USathana UMtyholi

Ingcaciso: Sisidalwa sokomoya esilutshaba oluphambili lukaYehova uThixo nabo bonke abanqula uThixo oyinyaniso. Igama elithi Sathana walinikwa ngenxa yokuchasa kwakhe uYehova. USathana ukwaziwa ngokuthi nguMtyholi, kuba ungoyena mhlebi mkhulu kaThixo. USathana uchazwa njengenyoka yakudala, ngokucacileyo ngenxa yokusebenzisa kwakhe inyoka e-Eden ukukhohlisa uEva, ibe ngenxa yesi sizathu igama elithi “inyoka” laba lelithetha “umkhohlisi.” Kwincwadi yeSityhilelo, umfuziselo wenamba eqwengayo ukwasetyenziswa kuSathana.

Sinokwazi njani enoba umntu ongumoya ngolo hlobo ukho ngokwenene?

IBhayibhile ingumthombo ophambili wobungqina. Apho ngokuphindaphindiweyo kuthethwa ngaye ngegama lakhe (uSathana izihlandlo ezingama-52, uMtyholi izihlandlo ezingama-33). Ubungqina bokuzibonela ngobukho bukaSathana bukwabhaliwe nalapho. Ngubani owayelingqina lokuzibonela? UYesu Kristu, owayephila ezulwini ngaphambi kokuza emhlabeni, ngokuphindaphindiweyo wathetha ngalowo ungendawo ngegama lakhe.—Luka 22:31; 10:18; Mat. 25:41.

Okuthethwa yiBhayibhile ngoSathana uMtyholi kunengqiqo. Ububi uluntu oludibana nabo bulugqwesa kakhulu ulunya lwabantu ababandakanyekileyo. Ingcaciso yeBhayibhile ngemvelaphi kaSathana nemisebenzi yakhe isenza sicace isizathu sokuba uluntu luthwaxwe yintiyo, lugonyamelo, nemfazwe kangangamawakawaka eminyaka, phezu kwawo nje umnqweno wabaninzi wokuphila eluxolweni, nesizathu sokuba oku kube kufikelele umlinganiselo ngoku osongela ngokutshabalalisa lonke uluntu.

Ukuba ngokwenene ebengekho uMtyholi, ukwamkela oko iBhayibhile ikuthethayo ngaye bekungayi kuzisa iingenelo ezihlala zihleli emntwini. Noko ke, kwiimeko ezininzi, abantu ngaphambili ababebandakanyeke kubugqwirha bomlingo okanye ababekumaqela aqhelisela ukukhafula bathi ngelo xesha babenxunguphele gqitha ngenxa yokuva “amazwi” avela kwimithombo engabonakaliyo, ngenxa “yokuhlaselwa” ngabantu abanamandla angaphaya kwawomntu, njl. Bakhululeka ngokwenyaniso xa bafunda okuthethwa yiBhayibhile ngoSathana needemon zakhe, basebenzisa isiluleko seBhayibhile ukuphepha uqheliselo lokukhafula, baza bafuna uncedo lukaYehova ngomthandazo.—Bona iphepha 159-164, phantsi komxholo othi “UkuKhafula.”

Ukukholelwa ukuba uSathana ukho akuthethi kuthi uneempondo, nomsila omde, nefolokhwe aqhotsa ngayo abantu esihogweni somlilo. IBhayibhile ayinikeli ngcaciso injalo ngoSathana. Leyo yinto eyacingwa ngabazobi bamaxesha aphakathi ababephenjelelwe yimifanekiso yothixo wentsomi yamaGrike onguPan noyi-Inferno eyabhalwa yimbongi engumTaliyane uDante Alighieri. Kunokuba ifundise isihogo somlilo, ngokucacileyo iBhayibhile ithi “abafileyo abazi lutho.”—INtshu. 9:5.

Ngaba mhlawumbi uSathana ubububi nje obusebantwini?

UYobhi 1:6-12 nesesi-2:1-7 zibalisa ngencoko eyayiphakathi koYehova uThixo noSathana. Ukuba uSathana ebebububi obusemntwini, ububi kule meko buthetha ukuba babukuYehova. Kodwa oko akuvumelani ngokupheleleyo noko iBhayibhile isixelela kona ngoYehova njengaLowo “kungekho bugqwetha kuye.” (INdu. 92:15; ISityhi. 4:8) Kuyaphawuleka ukuba isiHebhere sisebenzisa igama elithi has·Sa·tanʹ (uSathana) kwiingxelo ezikuYobhi, okubonisa ukuba kuthethwa ngalowo ungumchasi obalaseleyo kaThixo.—Bona kwanoZekariya 3:1, 2, umbhalo osemazantsi weNW kuhlelo oluneeMbekiselo.

ULuka 4:1-13 uthi uMtyholi wazama ukulinga uYesu ukuba enze umyalelo wakhe. Le ngxelo ichaza ngamazwi awathethwa nguMtyholi neempendulo ezanikelwa nguYesu. Ngaba uYesu apho wayelingwa bububi obungaphakathi kuye? Imbono enjalo ayivisisani nengcaciso yeBhayibhile engoYesu njengongenasono. (Heb. 7:26; 1 Pet. 2:22) Nangona kuYohane 6:70 igama lesiGrike elithi di·aʹbo·los lisetyenziswe ukuchaza uphawu olubi olwavela kuYuda Sikariyoti, kuLuka 4:3 kusetyenziswe ibinzana elithi ho di·aʹbo·losʹ (uMtyholi), ngaloo ndlela kubonisa ukuba nguthile.

Ngaba ukubek’ ityala uMtyholi bubuqhinga nje obusetyenziswa kumzamo wokuphepha imbopheleleko ngenxa yeemeko ezimbi?

Bambi abantu bambek’ ityala uMtyholi ngezinto ezenziwa ngabo. Ngokwahlukileyo koko, iBhayibhile ibonisa ukuba abantu badla ngokuba ngabo abanetyala ngobubi abadibana nabo, enoba bobenziwa ngabanye abantu okanye bubangelwa yihambo yabo. (INtshu. 8:9; Gal. 6:7) Kanti, iBhayibhile ayisishiyi singabazi ubukho nobuchule botshaba olunamandla angaphaya kwawomntu oluye lwezisa intlungu egqithiseleyo kuluntu. Ibonisa indlela esinokuphuma ngayo phantsi kolawulo lwakhe.

Wayevela phi uSathana?

Yonke imisebenzi kaYehova igqibelele; akanguye umyili wokungalungisi; ngoko akazange adale nawuphi na ongendawo. (Dut. 32:4; INdu. 5:4) Lowo wathi waba nguSathana ngaphambili wayengunyana kaThixo ongumoya nogqibeleleyo. Xa wayesithi uMtyholi ‘akazange eme enyanisweni,’ uYesu wayebonisa ukuba ngaxa lithile lowo ‘wayesenyanisweni.’ (Yoh. 8:44) Kodwa, njengoko kunjalo ngazo zonke izidalwa zikaThixo ezinengqiqo, lo nyana ungumoya wayejizekwe ngelungelo lokuzikhethela. Walusebenzisa kakubi ukhetho lwakhe lwenkululeko, evumela iimvakalelo zokuzenza obalulekileyo zikhule entliziyweni yakhe, waqalisa ukunqwenela unqulo olwalulolukaThixo kuphela, waza ke watsala uAdam noEva ukuba bamphulaphule kunokuthobela uThixo. Ngaloo ndlela ngekhondo lakhe lesenzo wazenza uSathana, gama elo elithetha “utshaba.”—Yak. 1:14, 15; bona kwanephepha 241, phantsi komxholo othi “IsoNo.”

Kutheni le nto uThixo engazange amtshabalalise uSathana ngokukhawuleza emva kokuvukela?

USathana waphakamisa iimbambano ezinzulu: (1) Ubulungisa nokulunga kolongamo lukaYehova. Ngaba uYehova wayebandeza uluntu inkululeko eyayiya kufak’ isandla elonwabeni lwalo? Ngaba ubuchule boluntu bokulawula imigudu yalo ngempumelelo nobomi balo obuqhubekayo ngokwenyaniso zazixhomekeke ekuthobeleni kwalo uThixo? Ngaba uThixo wayenganyanisekanga ekunikeleni umthetho othi ukungathobeli kwakuya kukhokelela ekufeni kwabo? (Gen. 2:16, 17; 3:3-5) Ngoko, ngaba uYehova ngokwenene wayenalo ilungelo lokulawula? (2) Ingqibelelo yezidalwa ezinengqiqo kuYehova. Ngokutyeka kuka-Adam noEva kwaphakanyiswa lo mbuzo: Ngaba abakhonzi bakaYehova bamthobela ngokwenene ngenxa yokumthanda okanye ngaba kusenokwenzeka ukuba bonke bamlahle uThixo baze balandele ukhokelo olunikelwa nguSathana? Le mbambano ichazwe mva yakhuliswa ngokubhekele phaya nguSathana ngemihla kaYobhi. (Gen. 3:6; Yobhi 1:8-11; 2:3-5; bona kwanoLuka 22:31.) Ezi mbambano zazingenakuzinziswa ngokubulala nje abavukeli.

Asikuko nje ukuba uThixo wayefuna ukungqina nantoni na kuye. Kodwa wayesenzela ukuba ezi mbambano zingaze ziphinde ziphazamise uxolo nentlalontle yendalo iphela, uYehova uvumele ixesha elaneleyo lokuba zizinziswe ngaphandle kwamathandabuzo. Into yokuba uAdam noEva bafa emva kokuvukela kwabo uThixo yacaca ngexesha elifanelekileyo. (Gen. 5:5) Kodwa kwakukho okungakumbi kunaloo mbambano. Ngoko, uThixo uvumele uSathana nabantu ukuba bazame zonke iintlobo zikarhulumente owenziwe ngabo. Akukho namnye ozise ulonwabo oluhlala luhleli. UThixo uvumele uluntu ukuba lwenze okusemandleni alo ekufuneni iindlela zobomi ezityeshela imilinganiselo Yakhe yobulungisa. Isiqhamo sizithethela ngokwaso. Kunjengoko iBhayibhile ngokunyanisekileyo isithi: “Ayikhona emntwini indlela yakhe; akukhona endodeni ehambayo ukuqinisela ukunyathela kwayo.” (Yer. 10:23) Kwangaxeshanye uThixo unike abakhonzi bakhe ithuba lokungqina ukunyaniseka kwabo kuye ngezenzo zabo zentobelo enothando, ibe oku bekwenza bejongene nezilingo nentshutshiso ephenjelelwa nguSathana. UYehova uyala abakhonzi bakhe, esithi: “Yiba nobulumko, nyana wam, uyivuyise intliziyo yam; ukuze ndimphendule ngezwi ondingcikivayo.” (IMize. 27:11) Abo bazingqina bethembekile bavuna iingenelo ezinkulu ngoku ibe banethemba lobomi obungunaphakade emfezekweni. Ubomi obunjalo baya kubusebenzisa ekwenzeni ukuthanda kukaYehova, obuntu neendlela zakhe bazithanda ngokwenyaniso.

USathana unamandla angakanani kwihlabathi lanamhla?

UYesu Kristu wabhekisela kuye ‘njengomlawuli wehlabathi,’ lowo uluntu ngokubanzi lumthobelayo ngokwamkela izibongozo zakhe zokutyeshela izinto ezifunwa nguThixo. (Yoh. 14:30; Efe. 2:2) IBhayibhile ikwambiza ngokuthi ‘nguthixo weli phakade,’ ozukiswa luqheliselo lonqulo olwenziwa ngabantu abanamathele kule nkqubo yezinto.—2 Kor. 4:4; 1 Kor. 10:20.

Xa wayezabalazela ukulinga uYesu Kristu, uMtyholi ‘wamnyusa wambonisa zonke izikumkani zelimiweyo, ngesiquphe sexesha. Wathi ke uMtyholi kuye, Ndokunika bonke obu bukhosi bazo nozuko lwazo; ngokuba bunikelwe kum; nosukuba ndithanda ndiyamnika bona. Ukuba ngoko uthe wena waqubuda phambi kwam, konke oko koba kokwakho.’ (Luka 4:5-7) ISityhilelo 13:1, 2 sibonisa ukuba uSathana unikela ‘amandla, itrone negunya elikhulu’ kwinkqubo yolawulo yobupolitika esemhlabeni. UDaniyeli 10:13, 20 ubonisa ukuba uSathana ebenabathetheli abaziidemon kwizikumkani eziphambili zomhlaba. AmaEfese 6:12 abhekisela kwaba bathetheli njengababumba ‘oorhulumente, oomagunya, iziphatha-hlabathi zobumnyama, imikhosi yoomoya abakhohlakeleyo kwezasezulwini iindawo.’

Akumangalisi ukuba eyoku-1 kaYohane 5:19 ibe ithi: “Ihlabathi liphela lilele kongendawo.” Kodwa amandla akhe ngawethuba nje elilinganiselweyo lexesha ibe akho nje ngokunyamezela kukaYehova, onguThixo uSomandla.

USathana uya kuvunyelwa ithuba elingakanani ukulahlekisa uluntu?

Ukuze ubone ubungqina bokuba ngoku siphila kwimihla yokugqibela yenkqubo yezinto engendawo kaSathana, bona iphepha 133-135, phantsi kothi “ImiHla Yeziganeko,” kwanomxholo omkhulu othi “ImiHla Yokugqibela.”

Ilungiselelo lokukhululwa kwimpembelelo engendawo kaSathana ngokufuziselayo lichazwa ngale ndlela: “Ndabona isithunywa sezulu, sisihla siphuma emazulwini, sinesitshixo senzonzobila, nomxokelelwane omkhulu esandleni saso. Sayibamba inamba, loo nyoka yakudala enguMtyholi, uSathana ke, sayikhonkxa iminyaka eliwaka. Sayiphosa enzonzobileni, sayivalela, satywina ngaphezu kwayo, ukuze ingabi sazilahlekisa iintlanga, ide izaliseke iminyaka eliwaka; emva koko imelwe kukukhululwa ixeshana elincinane.” (ISityhi. 20:1-3) Emva koko kwenzeke ntoni? “UMtyholi lowo ubalahlekisayo waphoswa edikeni lomlilo nesulfure.” (ISityhi. 20:10) Kuthetha ntoni oko? ISityhilelo 21:8 siphendula ngelithi: “Oko kukufa kwesibini.” Uya kushenxiswa ngonaphakade!

Ngaba ‘ukuphoswa enzonzobileni’ kukaSathana kuthetha ukuba uya kuvalelwa kumhlaba obharhileyo kungekho namnye anokumlinga iminyaka eli-1 000?

Bambi abantu babhekisela kwiSityhilelo 20:3 (esicatshulwe ngasentla) ukuxhasa le ngcamango. Bathi ‘inzonzobila,’ okanye “umngxuma ongumwonyo” (KJ), imela umhlaba obharhileyo. Ngaba kunjalo? ISityhilelo 12:7-9, 12 sibonisa ukuba ngaxa lithile ngaphambi kokufakwa kwakhe enzonzobileni uSathana ‘ukhutshwa’ ezulwini ephoselwa emhlabeni, apho azisa uyeha omkhulu kuluntu. Ngoko, xa ISityhilelo 20:3 sisithi uSathana ‘uphoswa enzonzobileni,’ ngokuqinisekileyo akashiywa nje apho akhoyo ngoku—engabonakali kodwa evalelwe kwindawo yomhlaba. Uyashenxiswa apho, ‘ukuze angabi sazilahlekisa iintlanga, ide izaliseke iminyaka eliwaka.’ Phawula ukuba ISityhilelo 20:3 sithi, ekupheleni kweminyaka eliwaka, nguSathana, kungekhona iintlanga, okhululwayo enzonzobileni. Xa uSathana ekhululwa, abantu ababekade bebumba ezo ntlanga baya kuba sele bekho.

Isaya 24:1-6 noYeremiya 4:23-29 maxa wambi kubhekiselwa kubo ukuxhasa le nkolelo. Ezi ncwadi zithi: “Yabona uYehova ulithi qongqololo ihlabathi, ulenza amagqagala, . . . ihlabathi lithiwe qongqololo ngakunye, liphangiwe; kuba uYehova elithethile elo lizwi.” “Ndakhangela emhlabeni, nanko kusenyanyeni, lilubala; . . . Ndakhangela, nanko ke kungekho mntu, . . . Ngokuba utsho uYehova ukuthi, Kuya kuba senkangala kulo lonke ilizwe; . . . yonke imizi ishiyiwe, akuhlali mntu kuyo.” Zithetha ukuthini ezi ziprofeto? Zaqala ukuzaliseka eYerusalem nakwilizwe lakwaYuda. Ekuphumezeni umgwebo wobuthixo, uYehova wavumela amaBhabhiloni ukuba alitshabalalise elo lizwe. Ekugqibeleni lonke lashiywa libharhile yaye liyinkangala. (Bona uYeremiya 36:29.) Kodwa uThixo akazange abashenxise ngelo xesha abantu kuwo wonke umhlaba, ibe engayi kwenjenjalo nangoku. (Bona iphepha 191-193, phantsi kothi “UMhlaba,” kwanomxholo omkhulu othi “IZulu.”) Noko ke, uya kumphanzisa ngokupheleleyo umlingani wanamhla weYerusalem engathembekanga, iNgqobhoko, egculela igama likaThixo ngehambo yayo engengcwele, nayo yonke intlangano kaSathana ebonakalayo.

Kunokuba ube yinkangala ephanzileyo, ebudeni boLawulo lukaKristu Lwewaka Leminyaka, ibe ngoxa uSathana esesenzonzobileni, wonke umhlaba uya kuba yiparadisi. (Bona othi “IParadisi.”)