Indlela Yokusebenzisa Incwadana Ethi Ngoobani Abenza Ukuthanda KukaYehova Namhlanje?
Incwadana Entsha Enemifanekiso Eyenzelwe Ukwalathisela Izifundo Entlanganweni
1. Chaza izizathu ezithathu zokwenziwa kwencwadana enemifanekiso ethi Ukuthanda KukaYehova?
1 Ngaba sele uqalile ukusebenzisa incwadana entsha enemifanekiso ethi Ngoobani Abenza Ukuthanda KukaYehova Namhlanje? Injongo yayo (1) kukuqhelanisa isifundo seBhayibhile namaNgqina kaYehova, (2) ukusinceda sazi imisebenzi esiyenzayo (3) nokusibonisa indlela esebenza ngayo intlangano yethu. Incwadana enemifanekiso ethi Ukuthanda KukaYehova inesifundo esikwiphepha elinye esinokugutyungelwa ngemizuzu emihlanu ukuya kwelishumi.
2. Chaza indlela eyenziwe ngayo le ncwadana inemifanekiso.
2 Yenziwe Njani: Le ncwadana yahlulwe yangamacandelo amathathu, ngalinye lixubusha inkalo eyahlukileyo yentlangano kaYehova njengokuba kuchazwe ngasentla. Umxholo ngamnye wezi zifundo zingama-28 ungumbuzo, imixholwana ebhalwe ngqindilili elandelayo iphendula umbuzo ongumxholo. Imifanekiso inamagama amazwe angaphezu kwama-50 ethatyathwe kuwo, ukubonisa ukuba umsebenzi wethu wenziwa ehlabathini lonke. Izifundo ezininzi zinebhokisi ethi “Funda Okungakumbi” enamacebiso onokukhuthaza isifundo sakho ngawo ukuba siwasebenzise.
3. Sinokuyisebenzisa njani incwadana enemifanekiso ethi Ukuthanda KukaYehova?
3 Indlela Onokuyisebenzisa Ngayo: Qala ngokusibonisa umbuzo ongumxholo wesifundo. Emva koko, njengoko nifunda kunye, balaselisa imixholwana ebhalwe ngqindilili. Nize emva koko, nixubushe imibuzo yempinda esekupheleni kwephepha. Nisenokusifunda sonke isifundo okanye ninokumana nifunda amacandelo nize niwaxubushe. Unokuzikhetha ngokwakho izibhalo ezibonisiweyo ofuna ukuzifunda. Ungayilibali imifanekiso nebhokisi ethi “Funda Okungakumbi.” Ubukhulu becala ezi zifundo zifanele zixutyushwe ngokulandelelana kwazo. Noko ke, unokuqakatha uye kwisifundo esibangel’ umdla. Ngokomzekelo, masithi kuyiwa endibanweni, ninokufunda isifundo 11.
4. Kutheni ukuvuyela ukuba nale ncwadana intsha inemifanekiso?
4 Xa sifunda iBhayibhile nomnye umntu, siyamnceda aqhelane noBawo wethu wasezulwini. Kodwa ke, kufuneka simfundise nangentlangano kaYehova. (IMize. 6:20) Sivuya ngokwenene ngokuba nale ncwadana intsha inemifanekiso eyenza kube lula ukwenza loo nto!