Bamkele!
1. Sisiphi isihlandlo esivula ithuba lokunikela ubungqina, yaye ngoba?
1 Asikho isihlandlo esibhetele sokunikela ubungqina kunangeSikhumbuzo esiba naso minyaka le. Cinga ngoku: KwiSikhumbuzo salo nyaka kulindeleke iindwendwe ezizizigidi ezilishumi ezize kuva ngeendlela ezimbini ekuye kwabonakaliswa ngazo uthando ngentlawulelo. (Yohane 3:16; 15:13) Ziza kufunda ngeentsikelelo ezifumanekayo ngenxa yesipho sikaYehova. (Isa. 65:21-23) Noko ke, ayisosithethi kuphela esiza kunikela ubungqina kwesi sihlandlo. Bonke abakhoyo baza kufumana ithuba lokunikela ubungqina ngokwamkela iindwendwe.—Rom. 15:7.
2. Sinokuzamkela njani iindwendwe?
2 Kunokuba usuke ufike uze uzikhangelele indawo yokuhlala uze ulindele ukuqalisa kocwangciso, zazise kubantu abahleli ecaleni kwakho. Iindwendwe zisenokungakhululeki. Ukuzincumela nokuzibulisa ngobubele kuya kuzenza zizive zamkelekile. Ukuze wazi enokuba umenyiwe umntu kusini na, unokumbuza ukuba sisihlandlo sokuqala esiza kwiintlanganiso zethu okanye unomntu amaziyo. Unokumcela ukuba ahlale ecaleni kwakho ukuze nifunde kunye iBhayibhile nize nibambisane nangeculo. Ukuba kusetyenziswa iHolo yoBukumkani, unokumchazela ngayo. Emva kwentetho, phinda uthethe naye ukuze uphendule imibuzo yakhe. Ukuba ibandla lenu kuza kufuneka likhawuleze liphume ukuze kungene elinye ibandla, usenokuthi: “Ndingathanda ukuva ukuba uyive njani intetho. Ngaba ndingakwazi ukuqhagamshelana nawe?” Lungiselela ukubuyela kuye. Abadala bafanele bakuphaphele ukukhuthaza abavakalisi abapholileyo abezileyo.
3. Kutheni kubalulekile ukuba sizamkele ngobubele iindwendwe ezize eSikhumbuzweni?
3 Kwiindwendwe ezininzi, esi iza kuba sisihlandlo sokuqala zibona uvuyo, uxolo nomanyano lwethu lweparadisi yokomoya njengabantu bakaYehova. (INdu. 29:11; Isa. 11:6-9; 65:13, 14) Yintoni eya kuhlala inkenteza ezingqondweni zezi ndwendwe emva kweSikhumbuzo? Ubukhulu becala kuya kuxhomekeka kwindlela esiye sazamkela ngayo.