“Uncedo Lwam Luvela KuYehova”

Xa Ukwaluphala Kusiba ‘Sisithsaba Sokuhomba’

UMURIEL oneminyaka eli-101 ubudala wathi: “Ndiye ndaphila obona bomi bumnandi.” UTheodoros oneminyaka engama-70 ubudala uthi: “Kulilungelo elikhethekileyo!” UMaria oneminyaka engama-73 ubudala wathi: “Ayikho enye indlela engendibusebenzise ngayo ubomi bam.” Bonke aba baye bachitha ubomi babo ekukhonzeni uYehova uThixo.

Abalupheleyo abanjalo bayafana nabakhonzi bakaYehova abaninzi abakhutheleyo ehlabathini lonke. Kungakhathaliseki ukwaluphala, iingxaki zempilo nezinye iimeko ezinzima, basakhonza uThixo ngomphefumlo uphela. Ebandleni lamaKristu, abo balupheleyo nabathembekileyo bayimizekelo enokuhlonelwa yokuzinikela kuThixo. UYehova uyixabisa gqitha inkonzo yabalupheleyo, nangona iimeko zabo zinokubangela bangenzi okuninzi.a—2 Korinte 8:12.

Incwadi yeeNdumiso yenza umzekelo ofanelekileyo ngobomi abalupheleyo abathembekileyo abanokulindela ukubuphila. Basenokufana nomthi omdala nomhle ohlala uvelisa iziqhamo. Ngokuphathelele abalupheleyo abathembekileyo, umdumisi wacula esithi: “Baya kuqhubeka bechuma ebudeni bokuba nezimvi, baya kuqhubeka betyebile yaye besiba nentlahla.”—INdumiso 92:14.

Bambi basenokuba noloyiko lokuba baza kulahlwa baze bangakhathalelwa xa ukwaluphala kubenza babe buthathaka. UDavide wabongoza uThixo esithi: “Musa ukundilahla ngexesha lobudala; xa amandla am ephela, musa ukundishiya.” (INdumiso 71:9) Yintoni eyenza ukuba ukwaluphala kubangele ukuchuma kunokuba kubangele ubani abe buthathaka? Kukubonakalisa isiqhamo sikaThixo sobulungisa. Umdumisi wacula esithi: “Ilungisa liya kutyatyamba njengesundu.”—INdumiso 92:12.

Abo baye bakhonza uThixo ngokuthembeka ubomi babo bonke badla ngokuqhubeka bevelisa isiqhamo esihle xa besaluphala. Eneneni, iimbewu ezininzi abazityalileyo ebomini babo okanye ukuze bancede abanye ziye zichume zize zivelise ukulunga. (Galati 6:7-10; Kolose 1:10) Kakade ke, abantu abaye bachitha ubomi babo kwimisebenzi yokuzingca ebenza batyeshele iindlela zikaThixo ngokuqhelekileyo ubomi babo abubi nanzuzo ingako njengoko besaluphala.

Ubulungisa njengesithsaba sokwaluphala bukwabalaseliswa kwincwadi yeBhayibhile yeMizekeliso. Apho siyafunda: “Isithsaba sokuhomba zizimvi xa sifunyanwa endleleni yobulungisa.” (IMizekeliso 16:31) Ewe, ubulungisa butyhila ubuhle bangaphakathi. Ukubonakalisa kukabani ubulungisa kangangexesha elide ephila kumenza ahlonelwe. (Levitikus 19:32) Xa umntu onezimvi ngenxa yokwaluphala enobulumko nokulunga, oko kumenza abe nesidima.—Yobhi 12:12.

Kumkholisa gqitha uYehova ukuphila njengelungisa enkonzweni yakhe. IZibhalo zithi: “Kwanasebudaleni bukabani [mna Yehova] isekwaNdim; nasekubeni ubani abe yingwevu ndiya kuqhubeka ndithwele. Ngokuqinisekileyo mna ndiya kusebenza, ukuze ndithwale nokuze ndifunqule ndize ndisindise.” (Isaya 46:4) Hayi indlela ekuthuthuzela ngayo ukwazi ukuba uBawo wethu wasezulwini onothando uthembisa ukubomeleza nokubaxhasa abanyanisekileyo bakhe ekwaluphaleni!—INdumiso 48:14.

Ekubeni ubomi obuchithwe ekukhonzeni uYehova ngokuthembeka ebujonga njengento entle, ngaba akwenzi nabanye babonakalise intlonelo? Xa sicamngca ngembono kaThixo, oko kusenza ukuba siwaxabise amanye amakholwa awalupheleyo. (1 Timoti 5:1, 2) Ngoko ke masikhangele iindlela esinokubonakalisa ngazo uthando lobuKristu ekunyamekeleni iintswelo zawo.

Ukuba Semendweni Wobulungisa Xa Sele Waluphele

USolomon uyasiqinisekisa esithi: “Busemendweni wobulungisa ubomi.” (IMizekeliso 12:28) Xa ubani sele aluphele oko akumthinteli ukuba abe kulo mendo. Ngokomzekelo, eMoldova, indoda eneminyaka engama-99 ubudala yachitha ubutsha bayo ihambisela phambili iingcamango zobuKomanisi. Kwakuyenza ibe nelunda into yokuba yayikhe yancokola neenkokeli ezidumileyo zobuKomanisi ezinjengoVladimir I. Lenin. Noko ke, xa ubuKomanisi babhanga, ubomi bale ndoda yalupheleyo abuzange bube nantsingiselo. Kodwa xa amaNgqina kaYehova ayibonisa ukuba uBukumkani bukaThixo bukuphela kwesicombululo sokwenene kwiingxaki zabantu, yayamkela inyaniso yeBhayibhile yaza yaba ngumfundi weZibhalo okhutheleyo. Okubuhlungu kukuba yafa ngaphambi kokuba ibe ngumkhonzi kaYehova obhaptiziweyo.

Xa lalifunda ngemilinganiselo kaThixo yokuziphatha, ibhinqa laseHungary elineminyaka engama-81 ubudala laqonda ukuba kwakufuneka litshate nendoda elalihleli nayo kangangeminyaka emininzi. Eli bhinqa laqweba inkalipho laza lachazela iqabane lalo imbono yalo esekelwe eBhayibhileni. Lamangaliswa gqitha laza lavuya, xa lavuma ukumtshata. Emva kokuba betshate ngokusemthethweni, lenza inkqubela ekhawulezileyo ngokomoya. Ebudeni beenyanga ezisibhozo emva kokuba isifundo salo seBhayibhile siqalisiwe, laba ngumvakalisi ongabhaptizwanga, yaye labhaptizwa kungekudala emva koko. Hayi indlela ekuyinyaniso ngayo ukuba ubulungisa bunokwenza abalupheleyo babonakalise ubuhle bokwenene!

Ewe, amaKristu athembekileyo alupheleyo anokuqiniseka ukuba uThixo unomdla kuwo. UYehova akayi kubashiya abo bahlala benyanisekile kuye. Kunoko, uthembisa ukubakhokela, ukubaxhasa aze abomeleze nangona baluphele. Yaye bavumelana namazwi omdumisi athi: “Uncedo lwam luvela kuYehova.”—INdumiso 121:2.

[Umbhalo osemazantsi]

[Amagama acatshulweyo akwiphepha 9]

“Isithsaba sokuhomba zizimvi xa sifunyanwa endleleni yobulungisa.”—IMIZEKELISO 16:31

[Ibhokisi ekwiphepha 8]

UYEHOVA UYABANYAMEKELA ABAKHONZI BAKHE ABALUPHELEYO

“Uze usukume phambi kwengwevu, uyihlonele indoda enkulu.”—Levitikus 19:32.

“Kwanasebudaleni bukabani isekwaNdim; nasekubeni ubani abe yingwevu ndiya kuqhubeka ndithwele.”—Isaya 46:4.