Abakhulileyo—Amalungu Axabisekileyo Obuzalwana Bethu BobuKristu
“Abo batyalwe endlwini kaYehova . . . baya kutyatyamba. Baya kuqhubeka bechuma ebudeni bokuba nezimvi.”—INDUMISO 92:13, 14.
1. Abantu abaninzi babajonga njani abantu abakhulileyo?
UYEHOVA ubathanda bonke abakhonzi bakhe abathembekileyo, kuquka nabo sele bekhulile ngeminyaka. Noko ke, kolunye uhlolisiso olwenziwayo, kwafunyaniswa ukuba nyaka ngamnye bamalunga nesiqingatha sesigidi abantu abakhulileyo eUnited States abaphathwa kakubi okanye abangahoywayo. Iingxelo ezifana nezo zidiza ukuba ukuphathwa kakubi kwabantu abakhulileyo kuyingxaki esehlabathini lonke. Omnye umbutho uthi oyena nobangela wale ngxaki “sisimo sengqondo esixhaphakileyo phakathi kwabantu abaninzi . . . sokuba abantu abakhulileyo abaseloncedo, abanamveliso yaye baluxanduva.”
2. (a) UYehova ubajonga njani abakhonzi bakhe abakhulileyo nabathembekileyo? (b) Yiyiphi inkcazelo ethuthuzelayo efumaneka kwiNdumiso 92:12-15?
2 UYehova uThixo uyabaxabisa abakhonzi bakhe abasele bekhulile nabanyanisekileyo. Unikela ingqalelo ‘kumntu esinguye ngaphakathi’—imeko yethu yokomoya—kunokusikelwa kwethu umda ngokwasempilweni. (2 Korinte 4:16) ELizwini lakhe iBhayibhile sifumana esi siqinisekiso sithuthuzelayo: “Ilungisa liya kutyatyamba njengesundu; liya kukhula njengomsedare waseLebhanon. Abo batyalwe endlwini kaYehova, ezintendelezweni zoThixo wethu, baya kutyatyamba. Baya kuqhubeka bechuma ebudeni bokuba nezimvi, baya kuqhubeka betyebile yaye besiba nentlahla, ukuze baxele ukuba uYehova uthe tye.” (INdumiso 92:12-15) Ukuhlolisisa ezi ndinyana kuya kubonisa igalelo elibalulekileyo eninokuba nalo nina bakhulileyo kubuzalwana bobuKristu.
‘Ukuchuma Ebudeni Bokuba Nezimvi’
3. (a) Kutheni amalungisa efaniswa nemithi yesundu? (b) Abakhulileyo ‘banokuchuma njani ebudeni bokuba nezimvi’?
3 Umdumisi ufanisa amalungisa nemithi yesundu ‘etyalwe ezintendelezweni zoThixo wethu.’ ‘Aqhubeka echuma ebudeni bokuba nezimvi.’ Enye inguqulelo ifundeka ngolu hlobo: “Avelisa iziqhamo naxa sel’ aluphele.” (IBhayibhile yesiXhosa yowe-1996) Ngaba akuvumi ukuba oku kuyakhuthaza? Imithi yesundu emihle nemide yayixhaphakile kwiintendelezo zaseMpuma ngamaxesha okubhalwa kweBhayibhile. Imithi yesundu yayinganeli nje ukuhombisa, kodwa yayixatyisiwe ngenxa yokuthwala iziqhamo ezininzi, eminye kuyo iqhubeka nokuba nemveliso nakuba sele idlulile kwikhulu leminyaka.a Ngokubambelela ngokuqinileyo kunqulo lokwenyaniso, nawe ‘unokuqhubeka uvelisa isiqhamo kuwo wonke umsebenzi olungileyo.’—Kolose 1:10.
4, 5. (a) Sisiphi isiqhamo esibalulekileyo esimele siveliswe ngamaKristu? (b) Nika imizekelo yeZibhalo yabakhulileyo abavelisa “isiqhamo semilebe.”
4 UYehova ulindele ukuba amaKristu avelise “isiqhamo semilebe”—amazwi okumdumisa nokuvakalisa iinjongo zakhe. (Hebhere 13:15) Ngaba oku kuyasebenza kuwe njengomntu okhulileyo? Ngokuqinisekileyo kunjalo.
5 IBhayibhile inemizekelo yabantu abakhulileyo abanikela ubungqina ngegama likaYehova neenjongo zakhe ngaphandle koloyiko. UMoses wayesele engaphaya ‘kweminyaka engamashumi asixhenxe’ ubudala xa uYehova wammisela njengomprofeti nommeli wakhe. (INdumiso 90:10; Eksodus 4:10-17) Ukukhula akuzange kumthintele umprofeti uDaniyeli ekunikeleni ubungqina ngokungenaloyiko ngolongamo lukaYehova. UDaniyeli wayemalunga neminyaka engama-90 ubudala xa wacelwa nguBheleshatsare ukuba atolike umbhalo ongaqondakaliyo owawuseludongeni. (Daniyeli, isahluko 5) Yaye kuthekani ngompostile uYohane owalupheleyo? Xa wayesele eza kugqiba inkonzo yakhe ende yokuthembeka, wazibona sele evalelwe kwisiqithi sasePatmos “ngenxa yokuthetha ngoThixo nokunikela ubungqina ngoYesu.” (ISityhilelo 1:9) Kusenokwenzeka ukuba baninzi abanye abantu ekuthethwe ngabo eBhayibhileni obaziyo nabavelisa “isiqhamo semilebe” ngoxa bekhulile.—1 Samuweli 8:1, 10; 12:2; 1 Kumkani 14:4, 5; Luka 1:7, 67-79; 2:22-32.
6. UYehova uwasebenzisa njani ‘amadoda amadala’ ngenjongo yokuprofeta kule mihla yokugqibela?
6 Ecaphula umprofeti ongumHebhere uYoweli, umpostile uPetros wathi: ‘“Ngemihla yokugqibela,” utsho uThixo, “ndiya kuthululela inxalenye yomoya wam phezu kwalo lonke uhlobo lwenyama [kuquka ‘amadoda amadala’], ibe luya kuprofeta.”’ (IZenzo 2:17, 18; Yoweli 2:28) Ngokufanayo, kule mihla yokugqibela uYehova usebenzisa amalungu asele ekhulile odidi lwabathanjiswa ‘nawezinye izimvu’ ukuze avakalise iinjongo zakhe. (Yohane 10:16) Amanye kuwo ebevelisa isiqhamo soBukumkani ngokuthembeka kangangamashumi eminyaka.
7. Yenza umzekelo wendlela abakhulileyo abaye baqhubeka besivelisa ngayo isiqhamo soBukumkani nakuba bekhathazwa yimpilo.
7 Cinga nje ngoSonia, owaba ngumvakalisi woBukumkani wexesha elizeleyo ngowe-1941. Nakuba wayecinezelwe sisigulo esinganyangekiyo kangangethuba elide, wayeqhuba izifundo zeBhayibhile rhoqo ekhayeni lakhe. USonia wathi: “Ukushumayela iindaba ezilungileyo kuyinxalenye yobomi bam. Xa ndithetha inyaniso, yindlela endiphila ngayo. Andifuni kuyeka.” USonia nodadewabo uOlive, bebesandul’ ukudlulisela isigidimi seBhayibhile esinik’ ithemba kuJanet, onesigulo esinganyangekiyo nabadibana naye kwigumbi lokulinda esibhedlele. Unina kaJanet, ongumKatolika ozinikeleyo wayivuyela gqitha into yokuboniswa komdla kwintombi yakhe kangangokuba wasamkela isifundo seBhayibhile waza wenza inkqubela. Ngaba nawe ungasebenzisa amathuba afanayo ukuze uvelise isiqhamo soBukumkani?
8. UKalebhi owalupheleyo wathembela njani kuYehova, yaye amaKristu akhulileyo anokuwuxelisa njani umzekelo wakhe?
8 Ngokuqhubeka ngenkalipho eshumayela ngoBukumkani nakuba esikelwe umda kukukhula, amaKristu akhulileyo alandela umzekelo kaKalebhi ongumSirayeli othembekileyo owahamba noMoses entlango kangangamashumi amane eminyaka. UKalebhi lo wayeneminyaka engama-79 ubudala ukuwela kwakhe uMlambo iYordan esiya kwiLizwe Lesithembiso. Emva kokuba lijoni lomkhosi wakwaSirayeli kangangeminyaka emithandathu, ngewayesuke waziphumlela, anelisekile zizinto awaziphumezayo. Kodwa kunoko, ngenkalipho wacela ukwenza umsebenzi olucelomngeni wokuthimba ‘izixeko ezikhulu ezinqatyisiweyo’ ezikummandla weentaba wakwaYuda, omiwe ngama-Anakim azizigantsontso. Encediswa nguYehova, uKalebhi ‘wawahlutha ilizwe lawo, kanye njengoko uYehova wathembisayo.’ (Yoshuwa 14:9-14; 15:13, 14) Qiniseka ukuba uYehova unawe njengoko uqhubeka uvelisa isiqhamo soBukumkani ebudaleni bakho, kanye njengoko wayekunye noKalebhi. Yaye ukuba uqhubeka uthembekile, uya kukuvuza ngokukungenisa kwihlabathi elitsha alithembisileyo.—Isaya 40:29-31; 2 Petros 3:13.
“Baya Kuqhubeka Betyebile Yaye Besiba Nentlahla”
9, 10. AmaKristu asele ekhulile anokuqhubeka njani ephilile elukholweni aze ahlale omelele ngokomoya? (Bona ibhokisi ekwiphepha 13.)
9 Ethetha ngokuba nemveliso kwabakhonzi baYehova abakhulileyo, umdumisi wathi: “Ilungisa liya kutyatyamba njengesundu; liya kukhula njengomsedare waseLebhanon. Baya kuqhubeka bechuma ebudeni bokuba nezimvi, baya kuqhubeka betyebile yaye besiba nentlahla.”—INdumiso 92:12, 14.
10 Unokuhlala njani womelele ngokomoya nakuba ukhulile ngeminyaka? Ukuze uqhubeke ukwimeko entle, umthi wesundu uxhomekeke ekufumaneni amanzi amaninzi. Ngokufanayo, nawe unokufumana amandla kumanzi enyaniso yeBhayibhile ngokufundisisa iLizwi likaThixo nangokunxulumana nentlangano yakhe. (INdumiso 1:1-3; Yeremiya 17:7, 8) Xa womelele ngokomoya uya kuba luncedo gqitha kwabo ukholwa kunye nabo. Oku sinokukubona kwimeko yoMbingeleli Omkhulu nowayesele ekhulile uYehoyada.
11, 12. (a) UYehoyada waba nayiphi indima kwimbali yobukumkani bakwaYuda? (b) UYehoyada wayisebenzisa njani impembelelo awayenayo ukuze akhuthaze unqulo lokwenyaniso?
11 Kusenokwenzeka ukuba uYehoyada wayengaphezu kweminyaka elikhulu ubudala xa uKumkanikazi uAtaliya onamabhongo wathabatha ulawulo kwaYuda ngokubulala abazukulwana bakhe. Wayenokwenza ntoni uYehoyada ekubeni wayesele ekhulile? Kangangeminyaka emithandathu, yena nomfazi wakhe bafihla etempileni ekuphela kwendlalifa eyayisele, uYehowashe. Engabhungisanga, uYehoyada wavakalisa uYehowashe oneminyaka esixhenxe ubudala njengokumkani, waza wayalela ukuba uAtaliya abulawe.—2 Kronike 22:10-12; 23:1-3, 15, 21.
12 Njengomcebisi kakumkani, uYehoyada wasebenzisa impembelelo awayenayo ukuze akhuthaze unqulo lokwenyaniso. “Wenza umnqophiso phakathi kwakhe nabo bonke abantu nokumkani wokuba baya kuqhubeka njengabantu bakaYehova.” Ngokomyalelo kaYehoyada, abantu badiliza indlu yothixo wobuxoki uBhahali baza basusa izibingelelo nemifanekiso yakhe, babulala nombingeleli wakhe. Esalathiswa nguYehoyada, uYehowashe walungisa itempile waza wavuselela neenkonzo ezazisenziwa kuyo. “UYehowashe waqhubeka esenza okulungileyo emehlweni kaYehova yonke imihla yakhe leyo uYehoyada umbingeleli wayemyala ngayo.” (2 Kronike 23:11, 16-19; 24:11-14; 2 Kumkani 12:2) Ekufeni kwakhe eneminyaka eli-130, uYehoyada wangcwatywa ngembeko kunye nookumkani ngenxa yokuba “wenza okulungileyo kwaSirayeli nakuThixo oyinyaniso nendlu Yakhe.”—2 Kronike 24:15, 16.
13. AmaKristu asele ekhulile ‘anokukwenza njani okulungileyo kuThixo oyinyaniso nendlu yakhe’?
13 Mhlawumbi impilo enkenenkene okanye ezinye iimeko zikusikel’ umda oko unokukwenza ukuze ukhuthaze unqulo lokwenyaniso. Kwanaxa kunjalo, unako ‘ukwenza okulungileyo kuThixo oyinyaniso nendlu yakhe.’ Unokuba nenzondelelo ngendlu kaYehova yokomoya ngokuya nokuba nenxaxheba kwiintlanganiso zebandla nangokushumayela nangaliphi na ithuba elivelayo. Ukusamkela ngovuyo isiluleko seBhayibhile nokulixhasa ngokunyaniseka “ikhoboka elithembekileyo neliyingqondi” nebandla kuya kubomeleza ubuzalwana bobuKristu. (Mateyu 24:45-47) Kanti unokuvuselela abo ukhonza kunye nabo “eluthandweni nasemisebenzini emihle.” (Hebhere 10:24, 25; Filemon 8, 9) Yaye uya kuba yintsikelelo kwabanye ukuba wenza ngokuvisisana nesi siluleko sompostile uPawulos: “Amadoda awalupheleyo makabe ngcathu ngokwemikhwa, andileke, abe ngaphilileyo engqondweni, aphile elukholweni, eluthandweni, ekunyamezeleni. Ngokunjalo abafazi abalupheleyo mabaziphathe ngokuhlonel’ uThixo, banganyelisi, bangakhotyokiswa yiwayini eninzi, mabafundise oko kulungileyo.”—Tito 2:2-4.
14. Abaveleli abangamaKristu abangamagqala banokwenza ntoni ukuze bakhuthaze unqulo lokwenyaniso?
14 Ngaba uye wakhonza njengomdala webandla kangangeminyaka emininzi? Omnye umdala webandla oligqala ucebisa ngelithi: “Musa ukubugogotya ubulumko oye wabufumana ukutyhubela iminyaka. Yabela abanye imisebenzi uze wabelane nabo basebenza ngokuzimisela ngamava onawo . . . Khangela izinto abanobuchule kuzo abanye. Bakhuthaze kwezo zinto. Baxhobisele ikamva.” (Duteronomi 3:27, 28) Ukuba nomdla wokwenene kumsebenzi owandayo woBukumkani kuya kuphumela ekufumaneni kwabanye iintsikelelo ezininzi kubuzalwana bethu bobuKristu.
‘Xela Ukuba UYehova Uthe Tye’
15. AmaKristu akhulileyo ‘axela njani ukuba uYehova uthe tye’?
15 Abakhonzi bakaThixo abasele bekhulile bayiphumeza ngovuyo imbopheleleko abanayo ‘yokuxela ukuba uYehova uthe tye.’ Ukuba ungumKristu okhulileyo, amazwi nezenzo zakho zinokubonisa abanye ukuba ‘uYehova uliLiwa lakho, ekungekho ntswela-bulungisa kuye.’ (INdumiso 92:15) Umthi wesundu unikela ubungqina beempawu ezibalaseleyo zoMdali. Kodwa uYehova ukunike ilungelo lokunikela ubungqina ngaye kwabo balwamkelayo unqulo lokwenyaniso. (Duteronomi 32:7; INdumiso 71:17, 18; Yoweli 1:2, 3) Kutheni oku kubalulekile?
16. Nguwuphi umzekelo weBhayibhile obonisa ukubaluleka ‘kokuxela ukuba uYehova uthe tye’?
16 Xa inkokeli yamaSirayeli uYoshuwa yayisele ‘indala neentsuku zihambile kuyo, yabiza uSirayeli wonke, amadoda ayo amakhulu neentloko zayo nabagwebi bayo namagosa ayo’ ukuze iwakhumbuze ngokuthi tye kweendlela zikaThixo. Yathi: “Akusilelanga nalinye ilizwi kuwo onke amazwi alungileyo uYehova uThixo wenu awathethileyo kuni. Onke abe yinyaniso kuni.” (Yoshuwa 23:1, 2, 14) Kangangethuba elithile, la mazwi abomeleza abantu ukuze baqhubeke bethembekile. Noko ke, uthe esakufa uYoshuwa, “kwavela esinye isizukulwana . . . esasingamazi uYehova okanye umsebenzi awayewenzele uSirayeli. Yaye oonyana bakaSirayeli benza okubi emehlweni kaYehova bakhonza ooBhahali.”—ABagwebi 2:8-11.
17. UYehova uye wasebenzisana njani nabantu bakhe kumaxesha akutshanje?
17 Ukugcina ingqibelelo kwebandla lamaKristu namhlanje akuxhomekekanga kubungqina obunikelwa ngabakhonzi abakhulileyo bakaThixo. Sekunjalo, ukholo lwethu kuYehova nakwizithembiso zakhe luyomelela xa sisiva iingxelo ‘zemisebenzi emikhulu’ ayenzele abantu bakhe kule mihla yokugqibela. (ABagwebi 2:7; 2 Petros 1:16-19) Ukuba sele uneminyaka emininzi usentlanganweni kaYehova, kusenokwenzeka ukuba uyalikhumbula ixesha laxa kwakukho abavakalisi boBukumkani abambalwa gqitha kummandla okanye kwilizwe ohlala kulo, okanye xa umsebenzi wokushumayela wawuchaswa ngokukrakra. Ngokuhamba kwexesha, uye wabona ngoxa uYehova esusa imiqobo ethile waza ‘wakhawulezisa’ ulwando loBukumkani. (Isaya 54:17; 60:22) Uye waphawula ukucaciswa kwenyaniso yeBhayibhile waza wabona nendlela eye yaphuculwa ngayo ngokuthe ngcembe inxalenye ebonakalayo yentlangano kaThixo. (IMizekeliso 4:18; Isaya 60:17) Ngaba uyabakhuthaza abanye ngokwabelana nabo ngamava akho ngokuphathelele ukuthi tye kweendlela zikaYehova? Olunjani lona ukhuthazo okunokuba lulo oku kubuzalwana bobuKristu!
18. (a) Yenza umzekelo wemiphumo eqhubekayo ‘yokuxelela abanye ukuba uYehova uthe tye.’ (b) Wena uye wabona njani ukuba uYehova uthe tye?
18 Kuthekani ngezihlandlo apho uye wabona uthando nolwalathiso lukaYehova ebomini bakho? (INdumiso 37:25; Mateyu 6:33; 1 Petros 5:7) Omnye udade okhulileyo ogama linguMartha wayedla ngokuthi xa ekhuthaza abanye: “Enoba sekutheni, ungaze umlahle uYehova. Uya kukulondoloza.” Eli cebiso laba nempembelelo entle kuTolmina, ongomnye wababeqhutyelwa isifundo seBhayibhile nguMartha nowabhaptizwa ebutsheni beminyaka yee-1960. UTolmina uthi: “Ekufeni komyeni wam, ndadimazeka gqitha kodwa loo mazwi andomeleza kangangokuba kwakungekho nokuba ibe nye intlanganiso eyayindiphosa. Yaye ngokwenene uYehova wandomeleza ukuze ndiqhubeke.” UTolmina uye wakhuthaza nabo abaqhubela izifundo zeBhayibhile ukutyhubela iminyaka esebenzisa icebiso elifanayo. Ngokwenene, ngokukhuthaza nokubachazela kwakho ngokuthi tye kweendlela zikaYehova, unokulwakha ukholo lwabo ukholwa kunye nabo.
UYehova Uyakuxabisa Ukuthembeka Kwabakhulileyo
19, 20. (a) UYehova uzijonga njani izinto ezenziwa ngabakhonzi bakhe abakhulileyo? (b) Yintoni eza kuxutyushwa kwinqaku elilandelayo?
19 Namhlanje, ihlabathi elidume ngokungabi nambulelo alinaxesha labo bakhulileyo. (2 Timoti 3:1, 2) Badla ngokukhunjulwa kuphela ngenxa yezinto abazenze kwixesha elidluleyo—oko babekuko, kungekhona oko bakuko. Ngokwahlukileyo iBhayibhile ithi: “UThixo akanantswela-bulungisa ukuba angawulibala umsebenzi wenu nothando enalubonisayo ngegama lakhe, ngokuthi nilungiselele abangcwele yaye nisaqhubeka nibalungiselela.” (Hebhere 6:10) Kakade ke, uYehova uThixo uyayikhumbula imisebenzi yokuthembeka oyenze kwixa elidluleyo. Kodwa uyakuxabisa ngenxa yoko uqhubeka ukwenza kwinkonzo yakhe. Ewe, ubajonga abo bakhulileyo nabathembekileyo njengabanemveliso, abasempilweni ngokomoya namaKristu aqolileyo—nto leyo ebubungqina obubonakalayo bamandla akhe.—Filipi 4:13.
20 Ngaba amalungu akhulileyo obuzalwana bethu bobuKristu uwajonga ngendlela awajonga ngayo uYehova? Ukuba kunjalo, uya kushukunyiselwa ukuba uwathande. (1 Yohane 3:18) Inqaku elilandelayo liza kuxubusha iindlela eziluncedo zokubonisa olo thando njengoko sinyamekela iimfuno zawo.
[Umbhalo osemazantsi]
a Sihlahla ngasinye seedatilisi sinokuba newaka leziqhamo size sibe nobunzima obuziikhilogram ezisi-8 nangaphezulu. Omnye umbhali uqikelela ukuba “mthi ngamnye [wesundu] ovelisa iziqhamo uba needatilisi eziziitoni ezimbini ukuya kwezintathu ngalo lonke ixesha lokubakho kwawo.”
Zithini Iimpendulo Zakho?
• Abakhulileyo ‘basivelisa njani isiqhamo’?
• Kutheni ukomelela kwamaKristu akhulileyo ngokomoya kuluncedo gqitha kwabanye?
• Abakhulileyo ‘banokuxela njani ukuba uYehova uthe tye’?
• Kutheni uYehova ebaxabisa abo baye bamkhonza ixesha elide?
[Ibhokisi ekwiphepha 13]
Indlela Abaye Bahlala Bomelele Ngayo Elukholweni
Yintoni eye yanceda abo bebengamaKristu kangangexesha elide ukuba bahlale bomelele elukholweni? Abanye baye bagqabaza bathi:
“Ukufunda izibhalo ezithetha ngolwalamano lwethu noYehova kubaluleke gqitha. Phantse busuku ngabunye ndicengceleza iNdumiso 23 neyama-91.”—UOlive, obhaptizwe ngowe-1930.
“Ndiyaqiniseka ukuba ndibakho kwintetho nganye yobhaptizo ndize ndiphulaphule ngenyameko, ngokungathi kubhaptizwa mna. Ukukhumbula ukuzahlulela kwam kube nendima ebalulekileyo ekuqhubekeni ndithembekile.”—UHarry, obhaptizwe ngowe-1946.
“Kubalulekile ukuthandaza yonke imihla—ucele uncedo, inkuselo, nentsikelelo kaYehova, uze ‘umgqale ezindleleni zakho zonke.’” (IMizekeliso 3:5, 6)—UAntônio, obhaptizwe ngowe-1951.
“Ukuphulaphula amava abo baqhubeka bemkhonza ngokuthembekileyo uYehova emva kweminyaka emininzi, kundenza ndizimisele ngakumbi ukuhlala ndithembekile.”—UJoan, obhaptizwe ngowe-1954.
“Kubalulekile ukungazicingeli ngokugqithiseleyo. Oko sinako sikufumene ngenxa yobubele obungasifanelanga bukaThixo. Le ngcamango isenza sikuxabise ukondliwa nguye ngokomoya, nto leyo eya kusenza sikwazi ukunyamezela de kube sekupheleni.”—UArlene, obhaptizwe ngowe-1954.
[Umfanekiso okwiphepha 11]
Abakhulileyo bavelisa isiqhamo esixabisekileyo soBukumkani
[Umfanekiso okwiphepha 14]
Ukomelela kwabakhulileyo ngokomoya kuluncedo gqitha kwabanye