IWatchtower LAYBRARI EKWI-INTANETHI
IWatchtower
LAYIBRARI EKWI-INTANETHI
IsiXhosa
  • IBHAYIBHILE
  • IINCWADI
  • MEETINGS
  • w94 12/1 iphe. 8-12
  • Indawo Efanelekileyo Yonqulo LukaYehova Kubomi Bethu

No video available for this selection.

Sorry, there was an error loading the video.

  • Indawo Efanelekileyo Yonqulo LukaYehova Kubomi Bethu
  • IMboniselo Evakalisa UBukumkani BukaYehova—1994
  • Imixholwana
  • Amanqaku Afanayo
  • Ukunqula KwamaSirayeli UYehova
  • Inzondelelo Yenkulungwane Yokuqala Ngonqulo Lokwenyaniso
  • Unqulo LukaYehova Luphakanyisiwe Namhlanje
  • Uza Konwaba Kakhulu Xa Ukhonza UYehova Ngendlela Ayifunayo
    IMboniselo Evakalisa UBukumkani BukaYehova (Efundwayo)—2022
  • Lunqulo Loobani UThixo Alwamkelayo?
    Ulwazi Olukhokelela Kubomi Obungunaphakade
  • Ukukhonza UThixo Ngendlela Ayifunayo
    Isifundisa Ntoni IBhayibhile?
  • Yixabise Inyhweba Yokukhonza Kwitempile Enkulu KaYehova
    IMboniselo Evakalisa UBukumkani BukaYehova (Efundwayo)—2023
Khangela Okunye
IMboniselo Evakalisa UBukumkani BukaYehova—1994
w94 12/1 iphe. 8-12

Indawo Efanelekileyo Yonqulo LukaYehova Kubomi Bethu

“Imihla yonke ndiya kukubonga, ndilidumise igama lakho ngonaphakade kanaphakade.”—INDUMISO 145:2.

1. Ngokuphathelele unqulo, yintoni ayifunayo uYehova?

“MNA, Yehova Thixo wakho, ndinguThixo onekhwele.” (Eksodus 20:5) UMoses waweva kuYehova loo mazwi, yaye kamva wawaphinda xa wayethetha nohlanga lwakwaSirayeli. (Duteronomi 5:9) UMoses wayengenamathandabuzo engqondweni yakhe ngelokuba uYehova uThixo wayelindele ukuba abakhonzi Bakhe banqule Yena kuphela.

2, 3. (a) Yintoni eyabethelela kumaSirayeli ukuba oko kwakusenzeka kwiNtaba yeSinayi kwakungaqhelekanga? (b) Yiyiphi imibuzo esiza kuyihlolisisa ngonqulo lwamaSirayeli nabakhonzi bakaThixo namhlanje?

2 Ngoxa ayemise iintente kufutshane neNtaba yeSinayi, amaSirayeli ‘nenkitha engumxube’ eyayiphume nawo eYiputa abona okuthile okungaqhelekanga. (Eksodus 12:38) Yayingafani nonqulo loothixo baseYiputa, ngoku ababehlazwe zizibetho ezilishumi. Njengoko uYehova wayebonakalisa ubukho bakhe kuMoses, kwenzeka into eyoyikekayo: iindudumo, imibane nesandi esothusayo sokuvuthelwa kwesigodlo esatsho yonke loo nkampu yagubha. Kwalandela umlilo nomsi njengokuba yonke loo ntaba yayinyikima. (Eksodus 19:16-20; Hebhere 12:18-21) Ukuba nawuphi na umSirayeli wayefuna ubungqina obungakumbi bokuba okwakusenzeka kwakungaqhelekanga, wayeza kubufumana. Kungekudala, uMoses wehla entabeni emva kokufumana imithetho kaThixo okwesihlandlo sesibini. Ngokutsho kwale ngxelo iphefumlelweyo, ‘ulusu lobuso bukaMoses lwalukhazimla; yaye abantu boyika ukusondela kuye.’ Ngokwenene, esi yayisisiganeko esinokwenziwa ngamandla angaphezu kwawomntu, nesingenakulibaleka!—Eksodus 34:30.

3 Kolo hlanga lukaThixo lokomfuziselo, kwakungekho mathandabuzo ngokubaluleka konqulo lukaYehova. WayenguMkhululi wabo. Ubomi babo babuxhomekeke kuye. WayekwanguMniki-mthetho wabo. Kodwa ngaba balugcina kwindawo yokuqala unqulo lukaYehova? Yaye kuthekani ngabakhonzi bakaThixo banamhlanje? Unqulo lukaYehova lubaluleke kangakanani kubomi babo?—Roma 15:4.

Ukunqula KwamaSirayeli UYehova

4. Yayimi njani inkampu yamaSirayeli ebudeni bohambo lwawo entlango, yaye yintoni eyayisembindini wenkampu?

4 Ukuba wawunokubukela kwinkampu yamaSirayeli entlango uphezulu, ngewawubone ntoni? Iintente ezininzi, kodwa ezilungeleleneyo, mhlawumbi ezazihlala abantu abazizigidi ezithathu okanye ngaphezulu, belungelelaniswe bangamaqela ezizwe ezithathu lilinye entla, ezantsi, empuma, nasentshona. Xa usondela, wawuya kuphawula nelinye iqela kufutshane nesazulu senkampu. La maqela mane mancinane eentente ayehlala iintsapho zesizwe sakwaLevi. Embindini wenkampu, kummandla owahlulwe ludonga lwelaphu, kwakukho isakhiwo esahlukileyo. Esi ‘yayiyintente yokuhlangana,’ okanye umnquba, amaSirayeli ‘anentliziyo elumkileyo’ ayeyakhe ngendlela uYehova awayefuna ngayo.—Numeri 1:52, 53; 2:3, 10, 17, 18, 25; Eksodus 35:10.

5. Umnquba wawunayiphi injongo kwaSirayeli?

5 Kuzo zonke izihlandlo ezimalunga nama-40 amisa iintente ngazo ebudeni bohambo lwawo lwasentlango, amaSirayeli ayesakha umnquba, yaye wawusiba sesona sakhiwo sibalulekileyo senkampu yawo. (Numeri, isahluko 33) Ngokufanelekileyo, iBhayibhile imchaza uYehova njengohlala phakathi kwabantu bakhe esazulwini senkampu yabo. Ubuqaqawuli bakhe babuwuzalisa umnquba. (Eksodus 29:43-46; 40:34; Numeri 5:3; 11:20; 16:3) Incwadi ethi Our Living Bible igqabaza ithi: “Le tempile iphathwayo yayibaluleke gqitha, ekubeni yayisisazulu sonqulo sezo zizwe. Ngaloo ndlela yazigcina zimanyene ebudeni beminyaka emininzi yokubhadula entlango yaza yazinceda zakwazi ukwenza izinto ngomanyano.” Ngaphezu koko, umnquba wawusoloko usisikhumbuzo sokuba ukunqula kwamaSirayeli uMdali wawo kwakuyeyona nto ibalulekileyo ebomini bawo.

6, 7. Sisiphi isakhiwo sonqulo esathabatha indawo yomnquba, ibe salukhonza njani uhlanga lwakwaSirayeli?

6 Emva kokufika kwamaSirayeli kwiLizwe Ledinga, umnquba waqhubeka uyindawo ebalulekileyo yonqulo lwamaSirayeli. (Yoshuwa 18:1; 1 Samuweli 1:3) Ekuhambeni kwexesha, uKumkani uDavide waceba ukwakha isakhiwo esisisigxina. Esi saba yitempile, eyakhiwa kamva ngunyana wakhe uSolomon. (2 Samuweli 7:1-10) Ekunikezelweni kwayo kwehla ilifu elalibonisa ukuba uYehova uyasamkela eso sakhiwo. USolomon wathandaza wathi: “Ukukwakhela, ndikwakhele indlu, ukuba ibe yeyokuhlala wena, indawo yokuhlala wena ngonaphakade.” (1 Kumkani 8:12, 13; 2 Kronike 6:2) Le tempile yayisandul’ ukwakhiwa ngoku yaba sisazulu sonqulo kolo hlanga.

7 Kathathu ngonyaka, onke amadoda akwaSirayeli ayenyuka aye eYerusalem ukuze abekho kwimisitho yovuyo etempileni ebulela intsikelelo kaThixo. Ngokufanelekileyo ke, la maxesha okuhlanganisana ayebizwa ngokuba ‘ngamaxesha amisiweyo kaYehova,’ etsalela ingqalelo kunqulo lukaYehova. (Levitikus 23:2, 4) Abafazi abazinikeleyo babesiya namanye amalungu entsapho.—1 Samuweli 1:3-7; Luka 2:41-44.

8. INdumiso 84:1-12 ikungqinela njani ukubaluleka konqulo lukaYehova?

8 Abadumisi abaphefumlelweyo ngobuciko bachaza indlela olwalubaluleke ngayo unqulo kubomi babo. Oonyana bakaKora bavuma le ndumiso: “Hayi, ukuthandeka kweminquba yakho, Yehova wemikhosi!” Ngokuqinisekileyo babengancomi isakhiwo nje kuphela. Kunoko, baphakamisa amazwi abo bedumisa uYehova uThixo, besithi: “Intliziyo yam nenyama yam imemelela kuThixo ophilileyo.” Inkonzo yabaLevi yayibonwabisa kakhulu. Bathi: “Hayi, uyolo lwabahlala endlwini yakho! Basaya kukudumisa.” Eneneni, onke amaSirayeli ayenokuvuma le ngoma: “Hayi, uyolo lwabantu abamandla akuwe, abakhumbula umendo. . . . Baya besomelela ngokomelela; babonakala phambi koThixo eZiyon.” Nangona uhambo lomSirayeli lokuya eYerusalem lusenokuba lwalulude yaye ludinisa, amandla akhe ayehlaziyeka xa efika kweli komkhulu. Intliziyo yakhe yayizaliswa luvuyo njengoko ebonisa uxabiso ngelungelo lakhe lokunqula uYehova: “Ngokuba imini enye ezintendelezweni zakho ilungile kunewaka [kwenye indawo, NW]; ndinyule ukuba semnyango endlwini kaThixo wam, kunokuhlala ngaphakathi kweentente zokungendawo. . . . Yehova wemikhosi, hayi, uyolo lomntu okholose ngawe!” Amazwi anjalo abonisa indlela unqulo lukaYehova olwalubaluleke ngayo kuloo maSirayeli.—INdumiso 84:1-12.

9. Kwenzeka ntoni kuhlanga lwamaSirayeli xa lwasilelayo ukulubeka kwindawo yokuqala unqulo lukaYehova?

9 Okulusizi kukuba, amaSirayeli akazange alugcine lukwindawo yokuqala unqulo lokwenyaniso. Avumela ukuzinikela koothixo bobuxoki kwayisingela phantsi inzondelelo yawo ngoYehova. Ngenxa yoko, uYehova wawayekela kwiintshaba zawo, wawavumela athinjelwa ebukhobokeni eBhabhiloni. Xa abuyiselwa kwilizwe lawo lokuzalwa emva kweminyaka engama-70, uYehova walungiselela ukuba ngomprofeti uHagayi, uZekariya noMalaki kudluliselwe kumaSirayeli izibongozo ezixhokonxayo. Umbingeleli uEzra neRhuluneli uNehemiya bashukumisela abantu bakaThixo ekubeni bayakhe kwakhona itempile baze balubuyisele apho unqulo lokwenyaniso. Kodwa ngokuhamba kweenkulungwane, unqulo lokwenyaniso lwaphinda alwaba yinto eza kuqala kolo hlanga.

Inzondelelo Yenkulungwane Yokuqala Ngonqulo Lokwenyaniso

10, 11. Unqulo lukaYehova lwalunayiphi indawo kubomi babantu abathembekileyo ngoxa uYesu wayesemhlabeni?

10 Ngexesha likaYehova elimiselweyo, wafika uMesiya. Abantu abathembekileyo babekhangele kuYehova ukuze bazuze usindiso. (Luka 2:25; 3:15) Ingxelo yeVangeli kaLuka ngokucacileyo ichaza uAna oneminyaka engama-84 ubudala njengomhlolokazi “obengemki etempileni, ekhonza uThixo ngokuzila ukudla nangokukhunga ubusuku nemini.”—Luka 2:37.

11 UYesu wathi: “Okwam ukudla kukuba ndenze ukuthanda kowandithumayo, ndiwufeze umsebenzi wakhe.” (Yohane 4:34) Khumbula indlela uYesu awasabela ngayo xa wafumana abantu ababenanisa ngemali etempileni. Wabhukuqa iitafile zabo kwanezihlalo zabathengisa ngamahobe. UMarko ubalisa enjenje: “[UYesu] wayengavumi ukuba kubekho ucanda etempileni ethwele isitya. Wayefundisa, esithi kubo, Akubhaliwe na kwathiwa, Indlu yam iya kubizwa ngokuba yindlu yokuthandaza iintlanga zonke? Ke nina niyenze umqolomba wezihange.” (Marko 11:15-17) Ewe, uYesu akazange avumele nabani na ukuba anqumle entendelezweni yetempile ephethe izinto azisa kwenye inxalenye yesixeko. Izenzo zikaYesu zabethelela icebiso awayelinikele ngaphambilana: “Funani ke tanci ubukumkani bukaThixo nobulungisa bakhe.” (Mateyu 6:33) UYesu wasishiyela umzekelo obalaseleyo wokuzinikela ngokupheleleyo kuYehova. Eneneni wayesenza njengokuba wayeshumayela.—1 Petros 2:21.

12. Abafundi bakaYesu babonisa njani ukuba unqulo lukaYehova babelugqala njengolubalulekileyo?

12 Kwakhona uYesu wamisela umzekelo wokulandelwa ngabafundi bakhe ngendlela awaluphumeza ngayo uthumo lwakhe lokukhulula amaYuda awayecinezelekile, kodwa ethembekile, kwimithwalo yezenzo zonqulo lobuxoki. (Luka 4:18) Ethobela umyalelo kaYesu wokwenza abafundi nokubabhaptiza, amaKristu okuqala ngenkalipho avakalisa ukuthanda kukaYehova ngokuphathelele iNkosi yawo evusiweyo. UYehova wakholiswa yindlela awayelugqala njengolubalulekileyo ngayo unqulo Lwakhe. Ngaloo ndlela, isithunywa sikaThixo ngokungummangaliso samkhulula umpostile uPetros noYohane entolongweni saza sabayalela sathi: “Hambani, niye kuma nithethe etempileni kubo abantu onke amazwi obu bomi.” Bomelezekile, bathobela. Imihla yonke, etempileni eYerusalem nakwizindlu ngezindlu “babengayeki ukufundisa nokushumayela iindaba ezilungileyo zokuba uYesu unguye uKristu.”—IZenzo 1:8; 4:29, 30; 5:20, 42; Mateyu 28:19, 20.

13, 14. (a) Kususela kumaxesha amaKristu okuqala, uSathana uye wazama ukwenza ntoni kubakhonzi bakaThixo? (b) Abakhonzi bakaThixo abathembekileyo baye baqhubeka besenza ntoni?

13 Njengoko ukuchaswa kokushumayela kwabo kwakusanda, uThixo walathisa abakhonzi bakhe abathembekileyo ukuba babhale eli cebiso lisexesheni. “Lonke ixhala lenu liphoseni phezu [koYehova], ngokuba yena enikhathalele,” wabhala oko uPetros ngokukhawuleza emva konyaka wama-60 C.E. “Yibani nobungcathu, phaphani; ngokuba ummangaleli wenu, uMtyholi, uhamba njengengonyama egqumayo, efuna ubani angamginyayo; mchaseni lowo, nizimasekile elukholweni, nisazi ukuba kwaezo ntlungu ziyenzeka kubo abazalwana benu abasehlabathini.” Ngokungathandabuzekiyo loo mazwi awomeleza amaKristu okuqala. Ayesazi ukuba emva kokuba eve ubunzima umzuzwana, uThixo wayeya kuwalungisa agqibelele. (1 Petros 5:7-10) Ebudeni baloo mihla yokugqibela yenkqubo yezinto yamaYuda, amaKristu okwenyaniso aluphakamisela kwindawo yokuqala unqulo lothando lukaYehova.—Kolose 1:23.

14 Njengoko umpostile uPawulos wayexele kwangaphambili, kwabakho uwexuko, ukuphambuka kunqulo lokwenyaniso. (IZenzo 20:29, 30; 2 Tesalonika 2:3) Kukho ubungqina obuyintabalala bamashumi okugqibela enkulungwane yokuqala obubonisa oku. (1 Yohane 2:18, 19) Ngempumelelo uSathana watyala amaKristu obuxoki phakathi kwawokwenyaniso, nto leyo eyenza kwaba nzima ukwahlula “umdiza” kumaKristu afana nengqolowa. Sekunjalo, ebudeni beenkulungwane ezazidlula, abantu abathile balubeka kwindawo yokuqala unqulo lukaThixo, kwanokuba oko kubeka ubomi babo engozini. Kodwa kuphela kusebudeni bamashumi okugqibela “amaxesha eentlanga” athe uThixo wabahlanganisa kwakhona abakhonzi bakhe ukuze baphakamise unqulo lokwenyaniso.—Mateyu 13:24-30, 36-43; Luka 21:24.

Unqulo LukaYehova Luphakanyisiwe Namhlanje

15. Ukususela ngowe-1919, isiprofeto esikuIsaya 2:2-4 nesikuMika 4:1-4 zizaliseke njani?

15 Ngowe-1919, uYehova wanika intsalela ethanjisiweyo amandla okuqalisa iphulo lokushumayela ngenkalipho emhlabeni wonke eliye laluphakamisa unqulo loThixo oyinyaniso. Ngenxa yokuthontelana ‘kwezinye izimvu’ zokomfuziselo ukususela ngowe-1935, umsinga wabantu abanyukela ‘entabeni yendlu kaYehova’ ngokomoya uye wakhula ngokukhula. Ebudeni bonyaka wenkonzo we-1993, amaNgqina kaYehova azizi-4 709 889 ebemdumisa ngokumema abanye ukuba bawathelele kunqulo lwakhe oluphakanyisiweyo. Hayi indlela oku okwahluke ngayo kwimeko ephantsi yokomoya ‘yeenduli’ ezingamahlelo obukhosi behlabathi bonqulo lobuxoki, ngokukodwa iNgqobhoko!—Yohane 10:16; Isaya 2:2-4; Mika 4:1-4.

16. Yintoni ekufuneka bonke abakhonzi bakaThixo bayenze ngenxa yoko kwaxelwa kwangaphambili kuIsaya 2:10-22?

16 Abo babambelele kunqulo lobuxoki bazigqala iicawa neecawa zabo ezinkulu kwanabefundisi babo ‘njengabaphakamileyo,’ bebabiza ngezibizo ezizukileyo nezembeko. Kodwa phawula oko uIsaya wakuxela kwangaphambili: “Amehlo aqwayingileyo esintu othotywa, noqhankqalazo lwamadoda lusibekeke; nguYehova yedwa owoba yingxonde ngaloo mini.” Kuya kwenzeka nini oku? Ebudeni bembandezelo enkulu esemnyango xa “izithixo ezingeni zothi shwaka zonke ziphela.” Ngenxa yokusondela kwelo xesha loyikekayo, bonke abakhonzi bakaThixo kufuneka bahlolisise ngenyameko indlela unqulo lukaYehova olubaluleke ngayo kubomi babo.—Isaya 2:10-22.

17. Abakhonzi bakaYehova banamhlanje babonisa njani ukuba unqulo lukaYehova balugqala njengolubalulekileyo?

17 Njengobuzalwana bomhlaba wonke, amaNgqina kaYehova adume ngenzondelelo yawo ekushumayeleni uBukumkani. Unqulo lwawo asikokudlulisela nje usana kunina, iyure okanye malunga noko ngeveki. Akunjalo, luyindlela yobomi bawo buphela. (INdumiso 145:2) Eneneni, kunyaka ophelileyo amaNgqina angaphezu kwama-620 000 alungelelanise imicimbi yawo ukuze abe nesabelo kubulungiseleli bamaKristu ixesha elizeleyo. Ngokuqinisekileyo nabanye abalutyesheli unqulo lukaYehova. Lubalasele kwiincoko zabo zemihla ngemihla nasekushumayeleni kwabo esidlangalaleni, kwanokuba iimbopheleleko zabo zentsapho zibangela bazibhokoxe kwimisebenzi yokuziphilisa.

18, 19. Caphula imizekelo yokhuthazo osenokuba ulufumene ngokufunda amabali obomi amaNgqina.

18 Amabali obomi amaNgqina apapashwa kwiMboniselo asinceda siqonde iindlela ezahlukahlukeneyo abaye abazalwana noodade bagcina unqulo lukaYehova kwindawo yokuqala ngazo kubomi babo. Omnye udade oselula owahlulela ubomi bakhe kuYehova eneminyaka emithandathu ubudala wazibekela inkonzo yobuvangeli basemazweni njengosukelo lwakhe. Nina bazalwana noodade abaselula, luluphi usukelo eninokulukhetha oluya kuninceda nibeke unqulo lukaYehova kweyona ndawo ibalulekileyo kubomi benu?—Bona inqaku elithi “Ukuxunela Usukelo Olwamiselwa Xa Ndandineminyaka Emithandathu Ubudala,” kwiMboniselo kaMatshi 1, 1992, iphepha 26-30.

19 Omnye udade osele ekhulile ongumhlolokazi ungomnye umzekelo omhle wokubeka unqulo lukaYehova kwindawo yalo efanelekileyo. Wakhuthazwa kakhulu ngabo wabanceda bafunda inyaniso ukuba anyamezele. “Babeyintsapho” yakhe. (Marko 3:31-35) Ukuba uzifumanisa ukwimeko efanayo, ngaba uya kuyamkela inkxaso noncedo lwabaselula ebandleni? (Nceda uphawule indlela uDade Winifred Remmie awazichaza ngayo iimvakalelo zakhe kwinqaku elithi “Ndasabela Ngexesha Lokuvuna,” elapapashwa kwiMboniselo kaJulayi 1, 1992, iphepha 21-3.) Nina bakhonzi bexesha elizeleyo, bonisani ukuba ngokwenene unqulo lukaYehova luza kuqala ebomini benu ngokukhonza ngokuthobeka apho nabelwe khona, ngokuvumayo nizithobe kulwalathiso lobuthixo. (Ncedani niphawule umzekelo kaMzalwan’ uRoy Ryan, njengokuba ubaliswa kwinqaku elithi “Ukunamathela Ngokusondeleyo Entlanganweni KaThixo,” kwiMboniselo kaDisemba 1, 1991, iphepha 24-7.) Khumbulani ukuba xa unqulo lukaYehova silubeka kwindawo yokuqala, sinesiqinisekiso sokuba uya kusinyamekela. Akuyomfuneko ukuba sixhalele ukuba ziya kuvela phi na izinto eziyimfuneko ebomini. Amava kaDade Olive noSonia Springate abonisa oku.—Bona inqaku elithi “Siye Safuna Tanci UBukumkani,” kwiMboniselo kaFebruwari 1, 1994, iphepha 20-5.

20. Ngoku yiyiphi imibuzo enokuthanani noku esifanele sizibuze yona?

20 Ngoko ke, ngaba umntu ngamnye kuthi akamele azibuze imibuzo ethile? Unqulo lukaYehova lukweyiphi indawo ebomini bam? Ngaba ndiphila ngokuvisisana nozahlulelo lwam lokwenza ukuthanda kukaThixo kangangoko ndinako? Ziziphi iinkalo endinokuphucula kuzo ebomini bam? Ukuqwalasela ngokunzulu inqaku elilandelayo kuya kusinika ithuba lokucingisisa ngendlela esibusebenzisa ngayo ubuncwane bethu ngokuvisisana naloo nto siyibeke kuqala ebomini bethu—ukunqula iNkosi enguMongami uYehova, uBawo wethu onothando.—INtshumayeli 12:13; 2 Korinte 13:5.

Impinda

◻ Ngokuphathelele unqulo, ufuna ntoni uYehova?

◻ Umnquba wawusisikhumbuzo santoni?

◻ Ngenkulungwane yokuqala yeXesha Eliqhelekileyo, ngoobani ababeyimizekelo ebalaseleyo yonqulo lokwenyaniso, yaye njani?

◻ Ukususela ngowe-1919, luye lwaphakanyiswa njani unqulo lukaYehova?

    Iimpapasho ZesiXhosa (1986-2025)
    Log Out
    Log In
    • IsiXhosa
    • Share
    • Zikhethele
    • Copyright © 2025 Watch Tower Bible and Tract Society of Pennsylvania
    • Imiqathango
    • Umthetho Wezinto Eziyimfihlo
    • Privacy Settings
    • JW.ORG
    • Log In
    Share