IsiProfeto
Ingcaciso: Sisigidimi esiphefumlelweyo; kukutyhilwa kokuthanda nenjongo kaThixo. Isiprofeto sisenokuba kukuchazwa kwangaphambili kwento eza kuza, imfundiso yokuziphatha ephefumlelweyo, okanye ukuchazwa komyalelo okanye umgwebo kaThixo.
Ziziphi iziprofeto ezibhalwe eBhayibhileni esele zizalisekile?
Ngokweminye imizekelo, qwalasela umxholo omkhulu othi “IBhayibhile,” “ImiHla Yokugqibela,” nothi “ImiHla Yeziganeko,” kwanencwadi ethi “All Scripture Is Inspired of God and Beneficial,” iphepha 343-346.
Ziziphi iziprofeto ezithile ezibalaseleyo zeBhayibhile eziseza kuzaliseka?
1 Tes. 5:3: “Kuba xenikweni baya kuthi, Luxolo nokunqaba, oko baya kufikelwa yintshabalaliso ngebhaqo, kwanjengenimba komithiyo; baye bengayi kukha basinde.”
ISityhi. 17:16: “Iimpondo ezilishumi owazibonayo ziserhamncweni, ngabo baya kulithiya ihenyukazi [iBhabhiloni Enkulu], baliphanzise, balihlube, bayidle inyama yalo, balitshise ngomlilo.”
Hez. 38:14-19: “Uthi kuGogi, Itsho iNkosi uYehova ukuthi, Akuyi kuba njalo na ngaloo mini, ekuhlaleni kwabantu bam amaSirayeli [okomoya] bekholosile, uya kuyazi loo nto? Uya kuphuma endaweni yakho, ezingontsini zasentla, wena nezizwe ezininzi ezinawe, . . . Kuya kuthi ngaloo mini, ngemini yokuwufikela kukaGogi umhlaba wakwaSirayeli, itsho iNkosi uYehova, bunyuke ubushushu bam emathatheni am. Ke ndithethe ndinobukhwele, ndinomlilo wokuphuphuma komsindo wam.”
Dan. 2:44: “Ubukumkani [obumiselwe nguThixo] . . . buya kuzicola buzigqibe zonke ezo zikumkani [zabantu], bona bume ngonaphakade.”
Hez. 38:23: “Ndiya kuzikhulisa, ndizingcwalise, ndizazise ngokwam emehlweni eentlanga ezininzi; zazi ukuba ndinguYehova.”
ISityhi. 20:1-3: “Ndabona isithunywa sezulu, sisihla siphuma emazulwini, sinesitshixo senzonzobila, nomxokelelwano omkhulu esandleni saso. Sayibamba inamba, loo nyoka yakudala enguMtyholi, uSathana ke, sayikhonkxa iminyaka eliwaka. Sayiphosa enzonzobileni, sayivalela, satywina ngaphezu kwayo, ukuze ingabi sazilahlekisa iintlanga, ide izaliseke iminyaka eliwaka; emva koko imelwe kukukhululwa ixeshana elincinane.”
Yoh. 5:28, 29: “Musani ukumangaliswa kuko oko; ngokuba kuza ilixa abaya kuthi ngalo bonke abasemangcwabeni balive ilizwi lakhe; baphume ke: abo benza izinto ezilungileyo beze eluvukweni lobomi; nabo ke benza izinto ezimbi, beze eluvukweni lokugwetywa.”
ISityhi. 21:3, 4: “Ndeva izwi elikhulu liphuma emazulwini, lisithi: Yabona, umnquba lo kaThixo unabantu; uya kuhlala nabo emnqubeni, bona babe ngabantu bakhe, yena uThixo abe nabo, enguThixo wabo; azisule uThixo zonke iinyembezi emehlweni abo, kungabi sabakho kufa, kungabi sabakho nasijwili, nakukhala, nantlungu; ngokuba izinto zokuqala zigqithile.”
1 Kor. 15:24-28: “Kwandule ke ukubakho isiphelo, xa athe wabunikela ubukumkani kuye uThixo uYise, . . . Xa ke zithe zathotyelwa phantsi kwakhe zonke izinto, uya kwandula noNyana ngokwakhe athotyelwe phantsi kwalowo wazithobela phantsi kwakhe zonke izinto, ukuze uThixo abe zizinto zonke kubo bonke.”
Kutheni le nto amaKristu amele abe nomdla kakhulu kwiziprofeto zeBhayibhile?
Mat. 24:42: “Phaphani ngoko; ngokuba ningazi ukuba lilixa liphi na eza ngalo iNkosi yenu.”
2 Pet. 1:19-21: “Sinalo nelona lizwi liqinisekileyo [ngenxa yoko kwenzekayo ekwenziweni kumila kumbi kukaYesu] elilelobuprofeti, enityaphayo ukulinyamekela, . . . Kuba akukhanga kubekho siprofeto ngokuthanda komntu; bathi abantu abangcwele bakaThixo bathetha beqhutywa nguMoya oyiNgcwele.”
IMize. 4:18: “Umendo wamalungisa unjengokukhanya komso, okuya kuba mhlophe ngokuba mhlophe, kude kube semini enkulu.”
Mat. 4:4: “Akaphili ngasonka sodwa umntu, uphila ngamazwi onke aphuma emlonyeni kaThixo.” (Oko kuquka amadinga akhe esiprofeto azukileyo.)
2 Tim. 3:16: “Sonke isibhalo, siphefumlelwe nguThixo nje, sikwancedela ukufundisa, ukohlwaya, ukululeka, ukuqeqesha okusebulungiseni.” (Ngaloo ndlela lonke iLizwi elibhalwe nguThixo kufuneka silifundisise ngokunyanisekileyo.)
Ukuba Ubani Uthi—
‘Usibalaselisa gqitha isiprofeto. Konke okufunekayo kukwamkela uKristu njengoMsindisi wakho uze uphile ubomi obuhle bobuKristu’
Usenokuphendula uthi: ‘Ukuxabisa indima kaYesu Kristu ngokuqinisekileyo kubalulekile. Kodwa ubusazi na ukuba esinye isizathu esenza amaYuda enkulungwane yokuqala asilela ukumamkela yayisesokuba akazange anikele ingqalelo efanelekileyo kwisiprofeto?’ Mhlawumbi usenokongeza uthi: (1) ‘Iziprofeto ezikwiZibhalo zesiHebhere zazilixele kwangaphambili ixesha laxa uMesiya (uKristu) awayeya kuvela ngalo noko wayeya kukwenza. Kodwa amaYuda ngokubanzi akazange akuthobele oko kwathethwa zezo ziprofeto. Ayeneengcamango ezizezawo ngoko kwakumele kwenziwe nguMesiya, ibe ngenxa yoko amchasa uNyana kaThixo. (Bona iphepha 397, 398, phantsi kothi “UYesu Kristu.”)’ (2) ‘Namhlanje siphila kwixesha laxa uKristu eqalisile ukulawula njengoKumkani wasezulwini ibe wahlula abantu bazo zonke iintlanga, ebahlulela ubomi okanye intshabalalo. (Mat. 25:31-33, 46) Kodwa abantu abaninzi bakhangele kwenye into.’
Okanye unokuthi: ‘Ndiyavuma ukuba ukuba ngumKristu olungileyo kubalulekile. Kodwa ngaba bendiya kuba ngumKristu olungileyo ukuba bendenze ezinye zezinto uYesu awazifundisayo kodwa ndakutyeshela oko wathi simele sikubeke kuqala ebomini? . . . Phawula awakuthethayo njengoko kubhalwe apha kuMateyu 6:33.’ Mhlawumbi usenokongeza uthi: ‘Akuyonyaniso na ukuba uYesu wasifundisa ukuba sibuthandazele obo Bukumkani, de sibubeke ngaphambi kokucela kwethu ukuxolelwa izono ngenxa yokukholwa kwethu kuye njengoMsindisi? (Mat. 6:9-12)’