Ukunikela Imibingelelo Emkholisayo UThixo
“UBOMI babakho ngokufa—ayekholelwa njalo ama-Aztec, awayebingelela ngabantu ngomlinganiselo ongenakuthelekiswa nanto eMesoamerica,” itsho njalo incwadi ethi The Mighty Aztecs. Le ncwadi ihlabela mgama isithi, “njengoko babukhula ubukhosi bawo, kwakukhona kubingelelwa ngabantu ukubuqinisa.” Ngokutsho kwenye incwadi, ama-Aztec ayebingelela ngabantu abangama-20 000 ngonyaka.
Ngenxa yokoyika nokungaqiniseki okanye beqhutywa kukuziva benetyala nokuzisola, ukutyhubela imbali abantu baye banikela imibingelelo kwizithixo zabo. Kwelinye icala, iBhayibhile ibonisa ukuba imibingelelo ethile yayimiselwe nguThixo usomandla, uYehova. Ngoko ke, kufanelekile ukubuza: Yimibingelelo enjani emkholisayo uThixo? Ngaba iminikelo nemibingelelo ifanele ibe yinxalenye yonqulo namhlanje?
Iminikelo Nemibingelelo Kunqulo Oluyinyaniso
Xa kwamiselwa uhlanga lakwaSirayeli, uYehova wanikela imiyalelo ecacileyo ngendlela awayefuna amaSirayeli amnqule ngayo, oku kwakuquka ukwenza iminikelo nemibingelelo. (Numeri, isahluko 28 nesama-29) Eminye yale minikelo yayiquka isivuno somhlaba; eminye iquka imibingelelo yezilwanyana njengenkunzi yenkomo, iigusha, iibhokhwe, amahobe namavukuthu. (Levitikus 1:3, 5, 10, 14; 23:10-18; Numeri 15:1-7; 28:7) Kwakufuneka neminikelo eyayiza kutshiswa iphele ngomlilo. (Eksodus 29:38-42) Kwakukho neminikelo yobudlelane, abo banikelayo besidla koko kubingelelwe kuThixo.—Levitikus 19:5-8.
Yonke iminikelo nemibingelelo eyayinikelwa kuThixo kuMthetho kaMoses yayiyindlela yokunqula uThixo nokumgqala njengoMongami wendalo. Ngalo mibingelelo, amaSirayeli ayebonisa uxabiso kuYehova ngeentsikelelo nokuwakhusela kuquka nokuwaxolela izono zawo. Ayesikelelwa gqitha, logama nje ehlala ethembekile ekunquleni uYehova ngendlela afuna ngayo.—IMizekeliso 3:9, 10.
Eyona nto yayibalulekile kuYehova sisimo sengqondo sabo banikela imibingelelo. Esebenzisa umprofeti wakhe uHoseya, uYehova wathi: “Ndiyoliswa bububele bothando, kungekhona imibingelelo; ndiyoliswa kukwazi uThixo kuneminikelo etshiswa kuphele.” (Hoseya 6:6) Ngenxa yoko, xa abantu balushiyayo unqulo oluyinyaniso baza baziphatha kakubi bephalaza igazi elimsulwa, imibingelelo ababeyinikela kwisibingelelo sikaYehova yayingenaxabiso. Yiloo nto, uYehova esebenzisa uIsaya wathi kumaSirayeli: “Kunangenelo ngantoni na kum ukuba mininzi kwemibingelelo yenu? . . . Ndanele yimibingelelo etshiswa kuphele yeenkunzi zeegusha namanqatha ezilwanyana ezondlekileyo; yaye andiyoliswa naligazi lamathole eenkomo aziinkunzi neenkunzi zeemvana neenkunzi zeebhokhwe.”—Isaya 1:11.
“Nto Leyo Ndingabayalelanga Yona”
Ngokwahlukileyo kumaSirayeli, abemi bakwaKanan babenikela ngabantwana babo njengemibingelelo koothixo babo, kuquka uthixo wama-Amoni uMoleki, okwaziwa ngokuba nguMilkom okanye uMolokhi. (1 Kumkani 11:5, 7, 33; IZenzo 7:43) IHalley’s Bible Handbook ithi: “Inxalenye yonqulo lwamaKanan yayiquka ukuziphatha kakubi ngokwesini phambi koothixo bawo; nokubulala amazibulo awo, ebingelela ngabo kwaba thixo.”
Ngaba ezo zinto zazimkholisa uYehova uThixo? Nakanye. Xa amaSirayeli ayesele eza kungena kwilizwe laseKanan, uYehova wawanika umyalelo obhalwe kwiLevitikus 20:2, 3, othi: “Yithi koonyana bakaSirayeli, ‘Nawuphi na umntu koonyana bakaSirayeli, naye nawuphi na umphambukeli ophambukele kwaSirayeli, othe wanikela nayiphi na yenzala yakhe kuMoleki, makabulawe afe. Abantu belizwe eli bafanele bamgibisele ngamatye afe. Ke mna ndiya kumchasa loo mntu, ndize ndimnqumle phakathi kwabantu bakowabo, kuba eyinikele kuMoleki inxalenye yenzala yakhe ukuze ayenze inqambi indawo yam engcwele aze alihlambele igama lam elingcwele.’”
Nangona oku kungakholeleki, amaSirayeli athile alushiya unqulo oluyinyaniso amkela olu qheliselo lobudemon lokubingelela ngabantwana bawo koothixo bobuxoki. Ngokuphathelele oku, INdumiso 106:35-38 ithi: “Baxubana neentlanga yaye bafunda imisebenzi yazo. Bakhonza izithixo zazo, zona ke ezi zaba ngumgibe kubo. Babebingelela ngoonyana babo nangeentombi zabo kwiidemon. Ngoko baphalaza igazi elimsulwa, igazi loonyana babo neentombi zabo, ababingelela ngazo kwizithixo zakwaKanan; nelizwe langcoliswa luphalazo-gazi.”
Echaza indlela ayicekisa ngayo le nto, uYehova esebenzisa umprofeti wakhe uYeremiya wathi ngokuphathelele oonyana bakaYuda: “Babeke izinto zabo ezilizothe endlwini ebizwe ngegama lam, ukuze bayenze inqambi. Kwaye bazakhile iindawo eziphakamileyo zaseTofete, esentlanjeni yoonyana bakaHinom, ukuze batshise oonyana babo neentombi zabo emlilweni, nto leyo ndingabayalelanga yona nengathanga qatha entliziyweni yam.”—Yeremiya 7:30, 31.
Ngenxa yokwenza ezi zinto zilizothe, ekugqibeleni uThixo wayeka ukukholiswa luhlanga lakwaSirayeli. Ikomkhulu lalo, iYerusalem, ekugqibeleni latshatyalaliswa baze abantu bathinjelwa eBhabhiloni. (Yeremiya 7:32-34) Kucacile ukuba, ukubingelela ngabantu asiyonto efunwa nguThixo ibe asiyonxalenye yonqulo olunyulu. Naluphi na uhlobo lokubingelela ngabantu luvela kwiidemon, ibe abanquli bokwenyaniso bakaThixo bagatya nayiphi na into enxulumene noko.
Idini Lentlawulelo LikaKristu Yesu
Noko ke, bambi basenokuzibuza, ‘Kutheni ke uMthetho kaYehova kumaSirayeli wawuquka ukubingelela ngezilwanyana?’ Umpostile uPawulos waphonononga lo mbuzo waza wanikela le mpendulo: “Kuthekani, ke ngoko, ngoMthetho? Wongezwa ukuze ukunxaxha kubonakaliswe, de ifike imbewu ekwakwenziwe kuyo isithembiso . . . Ngenxa yoko uMthetho uye waba ngumkhapheli wethu osikhokelela kuKristu.” (Galati 3:19-24) Imibingelelo yezilwanyana kuMthetho kaMoses yayifuzisela umbingelelo omkhulu uYehova uThixo awayeza kuwunikela ngenxa yabantu—lowo woNyana wakhe, uYesu Kristu. UYesu wabhekisela kwesi senzo sothando xa wathi: “UThixo walithanda kakhulu ihlabathi kangangokuba wanikela ngoNyana wakhe okuphela kwamzeleyo, ukuze wonk’ ubani obonisa ukholo kuye angatshabalali kodwa abe nobomi obungunaphakade.”—Yohane 3:16.
Ngenxa yokuthanda uThixo nabantu, ngokuzithandela uYesu wanikela ngobomi bakhe obufezekileyo baba yintlawulelo kwinzala ka-Adam. (Roma 5:12, 15) UYesu wathi: “Kanye njengokuba uNyana womntu weza, kungekhona ukuze alungiselelwe, kodwa ukuze alungiselele nokuze anikele ngomphefumlo wakhe ube yintlawulelo ngenxa yabaninzi.” (Mateyu 20:28) Akakho umntu emhlabeni owayenokukhulula abantu kubukhoboka besono nokufa abathengiswa kubo xa uAdam wonayo. (INdumiso 49:7, 8) Ngenxa yoko, uPawulos wathi uYesu “wangena, kungekhona ngegazi leebhokhwe nelamathole eenkomo aziinkunzi, kodwa ngelakhe igazi, kwaba kanye kwindawo engcwele waza wasizuzela intlangulo engunaphakade.” (Hebhere 9:12) Ngokwamkela igazi likaYesu elilidini, uThixo “walucima uxwebhu olubhalwe ngesandla olunxamnye nathi.” Oko kuthetha ukuba, uYehova wawubekel’ ecaleni umnqophiso woMthetho, neminikelo nemibingelelo eyayifuneka kuwo, ngaloo ndlela esizisa ‘isipho sobomi obungunaphakade.’—Kolose 2:14; Roma 6:23.
Imibingelelo Neminikelo Yokomoya
Ekubeni imibingelelo neminikelo yezilwanyana ingaseyonxalenye yonqulo oluyinyaniso, ngaba kusekho imibingelelo efunekayo namhlanje? Ewe, ikho. UYesu Kristu waphila ubomi bokuzincama ekukhonzeni kwakhe uThixo ibe ekugqibeleni wanikela ngobomi bakhe ngenxa yabantu. Ngenxa yoko, wathi: “Ukuba nabani na ufuna ukundilandela, makazincame, athabathe isibonda sakhe sentuthumbo aze aqhubeke endilandela.” (Mateyu 16:24) Oku kuthetha ukuba nabani na ofuna ukuba ngumlandeli kaYesu umele enze imibingelelo ethile. Yiyiphi lo mibingelelo?
Omnye ngulo, umlandeli wokwenene kaKristu akaphileli isiqu sakhe kodwa uphilela ukwenza ukuthanda kukaThixo. Ubeke ukuthanda kukaThixo ngaphambi kweminqweno yakhe. Phawula indlela umpostile uPawulos akubeka ngayo oku xa esithi: “Ndiyanibongoza ngeemfesane zikaThixo, bazalwana, ukuba niyinikele imizimba yenu ibe yimibingelelo ephilayo, engcwele, eyamkelekileyo kuThixo, inkonzo ke leyo engcwele ngokwamandla enu engqiqo. Yaye musani ukumilisa okwale nkqubo yezinto, kodwa guqukani ngokutshintsha ingqondo yenu, ukuze nikungqine ngokwenu ukulunga nokwamkeleka nokugqibelela kokuthanda kukaThixo.”—Roma 12:1, 2.
Ngokubhekele phaya, iBhayibhile ibonisa ukuba amazwi ethu okudumisa anokugqalwa njengombingelelo kuYehova. Umprofeti uHoseya wasebenzisa ibinzana elithi “amathole eenkomo aziinkunzi, amazwi emilebe yethu,” ukubonisa ukuba uThixo ugqala indumiso yemilebe yethu njengomnye weyona mibingelelo ethandekayo. (Hoseya 14:2) Umpostile uPawulos wabongoza amaKristu angamaHebhere wathi: ‘Nikelani kuThixo umbingelelo wendumiso, oko kukuthi, isiqhamo semilebe evakalisa ekuhleni igama lakhe.’ (Hebhere 13:15) Namhlanje, amaNgqina kaYehova ahlala exakekile eshumayela iindaba ezilungileyo yaye esenza abafundi abantu bazo zonke iintlanga. (Mateyu 24:14; 28:19, 20) Anikela kuThixo imibingelelo yendumiso imini nobusuku ehlabathini lonke.—ISityhilelo 7:15.
Ukongezelela ekushumayeleni, imibingelelo ekholisa uThixo iquka nokwenza okulungileyo kwabanye. UPawulos wathi: “Musani ukulibala ukwenza okulungileyo nokwabelana ngezinto nabanye, kuba uThixo uyakholiswa yimibingelelo enjalo.” (Hebhere 13:16) Eneneni, ukuze imibingelelo yendumiso imkholise uThixo, abo bayinikelayo bamele baziphathe kakuhle. UPawulos unikela esi siluleko: “Ukuziphatha kwenu makube kokuzifaneleyo iindaba ezilungileyo ezingoKristu.”—Filipu 1:27; Isaya 52:11.
Njengakwixesha elidluleyo, yonke imibingelelo eyenzelwa ukuxhasa unqulo oluyinyaniso iya kuzisa uvuyo olukhulu neentsikelelo ezivela kuYehova. Ngoko ke, masenze konke okusemandleni ethu ukunikela imibingelelo emkholisa ngokwenene uThixo!
[Umfanekiso okwiphepha 18]
“Oonyana babo neentombi zabo . . . babingelela ngazo kwizithixo zakwaKanan”
[Imifanekiso ekwiphepha 20]
Ngokushumayela iindaba ezilungileyo nangokunceda abanye ngezinye iindlela, amaKristu okwenyaniso anikela imibingelelo emkholisayo uThixo