Ingxelo Yehlabathi Lonke

Ukwakha Ukuze Kwamkelwe Isihlwele Esikhulu

Ngowe-1935, amaNgqina kaYehova afunda kwiZibhalo ngenjongo kaThixo yokuhlanganisa isihlwele esikhulu ngoku, kule nkqubo yezinto, ukuze sikhonze uYehova ngonaphakade kumhlaba oyiparadesi. (ISityhi. 7:9, 10) Kwakuloo nyaka, okwesihlandlo sokuqala, enye yeendawo zawo zokuhlanganisana eHawaii yabizwa ngokuba yiHolo yoBukumkani. Ngoku kukho amawaka ezo Holo zoBukumkani eziphuphuma ngabantu abaye bamkela amadinga afudumez’ intliziyo eBhayibhile nabayihlonelayo imilinganiselo yayo yobulungisa.

Inani labo baya rhoqo kwiintlanganiso ezikwezo Holo zoBukumkani lifikelela kwizigidi. Ngenxa yamakhulu amawaka abantu ababhaptizwayo nyaka ngamnye, kukho imfuneko engxamisekileyo yeeHolo zoBukumkani ezingakumbi. Uhlolisiso lowe-1998 lwabonisa ukuba zimalunga nama-8 000 iiHolo zoBukumkani ezingakumbi ezazifuneka ngokungxamisekileyo kumazwe angama-40 asakhasayo. Yintoni eye yenziwa kunyaka ophelileyo ukuhlangabezana naloo ntswelo?

Kuye kwasekwa iiOfisi Zokwakha IiHolo ZoBukumkani Zeenqila kwiindawo ezinkulu ezifana noMzantsi Afrika, iOstreliya neJamani. Ngokusuka kula maziko okwenza lo msebenzi, abaveleli bawo baqalisa ukunceda ekulungelelaniseni amaphulo okwakha iiHolo zoBukumkani eMpuma naseNtshona Afrika, kummandla weAsia nowePasifiki nakwiMpuma Yurophu, ngokulandelelana. Ukuza kuthi ga ngoku, ngabakhonzi bokwakha bamazwe ngamazwe abangama-77 abancedisa kulo msebenzi kumazwe angama-21 aseAfrika, asi-7 aseMpuma Yurophu nama-4 akummandla waseAsia nowePasifiki. Kunikelwa uncedo nakumazwe amabini akuMbindi noMzantsi Merika. Apho kunokwenzeka, kwenziwa imizamo yokumisela amaQela Okwakha IiHolo ZoBukumkani exesha elizeleyo. Kangangoko kunokwenzeka, kusetyenziswa iindlela zokwakha nezinto zokwakha zasekuhlaleni, yaye abazalwana basekuhlaleni bakhuthazwa ukuba babe nenxaxheba kule nkqubo yokwakha. Ngokuyintloko, umkhonzi wokwakha wamazwe ngamazwe omnye okanye ababini basekunokukhokela kula maqela baze banikele uqeqesho olufunekayo. Apho kufuneka iindawo zeentlanganiso ngokungxamisekileyo zibe zona iimeko zezoqoqosho ziphantse zingabavumeli abazalwana balapho ukuba bathenge izinto zokwakha, abazalwana bazweni-banzi benza imigudu yokunceda nakuloo meko.

Emva kokuba abazalwana baseGhana bencediwe ukuze balungelelanise ucwangciso lwabo lokwakha iiHolo zoBukumkani, bakwazi ukwakha iiHolo zoBukumkani ezili-13 kulo nyaka uphelileyo kunezi-4 ebezisoloko zingumlinganiselo kule minyaka yakutshanje. Ngenxa yoncedo lwamazwe ngamazwe, eBurundi kwakhiwa iiHolo zoBukumkani ezili-11 kwiinyanga nje ezimbalwa. Kwenzeka ukuba iHolo yoBukumkani yaseGitega, eBurundi ibe sisakhiwo sokuqala esakhiwe endulini kwindawo emi kuyo. Ngokwesiko lalapho, abemi abaninzi balapho bayibiza loo nduli njengeNtaba kaYehova.

ELiberia kwabakho ulwando lwama-40 ekhulwini kubavakalisi bowe-1998 nolwando lwe-19 ekhulwini ngowe-1999. Emva kweminyaka yemfazwe yamakhaya kwelo lizwe, inkoliso yamabandla ifuna iiHolo zoBukumkani. Sekunjalo, inkoliso yabazalwana bethu abalapho ijamelene neengxaki ezinzulu zezoqoqosho, kuquka ukungabikho komsebenzi. Hayi indlela abanombulelo ngayo ngoncedo lwemali abalufumana kubazalwana babo abakwamanye amazwe ukuze bakwazi ukwakha ezo Holo zoBukumkani zifunekayo! Banombulelo nangoncedo lwabakhonzi bokwakha bamazwe ngamazwe abahlanu abeze kubanceda balungelelanise loo msebenzi wokwakha.

ENigeria kufuneka iiHolo zoBukumkani ezingakumbi ezingaphezu kwe-1 800. EAbeokuta, eNigeria ukumanyana nokukhuthala kwamaNgqina alapho awayesebenza xa kwakusakhiwa kwashukumisela inkokeli yecawa ekufutshane ukuba inikele uncedo ngokuzithandela. Ngoku ikhonza uYehova nelo bandla yayilincedisa ekwakheni iHolo yalo yoBukumkani. ETogo kwabakho inkcaso eqatha ekwakhiweni kweHolo yoBukumkani kwenye yeedolophana zalapho kangangokuba abazalwana baya kuyakha kwenye indawo. Kodwa emva kokuba abo bachasi bebone indlela entle ngayo loo Holo yoBukumkani yayisakhiwa, babuza enoba babengenako ukwakha enye iholo kusini na kuloo mhlaba kwakuphikiswana ngawo.

ESri-Lanka amabandla ebesoloko eqhubela iintlanganiso kwimizi yabantu, kwizakhiwo ezincinane zokwexeshana ezenziwe ngamagqabi athungelweyo ecoconut, naphantsi kweeseyile ngasemva kwezindlu. Hayi indlela abanombulelo ngayo kukufumana iindawo zokunqula ezifanelekileyo nezindiliseke ngakumbi! Ngoku kwakhiwa iiHolo zoBukumkani ezili-13 eSri-Lanka, yaye kucetywa ezingama-20 ezingakumbi yaye ezingama-50 zicetyelwa iminyaka emihlanu ezayo.

Xa kukho iHolo yoBukumkani efanelekileyo, abantu bakulungela ngakumbi ukuhlanganisana ukuze bazuze kwimfundiso enikelwa nguYehova. Ngoko ke, xa kwakhiwa iHolo yoBukumkani enkulu kwihlomela-dolophu laseLima, ePeru, inani labezayo landa kwibandla ngalinye kulawo mathathu ayisebenzisayo, yaye kunyaka nje omnye baba ngama-75 abavakalisi abatsha abaqalisa ukuba nesabelo kwinkonzo yasentsimini.

Kwizixeko ezikhulu apho kukho amabandla amaninzi, umhlaba usetyenziswa kakuhle ngokwakha izakhiwo ezineeHolo zoBukumkani ezingakumbi. Ngempela-veki yomhla kaMeyi 29 nowama-30, kwanikelwa ezintathu zezo Holo zoBukumkani zikwisakhiwo esinye eRomania. Esinye sazo sesaseCluj-Napoca esineeHolo zoBukumkani ezine; esinye sinezimbini. Kusuku olulandelayo, eTârgu-Mureş, kwanikelwa isakhiwo esineeHolo zoBukumkani ezisixhenxe.

Ukulungiselela IiHolo ZeNdibano

Elungiselela iindibano ezinkulu, amazwe amaninzi akha iiHolo zeNdibano. E-Estonia kuye kwanikelwa izakhiwo ezibini zeeHolo zoBukumkani eziziiHolo zeNdibano kuloo nyaka. Isakhiwo ngasinye sineeHolo zoBukumkani ezintathu ezahlukeneyo nezikwaziyo ukudityaniswa zibe yiHolo yeNdibano enye enkulu. Esona siganeko sibalulekileyo esenzeka ePoland kuloo nyaka wenkonzo yaba kukunikezelwa kweeHolo zeNdibano ezintathu kwimpela-veki enye. Amalungu amabini eQumrhu Elilawulayo, uTheodore Jaracz noDaniel Sydlik babekho kweso sihlandlo sikhethekileyo baza banikela iintetho ezikhuthazayo kuyo nganye yezo holo. Kongezelelwa ibala elinezihlalo ezingama-6 400 kweyona holo inkulu yazo, kwisixeko saseSosnowiec, yaye eso sakhiwo sasetyenziselwa iindibano zesithili ezintlanu ebudeni benyanga kaJulayi.

EUnited States, apho ngoku kukho abavakalisi boBukumkani abangama-980 419, kuye kwanikezelwa iiHolo zeNdibano ezingakumbi ezine kulo nyaka uphelileyo, nto leyo eyenza ukuba zibe ngama-40. EBrazil, apho kukho abavakalisi abangama-528 034 kuye kwanikezelwa iHolo yeNdibano yabo ye-17. Esi sakhiwo sinamacandelo amabini okuhlala anezihlalo ezingama-10 000, kumgama omalunga neyure ukusuka eSão Paulo. Kwanikezelwa iiHolo zeNdibano ezingakumbi ezimbini ezivulekileyo emacaleni eNigeria ebudeni baloo nyaka—enye eOta nenye eIbadan, yaye zinokuhlala abantu abangama-10 000 nabangama-5 000 ngokwahlukahlukeneyo.

Zikho nezinye izakhiwo eziye zalungiselelwa ukuze kuxhaswe ucwangciso lwemfundo yeBhayibhile yehlabathi lonke.

Iziko Lemfundo LeWatchtower

Ngowe-1986 kwathatyathwa amanyathelo athile okuqala asemthethweni ngenjongo yokwakha ezo zakhiwo zingama-28 ngoku zeZiko Lemfundo LeWatchtower ePatterson, eNew York, eUnited States. Ekugqibeleni ngowe-1989 kwenzeka ukuba kuqaliswe ukwakhiwa. Ngowe-1994 iiofisi ezahlukahlukeneyo ezinokuthanani nomsebenzi wokufundisa wamaNgqina kaYehova zaqalisa ukusebenzisa ezo zakhiwo. Ngowe-1995, iSikolo saseGiliyadi safuduselwa apho kwezo zakhiwo. IZikolo Zamalungu eeKomiti zamaSebe nezabaveleli abahambahambayo ziqhutyelwa apho. Ekugqibeleni, ngowe-1999 kwaqhutywa ucwangciso lokunikezelwa kwazo. (Ingxelo ephathelele lona yapapashwa kwiMboniselo kaNovemba 15, 1999.) Yinyambalala yezihlwele zamaNgqina nabanye abantu abanomdla abatyelela ukuze babone ezo zakhiwo nyaka ngamnye, yaye bayakuvuyela ukubona oko kuye kwaphunyezwa ngeminikelo yabo yokuzithandela, ngemizamo yokumanyana kwabazalwana noodade abavumayo, ngaphezu kwako konke ngentsikelelo kaYehova.

Izakhiwo Zesebe Ezifunekayo

Ulwando kwinani labadumisi bakaYehova kumazwe amaninzi lubangele kwakho imfuneko yokuba kwakhiwe iiofisi zamasebe ezintsha. Ezo ofisi zamasebe, kwanekomkhulu lehlabathi zihlala amalungu eentsapho zaseBheteli aqukwe kwiNkqubo Yabakhonzi Abakwinkonzo Ekhethekileyo Yexesha Elizeleyo.

EBOLIVIA: Ulwando lobuthixo olubalaseleyo luye lwakhokelela ekunikelweni kwezakhiwo zesebe ezitsha eSanta Cruz, eBolivia ngomhla kaMatshi 20, 1999. Lisusela kubavakalisi abangama-714 ngexesha ekwakunikezelwa indawo eyayisakuba lisebe ngowe-1968, inani labavakalisi boBukumkani eBolivia liye lakhula laya kufikelela kweyona ncopho iphakamileyo yabali-15 388, yaye abebekho kwiSikhumbuzo sowe-1999 bafikelela kuma-53 312.

Iofisi yesebe entsha, ekumathafa etropiki aseBolivia, yakhiwa yonke ngabasebenzi balapho—inxalenye enkulu yenziwe ngokuzithandela ngamaNgqina—yaye yakhiwe ngezinto zokwakha ezithandwayo apho. Ngenxa yoko eso sakhiwo siyakwazi ukungenisa umoya opholileyo ngaphandle kwezixhobo zokufaka umoya opholileyo yaye sisakhiwo esingena kakuhle kuloo mhlaba unemithi. Ebudeni botyelelo lukaGerrit Lösch, weQumrhu Elilawulayo ezi zakhiwo kunye neHolo yeNdibano yokuqala kwelo lizwe, zanikezelwa kuYehova. Kweso sihlandlo sovuyo kwakukho amawaka amaNgqina aseBolivia kwaneendwendwe ezivela kumazwe ali-11, kuquka abo babesakuba ngabavangeli basemazweni ababekhonza eBolivia ngaxa lithile ebudeni beminyaka engama-54 yembali yenkonzo yobuvangeli basemazweni apho.

EMOZAMBIQUE: “UYehova mkhulu yaye ngowokudunyiswa kakhulu.” (INdu. 48:1) Lawo ngamazwi amnandi kumaNgqina kaYehova aseMozambique, yaye ayevakala ngokufuthi ngomhla kaDisemba 19, 1998 xa kwakunikezelwa izakhiwo zesebe ezitsha eMaputo, kufutshane noLwandlekazi LwaseIndiya. Kwiminyaka embalwa edlulileyo, oku bekusenokubonakala ngathi akunakwenzeka. AmaNgqina kaYehova ebevalwe umlomo ngurhulumente ngaphezu kweminyaka engamashumi amabini, de kwangowe-1991. Kulo nyaka ayengaphezu kwama-6 000 nje kuphela. Ngasekupheleni kowe-1998, kwanikelwa ingxelo yencopho yabavakalisi abangama-29 514. Kwakufuneka izakhiwo zesebe ezitsha.

Lakhiwa njani elo sebe, ekubeni abazalwana baseMozambique abaninzi babengenamava kolu hlobo lomsebenzi wokwakha? Uncedo lwavela kumatsha-ntliziyo nakubakhonzi bokwakha bamazwe ngamazwe, yaye baqeqesha amaNgqina alapho ngoxa umsebenzi wawuqhubeka. Kwakukho iindwendwe ezivela kumazwe ali-15 kolo nikezelo, yaye kwakuloo mpela-veki eMatola kumgama weekhilomitha ezingama-26 ukusuka apho, kwanikezelwa iHolo yeNdibano yokuqala eMozambique. Ngokwenene, uYehova mkhulu! Ngaphandle kwenyameko yakhe yothando, abakhonzi bakhe eMozambique bebengenakuze babe nezi ziganeko ziyimbalasene.

ENEW CALEDONIA: Ngomhla kaOktobha 24, 1998 kwanikezelwa iofisi entsha yesebe neHolo yeNdibano eNew Caledonia. Ezo zakhiwo zibuphinda ngaphezu kwezihlandlo ezithathu ubukhulu belo sebe. Mathathu amaqela abaguquleli asebenza apha ukuze anyamekele iintswelo zolwimi lwaseNew Caledonia kunye nezinye zalapho.

Oko kunikezelwa kwaba sisihlandlo sovuyo nezinto ezininzi ezibangela umdla. Eyona nto yayibalasele kolo cwangciso yimifanekiso yevidiyo eyayibonisa iimbalasane zomsebenzi wokwakha. Kwakuvuyisa ngokukhethekileyo kumaNgqina kaYehova aseNew Caledonia ukuba noLloyd Barry weQumrhu Elilawulayo kweso sihlandlo ukuze anikele intetho yonikezelo.

ESENEGAL: Ukususela ekufikeni kweNgqina likaYehova lokuqala eSenegal ngowe-1951, kuye kwenziwa umzamo omkhulu ukuze kufikelelwe izigidi zabantu abahlala kwintsimi yelo sebe. Ngabavangeli basemazweni abali-194 abavela kumazwe ali-18 abaye bakhonza apho. Bangamakhulu abantu abaye bancedwa ngabo ukuze bathelele ekukhonzeni uYehova kuloo ntsimi, apho abemi abangaphezu kwama-90 ekhulwini bengengomaKristu.

Ukwakhiwa kwesebe elitsha eCape Almadies, kumda waseDakar, kwakubandakanya iindlela ezintsha kubantu abaninzi abakuloo mmandla. Njengoko icrane yayiphakamisa icala ngalinye lodonga, abo babebukele babeqhwaba izandla yimincili. Yonke into yayimi ngendlela, izinto zihamba kakuhle. Ekuqukunjelweni kocwangciso lokunikezelwa apho kwincam yentshona yelizwekazi laseAfrika, ngomhla kaJuni 19, 1999, bonke abo babekho bathelela ngeentliziyo ekuvumeni ingoma ethi “Enkosi Yehova”!

EAfrika

Imbali yanamhlanje yamaNgqina kaYehova eAfrika isusela emva ebutsheni beminyaka yee-1880. Malunga neminyaka yee-1920 kwaqaliswa ukushunyayelwa ngamandla kwelo lizwekazi. Kunyaka ophelileyo incopho yamaNgqina angama-830 000 kulo lonke eli laseAfrika aye anenxaxheba ekuxeleleni abamelwane bawo nabanye abantu ‘ngezinto zobungangamela zikaThixo.’—IZe. 2:11.

Kuye kwalukhuthazo olukhulu ukubona ulutsha lusenza isikolo intsimi yalo yokunikela ubungqina. UDorcas, udade oselula waseMozambique, uye wakwenza usukelo lwakhe ukunikela ubungqina kwinqununu nakubo bonke abafundisi-ntsapho besikolo sakhe, nakwabo afunda nabo. Ngoku uqhuba izifundo zeBhayibhile ezisibhozo, yaye abathandathu kwizifundo zakhe zeBhayibhile baya rhoqo kwiintlanganiso. Abanye abathathu benza inkqubela yaye babhaptizwa baza emva koko bafanelekela ukuba ngoovulindlela abathe ngxi. Kangangezihlandlo ezahlukeneyo abafundisi-ntsapho abane bakaDorcas baye bazamkela izimemo zakhe zokuya kwiintlanganiso zebandla. Uyise kaDorcas ngoku ufunda nomnye wabo. Omnye umfundisi-ntsapho, uDorcas awaqalisa ukunikela ubungqina kuye kwiminyaka emihlanu eyadlulayo xa wayesiya kwesinye isikolo, ekugqibeleni wasabela ekuzingiseni kwakhe waza wavuma ukufunda naye iBhayibhile ngeenjongo zokwabelana naye ngonqulo lokwenyaniso.

Ukususela ngowe-1995 kuye kwanikelwa ingqalelo engakumbi kubantu abangevayo abaqikelelwa kwizigidi ezihlanu baseNigeria. Emva kokubona iintetho zitolikelwa kwintetho yezandla kwenye indibano yesithili, abavakalisi abaninzi abakwaziyo ukuva bafuna ukufunda indlela yokuthetha olo lwimi. Kwisithuba esingaphezulu kancinane nje kunyaka, abavakalisi noovulindlela abangama-216 abavela kumabandla angama-61 bayifunda kakuhle intetho yezandla de baqhuba izifundo zeBhayibhile yaye batolika ezintlanganisweni. Kukho amabandla angaphezu kwama-80 ngoku aneentlanganiso ezitolikelwa ukuze kungenelwe abo bangevayo.

Njengebhinqa eliselula laseCôte d’Ivoire, uFlorence wagqiba ekubeni abe ngunongendi. Kodwa wadaniswa ziimfundiso ezintsonkothileyo ezingacaciswayo, yaye wothuswa ngumnqweno womfundisi othile wokuziphatha okubi naye ngokwesini. Wawushiya loo mzi woonongendi. Kamva, eBurkina Faso, amaNgqina kaYehova adibana naye kubulungiseleli bawo bendlu ngendlu. Isifundo kwincwadana ethi Yintoni UThixo Ayifunayo nethi Ulwazi ngokukhawuleza sakhokelela ekubeni abe ngumkhonzi kaYehova ovuyayo.

Izihlandlo ezibini kuloo nyaka, iiHolo zoBukumkani nemizi yabantu eBangui, kwiCentral African Republic, zavulelwa amaNgqina ekwafuneka awele umlambo asabe kwelo leDemocratic Republic of Congo lidlakazwe yimfazwe. NgoJulayi baba ngaphezu kwama-200 abazalwana noodade neentsapho zabo kwanabanye, abantu abawelela eBangui. Ngoxa inkoliso yeembacu yayithontelene ngaphandle kwelo zibuko, abazalwana bethu babenyanyekelwa ngokwasemzimbeni nangokomoya. Balungiselelwa iintlanganiso zesiLingala kwiiHolo zoBukumkani ezimbini yaye zaziqhutywa zontlanu iintlanganiso zeveki. Elinye igosa likarhulumente lalapho elalibukele konke oko lathi: “Kuhle gqitha oku nikwenzileyo, ukuvula iholo yenu ukuze ibe yindawo yokuhlala aba bantu baxhwalekileyo. Nimele ninconywe ngoku.” Enye indoda eyayidlula kuloo holo yamisa omnye umvangeli wasemazweni yathi: “Nina niphila ngale ndlela niyishumayelayo. Ndininqwenelela okuhle. UThixo uza kunisikelela ngoku.”

Ngoxa wayelaliswe esibhedlele kwiminyaka edluleyo, omnye umvakalisi ongabhaptizwanga waseGhana, nangona wayegula kakhulu, wanikela ubungqina kwibhedi ngebhedi esibhedlele. Abanye bakuxabisa oko wayebaxelela kona; abanye bakugatya, elinye ibhinqa laphulaphula kodwa alizange liphendule. Emva kweminyaka ngoxa wayeye kwiiNdibano zeSithili ‘Zokuphila Ngendlela KaThixo’ eGhana, loo mvakalisi osele enguvulindlela okhethekileyo ngoku wadibana nebhinqa awathi walinakana. Loo vulindlela wabuza: “Ubekwa yintoni apha?” Elo bhinqa lathi: “UYehova mkhulu. Bendisoloko ndicinga enoba ndingaze ndiphinde ndikubone kusini na ukuze ndikubulele ngenyaniso yoBukumkani owayityala entliziyweni yam esibhedlele. Ndandigula gqitha ukuba ndingaphendula ngoko, kodwa ndahlala ndicinga yaye ndicamngca ngoko wakuthethayo ngobomi kwiParadesi ngaphantsi koBukumkani bukaThixo, apho ‘kungekho mmi wakhona oya kuthi: “Ndiyagula.”’ Kungekudala nje ukuphuma kwam esibhedlele, ndakhangela amaNgqina kaYehova, yaye aqalisa ukundifundisa okungakumbi. Kungekudala emva koko, ndafudukela kwenye indawo. Kuloo ndawo intsha, ndakhangela amaNgqina kaYehova yaye ndaqhubeka nesifundo sam seBhayibhile. Imiphumo yoko kukuba ngomso ndiza kubhaptizwa kule ndibano.” Loo mabhinqa mabini awolana yaye kwakusihla iinyembezi zovuyo. Ngokwenene oko kunikela ubungqina esibhedlele kwavelisa isiqhamo esihle!

EMali elinye ibhinqa elalingumlwelwe kangangeminyaka eli-13 ngenxa yobugqwirha ladibana namaNgqina kaYehova. Ukuze likwazi ukuhamba kwakufuneka lirhubuluze ngezandla namadolo. Kwaqaliswa isifundo seBhayibhile nalo. Laxelelwa ngeentlanganiso zethu zebandla, kodwa ngenxa yobulwelwe balo, lo dade wethu wayengenathemba lingako lokuba lingakwazi ukuya kufika kwiHolo yoBukumkani. Noko ke, inyaniso yayichukumisa intliziyo yelo bhinqa. Khawufan’ ucinge indlela abothuka ngayo abazalwana noodade bakubona elo bhinqa liphambi kweHolo yoBukumkani, lilinde ukuqalisa kweentlanganiso. Umzalwana onenqwelo-mafutha waligodusa emva koko. Njengoko isifundo salo sasiqhubela phambili nokholo lwalo kuYehova lukhula, laya likhululeka kubukhoboka bemimoya engendawo. Ngokuthe ngcembe, yaqalisa ukuswabuluka yasebenza imilenze yalo, yaye emva kweenyanga ezintandathu lakwazi ukuhamba kwakhona! Ngoku lingumkhonzi obhaptiziweyo kaYehova.

Ebudeni bekhefu lasemini kusuku lwesibini ekumsebenzi wakhe omtsha, omnye uvulindlela othe ngxi waseUganda waqalisa incoko nomnye asebenza naye ngolu hlobo: “Molo, ndikufumanisa kunzima ukwazi amagama abo bonke abo ndisebenza nabo.” Lo asebenza naye wathi: “Hayi noko ungazixhalisi, kungekudala izinto ziza kulunga. Mna ndinguWilliam.” Loo vulindlela waphendula wathi: “Ndiyabulela ngokuzazisa. Enkosi kakhulu. Kodwa ndiyazi ukuba ukwazi amagama abanye abantu yingxaki yehlabathi lonke.” UWilliam wabuza: “Uthetha ukuthini?” Loo vulindlela waqhubeka wathi: “Ngokomzekelo, ukuba ubunokubuzwa igama loMdali wendalo nazo zonke izinto eziphilayo, ngaba ubunokuphendula ngokulula?” Loo ngxubusho ngegama likaThixo yakhokelela kwisifundo seBhayibhile kusuku olulandelayo. UWilliam wamemela loo vulindlela kwikhaya lakhe ukuze athethe nentsapho yakhe. Ngoku amalungu amahlanu aloo ntsapho angamaNgqina abhaptiziweyo. Ngaphambi kweSikhumbuzo loo vulindlela waya kwiofisi neofisi ememela abo asebenza kunye nabo kwesi siganeko sibalulekileyo. Hayi indlela awavuya ngayo akubona abangama-40 bekho!

Abantu abaninzi eAfrika baye babandezeleka ngenxa yeemfazwe eziliwayo kumazwe abo. Ngokufuthi kuye kwafuneka ukuba basabe kumakhaya abo. Kodwa ukuba iimbacu zingamaNgqina kaYehova, zisoloko zishumayela iindaba ezilungileyo. Abazalwana noodade abaninzi besixeko esilikomkhulu saseGuinea-Bissau, eNtshona Afrika, basabela kwidolophu yaseBuba ekumgama weekhilomitha ezingama-240. Kwakukho umzalwana nodade abahlala apho, kodwa kungekho bandla. Noko ke, kungekudala emva kokuba efikile loo maNgqina avela kwidolophu elikomkhulu, kwalungiselelwa iintlanganiso, yaye umsebenzi wokunikela ubungqina waqhubela phambili. Kungentsuku zatywala, baba ngama-40 abantu abaya kwiintlanganiso yaye kwaqhutywa izifundo zeBhayibhile ezingama-70.

Abavakalisi abangama-30 beBandla laseGiteranyi eBurundi bahamba ngeenyawo iikhilomitha ezimalunga ne-160 besiya kwindibano yesiphaluka eKayanza. Olo hambo lwathabatha iintsuku ezintathu. Abo babeneebhayisekile babekhwelisa abanye bababeke kumgama othe tyishi ngaphambilana, baze babuye baphuthume abangasemva babagqithisele komnye umgama ongaphambili njalo njalo. Yonke intsapho yakwaNzeyimana Jean—umfazi, uninazala nabantwana abasixhenxe kuquka nomnye onepoliyo osebenzisa induku—babelapho kolo hambo. Ngovuyo olukhulu, bonke baya kufika kwindawo yendibano.

Yamazwe AseMerika

Malunga nenkulungwane ye-18, iBhayibhile epheleleyo yayifumaneka ngesiFrentshi, isiNgesi, iSpanish nesiPhuthukezi, ezaba zezona lwimi zisetyenziswa kakhulu kumazwe aseMerika. Kamva kwinkulungwane ye-19, amaNgqina kaYehova, njengoko aye aziwa njalo kamva aqalisa ucwangciso lokufundisa ngeBhayibhile olwathi malunga nowe-1935 lwaba sele lufikelele phantse kwilizwe ngalinye laseMerika. Kuloo mazwe ngoku kukho amaNgqina anenzondelelo azizi-2 769 625.

Kwezinye iindawo kubanda kakhulu, kodwa ukushunyayelwa kweendaba ezilungileyo kuqhubela phambili. Omnye umdala weBandla laseNorth Pole eAlaska wasichazela ukuba umsebenzi wendlu ngendlu usaqhubeka nokuba imozulu ingaphantsi kweqondo lobushushu ngama-37 ngokukaCelsius, yaye iintlanganiso ziqhutywa nokuba ingaphantsi kweqondo lobushushu ngama-48 ngokukaCelsius. Ukukhonza phantsi kwezi meko kufuna ukunyamezela.

Kwamanye amasimi akwizixeko ezikhulu, kukho izakhiwo ezininzi apho ngenxa yoloyiko lolwaphulo-mthetho, abaninimzi bangafane banike abavakalisi ithuba lokuthetha nabo ubuso ngobuso. Xa omnye umvakalisi waseArgentina wanikela ubungqina kwezo zakhiwo ngeintercom kwinenekazi elathi laphulaphula ngenyameko. Benza amalungiselelo okuqhubeka nalo ncoko ngelinye ixesha. Kwenziwa amabuyelo amaninzi ngaphandle kokudibana ubuso ngobuso. Sekunjalo, kwakuqhutywa incoko ebangela umdla, yaye izibhalo zazifundwa apho kwi-intercom. Ekugqibeleni emva kweenyanga ezine, elo nenekazi lammemela endlwini yalo loo mvakalisi yaye baqalisa isifundo seBhayibhile. Ukuzingisa ngomonde kwalo mvakalisi kwavuzwa.

EUnited States kukho imizi engaphezu kwe-17 000 yokunyamekela abantu abakhulileyo, ekuhlala kuyo amawaka abemi abakhulileyo. Yiyiphi indlela ekunokufikelelwa ngayo ngeendaba ezilungileyo kwaba bemi bakhulileyo? Amanye amabandla aye anempumelelo ngokuya kubalathisi bemisebenzi eyenziwa kwezo zakhiwo aza ngokuzithandela anikela uncedo ehlangabezana neentswelo zokomoya zabo bahlala apho. Kwenye imeko kwacaciswa ukuba amatsha-ntliziyo elinye ibandla ayeya kukuvuyela ukuqhuba isifundo seBhayibhile sesisa ngeveki naye wonk’ ubani onqwenela ukubakho. Kwamkelwa ngovuyo oko. Ngokufuthi abo basebenza apho, amalungu entsapho, ezinye iindwendwe naloo matsha-ntliziyo abakho kweso sifundo. Omnye umalathisi walapho wabhala: “Esi sifundo seqela sinikela inkxaso yokomoya yaye siqhubeka sinikela uncedo kwimpilo-ntle yabantu bethu abahlala apha. Basithanda ngokwenene isifundo seBhayibhile.” Wayiqonda indlela esazivuselela ngayo iingqondo zabo bantu badala. Enye into evuyisa abo basebenzi kukuba, elinye ixhegokazi elingazange khe lithethe okoko lafikayo kwelo khaya labakhulileyo, laqalisa ukugqabaza kweso sifundo. Elinye ixhego elalingayi kuyo nantoni na eyenziwa liqela kwelo khaya lakulangazelela ukuya kweso sifundo seBhayibhile.

Ngoxa wayenikela ubungqina kwindawo yamangcwaba, omnye udade waseChile, wathetha nelinye ibhinqa elafelwa ngunyana walo oneminyaka eli-12 ubudala kwingozi. Lo mama usentlungwini wayetyelela ingcwaba lonyana wakhe kabini ngosuku. Elo Ngqina labelana naye ngethemba lovuko, yaye baqalisa isifundo seBhayibhile. Elo bhinqa lathetha nommelwane walo naye owafelwa ngunyana wakhe omncinane yaye wayetyelela kwingcwaba lakhe yonk’ imihla. Naye waqalisa isifundo. Ngoxa wayetyelele emangcwabeni, unina welo bhinqa wacela umfundisi ukuba aqhube inkonzo yonyana wakhe ofileyo. Ngenxa yempendulo erhabaxa yaloo mfundisi, wayeka ukuya ecaweni waza waqalisa ukufundisisa iBhayibhile. Omathathu ngoku la mabhinqa abelana ngethemba lawo elitsha nabanye kwindawo yamangcwaba.

Ngaba ubuya kumvumela uYehova akusebenzise ukuze uncede umntu othile afunde inyaniso kwanokuba iimeko zakho zobuqu azikuvumeli? Umvangeli wasemazweni waseCosta Rica wakwenza oko. Wayengekakwazi kakuhle ukuthetha iSpanish. Sekunjalo, waqalisa isifundo seBhayibhile noAna, umKatolika onenzondelelo. Kwasetyenziswa incwadana ethi Yintoni UThixo Ayifunayo Kuthi? kunye neBhayibhile. UAna akakwazi kubona kakuhle, ngoko ke wayephulaphula nje njengoko kwakufundwa iziqendu nezibhalo; andule ke agqabaze. Kwenye iveki uAna wenza la magqabaza alukhuthazo kuloo dade ungumvangeli wasemazweni: “Ayindikhathazi into yokuba singakwazi ukunxibelelana kakuhle. Izinto ezininzi esiye sazixubusha zahlukile kwezo zifundiswa yiCawa yamaKatolika. Ukuba bendifumene inkcazelo ende ngamazwi amahle gqitha, bendingasokuze ndiyikholelwe, kodwa undibonisa ezi zinto ngokusuka ngqo eBhayibhileni ngaphandle kobuqhetseba bamazwi ongezelelekileyo, ngoko ke ndiyabona ukuba ngokwenene yimfundiso yeBhayibhile.”

ENicaragua, amaNgqina aye enza umzamo okhethekileyo wokuphathela abafundisi-ntsapho iinkupho ezithile zikaVukani! Umxholo othi: “Lunaliphi Ithemba Ulutsha Lwanamhlanje?” ngumzekelo owabalaseliswayo. Ayithandabuzeki indlela exabiseke ngayo loo nkcazelo. Nangona omnye umfundisi-ntsapho wenye idolophu wachasayo, umphathi wesinye isikolo wacela amaNgqina ukuba athethe nabo bonke abantwana besikolo esithile. Kwanikelwa ungcelele lweentetho lweyure enesiqingatha, yaye abantwana besikolo abaninzi bacela olo ncwadi. Emva koko, loo mfundisi-ntsapho wayechasa ngoku wafuna ukuba amaNgqina aphinde loo ntetho kwisikolo awayengumphathi kuso. Oku kwenziwa. Kwaqaliswa isifundo seBhayibhile naye, yaye ngoku ufuna ukuba amaNgqina anikele iintetho kubantwana beso sikolo nyanga nganye.

E-Eurasia

Igama elithi Eurasia libhekisela kwiYurophu neAsia njengelizwekazi elinye. Apho kulapho uYehova waqalisa khona ukuvakalisa iindaba ezilungileyo kuAbraham. (Gal. 3:8) Kulapho noYesu Kristu wabeka khona isiseko somsebenzi wokushumayela oye waqhubeka ukuza kuthi ga kulo mhla wethu. (Mat. 28: 19, 20) AmaNgqina kaYehova azimisele ukwabelana ngeendaba ezilungileyo nabantu abakuwo onke amazwe amalunga nama-80 ase-Eurasia. Ukongezelela kumakhulu eelwimi eyayisele iWatch Tower Society ishicilela ngazo uncwadi lweBhayibhile, ukususela ngowe-1995 iye yongezelela ezinye iilwimi ezingama-36 ukuze kufikelelwe abantu abangakumbi abazizi-170 000 000 abakule nxalenye yomhlaba. Phakathi kwezi lwimi kukho isiPunjabi (isiNastaliq, isiUzbek, isiKazakh, isiTajiki, isiAzerbaijani nesiMongolia.

Ebudeni bowe-1999, kwabakho iingxaki ezinzulu eKosovo. Phantse abemi baseAlbania abangama-800 000 abavela eKosovo baba ziimbacu kumazwe angabamelwane. Abamalunga nama-500 000 kubo basabela eAlbania. Phakathi kwezo mbacu kwakukho amaNgqina kaYehova ali-14 kunye nabantwana bawo abasi-8. AmaNgqina aseAlbania avula amakhaya awo ukuze ancede aba bazalwana kwelo xesha linzima. Njengoko ungquzulwano lobuhlanga lwalusiya luthabath’ unyawo, zacaca ezona zinto ziphambili kubazalwana baseKosovo. Babefuna ukuqinisekisa ukuba abazalwana babo baseSerbia bakhuselekile. Ngokufanayo amaNgqina aseSerbia ayesenza imigudu ekhethekileyo yokunxibelelana nabazalwana baseAlbania ukuze baqinisekise ukuba bakhuselekile. Hayi indlela abanothando ngayo, ngokuchaseneyo nentiyo yobuhlanga eyayibonakaliswa kwiindawo abakuzo! Emva kweenyanga ezine abazalwana baseKosovo babenqwenela ukubuyela emakhaya. Abazange bazixhalabise ngokuthabatha izinto eziphathekayo ezininzi. Kunoko, bacela iibhokisi zoncwadi ababeza kulusebenzisa ekunikeleni isigidimi esithuthuzelayo soBukumkani bukaThixo kwabanye.

Xa elinye iNgqina laseBelgium lathetha nelinye ibhinqa ngeintercom, ngokunyaniseka elo bhinqa lachaza ukuba lalingekho kwimeko yokuthetha ngezinto ezinjalo ngelo xesha. Loo dade wethu wacela ukubuyela kulo ngomnxeba kamva. Elo bhinqa lamangaliswa xa ngokwenene lafumana umnxeba kwiintsuku ezimbalwa kamva. Lacacisa ukuba kwakufuneka lifuduke yaye kwakufuneka licele iOfisi Yezentlalo-ntle ukuba ilincedise ukuze lifumane elinye igumbi. Emva kwenye incoko ngomnxeba, unxibelelwano lwabo lwaqhawuka, ngoko ke elo Ngqina lagqiba ekubeni libhale ileta lize liyithumele kwiOfisi Yezentlalo-ntle. Loo leta yafakwa kwifayile yelo bhinqa, yaye olo qhagamshelwano lwaphinda lwavuselelwa xa lade layifumana loo leta kwiiveki nje ezimbalwa kamva. Oko kwenzeka kanye ngexesha UBulungiseleli Bethu BoBukumkani babusithi: “Ukuba sonke senza umgudu omanyeneyo wokuqalisa izifundo yaye ukuba sithandazela intsikelelo kaYehova kwimigudu yethu, ngokuqinisekileyo siya kuzifumana izifundo ezitsha!” Emva kokuthandaza ngokusuk’ entliziyweni kuYehova, loo dade walitsalel’ umnxeba elo bhinqa walixelela ukuba unqwenela ukufundisisa nalo iBhayibhile. Elo bhinqa lavuma. Ngoku lona nomyeni walo bayaya kwiintlanganiso zebandla, yaye labelana nenye intsapho nabahlobo ngezinto ezilungileyo elizifundayo.

Ngenye imini ekwakunetha ngayo, omnye uvulindlela okhethekileyo wokwexeshana nalowo wayesebenza naye babethetha noonovenkile kwidolophu yaseMalaysia apho kungakhange kunikelwe bungqina bungako. Omnye umfundi wesikolo semfundo ephakamileyo, owayelapho kufutshane elinde ukuphela kwaloo mvula inkulu, waya kubo waza wacela olo ncwadi babeluhambisa. Bamcacisela ngelungiselelo lesifundo seBhayibhile sasekhaya sesisa, baza abo vulindlela bambonisa indawo ababehlala kuyo. Malunga neveki kamva wabatsalela umnxeba. Wayelufunde lonke olo ncwadi yaye wayefuna olungakumbi. Kwaqaliswa isifundo seBhayibhile. Le ntombazana ikuthanda ngeyona ndlela ukufunda yaye yayisoloko icela ezinye iimpapasho phantse emva kotyelelo ngalunye. Maxa wambi yayibatsalel’ umnxeba nasebusuku icela uncwadi ekuye kwabhekiselwa kulo kwezo mpapasho. Njengoko abo vulindlela babekuloo dolophu okwexeshana nje kuphela, inxalenye yeso sifundo yayiqhutywa ngokobuqu enye ngembalelwano. Kwiinyanga nje ezimbini loo ntombazana yayigqiba incwadi ethi Ulwazi. Yayishumayela kubahlobo bayo nasebhasini. Iye yenza inkqubela entle yaye ngoku ingumvakalisi ongabhaptizwanga, onqwenela ukufanelekela ukubhaptizwa.

Elinye iNgqina laseItali lazenzela abahlobo nommelwane omtsha. Loo mmelwane wafika eItali evela eJamani kuba umyeni wakhe wayethenjiswe ngomsebenzi. Noko ke, awuzange ude ufumaneke loo msebenzi. Ngoko ke eshiya intsapho yakhe eItali, umyeni wakhe waya kwilizwe elikude ukuze afune umsebenzi. Ngoxa wayengekho, eso sibini samaNgqina sasinceda loo mfazi wakhe ngokumsa ezivenkileni, sisisa unyana wakhe esikolweni, simmemele kwezinye izidlo kunye nabantwana bakhe yaye simxhasa ngokweemvakalelo nto leyo wayeyifuna ngeyona ndlela. Elo bhinqa labuza isizathu sokuba benze konke oko. Yayisithini impendulo yabo? Bathi: “Kungenxa yokuba njengamaNgqina kaYehova siyabathanda abamelwane bethu.” Elo bhinqa lathi alizange khe lifumane ithuba lokuwaphulaphula amaNgqina, kodwa ngoku lalilangazelela ukwazi oko akukholelwayo. Kwaqaliswa isifundo seBhayibhile esithe rhoqo nalo; yaye laqalisa nokuya kwiintlanganiso zebandla. Kwelo xesha kanye umyeni walo wabuya. Loo maNgqina acela ukumqhubela isifundo seBhayibhile, kodwa wala kuba wayexinezelekile engqondweni. Kwaphinda kwanzima ukuba afumane umsebenzi. Xa loo ntsapho yafudukela komnye ummandla waseItali, loo maNgqina afumana idilesi yeHolo yoBukumkani yalapho aza akhuthaza elo bhinqa ukuba liye apho eholweni. Noko ke, lalineentloni ngeyona ndlela, ngoko ke alizange liye. Sekunjalo, omnye udade wethu wayesoloko esiya rhoqo ngeveki yaye waligcina linomdla kuYehova. Ekuhambeni kwexesha, xa elo bhinqa labona amaNgqina amabini enikela ubungqina basesitratweni lacela ukuba aliqhubele isifundo seBhayibhile. Yaye laqalisa nokuya ezintlanganisweni. Ngelo xesha umyeni walo wayewufumene umsebenzi. Naye wacela ukuqhutyelwa isifundo. Bobabini ngoku bangamaKristu azinikeleyo nabhaptiziweyo. Noonyana babo ababini abadala babhaptiziwe, yaye umntwana wabo wesithathu ungumvakalisi ongabhaptizwanga.

Omnye uvulindlela waseLuxembourg wayenomdla wokufikelela wonk’ ubani okwintsimi yakhe. Kweny’ indlu iifestile zazisoloko zivalwe ngeeblinds, yaye kusoloko kungekho mntu. Noko ke, ngenye imini xa loo vulindlela wayesiya kuphuthuma intombazana yakhe esikolweni, wabona inqwelo-mafutha emise phambi kwaloo ndlu yayisoloko ingenamntu. Kucacile ukuba wayengenanjongo yakuya kwinkonzo yasentsimini ngelo xesha, kodwa wayengafuni ukuyeka elo thuba limke nomoya. Wankqonkqoza. Indoda eyavulayo yathi ayinamdla eBhayibhileni, kodwa yayifuna ukwazi okungakumbi ngoYesu Kristu. Wayishiyela incwadi ethi Oyena Mntu Ubalaseleyo Wakha Waphila. Emva kokuba yena nomyeni wakhe bebuyele izihlandlo eziliqela, kwaqaliswa isifundo. Kodwa ekuqaleni, le ndoda yavuma ukufunda kube kanye nje kuphela kwiiveki ezintathu ngenxa yokuxakeka. Noko ke, ngokuthe ngcembe yaqalisa ukuzibona izinto ngeny’ indlela ebomini. Yaqonda ukuba kufuneka izongele ixesha elingakumbi lokufunda nokwenza ukuthanda kukaThixo. Yaluyeka olona sukelo lwayo lokudlala intenetya edlalwa etafileni, eyayichitha ixesha layo lasebusuku kuyo kane ngeveki. Xa yawuqonda ngokucacileyo umbandela wobundilele bobuKristu, yawuyeka umsebenzi wayo yaza yamkela umsebenzi ohlawula ngaphantsi kwesiqingatha somvuzo wayo. Yavakalelwa njani ngokwenza olo tshintsho? Yathi: “Ndandivuyiswa kukwenza oko. Ngapha koko, ndandifuna ngamandla ukuba ubomi bam buvisisane nemigaqo yeBhayibhile. Ndaqhubeka ndisenza inkqubela enyanisweni ukuze kungabikho enye into exaba endleleni yam yokuba ngumvakalisi ongabhaptizwanga, yaye kwiinyanga ezintlanu emva koko, ndafuzisela uzahlulelo lwam kuYehova ngokubhaptizwa emanzini.” Hayi indlela anombulelo ngayo loo dade unguvulindlela ngokucokisa ngolo hlobo kubulungiseleli bakhe!

Kwiziqithi Zomhlaba

UYehova umema wonke umhlaba, kuquka nabo bakwiziqithi, ukuba bavuye ngobukumkani bakhe. (INdu. 97:1) KwangePentekoste yowama-33 C.E., abantu besiqithi saseKrete babephakathi kwabo basifumanayo esi simemo. Kwinkulungwane yama-20, inginginya yabo bahlala kwiziqithi zomhlaba iye yasabela kuso. KwiPhilippines, kukho abangama-132 496 abaxelela abanye ngozuko lobukumkani bukaYehova. Kwezo ziqithi zibumba iJapan, kukho abangama-222 857 abanesabelo kuloo nkonzo ivuyisayo. Kwanakwiziqithi ezinabemi abambalwa kukho amathuba okuvuya ngenxa yeendaba ezilungileyo zoBukumkani bukaThixo.

Ububele obaboniswa ngomnye umzalwana onguvulindlela oselula waseSamoa banceda baphelisa intiyo ngamaNgqina kaYehova. Wayeye kwikliniki yalapho, waza wanikwa inombolo yakhe yaye waxelelwa ukuba alinde de ibe lixesha lokubonana nogqirha. Noko ke, xa kwabizwa inombolo yakhe, wayehleli kufutshane nelinye ibhinqa elikhulileyo ekwakubonakala ukuba imeko yalo imandundu kunenkoliso yabo babelapho, ngoko ke ngobubele loo mzalwana wacela kuloo mongikazi ukuba alingenise endaweni yakhe ze yena angene kweyalo. Loo mongikazi wamangaliswa kodwa wavuma. Ngexesha awaphinda wabizwa ngalo loo mzalwana, kwakukho enye yeenkosi (imatai) zaloo dolophana yakhe yaye ihleli kufutshane naye. Ekubeni loo ndoda yayigula kakhulu kunaloo mzalwana wethu, kwakhona loo mzalwana wanikezela ngethuba lakhe evumela loo ndoda ukuba ibone ugqirha ngaphandle kokulibazisa. Kamva, loo mzalwana waphinda wadibana nelo bhinqa likhulileyo, kwesi isihlandlo emarikeni. Lavuya gqitha lakumbona laza labuza enoba wayengomnye wamaNgqina kaYehova kusini na. Akuvuma, lathi belidla ngokungawamkeli amaNgqina xa eze kulo, kodwa ngoku liyazi ukuba abathanda ngokwenene abamelwane bawo. Kwathatyathwa idilesi yalo, kwaza kwaqaliswa isifundo seBhayibhile esithe rhoqo. Kuthekani ngenkosi yaloo dolophana? Yacacisela uyise waloo vulindlela ukuba ngoxa yayikade ingawahloneli amaNgqina, ngoku iyawamkela ekhayeni layo. Yeza kwiSikhumbuzo yaza yathi: “Ongakuthandiyo ekuqaleni, ungakuthanda ekugqibeleni.”

Ngaba kuyenzeka ukuba uzame ukuqalisa izifundo zeBhayibhile kwindawo yamashishini? Maxa wambi kuba njalo. Omnye uvulindlela okhethekileyo waseCyprus wayesoloko ephathela omnye usomashishini amaphephancwadi. Xa loo ndoda yabonakalisa uxabiso ngoko yayikufunda, loo vulindlela wayibonisa ilungiselelo lesifundo seBhayibhile esebenzisa incwadana enemifanekiso ethi Yintoni UThixo Ayifunayo. Eso sifundo siqhutyelwa kanye apho kuloo ndawo isebenzela kuyo loo ndoda, kodwa ecingela loo meko, loo vulindlela usilungiselela imizuzu eli-10 okanye eli-15 sihlandlo ngasinye.

EGuadeloupe kuye kwagxininiswa ngokukhethekileyo ekunikeleni ubungqina basesitratweni. Ekubeni kukho umlinganiselo womvakalisi om-1 kubemi abangama-55, ngaba kuyimfuneko ngokwenene ukunikel’ ubungqina esitratweni? Xa besekhaya abantu baya benikela ingqalelo ngakumbi nangakumbi kumabonwakude onesatellite. Kulula ukubamisa baze baphulaphule iindaba ezilungileyo xa bekude nekhaya. Omnye umveleli wesiphaluka wanikela ingxelo yokuba elinye iqela labavakalisi abali-15 ababenikela ubungqina basesitratweni eSt. Martin bahambisa amaphephancwadi angama-250, kwanamaphecana kwisithuba nje esimalunga neeyure ezimbini. Enyanisweni, bambi kwabo balwamkelayo uncwadi basenokuthi baxakeke gqitha ukuba bangakwazi ukuthetha. Kodwa xa iimeko zobomi zivuselela ukulambela komntu izinto zokomoya, izinto eziphambili kuye zisenokuguquka. Ngoko ke, kwidolophu yaseLes Abymes, umntu onjalo wayenemibuzo emininzi emva kokufa kukayise. Ngoku wayefuna ukufunda phantse yonk’ imihla—kuqala esebenzisa incwadana enemifanekiso ethi Yintoni UThixo Ayifunayo, emva koko yayincwadi ethi Ulwazi. Yaye wayesenza nophando kwincwadi ethi Ukuqiqa aze abhale izibhalo ezikhankanyiweyo ephepheni. Uthi uziva ‘efana nokumkani wakwaSirayeli owayezenzela umbhalo wakhe weZibhalo.’ Uye wafikelela kwisigqibo sokuba mhlawumbi “zonke ezo nkonzo kuthiwa zezobuKristu zinayo iBhayibhile, kodwa inye ephila ngoko ikuthethayo—ngamaNgqina kaYehova.”

UHatsuko ngumzali ongenaqabane waseJapan okhulisa abantwana ababini. Ukuze axhase intsapho yakhe ngemali, uqeshwe kwiindawo ezimbini. Liliphi ixesha analo ukuze anikele ubungqina kwabanye ngoYehova neenjongo zakhe zothando ngoluntu? Ngebhayisekile kumthabatha malunga nemizuzu engama-20 ukuya kwindawo nganye kwezo asebenza kuzo. Wagqiba ekubeni yonk’ imihla elo xesha alisebenzise enikel’ ubungqina. Uthetha nabantu adibana nabo—abadlulayo, abo bathenga koomatshini, abantu abazise iimpahla, abakhi, njalo njalo. Ekuqaleni kwakufuneka enze umgudu omkhulu kuba uneentloni. Wagqiba ekubeni kunokuba athethe kakhulu ngokwakhe, kuya kuba bhetele ayekele amaphephancwadi azithethele. Yaye nangokuthandaza ngaphambi kokuba aphume, wafumanisa kulula ukuthetha nabantu. Uye waqhubeka enikela ubungqina ngale ndlela kangangeminyaka emibini edlulileyo yaye ngoku uhambisa amaphephancwadi angama-200 ukusa kwangama-300 nyanga nganye, kuquka nalawo awahambisa kumzila wakhe wamaphephancwadi wasesitratweni.

Ividiyo ethi Jehovah’s Witnesses—The Organization Behind the Name iye yasisixhobo esinamandla ekukhuliseni uxabiso lwabantu ngentlangano kaYehova ayisebenzisayo. Elinye ibhinqa laseOstreliya lalifumana amaphephancwadi oMbutho nolunye uncwadi kangangeminyaka emihlanu. Kwandula ke ngeny’ iveki amaNgqina alishiyela le vidiyo ukuze liyibukele. Kutyelelo olulandelayo, labamemela endlwini abo bavakalisi. Elo bhinqa lalibukele loo vidiyo yaye zehla iinyembezi kukuchukumiseka. Laliwathembile loo maNgqina ayelityelela, kodwa ngoku lalivakalelwa kukuba linokuyithemba nentlangano. Ngaloo mini kwaqaliswa nalo isifundo kwincwadi ethi Ulwazi, yaye kwiveki elandelayo laya ezintlanganisweni kwiHolo yoBukumkani.

Ngubani abantu abacela kuye icebiso? Maxa wambi iba liphephandaba okanye umbhali wemihlathi yamaphephancwadi. Omnye uvulindlela waseNew Caledonia wakhumbula ukuba omnye wemibuzo eyayikwiphephancwadi yayiphendulwe kakuhle kwenye inkupho kaVukani! Wabhalela lowo wayebuza waza wamthumelela ileta kumpapashi welo phephancwadi, ecela ukuba idluliselwe kuye. Wachaza ukuba unenkcazelo ebalulekileyo kulo mbandela, wakhankanya umxholo wawo, edwelisa eminye yemixholwana, equka ezinye zezicatshulwa waza wathembisa ukwabelana naye ngaloo mbandela. Kungekudala yafika impendulo, elo phephancwadi lathunyelwa, yaye oko kwavula indlela yokuba kunikelwe uncedo olungakumbi lokomoya.

Abavakalisi baseIreland kwintsimi yabo badibana nabantu abavela eAfrika, eMpuma Yurophu nakumazwe aseMpuma. Ibandla laseBelfast lalungiselela ukuba kuqhutywe intetho yesidlangalala neSifundo seMboniselo ngesiMandarin Chinese. Kwabakho abantu abanomdla abangama-22. Oku kwenzeka ngenxa yomsebenzi omhle owenziwa sesinye isibini sabavangeli basemazweni phakathi kwamaTshayina asebenzayo okanye aye kufunda kwikholeji yaseBelfast. Ukususela ngowe-1993 abo bavangeli basemazweni baye baqhuba izifundo zeBhayibhile nabantu abangama-75 abavela kumaphondo ali-17 aseTshayina nakwiidolophu ezahlukahlukeneyo zaseTaiwan. Kuye kwagcinwa unxibelelwano nabaninzi abanomdla emva kokuba bebuyele eTshayina. Kwesinye isihlandlo kwakukho isibini esasisinandipha isifundo seBhayibhile; kwaza kwafuneka ukuba umfazi abuyele eTshayina, ebuhlungu kuba wayecinga ukuba wayengayi kuphinda akwazi ukuqhubeka nesifundo sakhe seBhayibhile apho. Noko ke, kwiiveki ezimbalwa kamva indoda yakhe ichulumancile yachaza into yokuba ifumene umyalezo ovela kwinkosikazi yayo usithi iye yatyelelwa ngamaNgqina ngeny’ imini ngoxa yayisemsebenzini aza ayishiyela iphetshana elithi: “Abahlobo bakho baseIreland basicele ukuba sikutyelele. Siza kubuya kwakhona.” Yaye enjenjalo! Esinye isibini sabhala siseTshayina sisithi: “Sinikhumbula gqitha. Sinezinto ezininzi ezintle ezibangela ukuba sinikhumbule, kodwa simele sitsho ukuba eyona nto ibisoloko ixabisekile sisifundo seBhayibhile kunye nani. Kubonakala ngathi ngoku iBhayibhile isisiseko sobomi bethu.”

[Imifanekiso ekwiphepha 49]

(1) Mozambique, (2) Senegal, (3) New Caledonia, (4) Bolivia