UKristu Wakuthiya Ukuchas’ Umthetho—Ngaba Wena Unjalo?
“Wathanda ubulungisa, wathiya okungendawo [“ukuchas’ umthetho,” “NW”]; ngenxa yoko, uThixo, uThixo wakho, ukuthambise ngeoli yomgcobo ngaphezu kowenu.”—HEBHERE 1:9.
1. Ngaphandle kokuthanda ubulungisa, yintoni enye efunekayo kubo bonke abakhonzi bokwenyaniso bakaYehova uThixo?
ABAKHONZI bakaYehova bokwenyaniso bamthanda ngentliziyo, ngomphefumlo, ngengqondo nangamandla abo ephela. (Marko 12:30) Bafuna ukuvuyisa intliziyo kaYehova ngokugcina ingqibelelo. (IMizekeliso 27:11) Ukuze benze oko, abamele bathande ubulungisa nje kuphela kodwa bakwamele bathiye ukuchas’ umthetho. Ngokuqinisekileyo, uMzekelo wabo, uYesu Kristu, wenjenjalo. Kwathiwa ngaye: “Wathanda ubulungisa, wathiya ukuchas’ umthetho.”—Hebhere 1:9, NW.
2. Kuquka ntoni ukuchas’ umthetho?
2 Kuyintoni ukuchas’ umthetho? Kusisono, njengokuba umpostile uYohane wabonisayo xa wabhala wathi: “Bonke abasenzayo isono benza okuchasene nomthetho; sona isono sikukuchasana nomthetho.” (1 Yohane 3:4) Umntu ochas’ umthetho “akasikelwa mda okanye akalawulwa ngumthetho.” (Webster’s Ninth New Collegiate Dictionary) Ukuchas’ umthetho kuquka konke okubi, okungendawo, ukuziphatha okubi nokunganyaniseki. Ukuphos’ iliso nje ehlabathini kusibonisa ukuba ukuchas’ umthetho kuxhaphakile namhlanje kunanini na ngaphambili. Alithandabuzeki elokuba siphila ‘kumaxesha anomngcipheko’ umpostile uPawulos awawaxela kwangaphambili kweyesi-2 kuTimoti 3:1-5. Ngenxa yako konke oku kuchas’ umthetho, hayi indlela ekufaneleke ngayo ukuba siyalelwe ukuba sithiye bonke ububi! Ngokomzekelo, sixelelwa oku: “Bathandi bakaYehova, kuthiyeni okubi.” (INdumiso 97:10) Ngokufanayo, sifunda oku: “Thiyani okubi, nithande okulungileyo.”—Amosi 5:15.
Iintlobo Ezintathu Zentiyo
3-5. Igama “ukuthiya” lisetyenziswe ngaziphi iindlela ezintathu eLizwini likaThixo?
3 Kuthetha ntoni ukuthiya? ELizwini likaThixo, “ukuthiya” kusetyenziswa ngeendlela ezintathu ezahlukahlukeneyo. Kukho intiyo ebangelwa yinzondo yokufuna ukwenzakalisa oko kuthiyiweyo. AmaKristu afanele aluphephe olu uhlobo lwentiyo. Lolu hlobo olwashukumisela uKayin ukubulala umzalwana wakhe olilungisa uAbheli. (1 Yohane 3:12) Olu ikwaluhlobo lwentiyo iinkokeli zonqulo ezazinalo ngoYesu Kristu.—Mateyu 26:3, 4.
4 Kwakhona, igama elithi “thiya” eZibhalweni likwasetyenziswa ngengqiqo yokungathandi kangako. Ngokomzekelo, uYesu wathi: “Ukuba ubani uza kum, angamthiyi uyise, nonina, nomfazi, nabantwana, nabazalwana, nodade, ewe, nobakhe ubomi, akanakuba ngumfundi wam.” (Luka 14:26) Licacile elokuba, ekuphela kwento eyayithethwa nguYesu kukuba aba asimele sibathande ngaphezu kokuba simthanda yena. UYakobi ‘wayemthiyile uLeya,’ kodwa enyanisweni wayemthanda kancinane kunoRakeli.—Genesis 29:30, 31.
5 Kwandule ke kubekho intsingiselo yegama “ukuthiya” esithetha ngalo apha. Lidlulisela ingcamango yokuba nemvakalelo enzulu yokungathandi okanye yokucekisa umntu okanye into ethile ngokokude sikuphephe ukuba nento yokwenza naloo mntu okanye loo nto. KwiNdumiso 139 kuthiwa oku ‘yintiyo ephelelisileyo.’ Apho uDavide wathi: “Andinakubathiya na abakuthiyayo, Yehova, ndikruquke ngabasukela phezulu kuwe? Ndibathiya ngentiyo ephelelisileyo, kum mna baziintshaba.”—INdumiso 139:21, 22.
Isizathu Sokuba Sifanele Sikuthiye Ukuchas’ Umthetho
6, 7. (a) Kutheni, ngokukhethekileyo, sifanele sikuthiye ukuchas’ umthetho? (b) Sisiphi isizathu sesibini esinamandla sokuthiya ukuchas’ umthetho?
6 Kutheni sifanele sikuthiye ukuchas’ umthetho? Esinye isizathu sikukuze sibe nokuzihlonela size sibe nesazela esilungileyo. Kungale ndlela kuphela esinokuba nolwalamano oluhle noBawo wethu wasezulwini olilungisa nonothando, uYehova. UDavide wamisela umzekelo omhle kule nkalo, njengokuba sinokubona xa sifunda INdumiso 26. Ngokomzekelo, wathi: “Ndilithiyile ibandla labenzi bobubi, andihlali nabangendawo.” (INdumiso 26:5) Uthando lwethu ngoThixo nobulungisa lufanele lusishukumisele ukuba ngobulungisa kube nezothe kuthi—ewe, sikuthiye—konke athi yena kukuchas’ umthetho, kuquka izenzo zokuchas’ umthetho zabo bangamthobeliyo nabamthiyileyo uYehova. Ngaphezu koko, sifanele sikuthiye ukuchas’ umthetho ngenxa yokuba kubangela ukugculelwa kwegama likaYehova.
7 Esinye isizathu sokuba abantu bakaYehova befanele bakuthiye ukuchas’ umthetho kungenxa yokuba kuyingozi gqitha yaye kuyenzakalisa. Ukuhlwayela inyama, okuthetha ukuhlwayela ukuchas’ umthetho, kuya kuba nawuphi umphumo? UPawulos walumkisa: “Musani ukulahlekiswa; uThixo yena asingowokuhlekisa. Kuba into athe wahlwayela yona umntu, wovuna kwayona; ngokuba lowo uhlwayelela eyakhe inyama, wovuna ukonakala ngokwasenyameni; lowo uhlwayelela uMoya ke, wovuna ubomi obungunaphakade ngokwaseMoyeni.” (Galati 6:7, 8) Ngoko asifanele sibe nanto yakwenza tu kwaphela nokuchas’ umthetho. Eneneni, kufuneka sithiye konke ukuchas’ umthetho ngenxa yempilo-ntle noxolo lwethu lwengqondo.
Abo Bakuthiyileyo Ukuchas’ Umthetho
8. Ngubani omisele owona mzekelo ubalaseleyo wokuthiya ukuchas’ umthetho, njengoko kuboniswa ziziphi izibhalo?
8 UThixo wamisela zonke izidalwa ezinengqondo owona mzekelo ubalaseleyo wokuthiya ukuchas’ umthetho. Ngobulungisa uyakucekisa ukuchas’ umthetho, yaye iLizwi lakhe lithi: “Izinto ezintandathu uzithiyile uYehova, ezisixhenxe zingamasikizi emphefumlweni wakhe: ngamehlo aqwayingayo; lulwimi oluxokayo; zizandla eziphalaza igazi elimsulwa; yintliziyo eyila iingcinga zobutshinga; ziinyawo ezikhawulezayo ukugidimela ebubini; lingqina elixokayo, elifutha amanga; nongenisa ingxabano phakathi kwabangabazalwana.” Kwakhona sifunda oku: “Ukoyika uYehova kukuthiya into embi: ikratshi nokukratsha, nendlela embi, nomlomo onempenduka, ndiwuthiyile.” (IMizekeliso 6:16-19; 8:13) Ngaphezu koko, sixelelwa oku: “Mna, Yehova, ndithanda okusesikweni, ndikuthiyile ukuphanga ngokugqwetha.”—Isaya 61:8.
9, 10. UYesu wabonisa njani ukuba wayekuthiyile ukuchas’ umthetho?
9 UYesu Kristu waxelisa uYise ekuthiyeni ukuchas’ umthetho. Ngaloo ndlela, sifunda oku: “Wathanda ubulungisa, wathiya okungendawo [“ukuchas’ umthetho,” NW]; ngenxa yoko, uThixo, uThixo wakho, ukuthambise ngeoli yomgcobo ngaphezu kowenu.” (Hebhere 1:9) UYesu wasimisela umzekelo kolu hlobo lwentiyo. Intiyo yakhe yokuchas’ umthetho wayibonisa ngokubhenca abo babekwenza ngabom—iinkokeli zonqulo lobuxoki. Ngokuphindaphindiweyo, wazigxeka esithi zingabahanahanisi. (Mateyu, isahluko 23) Ngesinye isihlandlo uYesu wazixelela oku: “Ningaboyihlo uMtyholi, neenkanuko zoyihlo niyathanda ukuzenza.” (Yohane 8:44) UYesu wasebenzisa amandla ukuze abonise ukukuthiya kwakhe ukuchas’ umthetho, izihlandlo ezibini ehlambulula itempile ngokukhupha abahanahanisi bonqulo ababawayo.—Mateyu 21:12, 13; Yohane 2:13-17.
10 Kwakhona uYesu wabonisa ukukuthiya kwakhe ukuchas’ umthetho nesono ngokuzigcina kude nazo. Ngoko ke, ngokufanelekileyo wayenokubabuza oku abachasi bakhe: “Ngubani na kuni ondohlwayayo ngenxa yesono?” (Yohane 8:46) UYesu ‘wayengcwele, engenabubi, engenabala, ahlukile kubo aboni.’ (Hebhere 7:26) Engqina oku, uPetros wabhala ukuba uYesu ‘akazange enze sono, yaye akuzange kufunyanwe nkohliso emlonyeni wakhe.’—1 Petros 2:22.
11. Yiyiphi imizekelo yeZibhalo ekhoyo yabantu abangafezekanga abakuthiyayo ukuchas’ umthetho?
11 Noko ke, uYesu wayengumntu ofezekileyo. Ngaba ikho imizekelo engokweZibhalo yabantu abangafezekanga abakuthiya ngokwenene ukuchas’ umthetho? Kakade ikho! Ngokomzekelo, uMoses nabanye abaLevi babonisa ukuluthiya kakhulu unqulo-zithixo ngokubulala abanquli-zithixo abamalunga nama-3 000 ngokuyalelwa nguYehova. (Eksodus 32:27, 28) UPinehasi wabonisa ukukuthiya gqitha ukuchas’ umthetho xa wabulala ngekrele abantu ababini ababehenyuza.—Numeri 25:7, 8.
Ukubonakalisa Ukuthiya Ukuchas’ Umthetho
12. (a) Sinokubonisa njani ukuba sikuthiyile ukuchas’ umthetho? (b) Ziziphi ezinye zeendlela esinokuzisebenzisa ukuze siphephe iingcinga zokuchas’ umthetho?
12 Xa sisiza kwixesha lethu, sinokukubonakalisa njani ukuthiya kwethu ukuchas’ umthetho? Ngokulawula iingcinga, amazwi nezenzo zethu. Kufuneka siziqhelise umkhwa wokucinga ngezinto ezakhayo xa iingqondo zethu zingaxakekanga ngumsebenzi othile. Ukuba kuyenzeka siphuthelwe, sisenokuba notyekelo lokucinga izinto ezingakhiyo, njengokucinga ngezikhalazo okanye uyolo lwesini. Ungaze uzivumele izinto ezinjalo, kodwa ziqhelise umkhwa wokucinga izinto eziyingenelo. Ngokomzekelo, zama ukwazi izibhalo ngentloko, izinto ezisithoba ezibangela uyolo neziqhamo zomoya ezisithoba. (Mateyu 5:3-12; Galati 5:22, 23) Ngaba uyawazi amagama abapostile abali-12? Ngaba uyayazi iMithetho Elishumi? Ngawaphi amabandla asixhenxe awabhalelwayo kwiSityhilelo? Ukucula iingoma zoBukumkani ngentloko nako kuyanceda kugcine iingqondo zethu zicinga ngezinto eziyinene, ezindilekileyo, ezibubulungisa, ezinyulu, ezithandekayo, eziludumo lulungileyo, ezinesidima nezinendumiso.—Filipi 4:8.
13. Ukuthiya ukuchas’ umthetho kuya kusibangela sithiye intetho enjani?
13 Ngokubhekele phaya, sibonisa ukuba sikuthiyile ukuchas’ umthetho ngokuphepha lonke uhlobo lwentetho engcolileyo. Abantu abaninzi behlabathi bayakuthanda ukubalisa nokuphulaphula iziqhulo ezingcolileyo, kodwa amaKristu awamele afune kwanokuziphulaphula. Kunoko, sifanele sizishiye yaye sikuphephe ukubandakanyeka kuko nakuphi na ukuncokola ngezinto eziphantsi ngolo hlobo. Ukuba asikwazi kuhamba, ubuncinane sinokubonisa ngenkangeleko yethu ukuba siyithiyile loo ncoko. Kufuneka sithobele esi siluleko silungileyo: “Makungaphumi nanye intetho ebolileyo emlonyeni wenu; mayibe yesukuba ilungele ukuxuma oko kuluncedo, ukuze ibabale abevayo.” (Efese 4:29) Asifanele sizingcolise ngokuthetha izinto ezingcolileyo okanye ngokuziphulaphula.
14. Ukuthiya ukuchas’ umthetho kuya kusikhusela njani xa kufikelelwa kumba wezoshishino nengqesho?
14 Ukuthiya kwethu ukuchas’ umthetho kufanele kuboniswe nakuzo zonke izenzo ezisisono. Ukuthiya ukuchas’ umthetho kuya kusinceda siphephe umgibe wokulalanisa kule nkalo. AmaKristu okwenyaniso awasiqheliseli isono. (Thelekisa eyoku-1 kaYohane 5:18.) Ngokomzekelo, simele sizithiye zonke iindlela zokunganyaniseki zoshishino. Namhlanje, amaNgqina kaYehova amaninzi aye acinezelwa ukuba enzele abaqeshi bawo izinto zokunganyaniseki kodwa aye ala ukwenjenjalo. AmaKristu aye akulungela nokuphulukana nemisebenzi yawo kunokwenza into engqubana nesazela sawo esiqeqeshwe ngeBhayibhile. Ngaphezu koko, sikwafuna nokubonisa ukukuthiya kwethu ukuchas’ umthetho ngokungayophuli imithetho yendlela nangokungaqhathi xa simele sihlawule iirhafu kuquka nezokungenisa izinto ezithengwe kwamanye amazwe.—IZenzo 23:1; Hebhere 13:18.
Ukuthiya Ukungcola Ngokwesini
15. Ukudala abantu banomnqweno onzulu wokuba neqabane kwafeza ziphi iinjongo ezintle?
15 NjengamaKristu, simele sikuthiye ngokukhethekileyo ukungcola okubandakanya isini. Ngokudala abantu banomnqweno onamandla wokufuna iqabane, uThixo wayesenzela iinjongo ezimbini ezintle. Waqinisekisa ukuba uhlanga lwabantu lwalungayi kuphela, kwakhona wenza elona lungiselelo lothando lokuba bonwabe. Kwanabantu abangamahlwempu, abangafundanga okanye abasweleyo ngezinye iindlela banokonwaba gqitha kulwalamano lwabo lomtshato. Noko ke, uYehova umise imida olunokunanditshwa kuyo olu lwalamano. Le mida imiswe nguThixo imele ihlonelwe.—Genesis 2:24; Hebhere 13:4.
16. Sifanele sibe nasiphi isimo sengqondo kumba wokuzonwabisa nezenzo ezingacocekanga zesini?
16 Ukuba sikuthiyile ukuchas’ umthetho, ngenkuthalo siya kuphepha zonke izenzo ezingacocekanga zesini nokuzonwabisa okukhuthaza ukuziphatha okubi. Ngoko ke siya kuphepha zonke iincwadi, amaphephancwadi namaphephandaba athandabuzekayo ngokokuziphatha. Ngokufanayo, ukuba sikuthiyile ukuchas’ umthetho, asiyi kubukela nayiphi na imiboniso engcolileyo, enoba kukumabonwakude, kwimifanekiso eshukumayo okanye yeqonga. Ukuba sifumanisa ukuba inkqubo ethile ikhuthaza ukuziphatha okubi, sifanele sishukunyiselwe ukumcima ngoko nangoko umabonwakude okanye sifanele sibe nenkalipho yokuphuma kuloo holo. Ngokufanayo, ukuthiya ukuchas’ umthetho kuya kusenza siphephe wonke umculo ovuselela inkanuko ngamazwi okanye ngesingqi. Asiyi kufuna ukuzazi izinto zokuziphatha okubi kodwa siya kuba ‘ziintsana ebubini, engqondweni ke sibe ngabantu abakhulu.’—1 Korinte 14:20.
17. Sisiphi isiluleko esinikelwa kwabaseKolose 3:5 esinokusinceda sihlale sicocekile ngokokuziphatha?
17 Ngokufanelekileyo ke, silulekwa ngolu hlobo: “Bhubhisani ngoko amalungu enu asemhlabeni: umbulo, ukungcola, ukuthabatheka okuhlazisayo.” (Kolose 3:5) Alithandabuzeki elokuba kufuneka siziqobe ukuba siza kuzimisela ukuhlala sicocekile ngokokuziphatha. Mayela nesenzi sesiGrike esiguqulelwe ngokuthi “bhubhisani” kweyabaseKolose 3:5, iThe Expositor’s Bible Commentary ithi: “Sibonisa ukuba asimele sizicinezele okanye sizilawule nje kuphela izenzo nezimo zengqondo ezimbi. Simele siziphelise, siyitshabalalise ngokupheleleyo indlela endala yobomi. Ukuthi ‘siyibulale ngokupheleleyo’ kusenokuwabonakalisa amandla afunekayo. . . . Intsingiselo yesenzi namandla exesha abonisa isenzo esinamandla nesibuhlungu sokuzimisela ngokobuqu.” Ngoko ke sifanele siziphephe izinto ezibonisa amanyala ngokunga sisifo esiyingozi, esasulelayo nesibulalayo, kuba ngokwenene zinjalo ngokokuziphatha nangokomoya. UKristu wavakalisa ingcamango efanayo xa wathi masisinqumle isandla, unyawo okanye kwaneliso ukuba liyasikhubekisa.—Marko 9:43-48.
Ukuthiya Unqulo Lobuxoki Nowexuko
18. Sinokuyibonakalisa njani intiyo yethu ngokuchas’ umthetho konqulo?
18 Ngoko, kwakhona, njengokuba uYesu wabonisa ukukuthiya kwakhe ukuchas’ umthetho ngokubhenca iinkokeli zonqulo ezihanahanisayo, nanamhlanje amaNgqina kaYehova abonisa ukukuthiya kwawo konke ukuchas’ umthetho kokuhanahanisa konqulo. Njani? Ngokusasaza uncwadi lweBhayibhile olubhenca oko kanye kanye ikuko iBhabhiloni Enkulu, ihenyukazi lonqulo. Ukuba ngokwenyaniso sikuthiyile ukuhanahanisa kokuchas’ umthetho konqulo, siya kuyibhenca yaziwe nanguthathatha into eyiyo iBhabhiloni Enkulu, ubukhosi behlabathi bonqulo lobuxoki. Oko siya kukwenza ngenxa yabantu abantliziyo zinyanisekileyo eye yabamfamekisa yaza yabagcina ebukhobokeni bokomoya. Ngokuvisisana nomkhamo esikuthiye ngokwenene ngawo ukuchas’ umthetho kweBhabhiloni Enkulu, siya kuba nenzondelelo ekubeni nesabelo kuzo zonke iinkalo zobulungiseleli boBukumkani.—Mateyu 15:1-3, 7-9; Tito 2:13, 14; ISityhilelo 18:1-5.
19. Sifanele sibajonge njani abawexuki, yaye ngoba?
19 Imbopheleleko yokuthiya ukuchas’ umthetho ikwasebenza nakuzo zonke izenzo zabawexuki. Isimo sethu sengqondo ngakubawexuki sifanele sifane nesikaDavide, owathi: “Andinakubathiya na abakuthiyayo, Yehova, ndikruquke ngabasukela phezulu kuwe? Ndibathiya ngentiyo ephelelisileyo, kum mna baziintshaba.” (INdumiso 139:21, 22) Abawexuki banamhlanje bangakwicala ‘lomchasi-mthetho,’ abefundisi beNgqobhoko. (2 Tesalonika 2:3, NW) Ngoko ke, njengamaNgqina kaYehova anyanisekileyo, akukho nto isifanisa nabo tu kwaphela. Ekubeni singafezekanga, ngokulula nje iintliziyo zethu zisenokutyekela ekubagxekeni abazalwana bethu. Njengabantu ngabanye, abo babumba ‘umkhonzi othembekileyo noqondayo’ bangabantu abangafezekanga. (Mateyu 24:45-47) Kodwa olu didi luthembekile yaye luyaqonda. Abawexuki babalaselisa kakhulu iimposiso okanye oko kubonakala ngathi ziimpazamo ezenziwa ngabazalwana abakhokelayo. Ukuze sikhuseleke simele sibuphephe ubuxoki babawexuki ngokunga buyityhefu, enyanisweni obuyiyo.—Roma 16:17, 18.
20, 21. Zinokushwankathelwa njani izizathu zokuthiya ukuchas’ umthetho?
20 Sibonile ukuba ihlabathi lizaliswe kukuchas’ umthetho, okukwayinto enye nesono. Akwanele ukuba sithande ubulungisa; sikwamele sithiye ukuchas’ umthetho. Bambi babo baye basuswa kubudlelane kwibandla lamaKristu kusenokuba bebecinga ukuba bebebuthanda ubulungisa, kodwa bebengakuthiyanga ngokwaneleyo ukuchas’ umthetho. Kwakhona sisibonile isizathu sokuba sifanele sikuthiye ukuchas’ umthetho. Asinakuba naso isazela esilungileyo nokuzihlonela ukuba asenzi njalo. Ngaphezu koko, ukuchas’ umthetho kuthetha ukunganyaniseki kuYehova uThixo. Yaye ukuchas’ umthetho kusibangela sivune isiqhamo esikrakra—inkxwaleko, ukonakala nokufa.
21 Kwakhona siyiphawulile indlela esikubonisa ngayo ukuthiya kwethu ukuchas’ umthetho. Oko sikwenza ngokungabi nanto yakwenza tu kwaphela nokunganyaniseki, ukuziphatha okubi ngokwesini okanye uwexuko. Ekubeni sifuna ukuba nesabelo ekuthethelelweni kukaYehova yaye sinqwenela ukuvuyisa intliziyo yakhe, asimele sithande ubulungisa yaye sixakeke enkonzweni yakhe kuphela kodwa sikwamele sithiye ukuchas’ umthetho, njengoko yenzayo iNkokeli noMlawuli wethu, uYesu Kristu.
Ubuya Kuphendula Uthini?
◻ IZibhalo zilisebenzisa njani igama elithi “thiya”?
◻ Ziziphi ezinye izizathu ezilungileyo esinazo zokuthiya ukuchas’ umthetho?
◻ Yiyiphi imizekelo emihle ekhoyo yabo bakuthiyayo ukuchas’ umthetho?
◻ Sinokubonisa njani ukuba sikuthiyile ukuchas’ umthetho?
[Umfanekiso okwiphepha 8]
UYesu wahlambulula itempile ngenxa yokuba wayekuthiyile ukuchas’ umthetho
[Umfanekiso okwiphepha 10]
Ukuba sikuthiyile ukuchas’ umthetho, siya kukuphepha ukuzonwabisa okukhuthaza ukuziphatha okubi ngokwesini