Ukukhanyelwa KukaThixo Kwinkulungwane Yama-20
“Abantu bakwamkele ukungabikho kukaThixo yaye balungelelanisa ubomi babo ngokuzimele geqe, ingakhathaliseki imiphumo yoko, yaye ngaphandle kokuzikhathaza ngoThixo.”—One Hundred Years of Debate Over God—The Sources of Modern Atheism.
NANGONA ekuqaleni umangalisa, ekugqibeleni umthi omde ugqalwa njengento eqhelekileyo. Ubukho bawo buyaqheleka; ubude bawo buyayeka ukukhwankqisa.
Kunjalo nangokungakholelwa kubukho bukaThixo. Nangona kwabangela iingxoxo ezininzi ebudeni benkulungwane ye-19, ukukhanyelwa kobukho bukaThixo akothusi yaye akuphazamisi namhlanje. Ixesha lokunyamezelana liye lavumela ukungakholelwa kubukho bukaThixo kwazinza ngokukhululekileyo ndawonye nokukholelwa kuThixo.
Asikuba inkoliso yabantu imkhanyela ngokuphandle uThixo; ngokwahlukileyo koko, iziphumo zohlolisiso olwenziwe kumazwe ali-11 kulo lonke elaseMerika, eYurophu, naseAsia zityhila ukuba, ngokomlinganiselo, bangaphezulu kancinane kubantu ababini ekhulwini abathi abakholelwa kubukho bukaThixo. Sekunjalo, umoya wokungakholelwa kubukho bukaThixo wesamele—kwanaphakathi kwabaninzi ababukholelwayo ubukho bukaThixo. Kunokwenzeka njani oku?
Ukukhanyela Igunya LikaThixo
IThe Encyclopedia Americana ithi: “Maxa wambi ukungakholelwa kubukho bukaThixo kubhekisela ekumchaseni okanye ekumtyesheleni ngezenzo uThixo.” Ngenxa yesi sizathu, iThe New Shorter Oxford English Dictionary inikela le nkcazelo yesibini elandelayo ‘ngomntu ongakholelwayo kubukho bukaThixo’: “Umntu omkhanyelayo uThixo ngokuziphatha; umntu ongahloneli Thixo.”—Akekeliswe sithi.
Ewe, ukungakholelwa kubukho bukaThixo kusenokuquka ukukhanyela ubukho bukaThixo okanye igunya lakhe okanye kokubini. IBhayibhile ibhekisela kulo moya wokungakholelwa kubukho bukaThixo kuTito 1:16: “Bayavuma ukuba bayamazi uThixo; kanti ngayo imisebenzi bayamkhanyela.”—Thelekisa INdumiso 14:1.
Ukuchaswa okunjalo kwegunya likaThixo kunokulandwa emva kwisibini sokuqala esingabantu. UEva wayebuvuma ubukho bukaThixo; sekunjalo, wayefuna ‘ukuba njengoThixo, azi okulungileyo nokubi.’ Okuthetha ukuba wayefuna ‘ukuzilawula’ aze ayile eyakhe imigaqo yokuziphatha. Kamva uAdam wamthelela uEva koku kukhanyela igunya likaThixo.—Genesis 3:5, 6.
Ngaba esi simo sengqondo sesamele namhlanje? Ewe. Ukungakholelwa kubukho bukaThixo kubonakaliswa ngendlela echuliweyo ngelinge lokufuna ukuzimela geqe. Incwadi ethi One Hundred Years of Debate Over God—The Sources of Modern Atheism ithi: “Namhlanje abantu badiniwe kukuphila ngaphantsi kolongamo lukaThixo. Bona . . . bakhetha ukuphila enkululekweni.” Imigaqo yokuziphatha yeBhayibhile kuthiwa ayiloncedo, ayikho ngqiqweni. Indlela abacinga ngayo abaninzi ifana kakhulu naleyo kaFaro waseYiputa owathetha ngendelelo esithi: “Ngubani na uYehova, ukuba ndiphulaphule izwi lakhe . . . ? Andimazi uYehova.” Walikhanyela igunya likaYehova.—Eksodus 5:2.
Ukukhanyelwa KukaThixo YiNgqobhoko
Okona kukhanyelwa kwegunya likaThixo kothusayo koko kwabefundisi beNgqobhoko, abaye bamisa izithethe zabantu endaweni yeenyaniso ezisulungekileyo zeBhayibhile. (Thelekisa uMateyu 15:9.) Ukongezelela koko, baye baxhasa ezona mfazwe zimanyumnyezi zenkulungwane yama-20, ngaloo ndlela betyeshela umthetho oseBhayibhileni wokubonakalisa uthando lokwenene.—Yohane 13:35.
Kwakhona abefundisi baye bamkhanyela uThixo ngokunikel’ umva imilinganiselo yakhe yokuziphatha—ngokomzekelo, ubungqina boku luthotho lwezimangalo nxamnye nabefundisi abaxhaphaza abantwana ngokwesini. Imeko yeNgqobhoko ifana naleyo yoSirayeli noYuda wamandulo. Umprofeti uHezekile waxelelwa oku: “Nelizwe lizele ligazi, nomzi uzele bubugqwetha; ngokuba besithi, UYehova ulilahlile ilizwe, uYehova akaboni.” (Hezekile 9:9; thelekisa uIsaya 29:15.) Akumangalisi ukuba abaninzi baye bazishiya ngokupheleleyo iicawa zeNgqobhoko! Kodwa ngaba bamele bayeke ukukholelwa kuThixo?
Ngaba Ezi Zizizathu Ezibambekayo Zokungakholelwa Kubukho BukaThixo?
Enoba babone ukuhanahanisa konqulo okanye akunjalo, abaninzi abangakholelwayo kubukho bukaThixo abakwazi nje kwaphela ukukudibanisa ukukholelwa kuThixo nokubandezeleka okusehlabathini. USimone de Beauvoir wakha wathi: “Kwakulula ngakumbi ngam ukucinga ngehlabathi elingenamdali kunokucinga ngomdali othwele zonke iimpikiswano zehlabathi.”
Ngaba ukungabikho kokusesikweni ehlabathini—kuquka noko kuphenjelelwa ngabahanahanisi bonqulo—kungqina ukuba akukho Thixo? Khawucinge ngoku: Ukuba imela isetyenziselwa ukugrogrisa, ukwenzakalisa, okanye kwanokubulala umntu omsulwa, ngaba oku kungqina ukuba imela ayizange ibe nomyili? Ngaba akuthi kunoko kubonise ukuba esi sixhobo sasetyenziswa ngendlela engafanelekanga? Ngokufanayo, inkoliso yeentlungu zabantu ingqina ukuba abantu babusebenzisa kakubi ubuchule ababunikwe nguThixo kwanomhlaba ngokwawo.
Noko ke, bambi bavakalelwa kukuba akukho ngqiqweni ukukholelwa kuThixo, ekubeni singenakumbona. Kodwa kuthekani ngomoya, amaza omoya, namavumba? Asikwazi kubona nanye kwezi zinto, ukanti siyazi ukuba zikho. Imiphunga, iindlebe, neempumlo zethu zisixelela ukuba zikho. Ngokuqinisekileyo, siyakholelwa koko singenakukubona ukuba sinobungqina.
Emva kokucingisisa ngobungqina bokoqobo—kuquka iielectron, iiproton, iiatom, iiamino asidi, nengqondo entsonkothileyo—isazinzulu ngendalo uIrving William Knobloch washukunyiselwa ukuba athi: “Ndiyakholelwa kuThixo kuba kum ubukho Bakhe njengoThixo kuphela kwengcaciso esengqiqweni yendlela eziyiyo izinto.” (Thelekisa INdumiso 104:24.) Ngokufanayo, ingcaphephe kwezemithambo-luvo uMarlin Books Kreider ithi: “Njengomntu oqhelekileyo, kwananjengomntu onikele ubomi bakhe kufundisiso nakuhlolisiso lwezenzululwazi, andibuthandabuzi kwaphela ubukho bukaThixo.”
La madoda akawodwa koku. Ngokutsho kwenjingalwazi yephysics uHenry Margenau, “ukuba uthabatha izazinzulu zodidi oluphezulu, ufumana zimbalwa kakhulu ezingakholelwayo kubukho bukaThixo phakathi kwazo.” Ukuhambela phambili kwenzululwazi okanye ukusilela konqulo akufanele kusinyanzelele ekuyekeni ukukholelwa kuMdali. Makhe sihlolisise isizathu.
Ukwahluka Konqulo Lokwenyaniso
Ngowe-1803, umongameli waseUnited States uThomas Jefferson wabhala: “Ndikuchase ngenene ukonakala kobuKristu; kodwa kungekhona imigaqo yokwenene kaYesu.” Ewe, kukho umahluko phakathi kweNgqobhoko nobuKristu. Inkoliso yeenkolelo zeNgqobhoko ifumaneka kwizithethe zabantu. Ngokwahlukileyo koko, ubuKristu bokwenyaniso busekela iinkolelo zabo eBhayibhileni kuphela. Ngaloo ndlela, uPawulos wabhalela amaKristu aseKolose enkulungwane yokuqala ukuba afanele abe ‘nokwazi okuhle, ubulumko,’ kunye “nokuqonda konke okukokomoya.”—Kolose 1:9, 10.
Oku koko sifanele sikulindele kumaKristu okwenyaniso, kuba uYesu wabayalela oku abalandeli bakhe: ‘Niye kuzenza abafundi zonke iintlanga, nibabhaptize nibafundisa ukuba bazigcine zonke izinto endiniwisele umthetho ngazo.’—Mateyu 28:19, 20.
Namhlanje, amaNgqina kaYehova alandela lo myalelo kumazwe angama-231 ehlabathini jikelele. Aguqulele iBhayibhile kwiilwimi ezili-12 aza ashicilela imibhalo yayo engaphezulu kwezi-74 000 000. Ngaphezu koko, ngenkqubo yezifundo zeBhayibhile zamakhaya, ngoku anceda abantu abangaphezu kwezi-4 500 000 ukuba ‘bazigcine zonke izinto uYesu awawisa umthetho ngazo.’
Le nkqubo yokufundisa ineziphumo ezisemagqabini. Ibangela ukukhanyiselwa kokwenene, kuba isekelwe, kungekhona kwiingcinga zomntu, kodwa kubulumko bukaThixo. (IMizekeliso 4:18) Ngaphezu koko, inceda abantu bazo zonke iintlanga nezizwe benze okuthile okungazange kuphunyezwe “liXesha Lokhanyo” lwabantu—ukwambatha ‘umntu omtsha’ obenza bakwazi ukuhlakulela uthando lokwenene omnye ngomnye.—Kolose 3:9, 10.
Unqulo lokwenyaniso luyoyisa kwinkulungwane yethu yama-20. Alumkhanyeli uThixo—enoba bubukho okanye igunya lakhe. Siyakumema ukuba uzibonele oku ngokwakho ngokutyelela amaNgqina kaYehova kwenye yeeHolo zawo zoBukumkani.
[Ibhokisi ekwiphepha 6]
UKOMELEZA IMVELAPHI YOKUNGAKHOLELWA KUBUKHO BUKATHIXO
Phakathi kwinkulungwane ye-18, isithandi sobulumko uDenis Diderot wanikwa uthumo lokuba aguqulele intyilalwazi yesiNgesi engumqulu omnye kwisiFrentshi. Noko ke, wadlulela ngaphaya koko kwakulindelwe ngumqeshi wakhe. UDiderot wachitha malunga namashumi amathathu eminyaka equlunqa iEncyclopédie yakhe, incwadi enemiqulu engama-28 eyathimba iingqondo zabo babephila ngomhla wakhe.
Nangona le Encyclopédie yayiqulethe inkcazelo eninzi eluncedo, yayigxininisa kubulumko bomntu. Ngokutsho kweencwadi ezinomxholo othi Great Ages of Man, “yaba nobuganga bokufundisa imfundiso yemvukelo [yezithandi zobulumko] yokuba umntu unokubuphucula ubomi bakhe ukuba ebenokusebenzisa ingqiqo endaweni yokholo njengomgaqo wakhe omkhokelayo.” UThixo wayengakhankanywa ngokuphawulekayo. Incwadi ethi The Modern Heritage ithi: “Ngendlela abayikhetha ngayo imibandela, abahleli bayo balenza lacaca elokuba unqulo lwalungekho phakathi kwezinto ekufuneka ezazile umntu.” Akumangalisi ukuba icawa yazama ukuyiphanzisa le Encyclopédie. Igqwetha elimela urhulumente layigxeka njengevukela ezobupolitika, ukuziphatha, nonqulo.
Phezu kwazo nje iintshaba zayo, iEncyclopédie kaDiderot yafunwa ngabantu abamalunga nama-4 000—inani elibalaseleyo, xa ucinga ngexabiso layo eliphezulu. Kwakuza kudlula ixeshana nje ngaphambi kokuba le mpembelelo ifihlakeleyo yokungakholelwa kubukho bukaThixo ikhulele ekukhanyelweni kukaThixo ngokupheleleyo.