba nawe ulixhase iqela oshumayela nalo.
3. Ziziphi iingenelo zokuba nentsimi yakho?
3 Iingenelo: Ukuba unentsimi yakho, unendawo osebenza kuyo nanini na ucwangciso lwakho lukuvumela. Unokuhamba umgama omfutshane uze uchithe ixesha elingakumbi ushumayela. Eli lungiselelo libhetyebhetye lenza abanye bakwazi ukuba ngoovulindlela abangabancedani okanye oovulindlela abathe ngxi. Ekubeni abantu abanomdla bekufutshane nawe, kulula ukubabuyela nokubaqhubela izifundo zeBhayibhile. Abaninzi baye bafumanisa ukuba, ukuba nentsimi yabo kubanceda baqhelane nabaninimzi, babenze babathembe, ngokukodwa ukuba loo ntsimi bayakwazi ukuyigubungela ngaphezu kwesihlandlo esinye ngaphambi kokuba bayidlulisele kwabanye. Ngaba ukuba nentsimi yakho kunokukunceda wena nentsapho yakho nibufeze ngokupheleleyo ubulungiseleli benu?—2 Tim. 4:5.