UNqulo

Ingcaciso: Luhlobo lokukhonza. Luquka inkqubo yesimo sengqondo, iinkolelo noqheliselo lonqulo; ezi zinto zisenokuba zezobuqu, okanye zisenokuthethelelwa yintlangano. Ngokuqhelekileyo unqulo luquka ukukholelwa kuThixo okanye kwiqela loothixo; okanye lujonga abantu, izinto, iinkanuko, okanye amandla athile njengezinto ezifanele ukunqulwa. Unqulo oluninzi lusekelwe ekuhlolisiseni kwabantu imvelo; kukwakho nonqulo olutyhiliweyo. Kukho unqulo lokwenyaniso nolobuxoki.

Kutheni le nto kukho iinkonzo ezininzi kangaka?

Kubalo lwakutshanje kwafikelelwa kwelokuba kukho iinkonzo eziphambili ezili-10 namahlelo anokuba li-10 000. Kula mahlelo, anokuba ngama-6 000 aseAfrika, ali-1 200 aseUnited States, ibe angamakhulukhulu akwamanye amazwe.

Zininzi izinto ezifak’ isandla ekuveleni kwamaqela amatsha onqulo. Bambi bathe iinkonzo ezahlukahlukeneyo zonke zimela iindlela ezahlukeneyo zokunikela inyaniso yonqulo. Kodwa kunoko ukuthelekiswa kweemfundiso noqheliselo lwazo kunye neBhayibhile, kubonisa ukuba iinkonzo ezahlukahlukeneyo zibangelwe kukuba abantu baye baba ngabalandeli babantu kunokuphulaphula uThixo. Kuyaphawuleka ukuba, ngokomlinganiselo omkhulu, iimfundiso ezibambelela kuzo ngokuqhelekileyo, nezahlukileyo eBhayibhileni, ziphuma kwiBhabhiloni yamandulo. (Bona iphepha 62, 63, phantsi komxholo othi “IBhabhiloni Enkulu.”)

Ngubani umphembeleli wesiphithiphithi sonqulo esilolo hlobo? IBhayibhile ichaza uSathana uMtyholi ‘njengothixo wephakade eli.’ (2 Kor. 4:4) Isilumkisa ngelokuba “amadini eziwenzayo iintlanga, ziwenzela iidemon, aziwenzeli uThixo.” (1 Kor. 10:20) Ngoko, hayi indlela ekubaluleke kunene ngayo ukuqiniseka ukuba ngokwenene sinqula uThixo oyinyaniso, uMdali wezulu nomhlaba, ibe unqulo lwethu luyamkholisa!

Ngaba zonke iinkonzo zamkelekile kuThixo?

ABagwe. 10:6, 7: “Baphinda oonyana bakaSirayeli benza ububi emehlweni kaYehova bakhonza ooBhahali, nooAshtaroti, noothixo bakwa-Aram, noothixo baseTsidon, noothixo bakwaMowabhi, noothixo boonyana baka-Amon, noothixo bamaFilisti. Bamlahla uYehova, abamkhonza. Wavutha umsindo kaYehova kumaSirayeli.” (Ukuba umntu unqula nantoni na okanye nawuphi na umntu ongenguye uThixo oyinyaniso, uMdali wezulu nomhlaba, kuyacaca ukuba uhlobo lwakhe lonqulo alwamkelekanga kuYehova.)

Marko 7:6, 7: “Waphendula ke [uYesu] wathi kubo [abaFarisi nababhali bamaYuda], Watyapha uIsaya ukuprofeta ngani, bahanahanisi, njengokuba kubhaliwe kwathiwa, Aba bantu bandibeka ngomlomo, kanti yona intliziyo yabo ikude lee kum. Bafumana ke bendihlonela, befundisa iimfundiso eziyimithetho yabantu.” (Kungakhathaliseki ukuba iqela lithi linqula bani na, ukuba libambelela kwiimfundiso zabantu endaweni yokubambelela kwiLizwi eliphefumlelwe nguThixo, unqulo lwalo lulilize.)

Roma 10:2, 3: “Ndiyabangqinela ukuba banokumzondelela uThixo, koko bengamzondeleli ngokokwazi okukuko. Kuba bathe, bengabazi ubulungisa bukaThixo, befuna nokumisa obabo ubulungisa, ababululamela ubulungisa bukaThixo.” (Abantu basenokuba nalo iLizwi elibhalwe nguThixo kodwa bangabi nalo ulwazi oluchanileyo ngoko likuquletheyo, kuba bengafundiswanga ngokufanelekileyo. Basenokuba noluvo lokuba bayamzondelela uThixo, kodwa basenokungenzi oko akufunayo. Unqulo lwabo alunakumkholisa uThixo, akunjalo na?)

Ngaba kuyinyaniso ukuba zonke iinkonzo zilungile?

Iinkonzo ezininzi zifundisa ukuba umntu umele angaxoki okanye ebe, njalo njalo. Kodwa ngaba oko kwanele? Ngaba ibiya kukuvuyisa into yokuba usele iglasi yamanzi anetyhefu ngenxa yokuba uthile ukuqinisekisa ukuba inkoliso yoko ukuselayo ngamanzi?

2 Kor. 11:14, 15: “NoSathana ngokwakhe uzimilisa okwesithunywa sokukhanya. Akunto inkulu ke ngoko, ukuba abalungiseleli bakhe bazimilise okwabalungiseleli bobulungisa.” (Apha siyalunyukiswa ukuba asinto yonke evela kuSathana esenokubonakala imbi. Enye yezona ndlela zakhe ziphambili zokukhohlisa uluntu ibilunqulo lobuxoki bazo zonke iintlobo, yaye olunye uye walwenza lwabonakala ilolobulungisa.)

2 Tim. 3:2, 5: “Abantu baya . . . [kuba nokumila] kokuhlonela uThixo, ukanti bayawakhanyela amandla ako. Kwabo ke khwebuka.” (Kungakhathaliseki ukutsho kwabo ngaphandle ukuba bayamthanda uThixo, ukuba abo unqula nabo abalisebenzisi ngokunyanisekileyo iLizwi likaThixo kubomi babo, iBhayibhile ikubongoza ukuba wahlukane nezinxulumani ezilolo hlobo.)

Ngaba kufanelekile ngobani ukushiya unqulo lwabazali bakhe?

Ukuba oko sikufundiswa ngabazali bethu ngokwenene kuphuma eBhayibhileni, simele sibambelele kuko. Kwanokuba sifunda ukuba uqheliselo neenkolelo zonqulo azivisisani neLizwi likaThixo, abazali bethu kufuneka sibahlonele. Kodwa kuthekani ukuba ufunda ukuba umkhwa othile wabazali bakho uyingozi empilweni ibe unokuthintela ubude bobomi bomntu? Ngaba ubuya kubaxelisa uze ukhuthaze abantwana bakho ukuba benjenjalo, okanye ngaba ubuya kuthi ngentlonelo ubaxelele oko ukufundileyo? Ngokufanayo, ukwazi inyaniso yeBhayibhile kuzisa imbopheleleko. Ukuba kunokwenzeka, simele sabelane namalungu entsapho ngoko sikufundileyo. Simele senze isigqibo: Ngaba simthanda ngokwenene uThixo? Ngaba ngokwenene siyakufuna ukuthobela uNyana kaThixo? Ukwenjenjalo kwethu kusenokufuna ukuba silushiye unqulo lwabazali bethu size siye kunqulo lokwenyaniso. Ngokuqinisekileyo bekungayi kufaneleka ukuvumela ukuzinikela kwethu kubazali bethu kube kukhulu ngakumbi kunokuthanda kwethu uThixo noKristu, akunjalo na? UYesu wathi: “Lowo uthanda uyise nokuba ngunina kunam, akandifanele mna; nalowo uthanda unyana wakhe nokuba yintombi yakhe kunam, akandifanele mna.”—Mat. 10:37.

Yosh. 24:14: “Moyikeni ke ngoku uYehova, nimkhonze ngokugqibeleleyo, nangenyaniso. Susani oothixo, ababekhonza bona ooyihlo phesheya koMlambo, naseYiputa, nimkhonze ke uYehova.” (Ngaba oko akuzange kuthethe ukuguqula unqulo lookhokho babo? Ukuze bakhonze uYehova ngokwamkelekileyo, kwakufuneka balahle nayiphi na imifanekiso eqingqiweyo eyayisetyenziswa kunqulo olunjalo baze bacoce iintliziyo zabo ekukhanukeni nayiphi na yezo zinto.)

1 Pet. 1:18, 19: “Nisazi nje ukuba anihlawulelwanga nikhululwe ngazinto zinakonakala, oozisilivere noozigolide, kuyo ihambo yenu engento, enayinikelwayo ngooyihlo. Kwakungegazi elinqabileyo likaKristu, njengelemvana engenasiphako, engenabala.” (Ngoko, amaKristu okuqala azilahla ezo zithethe zookhokho bawo, zithethe ezo ezazingenakuze ziwanike ubomi obungunaphakade. Ayenombulelo ngedini likaKristu elawenza akulangazelela ukwahlukana nantoni na eyabangela ubomi bawo bungabi nasiqhamo, bungabi nayo intsingiselo yokwenene ngenxa yokuba ayengambeki uThixo. Ngaba nathi asimele sibe nesimo sengqondo esifanayo?)

Iyintoni imbono yeBhayibhile ngokubhekisele kuzwelonke?

UYesu wazijonga njani iinkokeli zonqulo ezazizenza amalungisa kodwa ezazingamhloneli uThixo? “Uthe ke uYesu kuwo, Ukuba uThixo ebenguYihlo, ninge nindithanda; kuba mna ndaphuma kuThixo, ndifikile ke; kuba andizanga ngokwam, nguye owandithumayo. . . . Nina ningaboyihlo uMtyholi, neenkanuko zoyihlo niyathanda ukuzenza. Yena waye esisibulala-mntu kwasekuqaleni; akemi enyanisweni, ngokuba akukho nyaniso kuye. Xa sukuba ethetha ubuxoki, uthetha okukokwakhe; ngokuba ulixoki, noyise wawo. Mna ke, ngokuba ndithetha inyaniso, anikholwa ndim. . . . Ngenxa yoko [aniva] nina, ngokuba ningengabakaThixo.”—Yoh. 8:42-47.

Ngaba bekuya kuba kukubonakalisa ukunyaniseka kuThixo nakwimilinganiselo yakhe yobulungisa ukuba abakhonzi bakhe bebeya kubamkela kubuzalwana bonqulo abo baqhelisela oko uThixo akugwebayo okanye abalubetha ngoyaba uqheliselo olunjalo? “Maningazidibanisi nosukuba enegama lokuba ngumzalwana, ukanti wenza umbulo [uhenyuzo, NW], nokuba ulibawa, nokuba ungumkhonzi wezithixo, nokuba ungumtshabhisi, nokuba ulinxila, nokuba ungumphangi; ningakhe nidle nokudla nonjalo. . . . Abenza umbulo [uhenyuzo, NW], nabakhonzi bezithixo, nabakrexezi, nezifebe, namadoda alalanayo, namasela, namabawa, namanxila, nabatshabhisi, nabaphangi, abayi kubudla ilifa ubukumkani bukaThixo.” (1 Kor. 5:11; 6:9, 10) “Othe . . . wanga angaba sisihlobo salo ihlabathi, uzenza utshaba lukaThixo.” (Yak. 4:4) “Bathandi bakaYehova, kuthiyeni okubi. Umgcini wemiphefumlo yabenceba bakhe uya kubahlangula esandleni sabangendawo.”—INdu. 97:10.

2 Kor. 6:14-17: “Musani ukunxulumana nabolunye uhlobo, abangakholwayo ke; kuba kunakwabelana kuni na ubulungisa nokuchasa umthetho? Kunabudlelane buni na ke ukukhanya nobumnyama? Unakuvumelana kuni na ke uKristu noBheliyali? Unasahlulelwano sini na okholwayo nongakholwayo? Inakudibana kuni na ke itempile kaThixo nezithixo? . . . Kungoko ndithi, Phumani phakathi kwabo, nizahlule, itsho iNkosi, nento engcolileyo ningayichukumisi; ndandiya kunamkela.”

ISityhi. 18:4, 5: “Ndeva elinye izwi liphuma emazulwini lisithi: Phumani kuyo, bantu bam, ukuze ningadlelani nayo ngezono zayo, nokuze ningamkeliswa kwizibetho zayo. Ngokuba izono zayo ziye zafikelela emazulwini, nezinto zayo zokungalungisi uzikhumbule uThixo.” (Ngeenkcukacha, bona umxholo omkhulu othi “IBhabhiloni Enkulu.”)

Ngaba ukuba ngowonqulo olulungelelanisiweyo kuyimfuneko?

Iintlangano ezininzi zonqulo zivelise isiqhamo esibi. Into ebangela ukuba loo maqela abe mabi asikokulungelelaniswa kwawo. Kodwa amaninzi akhuthaze iintlobo zonqulo ezisekelwe kwiimfundiso zobuxoki ezithi ngokukhulu zibe zizithethe endaweni yokunikela ukhokelo olulolokomoya ngokwenyaniso; ziye zasetyenziswa phosakeleyo ukulawula ubomi babantu ngenxa yeenjongo zokuzingca; ziye zazixhalabela ngokugqithiseleyo iinkongozelo zemali zaza zahombisa izindlu zonqulo endaweni yokukhuthaza imilinganiselo yokomoya; amalungu azo adla ngokuba ngabahanahanisi. Ngokucacileyo akukho bani othanda ubulungisa ebeya kufuna ukuba ngowentlangano enjalo. Kodwa unqulo lokwenyaniso lwahluke ngendlela ehlaziyayo kuko konke oko. Sekunjalo, ukuze luhlangabezane nezinto ezifunwa yiBhayibhile, lumele lube lolulungelelanisiweyo.

Heb. 10:24, 25: “Masinyamekelane, ukuba silolane eluthandweni nasemisebenzini emihle; singakuhilizeli ukuhlanganisana kwethu, njengesiko labanye. Masivuselelane kube kokukhona, niyibona nje ukuba imini leyo iyasondela.” (Ukuze kuphunyezwe lo myalelo weZibhalo, kumele kubekho iintlanganiso zamaKristu esinokuya kuzo ngokuthe rhoqo. Ilungiselelo elinjalo lisikhuthaza ukuba sibonakalise uthando kwabanye, singaxhalabeli nje isiqu sethu.)

1 Kor. 1:10: “Ke kaloku, ndiyaniyala, bazalwana, ngalo igama leNkosi yethu, uYesu Kristu, ukuba nithethe nto-nye nonke, nokuba kungabikho zahlukahlukano kuni; ke nibe ngabalungisiweyo, nigqibelele ngqiqweni-nye, nasicamangweni sinye.” (Umanyano olunjalo belungenakuze lufikelelwe ukuba abantu bebengahlanganisani, bebengangenelwa kucwangciso olufanayo lokondliwa ngokomoya, baze bahlonele uthunywashe elungiselelwa ngaye imfundiso enjalo. Bona kwanoYohane 17:20, 21.)

1 Pet. 2:17: “Thandani isizalwana [lonke umanyano lwabazalwana, NW].” (Ngaba oko kuquka kuphela abo basenokuhlanganisana kunye ukwenzela unqulo kwikhaya elithile lomntu? Akunjalo konke konke; bubuzalwana bezizwe ngezizwe, njengoko kuboniswe ngamaGalati 2:8, 9 neyoku-1 yabaseKorinte 16:19.)

Mat. 24:14: “Ezi ndaba zilungileyo zobukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.” (Ukuze zonke iintlanga zinikwe ithuba lokuva ezo ndaba zilungileyo, ukushumayela kumele kuphunyezwe ngendlela elungeleleneyo, imicimbi isonganyelwa ngokufanelekileyo. Ukuthanda uThixo nabantu abangoowabo kubangele abantu jikelele emhlabeni bamanyana ekwenzeni lo msebenzi.)

Bona kwanomxholo omkhulu othi “INtlangano.”

Ngaba ukuthanda komntu umntu onguwabo kuko okunomsebenzi ngokwenene?

Alithandabuzeki elokuba, uthando olunjalo lubalulekile. (Roma 13:8-10) Kodwa ukuba ngumKristu kuquka ngaphezu kokuba nobubele nje kummelwane wethu. UYesu wathi abafundi bakhe bokwenyaniso ngokubalaseleyo babeya kufaniswa ngokuthandana kwabo, nokuthanda amakholwa angoowabo. (Yoh. 13:35) Ukubaluleka koko kugxininiswa ngokuphindaphindiweyo eBhayibhileni. (Gal. 6:10; 1 Pet. 4:8; 1 Yoh. 3:14, 16, 17) Noko ke, uYesu wabonisa ukuba into ede yabaluleka ngakumbi kukuthanda kwethu uThixo ngokwakhe, nto leyo eboniswa kukuthobela kwethu imithetho yakhe. (Mat. 22:35-38; 1 Yoh. 5:3) Ukuze sibonakalise uthando olunjalo, kufuneka sifundisise size silisebenzise iLizwi likaThixo yaye sihlanganisane nabakhonzi bakaThixo abangoowethu ukwenzela ukunqula.

Ngaba ukuba nolwalamano lobuqu noThixo kuyinto ebaluleke ngokwenene?

Ngokuqinisekileyo kubalulekile. Ukuya nje kwiinkonzo zonqulo ngendlela esisithethe akunakubaluleka ngaphezu koko. Kodwa kufuneka silumke. Ngoba? Ngenkulungwane yokuqala, kwakukho abantu ababecinga ukuba babe nolwalamano oluhle noThixo kodwa uYesu awababonisa njengababephazame gqitha. (Yoh. 8:41-44) Umpostile uPawulos wabhala ngabathile ekwakubonakala ukuba babeluzondelela ukholo lwabo ibe ngokucacileyo babecinga ukuba babe nolwalamano oluhle noThixo kodwa ababengakuqondi oko kwakufuneka ngokwenene ukuze babe ngabakholisekileyo kuThixo.—Roma 10:2-4.

Ngaba sinokuba nolwalamano lobuqu oluhle noThixo ukuba imithetho yakhe besiyijongela phantsi? Eminye yayo yeyokuba sihlanganisane ngokuthe rhoqo namakholwa angoowethu.—Heb. 10:24, 25.

Ukuba iBhayibhile sizifundela ngokobuqu, ngaba oko kwanele?

Kuyinyaniso ukuba abantu abaninzi banokufunda okukhulu ngokuyifunda ngokobuqu iBhayibhile. Ukuba into ebashukumisayo kukufunda inyaniso engoThixo neenjongo zakhe, into abayenzayo incomeka gqitha. (Ize. 17:11) Kodwa, xa sinokunyaniseka kuthi, ngaba ngokwenene siza kuyiqonda yonke intsingiselo yoko ngaphandle koncedo? IBhayibhile ibalisa ngendoda eyayikwisikhundla esibalaseleyo kodwa eyayithobeke gqitha kangangokuba yafuna uncedo lokuqonda isiprofeto seBhayibhile. Olo ncedo lwalungiselelwa lilungu lebandla lamaKristu.—Ize. 8:26-38; thelekisa amanye amazwi abhekisela kuFilipu kwiZenzo 6:1-6; 8:5-17.

Kakade ke, ukuba umntu ufunda iBhayibhile kodwa akayisebenzisi kubomi bakhe, ayimenzeli nto ilungileyo. Ukuba uyayikholelwa ibe esenza ngokuvisisana nayo, uya kunxulumana nabakhonzi bakaThixo kwiintlanganiso zebandla ezithe rhoqo. (Heb. 10:24, 25) Kwakhona uya kubathelela ekwabelaneni nabanye abantu ‘ngeendaba ezilungileyo.’—1 Kor. 9:16; Marko 13:10; Mat. 28:19, 20.

Umntu unokwazi njani ukuba luluphi unqulo oluchanileyo?

(1) Zisekelwe entwenini iimfundiso zalo? Ngaba ziphuma kuThixo, okanye ngaba ngokukhulu ziphuma ebantwini? (2 Tim. 3:16; Marko 7:7) Ngokomzekelo khawuzibuze oku: Ifundisa phi iBhayibhile ukuba uThixo unguBathathu Emnye? Itsho phi ukuba umphefumlo womntu awufi?

(2) Qwalasela enoba luyalwazisa na igama likaThixo. UYesu wathi kumthandazo awayewubhekisa kuThixo: “Ndilibonakalisile igama lakho kubo abantu obundinike bona, bephuma ehlabathini.” (Yoh. 17:6) Wavakalisa oku: “YiNkosi uThixo wakho oya kuqubuda kuyo, ukhonze yona yodwa.” (Mat. 4:10) Ngaba unqulo lwakho lukufundise ukuba ‘nguYehova omele umnqule’? Ngaba uye wamazi uMntu ochazwa ngelo gama—iinjongo zakhe, imisebenzi yakhe, iimpawu zakhe—ukuze uzive unokusondela kuye ngentembelo?

(3) Ngaba ukholo lokwenyaniso kuYesu Kristu luyabonakaliswa? Oku kuquka ukuqonda ukuxabiseka kwedini lobomi bobuntu bukaYesu nesigxina sakhe namhlanje njengoKumkani wasezulwini. (Yoh. 3:36; INdu. 2:6-8) Uxabiso olunjalo lubonakaliswa ngokuthobela uYesu—ukuba nesabelo ngokobuqu nangenzondelelo emsebenzini awawabela abalandeli bakhe. Unqulo lokwenyaniso lunokholo olunjalo oluphelekwa yimisebenzi.—Yak. 2:26.

(4) Ngaba ngokukakhulu lusisithethe, isiko, okanye luyindlela yobomi? UThixo akakholiswa kwaphela lunqulo olulisiko nje. (Isa. 1:15-17) Unqulo lokwenyaniso luyayiphakamisa imilinganiselo yeBhayibhile yokuziphatha nentetho ecocekileyo endaweni yokuba luthi ngobuthathaka luhambe notyekelo lukawonke wonke. (1 Kor. 5:9-13; Efe. 5:3-5) Amalungu alo abonakalisa iziqhamo zomoya kaThixo kubomi bawo. (Gal. 5:22, 23) Ngoko, abo banamathela kunqulo lokwenyaniso banokuqondwa ngenxa yokuba ngokunyanisekileyo bazabalazela ukusebenzisa imilinganiselo yeBhayibhile kubomi babo kungekhona nje kwiindawo zabo zokuhlanganisana kodwa nakubomi beentsapho zabo, emsebenzini wabo wempangelo, esikolweni, nasekuzonwabiseni.

(5) Ngaba amalungu alo athandana ngokwenyaniso? UYesu wathi: “Ngayo le nto baya kwazi bonke, ukuba ningabafundi bam, ukuba nithe nathandana.” (Yoh. 13:35) Uthando olunjalo lugqitha ngaphaya kwemida yobuzwe, yezentlalo neyohlanga, luze luhlanganise abantu kubuzalwana bokwenyaniso. Olu thando lunamandla kangangokuba lubenza bahluke ngokwenyaniso. Xa iintlanga zisilwa emfazweni, ngoobani abanothando lokwenene ngabazalwana babo abangamaKristu abakwamanye amazwe kangangokuba bakwale ukuthabatha izixhobo baze bababulale? Oko koko amaKristu okuqala akwenzayo.

(6) Ngaba lwahluke ngokwenyaniso ehlabathini? UYesu wathi abalandeli bakhe bokwenyaniso babengayi kuba ‘ngabehlabathi.’ (Yoh. 15:19) Ukuze sinqule uThixo ngendlela ayifunayo kufuneka ukuba sizigcine ‘singenabala kulo ihlabathi.’ (Yak. 1:27) Ngaba kunokuthethwa oko ngabo banabefundisi namanye amalungu abandakanyeke kwiipolitiki, okanye ababomi babo ngokukakhulu busekelwe kwiinkanuko zezinto eziphathekayo nezokwenyama?—1 Yoh. 2:15-17.

(7) Ngaba amalungu alo angamangqina akhutheleyo oBukumkani bukaThixo? UYesu waxela kwangaphambili oku: “Ezi ndaba zilungileyo zoBukumkani ziya kuvakaliswa kulo elimiweyo liphela, zibe bubungqina kuzo zonke iintlanga; kwandule ke ukufika ukuphela.” (Mat. 24:14) Luluphi unqulo ngokwenene oluvakalisa uBukumkani bukaThixo njengethemba loluntu endaweni yokukhuthaza abantu ukuba bakhangele kulawulo lwabantu ukuze lucombulule iingxaki zalo? Ngaba unqulo lwakho lukuxhobisele ukuba nesabelo kulo msebenzi, ibe uwenze kwindlu ngendlu njengoko uYesu wabafundisa abapostile ukuba benjenjalo?—Mat. 10:7, 11-13; Ize. 5:42; 20:20.

Ngaba amaNgqina kaYehova akholelwa kwelokuba unqulo lwawo lukuphela kolufanelekileyo?

Bona iphepha 235, phantsi kothi “AmaNgqina KaYehova.”

Kutheni le nto abantu abathile benokholo ngoxa abanye bengenalo?

Bona umxholo omkhulu othi “UKholo.”

Ukuba Ubani Uthi—

‘Andinamdla elunqulweni’

Usenokuphendula uthi: ‘Oko akundimangalisi. Baninzi abantu abacinga njengawe. Makhe ndikubuze, Ngaba ubusoloko uvakalelwa ngaloo ndlela?’ Mhlawumbi usenokongeza uthi: ‘Enye yezinto ezindikhathazayo kukufumanisa ukuba phantse zonke iimfundiso eziphambili ezifundiswa ezicaweni namhlanje azifumaneki eBhayibhileni. (Mhlawumbi sebenzisa okufumaneka kwiphepha 235, 236, phantsi kothi “AmaNgqina KaYehova,” ugxininisa ngokukhethekileyo kuBukumkani. Ngokwenza umahluko, bonisa oko amaNgqina kaYehova akukholelwayo, njengoko kwandlalwe kwiphepha 230, 232.)’

Bona kwanephepha 16, 17.

‘Baninzi abantu abahanahanisayo elunqulweni’

Usenokuphendula uthi: ‘Ewe, ndiyavumelana nawe. Abaninzi bafundisa le nto baze baphile ngenye indlela. Kodwa khawundixelele, Wena uvakalelwa njani ngeBhayibhile? (INdu. 19:7-10)’

‘Ndiphila ubomi obufanelekileyo. Abamelwane bam ndibaphatha kakuhle. Olo lunqulo olundifaneleyo’

Usenokuphendula uthi: ‘Ekubeni usithi uphila ubomi obuhle, ngokucacileyo uyabunandipha ubomi, ngaba kunjalo? . . . Ubungakuthanda na ukuphila phantsi kohlobo lweemeko ezichazwe apha kwiSityhilelo 21:4? . . . Phawula oko uYohane 17:3 athi kuyimfuneko ukuze ube nenxaxheba apho.’

Bona kwanephepha 254.

‘Andinamdla kunqulo olulungelelanisiweyo. Ndikholelwa ukuba into ebalulekileyo kukuba nolwalamano lobuqu noThixo’

Usenokuphendula uthi: ‘Oko kubangel’ umdla kum. Ngaba ubusoloko uvakalelwa ngaloo ndlela? . . . Ngaba wakha wanxulumana neqela lonqulo kwixa elidluleyo? . . . (Ngoko mhlawumbi ungasebenzisa umbandela okwiphepha 253-255.)’

‘Andivumelani nento yonke icawa yam eyifundisayo, kodwa andiyiboni imfuneko yokuguqukela kolunye. Endaweni yoko ndingasebenzela ukuphucula izinto kweyam’

Usenokuphendula uthi: ‘Ndiyakuvuyela ukundixelela kwakho oko. Ndiqinisekile uza kuvuma ukuba into ebaluleke ngokwenene kuthi sonke kukuba ngabakholisekileyo kuThixo, akunjalo na?’ Mhlawumbi usenokongeza uthi: (1) ‘UThixo thina sonke usinika into ebaluleke gqitha esinokucinga ngayo apha kwiSityhilelo 18:4, 5. . . . Nokuba ngokobuqu asiziqheliseli izinto eziphosakeleyo, iBhayibhile ibonisa ukuba sinetyala ukuba sixhasa ezi ntlangano. (Bona kwanomxholo omkhulu othi “IBhabhiloni Enkulu.”)’ (2) (Mhlawumbi sebenzisa nombandela okwiphepha 255-257.) (3) ‘UThixo ukhangela abantu abathanda inyaniso, ibe ubahlanganisela kunqulo olumanyeneyo. (Yoh. 4:23, 24)’

‘Zonke iinkonzo zilungile; nawe uneyakho, nam ndineyam’

Usenokuphendula uthi: ‘Ngokucacileyo ungumntu onengqondo ephangaleleyo. Kodwa kwakhona uyaqonda ukuba sonke siyalufuna ukhokelo olunikelwa liLizwi likaThixo, ibe kungeso sizathu le nto unonqulo, akunjalo na?’ Mhlawumbi usenokongeza uthi: ‘Apha kuMateyu 7:13, 14 iBhayibhile isinika ukhokelo oluthile oluxabiseke gqitha kumazwi kaYesu. (Mfunde.) . . . Kutheni le nto kusenokuba njalo?’

Bona kwanephepha 249, 250.

‘Lo gama nje ukholelwa kuYesu, ngokwenene akunamsebenzi ukuba ukweyiphi na icawa’

Usenokuphendula uthi: ‘Akukho mathandabuzo ngako oko, ukukholelwa kuYesu kubalulekile. Mhlawumbi ngokutsho oko usingisele ekwamkeleni yonk’ into awayifundisayo. Ngokungathandabuzekiyo uye waphawula, njengoko nam ndiye ndenjenjalo, ukuba abaninzi abathi bangamaKristu ngokwenene abaphili ngokuvisisana nokumelwa lelo gama.’ Mhlawumbi usenokongeza uthi: (1) ‘Phawula okwathethwa nguYesu apha kuMateyu 7:21-23.’ (2) ‘Kukho ikamva elingummangaliso kwabo bakhathala ngokokude baphande oko ukuthanda kukaThixo kukuko baze ke bakwenze. (INdu. 37:10, 11; ISityhi. 21:4)’

‘Yintoni ekwenza ucinge ukuba lunye kuphela unqulo oluchanileyo?’

Usenokuphendula uthi: ‘Ngokungathandabuzekiyo, kukho abantu abanyanisekileyo phantse kuzo zonke iinkonzo. Kodwa okubaluleke ngokwenene koko kuthethwa liLizwi likaThixo. Zingaphi iindidi zokholo lokwenyaniso elibhekisela kuzo? Phawula okubhalwe apha kumaEfese 4:4, 5.’ Mhlawumbi usenokongeza uthi: (1) ‘Oko kuvisisana nokuchazwe zezinye iindinyana. (Mat. 7:13, 14, 21; Yoh. 10:16; 17:20, 21)’ (2) ‘Ngoko, ucelomngeni esimele sijongane nalo kukufanisa olo nqulo. Sinokukwenza njani oko? (Mhlawumbi sebenzisa umbandela okwiphepha 255-257.)’ (3) (Bona kwanokwiphepha 230-232, phantsi komxholo othi “AmaNgqina KaYehova.”)

‘Ndifunda nje iBhayibhile yam ekhaya ndize ndithandaze kuThixo ukuba ndiyiqonde’

Usenokuphendula uthi: ‘Ngaba uye waphumelela ekufundeni yonke iBhayibhile ukuza kuthi ga ngoku?’ Mhlawumbi usenokongeza uthi: ‘Njengoko usebenzela koko, uya kufumanisa into ebangel’ umdla gqitha kuMateyu 28:19, 20. . . . Oku kubalulekile kuba kubonisa ukuba uKristu usebenzisa abanye abantu ukusinceda siqonde okubandakanyekileyo ekubeni ngumKristu wokwenyaniso. Ngokuvisisana noko, amaNgqina kaYehova ayazinikela ukuba atyelele abantu emakhayeni abo echitha malunga neyure veki nganye, ukuze axubushe iBhayibhile ngesisa. Ndingakhe ndichithe imizuzu embalwa nje ndikubonise indlela esikwenza ngayo oku?’

Bona kwanephepha 254, 255.

‘Ndinoluvo lokuba unqulo lungumcimbi wangasese’

Usenokuphendula uthi: ‘Leyo yimbono eqhelekileyo kule mihla, yaye ukuba abantu ngokwenene abanamdla kwisigidimi seBhayibhile, ngovuyo sidlulela kwamanye amakhaya. Kodwa ubusiqonda na isizathu sokuba ndize kukubona ukuba kungenxa yoko uYesu wayalela abalandeli bakhe ukuba bakwenze? . . . (Mat. 24:14; 28:19, 20; 10:40)’