UYehova Uyayixabisa Inkonzo Yakho Yomphefumlo Uphela
“Nakuphi na enikwenzayo, kusebenzeni ngomphefumlo uphela ngokungathi kukuYehova, kungekhona kubantu.”—KOLOSE 3:23.
1, 2. (a) Liliphi ilungelo elingenakulinganiswa nanto esinokuba nalo? (b) Kutheni maxa wambi sisenokungakwazi ukwenza konke esinqwenela ukukwenza ekukhonzeni uThixo?
UKUKHONZA uYehova lilungelo elingenakulinganiswa nanto esinokuba nalo. Ngesizathu esivakalayo, lo lindixesha ebethe gqolo ekhuthaza amaKristu ukuba azibhokoxe kubulungiseleli, ade akhonze “ngokuzele ngakumbi” nanini na enako. (1 Tesalonika 4:1) Phofu ke, asisoloko sikwazi ukwenza konke oko iintliziyo zethu zilangazelela ukukwenza ekukhonzeni uThixo. Omnye udade ongatshatanga owabhaptizwa kwiminyaka engama-40 eyadlulayo uthi: “Iimeko zam zindinyanzela ukuba ndiphangele ixesha elizeleyo. Isizathu sokuba ndiphangele, asikokunxiba impahla engayiwayo okanye ndiye kupholelwa ngamalanga ekhefini elifuna imali eninzi, kodwa ndenzela nje ukunyamekela iintswelo zam, eziquka iindleko zamayeza nezokunyamekela amazinyo. Ndivakalelwa kukuba uYehova ndimkrwelela nje intshela yoko ndinako.”
2 Ukuthanda uThixo kusenza sifune ukwenza konke okusemandleni ethu kumsebenzi wokushumayela. Kodwa iimeko zobomi zisoloko zingumqobo koko sinokukwenza. Ukunyamekela ezinye iimbopheleleko ezingokweZibhalo, kuquka iimbopheleleko zentsapho, kusenokulixathula kanobom ixesha namandla ethu. (1 Timoti 5:4, 8) Kula ‘maxesha amanqam ekunzima ukuqhubana nawo,’ ubomi bulucelomngeni ngeyona ndlela. (2 Timoti 3:1) Xa sisoyiswa kukwenza konke esingathanda ukukwenza kubulungiseleli, sisenokuba nendawana yokukhathazeka. Sisenokude sizibuze enoba uThixo uyakholiswa lunqulo lwethu kusini na.
Ukuthandeka Kwenkonzo Yomphefumlo Uphela
3. Yintoni uYehova ayilindele kuthi sonke?
3 KwiNdumiso 103:14, iBhayibhile isiqinisekisa ngobubele ngelokuba uYehova “uyakwazi yena ukubunjwa kwethu, ekhumbula ukuba siluthuli.” Ngaphezu kwakhe nabani na omnye, uzazi ukusuka nokuhlala iintsilelo zethu. Akafuni okungaphezu kwamandla ethu. Yintoni ke ayilindele kuthi? Ulindele oko kunokunikelwa nguye nabani na kuthi, kungakhathaliseki ukuba ukweyiphi na imeko ebomini: “Nakuphi na enikwenzayo, kusebenzeni ngomphefumlo uphela ngokungathi kukuYehova, kungekhona kubantu.” (Kolose 3:23) Ewe, uYehova ulindele ukuba—sonke—simkhonze ngomphefumlo uphela.
4. Kuthetha ukuthini ukukhonza uYehova ngomphefumlo uphela?
4 Kuthetha ukuthini ukukhonza uYehova ngomphefumlo uphela? Ibinzana lesiGrike eliguqulelwe ngokuthi “umphefumlo uphela” ngokoqobo lithetha “ngokusuka emphefumlweni.” Igama elithi “umphefumlo” libhekisela kumntu ephela, kumandla omzimba nawengqondo yakhe yonke. Ngaloo ndlela ukukhonza ngomphefumlo uphela kuthetha ukunikela ngeziqu zethu, sisebenzisa bonke ubuchule esinabo yaye sikhupha naselugcinweni amandla siwanikele kwinkonzo kaThixo. Ngamafutshane, kuthetha ukwenza konke okunokwenziwa ngumphefumlo wethu.—Marko 12:29, 30.
5. Umzekelo wabapostile usibonisa njani ukuba asinakwenza okufanayo kubulungiseleli?
5 Ngaba ukukhonza ngomphefumlo uphela kuthetha ukuba sonke simele sibe nomlinganiselo ofanayo koko sikwenzayo kubulungiseleli? Ingayintsomi leyo, kuba iimeko namandla omphefumlo ngamnye zahlukile. Khawucinge nje ngabapostile abathembekileyo bakaYesu. Umlinganiselo woko babekwenza wawungafani. Ngokomzekelo, akukho nto ingako siyaziyo ngabanye abapostile, abanjengoSimon umKananayi noYakobi unyana ka-Alfeyu. Mhlawumbi zazimbalwa izinto ababezenza njengabapostile. (Mateyu 10:2-4) Ukanti, uPetros wayethwele iimbopheleleko ezininzi nezinzima—kuba, uYesu wada wamnika ‘nezitshixo zobukumkani’! (Mateyu 16:19) Sekunjalo, uPetros akazange abekwe emaqhuzwini kunabanye. Xa uYohane wabona umbono weYerusalem Entsha kwiSityhilelo (malunga nowama-96 C.E.), wabona amatye esiseko ali-12 ibe kuwo kubhalwe ‘amagama alishumi elinesibini abapostile abalishumi elinesibini.’a (ISityhilelo 21:14) UYehova wayeyixabisile inkonzo yabapostile xa bebonke, nangona kubonakala ukuba bambi babenemisebenzi ethe kratya kuneyabanye.
6. Kumzekeliso kaYesu womhlwayeli, kwenzeka ntoni kwimbewu ehlwayelwe “emhlabeni omhle,” yaye yiyiphi imibuzo ephakamayo?
6 Ngokufanayo ke, uYehova akalindelanga ukuba sonke sibe nomlinganiselo ofanayo wokushumayela. UYesu wakuchaphazela oku kumzekeliso wakhe womhlwayeli, apho afanisa umsebenzi wokushumayela nokuhlwayela imbewu. Le mbewu yawa kwiintlobo ngeentlobo zomhlaba, nto leyo efanekisela iimeko ngeemeko zentliziyo ezibonakaliswa ngabo basivayo isigidimi. UYesu wathi: “Leyo ke ihlwayelwe emhlabeni omhle, lo ngulowo ulivayo ilizwi aze afumane ingqiqo yalo, othwala ngokwenene isiqhamo aze avelise, lo ngokuphindwe kalikhulu, lowa amashumi amathandathu, omnye amashumi amathathu.” (Mateyu 13:3-8, 18-23) Siyintoni esi siqhamo, yaye kutheni siveliswa ngomlinganiselo ongafaniyo?
7. Siyintoni isiqhamo sale mbewu ihlwayelweyo, yaye kutheni siveliswa ngomlinganiselo ongafaniyo?
7 Ekubeni le mbewu ihlwayelwayo ‘ililizwi lobukumkani,’ ukuthwala isiqhamo kubhekisela ekusasazweni kwelo lizwi, ekuthetheni ngalo kwabanye. (Mateyu 13:19) Umlinganiselo wesiqhamo esiveliswayo awufani—bambi bavelisa amashumi amathathu ukusa kwikhulu—kuba amandla neemeko zabantu azifani. Umntu ophile qete nonomxhino usenokukwazi ukuchitha ixesha elingakumbi eshumayela kunomntu ogqitywe amandla yimpilo enkenenkene okanye ototobayo kukwaluphala. Umntu oselula ongatshatanga nongaxinwanga ziimbopheleleko zentsapho usenokumodlula lee umntu ekufuneka asebenzele intsapho ixesha elizeleyo.—Thelekisa IMizekeliso 20:29.
8. UYehova ubajonga njani abo banikela ubuncwane obunokunikelwa yimiphefumlo yabo?
8 NgokukaThixo, ngaba umntu ozinikele ngomphefumlo uphela ovelisa amashumi amathathu akazinikelanga njengalowo uvelisa ikhulu? Nakanye! Umlinganiselo wesiqhamo usenokungafani, kodwa uYehova uvuyiswa nje kukuba loo nkonzo ibobona buncwane bunokunikelwa yimiphefumlo yethu. Khumbula kaloku, ezi ziqhamo zahlukeneyo ziphuma kwiintliziyo ‘ezingumhlaba omhle.’ Ibinzana lesiGrike (elingu-ka·losʹ) eliguqulelwe ngokuthi “omhle” lichaza into “ethandekayo” ‘nechwayitisa intliziyo, nebukekayo.’ Hayi indlela ekuthuthuzela ngayo ukwazi ukuba xa sisenza okusemandleni ethu, iintliziyo zethu ziyathandeka emehlweni kaThixo!
Masingazithelekisi Nabanye
9, 10. (a) Iintliziyo zethu zisenokusenza sibe nayiphi ingcinga engakhiyo? (b) Umzekeliso okweyoku-1 kwabaseKorinte 12:14-26 ubonisa njani ukuba uYehova akasithelekisi nabanye koko sikwenzayo?
9 Noko ke, iintliziyo zethu ezingafezekanga zisenokusibonisa izinto ngenye indlela. Zisenokuthelekisa inkonzo yethu neyabanye. Zisenokusicingisa oku, ‘Abanye bandodlula lee kubulungiseleli. Angavuyiswa njani uYehova yinkonzo yam?’—Thelekisa eyoku-1 kaYohane 3:19, 20.
10 Iingcinga neendlela zikaYehova ziphakame gqitha kunezethu. (Isaya 55:9) Eyoku-1 kwabaseKorinte 12:14-26 isibonisa indlela uYehova ayijonga ngayo imigudu yabantu ngokuthi ifanise ibandla nomzimba onamalungu amaninzi—amehlo, izandla, iinyawo, iindlebe, njalo njalo. Khawucingisise ngomzimba wokoqobo okomzuzwana. Hayi indlela ebekuya kuba kukuzintwanisa ngayo ukuthelekisa amehlo nezandla zakho okanye iinyawo neendlebe zakho! Lungu ngalinye linomsebenzi walo, ukanti onke la malungu aluncedo yaye abalulekile. Ngokufanayo, uYehova uyixabisile inkonzo yakho yomphefumlo uphela enoba abanye bayakodlula okanye uyabodlula.—Galati 6:4.
11, 12. (a) Kutheni abanye besenokuziva ‘bebuthathaka’ okanye ‘bengabekekanga kangako’? (b) UYehova uyijonga njani inkonzo yethu?
11 Ngenxa yokudodotyaliswa kukwaphuka kwempilo, kukuhamba kweminyaka, okanye ezinye iimeko, maxa wambi bambi kuthi basenokuziva ‘bebuthathaka’ okanye ‘bengabekekanga kangako.’ Kodwa uYehova akazijongi njalo izinto. IBhayibhile isixelela oku: “Amalungu omzimba abonakala ebuthathaka ngakumbi ayimfuneko, neenxalenye . . . esicinga ukuba azibekekanga kangako, ezi sizingqonga ngembeko enkulu ngakumbi . . . Noko ke, uThixo wawumanya umzimba, enikela imbeko kakhulu ngakumbi kwinxalenye eyayinentswelo.” (1 Korinte 12:22-24) Ngoko mntu ngamnye unako ukuba ngoxabisekileyo kuYehova. Uyixabisile inkonzo esiyenza ngokwamandla ethu. Ngaba intliziyo yakho ayikwenzi ufune ukwenza konke okusemandleni akho ekukhonzeni uThixo onolwazelelelo nonothando?
12 Ngoko, into ebalulekileyo kuYehova asikokulinganisa abanye kodwa kukwenza oko—umphefumlo wakho—unokukwenza. Umzekelo wendlela uYehova ayixabisa ngayo inkonzo yomntu ngamnye siwubona kwindlela uYesu awawaphatha ngayo amabhinqa amabini awahluke gqitha xa ubomi bakhe basemhlabeni babusiya esiphelweni.
Isipho ‘Esixabiso Likhulu Kakhulu’ Sebhinqa Elinoxabiso
13. (a) Kwakusenzeka ntoni ngexesha uMariya agalela ioli eqholiweyo kwintloko nakwiinyawo zikaYesu? (b) Lalilingakanani ixabiso laloo oli kaMariya?
13 Ngengokuhlwa yangoLwesihlanu, ngoNisan 8, uYesu wagaleleka kwelaseBhetani, idolophana ekuloo maxethuka akwimpuma yeNtaba yemiNquma, malunga neekhilomitha ezintathu ukusuka eYerusalem. UYesu wayenabahlobo abasenyongweni kule dolophu—uMariya, uMartha nomntakwabo, uLazaro. UYesu wayekhe watyelela kwelo khaya, mhlawumbi izihlandlo eziliqela. Kodwa ngenjikalanga yangoMgqibelo, uYesu nabahlobo bakhe babethe nqwadalala kwikhaya likaSimon, owayesakuba sisiqhwala nekusenokwenzeka ukuba waphiliswa nguYesu. Uthe uYesu esathe zava etafileni, wasuka uMariya wenza isenzo sokuthobeka esabonisa indlela awayeyithanda ngokunzulu ngayo loo ndoda yavusa umntakwabo. Wavula iflaski eneoli yobulawu, “exabiso likhulu kakhulu.” Yayinexabiso elikhulu ngokwenene! Yayixabisa iidenariyo ezingama-300, mali leyo elingana nomvuzo wonyaka. Wagalela le oli inevumba elimyoli kwintloko nakwiinyawo zikaYesu. Wazisula zoma iinyawo zale ndoda ngeenwele zakhe.—Marko 14:3; Luka 10:38-42; Yohane 11:38-44; 12:1-3.
14. (a) Benza ntoni abafundi besakubona oko kwenziwa nguMariya? (b) UYesu wamlamlela njani uMariya?
14 Abafundi babejwaqeka ngumsindo! ‘Yinkcitho yantoni le ingaka?’ babuza batsho. UYudas, egquk’ umkhondo weenjongo zakhe zobusela ngokucebisa ukuba kubonelelwe abasweleyo, wathi: “Kutheni le oli yobulawu ibingathengiswa ngeedenariyo ezingamakhulu amathathu zize zinikwe abantu abangamahlwempu?” UMariya akazange akhuphe nelimdaka. Noko ke, uYesu wathi kubafundi bakhe: “Myekeni. Kutheni nizama ukumenzela inkathazo nje? Wenze isenzo esihle [uhlobo oluthile lwe-ka·losʹ] kum. . . . Wenze oko abenako; uqalise kwangaphambili ukuqhola umzimba wam ngeoli yobulawu ngenxa yomngcwabo. Enyanisweni ndithi kuni, Naphi na apho iindaba ezilungileyo zishunyayelwa khona kulo lonke ihlabathi, oko lo mfazi akwenzileyo kuza kuxelwa njengokukhunjulwa kwakhe.” Hayi indlela amele ukuba ayithuthuzela ngayo intliziyo kaMariya loo mazwi kaYesu obubele!—Marko 14:4-9; Yohane 12:4-8.
15. Kutheni uYesu wachukunyiswa kangako koko kwenziwa nguMariya, yaye oko kusifundisa ntoni ngenkonzo yomphefumlo uphela?
15 UYesu wayechukumiseke gqitha koko kwenziwa nguMariya. Ngokokubona kwakhe, wenza isenzo esimele siqhwatyelwe izandla. Eyona nto yayichukumisa uYesu yayingeloxabiso lemali leso sipho kodwa yayikukuba ‘wayenze oko abenako.’ Waxhakamfula elo thuba waza wanikela ngoko kwakusemandleni akhe. Ezinye iinguqulelo ziwabeka ngolu hlobo la mazwi, “Wenze konke anokukwenza,” okanye “Wenze konke okusemandleni akhe.” (An American Translation; The Jerusalem Bible) Isipho sikaMariya sasisesomphefumlo uphela kuba wanikela ngobuncwane anabo. Yile nto kuthiwa yinkonzo yomphefumlo uphela ke leyo.
“Iingqekembe Ezimbini Ezincinane” Zomhlolokazi
16. (a) Kwenzeka njani ukuba uYesu awuphawule umnikelo womhlolokazi olihlwempu? (b) Lalilingakanani ixabiso leengqekembe zaloo mhlolokazi?
16 Kungentsuku zatywala emva koko, ngoNisan 11, uYesu wayexakeke imini yonke etempileni, ehlatyw’ imibuzo ngegunya lakhe yaye ephendula imibuzo erhuq’ umrhaji ngerhafu, ngovuko nangeminye imibandela. Wahlab’ amadlala ababhali nabaFarisi, ngenxa yezinto eziliqela, ‘ezinjengokuqwenga izindlu zabahlolokazi.’ (Marko 12:40) Emva koko uYesu wakhe waya kuhlala phantsi, mhlawumbi kwiNtendelezo yamaBhinqa, apho, ngokwesiko lamaYuda, kwakukho izikhongozelo zobuncwane ezili-13. Wathi vu okwethutyana apho, ebukele bonke abantu ababephosa iminikelo yabo. Kwafika izigwili eziliqela, zimbi zibonakala nje uzijongile ukuba zinobulungisa benkwalambisa yaye zizele yinkqayiso. (Thelekisa uMateyu 6:2.) UYesu waphosa iliso kwibhinqa elithile. Omnye umntu wayengenakuphawula nto kwelo bhinqa okanye kumnikelo walo. Kodwa uYesu, owayezazi iintliziyo zabanye abantu, wayesazi ukuba ‘lalingumhlolokazi olihlwempu.’ Kwakhona wayelazi nexabiso lomnikelo walo—‘laliziingqekembe ezimbini ezincinane, ezinexabiso elincinane kakhulu.’b—Marko 12:41, 42.
17. UYesu wabonisa njani ukuba uyawuxabisa umnikelo waloo mhlolokazi, yaye ngenxa yoko sifunda ntoni ngokwenza umnikelo kuThixo?
17 UYesu wabiza abafundi bakhe, kuba wayefuna bazibonele ngawabo amehlo le nto wayefuna ukubafundisa ngayo. Eli bhinqa ‘liphose ngaphezu kwabo bonke abo baphose imali kwizikhongozelo zobutyebi,’ watsho njalo uYesu. Ngokokubona kwakhe lalinikele ngaphezu kwabo bonke abo bantu bedibene. Lalinikele ngako ‘konke elalinako’—laliqongqothe nepeni yokugqibela. Ngokwenza oko, lalizinikela kwizandla zikaYehova ezinothando. Ngoko ke umntu owabalaseliswa njengomzekelo wokunikela kuThixo ngulowo wanikela ngesipho esasiphantse sibe yinto nje yokulahlwa kude. Noko ke, emehlweni kaThixo, sasinexabiso elingenakuthelekiswa nanto!—Marko 12:43, 44; Yakobi 1:27.
Ukufunda Kwindlela UYehova Ayijonga Ngayo Inkonzo Yomphefumlo Uphela
18. Yintoni esiyifundayo kwindlela uYesu awawaphatha ngayo amabhinqa amabini?
18 Kule ndlela uYesu wawaphatha ngayo la mabhinqa mabini, sifunda izifundo ezihle ngendlela uYehova ayijonga ngayo inkonzo yomphefumlo uphela. (Yohane 5:19) UYesu akazange athelekise lo mhlolokazi noMariya. Ezo ngqekembe zimbini zomhlolokazi wazixabisa ngokufanayo neoli “exabiso likhulu kakhulu” kaMariya. Ekubeni bhinqa ngalinye kula lanikela ngobuncwane balo, uThixo wayeyixabise yomibini iminikelo yawo. Ngoko ukuba iimvakalelo zokuziva ungento yanto zikupheka zikophula kuba ungakwazi ukwenza konke oko ufuna ukukwenza ekukhonzeni uThixo, ungalahl’ ithemba. UYehova uyavuyiswa kukwamkela oko unako ukumnika kona. Khumbula kaloku, uYehova “ukhangela intliziyo,” ngoko uyazi mhlophe iminqweno yentliziyo yakho.—1 Samuweli 16:7.
19. Kutheni singafanele sikugwebe oko kwenziwa ngabanye ekukhonzeni uThixo?
19 Indlela uYehova ayijonga ngayo inkonzo yomphefumlo uphela ifanele ibe nefuthe kwindlela thina esijongana nesiphathana ngayo. Hayi indlela ebesiya kuba siswele uthando ngayo ukuba besinokugxeka imigudu yabanye okanye sithelekise inkonzo yomntu othile neyomnye! Okulusizi kukuba omnye umKristu wabhala wathi: “Maxa wambi abanye bakwenza ucinge ukuba xa ungengovulindlela ungumpha nje ochutywe walahlwa. Kwanathi thina bazamela ‘nje’ ukuba ngabavakalisi boBukumkani abathe rhoqo siyakufuna ukuxatyiswa.” Masikhumbule ukuba asinagunya lokugweba oko imele ibe kuko inkonzo yomphefumlo uphela yomnye umKristu. (Roma 14:10-12) UYehova uyixabise gqitha inkonzo yomphefumlo uphela yakhe ngamnye kwizigidi zabavakalisi boBukumkani abathembekileyo, yaye nathi simele sibe njalo.
20. Yintoni ekudla ngokuba kuhle ukuyicinga ngamakholwa esikunye nawo?
20 Noko ke, kuthekani ukuba abanye babonakala belel’ emqokozweni kubulungiseleli? Xa elinye ikholwa liyekelel’ umxakatho oko kumele kubonise abadala abanenkxalabo ukuba lifuna uncedo okanye ukhuthazo. Kwangaxeshanye, asimele silibale ukuba kwabanye, inkonzo yomphefumlo uphela isenokufana neengqekembe ezincinane zomhlolokazi kuneoli kaMariya exabiso likhulu. Kudla ngokuba kuhle ukucinga ukuba abazalwana noodade wethu bayamthanda uYehova yaye olo thando luya kubashukumisela ukuba benze okuninzi—kungekhona okuncinane—kangangoko banako. Ngokuqinisekileyo akakho umkhonzi kaYehova ozimiseleyo onokukhetha ukulal’ emqokozweni ekukhonzeni uThixo!—1 Korinte 13:4, 7.
21. Nguwuphi umsebenzi onomvuzo okhethwa ngabaninzi, yaye kuphakama yiphi imibuzo?
21 Phofu ke, kubantu bakaThixo abaninzi, inkonzo yomphefumlo uphela iye yathetha ukukhetha owona msebenzi unomvuzo othe chatha—ubulungiseleli bobuvulindlela. Ziziphi iintsikelelo abazifumanayo? Yaye kuthekani ngabo kuthi bangekakwazi ukuba ngoovulindlela—singawubonisa njani umoya wobuvulindlela? Le mibuzo iza kuxutyushwa kwinqaku elilandelayo.
[Imibhalo esemazantsi]
a Ekubeni uMatiyas wangena endaweni kaYudas njengompostile, ligama lakhe—kungekhona elikaPawulos—elimele ukubakho kuloo matye esiseko ali-12. Nangona uPawulos wayengumpostile, wayengenguye omnye wabali-12.
b Ngqekembe nganye kwezi yayiyi-lepton, eyona ngqekembe yayincinane yamaYuda eyayikho ngelo xesha. Ii-lepta ezimbini zazilingana nesi-1 kuma-64 omvuzo wemini. Ngokutsho kukaMateyu 10:29, xa umntu enengqekembe eyi-assarion (elingana nee-lepta ezisibhozo), wayenokuthenga oongqatyana ababini, ababephakathi kwezona ntaka zixabisa imali encinane kwezazityiwa ngamahlwempu. Ngoko lo mhlolokazi wayelihlwempu ngokwenene, kuba imali awayenayo yayisisiqingatha saleyo yayinokuthenga ungqatyana omnye, ongekokutya kwaneleyo kwaphela.
Ubuya Kuphendula Uthini?
◻ Kuthetha ukuthini ukukhonza uYehova ngomphefumlo uphela?
◻ Eyoku-1 kwabaseKorinte 12:14-26 ibonisa njani ukuba uYehova akasithelekisi nabanye?
◻ Sifunda ntoni ngokuphathelele ukunikela ngomphefumlo uphela koko kwathethwa nguYesu ngeoli exabiso lixhomileyo kaMariya neengqekembe zemali ezimbini zomhlolokazi?
◻ Indlela uYehova ayijonga ngayo inkonzo yomphefumlo uphela ifanele ibe nefuthe njani kwindlela esiphathana ngayo?
[Umfanekiso okwiphepha 15]
UMariya wanikela ngobuncwane anabo, eqhola umzimba kaYesu ngeoli “exabiso likhulu kakhulu”
[Umfanekiso okwiphepha 16]
Iingqekembe zomhlolokazi—ezaziphantse zibe yinto nje yokulahlwa kude kodwa ezazinexabiso elingenakuthelekiswa nanto emehlweni kaYehova