UkuKhafula

Ingcaciso: Yinkolelo yokuba inxalenye engumoya yabantu iyaphila ekufeni komzimba wenyama ibe inokunxibelelana nabaphilileyo, ngokuqhelekileyo ngomntu osebenza njengosiyazi. Bambi abantu bakholelwa ukuba yonke into ebonakalayo nezinto zemvelo zinemimoya ngaphakathi kuzo. Ubugqwirha kukusetyenziswa kwamandla avunywayo ukuba aphuma kwimimoya emibi. Zonke iintlobo zokukhafula zigxekwa ngamandla eBhayibhileni.

Ngaba ngokwenene kunokwenzeka ngabantu ukuncokola “nomoya” wothandekayo ofileyo?

INtshu. 9:5, 6, 10: “Abadla ubomi bayazi ukuba baya kufa; ke bona abafileyo abazi lutho, . . . seluphelile kade uthando lwabo, nentiyo yabo, nekhwele labo; abasenasabelo naphakade ezintweni zonke ezenzekayo phantsi kwelanga. Yonke into esiyifumanayo isandla sakho ukuba siyenze, yenze ngamandla akho; ngokuba akukho kwenza, nakucinga, nakwazi, nakulumka kwelabafileyo, apho uya khona wena.”

Hez. 18:4, 20: “Umphefumlo owonayo, kuya kufa wona.” (Ngoko umphefumlo asinto iphilayo ekufeni komzimba nento abanokuthi abantu abaphilileyo bancokole nayo emva koko.)

INdu. 146:4: “Uyaphuma umoya wakhe, abuyele yena emhlabeni wakhe; ngaloo mini ayatshitsha amabhongo akhe.” (Xa umoya kusithiwa “uyaphuma” emzimbeni, le yenye yeendlela nje yokuthi amandla obomi akasasebenzi. Ngaloo ndlela, emva kokufa komntu, umoya wakhe awubikho njengento engabonakaliyo enokucinga nenokuphumeza amacebo ngaphandle komzimba. Asinto abantu abaphilileyo abanokuncokola nayo emva kokufa komntu.)

Bona kwanephepha 106-108, phantsi komxholo othi “UkuFa.”

Ayibonisi na iBhayibhile ukuba uKumkani uSawule wancokola nomprofeti uSamuweli emva kokufa kukaSamuweli?

Le ngxelo ifumaneka kweyoku-1 kaSamuweli 28:3-20. Indinyana 13, 14 ibonisa ukuba uSawule akazange ambone uSamuweli kodwa waqikelela nje kuphela ngokwengcaciso eyanikelwa ngoneshologu ukuba wayebone uSamuweli. USawule wayekufuna ngamandla ukukholelwa ukuba lowo yayinguSamuweli ibe wazivumela ukuba akhohliswe. Indinyana 3 ithi uSamuweli wayefile yaye engcwatyiwe. Izibhalo ezicatshulwe phantsi komxholwana owandulelayo zikwenza kucace ukuba yayingekho inxalenye kaSamuweli eyayiphila komnye ummandla ibe ikwazi ukuncokola noSawule. Ilizwi elazenza elikaSamuweli yayilelomkhohlisi ozimilisa njengaye.

Abo bazabalazela ukuthetha nabafileyo ngokwenene bancokola noobani?

Inyaniso engemeko yabafileyo ichazwe ngokucacileyo eBhayibhileni. Kodwa ngubani owazama ukukhohlisa isibini sabantu bokuqala ngokufa? USathana wasiphikisa isilumkiso sikaThixo sokuba ukungathobeli kwakuya kuzisa ukufa. (Gen. 3:4; ISityhi. 12:9) Kakade ke, ekuhambeni kwexesha, kwaye kwacaca ukuba abantu bafa njengoko uThixo wathi babeya kwenjenjalo. Ngoko, ngokusengqiqweni, ngubani owayebophelelekile ngokuqulunqa ingcamango yokuba abantu ngokwenene abafi kodwa into eyenzekayo yeyokuba umoya othile oyinxalenye yomntu uyaphila ekufeni komzimba? Inkohliso enjalo iyamfanela uSathana uMtyholi, uYesu awamchaza ‘njengoyise wamaxoki.’ (Yoh. 8:44; bona kwaneyesi-2 yabaseTesalonika 2:9, 10.) Ukukholelwa ukuba abafileyo ngokwenene bayaphila komnye ummandla nokuba sinokuncokola nabo akuluzuzisanga nganto uluntu. Ngokwahlukileyo koko, ISityhilelo 18:23 sithi, ngokukhafula kweBhabhiloni Enkulu, “zonke iintlanga zalahlekiswa.” Uqheliselo lokukhafula oludibene ‘nokuthetha nabafileyo’ eneneni luyinkohliso enobuqhophololo enokwenza abantu banxibelelane needemon (izithunywa zezulu ezamvukela ngokuzingca uThixo) ibe ngokufuthi lukhokelela ekuveni komntu amazwi angafunekiyo aze akhathazwe nayiloo mimoya ingendawo.

Ngaba kukho ingozi ekufuneni ukuphiliswa okanye ukukhuselwa ngeendlela zokukhafula?

Gal. 5:19-21: “Iyabonakala ke yona imisebenzi yenyama, eyile: ukrexezo, umbulo, ukungcola, uburheletyo, ukubusa kwizithixo, ukukhafula, . . . endinixelelayo ngenxa engaphambili, njengokuba besendinixelele kade, ukuba abazenzayo izinto ezinjalo abayi kubudla ilifa ubukumkani bukaThixo.” (Ukubhenela komntu ekukhafuleni ukuze ancedakale kuthetha ukuba uyakholelwa kubuxoki bukaSathana obungokufa; ufuna icebiso ebantwini abazabalazela ukuzuza amandla kuSathana needemon zakhe. Ngaloo ndlela umntu onjalo uzinxulumanisa nabo bazivakalisa beziintshaba zikaYehova uThixo. Endaweni yokuba ancedwe ngokwenyaniso, nabani na ozingisa kwikhondo elinjalo ufumana ubungozi obuhlala buhleli.)

Luka 9:24: “Osukuba ethanda ukuwusindisa umphefumlo wakhe [okanye, ubomi], wolahlekelwa nguwo; ke othe wawulahla umphefumlo wakhe ngenxa yam [ngenxa yokuba engumlandeli kaYesu Kristu], wowusindisa lowo.” (Ukuba umntu uthi ngabom avukele imiyalelo yeLizwi likaThixo echazwe ngokucacileyo ngokuzabalazela ukulondoloza okanye ukukhusela ubomi bakhe bangoku, uya kuphulukana nethemba lobomi obungunaphakade. Hayi indlela okububuyatha ngayo oko!)

2 Kor. 11:14, 15: “Ke akummangaliso oko, kuba noSathana ngokwakhe uzimilisa okwesithunywa sokukhanya. Akunto inkulu ke ngoko, ukuba abalungiseleli bakhe bazimilise okwabalungiseleli bobulungisa.” (Ngoko asimele silahlekiswe xa ezinye zezinto ezenziwa ngeendlela zokukhafula zibonakala ziyingenelo okwexeshana.)

Bona kwanephepha 287-292, phantsi komxholo othi “UkuPhilisa.”

Ngaba kububulumko ukubhenela kwiindlela zokukhafula ukuze wazi okufunjethwe likamva okanye ukuqinisekisa ubani ngempumelelo kumsebenzi othile?

Isa. 8:19: “Xa bathe kuni, Quqelani kwabaneshologu nakoosiyazi, abalozayo, abadumzelayo, yithini, Abantu mabangaquqeli kuThixo wabo, yini na?”

Lev. 19:31: “Musani ukubheka kwabaneshologu; musani ukubafuna oosiyazi, ukuze nenziwe inqambi ngabo: ndinguYehova uThixo wenu.”

2 Kum. 21:6: “[UKumkani uManase] wamcandisa unyana wakhe emlilweni, waba litola, wahlaba izihlabo, wamisa abaneshologu noosiyazi, waphikela ukwenza okubi emehlweni kaYehova, ukuba amqumbise.” (Uqheliselo olunjalo lokukhafula ngokwenene lwaquka ukuphethukela kuSathana needemon zakhe ukuze afumane uncedo. Akumangalisi ukuba oku kube ‘kwakukubi emehlweni kaYehova,’ yaye abe wezisa isohlwayo esiqatha kuManase ngenxa yako. Kodwa xa waguqukayo waza walulahla olu qheliselo lubi, wasikelelwa nguYehova.)

Yiyiphi ingozi enokubakho ekubandakanyekeni kwimidlalo equka uhlobo lokuvumisa okanye ekufuneni intsingiselo yento ebonakala ingumqondiso wokulunga?

Dut. 18:10-12: “Maze kungafunyanwa namnye kuwe . . . [ovumisayo], nolitola, nohlaba izihlabo, nokhafulayo, nobopha ngomabophe, nobuza koneshologu, nosiyazi, noquqela kwabafileyo. Kuba balisikizi kuYehova bonke abenza ezo zinto.” (Ukuvumisa kutyhila ulwazi olufihlakeleyo okanye kuxela kwangaphambili iziganeko, kungekhona ngenxa yophengululo, kodwa ngokucaciswa kwemiqondiso okanye ngoncedo lwamandla angaphaya kwemvelo. UYehova walwalela uqheliselo olunjalo phakathi kwabakhonzi bakhe. Kwakutheni? Lonke olu qheliselo luyindlela yokumema ukuncokola nemimoya engcolileyo, okanye iidemon okanye luyindlela yokuyifumana. Ukubandakanyeka kwizinto ezinjalo bekuya kuba kukungathembeki okunzulu kuYehova.)

Ize. 16:16-18: “Sahlangatyezwa sisicakazana esithile, sinomoya wemilozi; sona besizizuzisa iinkosi zaso inzuzo enkulu ngokuvumisa.” (Ngokucacileyo, akukho bani uthanda ubulungisa ebeya kuya kumthombo onjalo wenkcazelo, enoba kungenjongo yokwenene okanye kungenxa yokudlala. UPawulos ekruqulwe kukukhala kwaso, wayalela umoya ukuba uphume kuso.)

Ngaba imimoya engendawo iyakwazi ukuzenza abantu?

Ngemihla kaNowa, izithunywa zezulu ezingathobeliyo zazenza abantu. Zatshata, yaye zaba nabantwana. (Gen. 6:1-4) Noko ke, xa uMkhukula wafikayo, ezo zithunywa zezulu kwanyanzeleka ukuba zibuyele kummandla womoya. Ethetha ngazo, uYuda 6 uthi: “Izithunywa zezulu, ezo zazingalugcinanga ulawulo lwazo, zesuka zalishiya ikhaya lazo, izigcinele umgwebo womhla omkhulu ngemixokelelwane engunaphakade, phantsi kwesithokothoko.” UThixo akazange nje azithobe kumalungelo azo angaphambili asezulwini waza wazifaka kwisithokothoko sobumnyama ngokubhekisele kwiinjongo zikaYehova, kodwa ukukhankanywa kwemixokelelwano kubonisa ukuba uzithintele. Uzithintele entwenini? Ngokucacileyo, uzithintele ekubeni zingabikho kwimizimba yokwenyama ukuze zibe neentlobano nabafazi, njengoko zenjenjalo ngaphambi koMkhukula. IBhayibhile ibika ukuba izithunywa zezulu ezithembekileyo, njengabathunywa bakaThixo, zazizambathisa imizimba yokwenyama xa zazisenza imisebenzi yazo de kwaba yinkulungwane yokuqala C.E. Kodwa emva koMkhukula, ezo zithunywa zezulu ezazisebenzisa ngokuphosakeleyo izipho zazo zabandezwa ubuchule bokuzenza abantu.

Noko ke, kubangel’ umdla ukuba iidemon ngokucacileyo zibe zinokubabangela abantu babone imibono, ibe oko bakubonayo kusenokubonakala kuyinto yokwenene. Xa uMtyholi walinga uYesu, ngokucacileyo wazisebenzisa iindlela ezinjalo ukuze abonise uYesu “zonke izikumkani zehlabathi, nozuko lwazo.”—Mat. 4:8.

Umntu unokukhululeka njani kwimpembelelo yokukhafula?

IMize. 18:10: “Yintaba ende eliqele igama likaYehova; ilungisa ligidimela kulo, libe sengxondeni.” (Oku akuthethi ukuba ukusebenzisa igama likaThixo lobuqu kusebenza njengekhubalo lokugxotha ububi. “Igama” likaYehova limela Yena ngokwakhe. Siyakhuseleka xa sithi simazi size sikholose ngokupheleleyo ngaye, sizithobe kwigunya lakhe yaye sithobele nemiyalelo yakhe. Ukuba siyakwenza oku, ngoko xa simcela ukuba asincede, sisebenzisa igama lakhe lobuqu, unikela inkuselo ayithembisileyo kwiLizwi lakhe.)

Mat. 6:9-13: “Thandazani ngoko nina nenjenje: . . . Ungasingenisi ekulingweni, sihlangule enkohlakalweni.” Kwakhona umele ‘uzingise emthandazweni.’ (Roma 12:12) (UThixo uyayiva imithandazo enjalo ephuma kwabo bakunqwenela ngokwenyaniso ukwazi inyaniso nokumnqula ngendlela emkholisayo.)

1 Kor. 10:21: “Aninako ukwabelana ngesithebe seNkosi nesithebe seedemon.” (Abo bafuna ukuba zizihlobo noYehova nokukhuselwa nguye bamele bangabi nanxaxheba ngokupheleleyo kwiintlanganiso zabakhafuli. Ngokuvisisana nomzekelo obhalwe kwiZenzo 19:19, kukwabalulekile ukutshabalalisa okanye ukulahla ngokufanelekileyo zonke izinto ubani anazo nezinxibelelene nokukhafula.)

Yak. 4:7: “Mthobeleni ngoko uThixo. Mchaseni ke uMtyholi, wonibaleka.” (Ukuze ukwenze oku, khuthala ekufundeni ukuthanda kukaThixo nokukusebenzisa kubomi bakho. Njengoko ukuthanda uThixo kukuqinisa nxamnye nokoyika umntu, ngokuqinileyo kugatye ukuba nesabelo kuwo nawaphi na amasiko ahlobene nokukhafula okanye kugatye ukuthobela nayiphi na imithetho eyandlalwa ngabantu abakhafulayo.)

Xhoba “sonke isikrweqe sikaThixo” esichazwe kumaEfese 6:10-18 uze ube nenzondelelo ekugcineni yonke inxalenye yaso ikwimeko entle.