Ukunyaniseka KuKristu Nakwikhoboka Lakhe Elithembekileyo
“Inkosi yalo . . . iya kulimisela phezu kwayo yonke impahla yayo.”—MATEYU 24:45-47.
1, 2. (a) Ngubani oyiNkokeli yethu ngokutsho kweZibhalo? (b) Yintoni ebonisa ukuba uKristu uyalikhokela ibandla lamaKristu?
“NINGABIZWA nangokuthi ‘iinkokeli,’ kuba inye iNkokeli yenu, uKristu.” (Mateyu 23:10) Ngala mazwi uYesu walitsolisa kubalandeli bakhe elokuba akakho umntu apha emhlabeni owayeza kuba yinkokeli yabo. Ekuphela kweNkokeli yabo, uYesu Kristu yayiza kuba sezulwini. UYesu wamiselwa nguThixo kwesi sikhundla. UYehova ‘wamvusa kwabafileyo waza wamenza intloko yezinto zonke kulo ibandla.’—Efese 1:20-23.
2 Ekubeni uKristu ‘eyintloko yezinto zonke’ kwibandla lamaKristu, unegunya kuzo zonke izinto ezenzeka ebandleni. Ayikho into eyenzekayo ebandleni aze angayazi. Uyabondela ubumoya beqela ngalinye lamaKristu, okanye bebandla. Oku kubonakala kakuhle kwisityhilelo esanikwa umpostile uYohane ngasekupheleni kwenkulungwane yokuqala yeXesha Eliqhelekileyo. Izihlandlo ezihlanu uYesu waxelela amabandla asixhenxe ukuba wayezazi izenzo zawo, izinto awayezenza kakuhle nawayebuthathaka kuzo. (ISityhilelo 2:2, 9, 13, 19; 3:1, 8, 15) Siqinisekile ukuba uKristu wayeyazi imeko yokomoya yamabandla aseAsia Minor, ePalestina, eSiriya, eBhabhiloni, eGrisi, eItali nakwezinye iindawo. (IZenzo 1:8) Kuthekani namhlanje?
Ikhoboka Elithembekileyo
3. Kutheni kufanelekile nje ukufanisa uKristu nentloko lona ibandla nomzimba?
3 Emva kokuvuswa kwakhe ngaphambi nje kokuba anyukele kuYise ezulwini, uYesu waxelela abafundi bakhe oku: “Linikwe mna lonke igunya ezulwini nasemhlabeni.” Waphinda wathi: “Khangelani! ndinani yonke imihla de kube sekuphelisweni kwenkqubo yezinto.” (Mateyu 28:18-20) Wayeza kuqhubeka eyiNtloko yabo. Kwiileta awazibhalela amaKristu ase-Efese naseKolose, umpostile Pawulos wafanisa ibandla lamaKristu ‘nomzimba,’ aze ke yena uKristu abe yiNtloko yawo. (Efese 1:22, 23; Kolose 1:18) IThe Cambridge Bible for Schools and Colleges ithi esi safobe “asibonisi umanyano nje oluphakathi komzimba neNtloko, kodwa sibonisa ukuba amalungu enza intando yentloko. Azizixhobo zikaKristu.” Ngoobani abaye basetyenziswa nguKristu njengesixhobo sakhe ukususela oko waye wanikwa amandla oBukumkani ngowe-1914?—Daniyeli 7:13, 14.
4. Njengokuba kwakuxelwe kwangaphambili kwisiprofeto sikaMalaki, wabona ntoni uYehova noKristu Yesu xa babeze kuhlola itempile yokomoya?
4 Isiprofeto sikaMalaki saxela kwangaphambili ukuba uYehova, “iNkosi yokwenyaniso,” iphelekwa “ngumthunywa womnqophiso,” uNyana wakhe osandula ukumiselwa, uKristu uYesu, wayeza kugweba aze ahlole “itempile,” okanye indlu yonqulo kaThixo. Kuyacaca ukuba ‘ixesha elimisiweyo,’ lokuba ‘umgwebo uqale ngendlu kaThixo’ lafika ngowe-1918.a (Malaki 3:1; 1 Petros 4:17) Abo babesithi bamela uThixo nonqulo lwakhe lokwenyaniso emhlabeni bahlolwa. Iicawa zeNgqobhoko, eziye zafundisa iimfundiso ezithoba isidima sikaThixo kangangeenkulungwane, ngoxa zibandakanyeke nasekubulaweni kwabantu kwiMfazwe Yehlabathi I, zagatywa. Intsalela ethembekileyo yamaKristu athanjisiweyo, yavavanywa, yacikidwa ngokungathi kungomlilo, yasulungekiswa yaza kuYehova yaba “ngabantu abanikela umnikelo osisipho ngobulungisa.”—Malaki 3:3.
5. Ngokuvisisana nesiprofeto sikaYesu esiphathelele “ubukho,” bakhe iye yaba ngubani “ikhoboka” elithembekileyo?
5 Ngokuvisisana nesiprofeto sikaMalaki, umqondiso oyintlanganisela uYesu awawunika abafundi bakhe ukuze balazi ixesha ‘lobukho bakhe nokupheliswa kwenkqubo yezinto’ iquka nokufaniswa kweqela elibumba ‘ikhoboka.’ UYesu wathi: “Ngubani ngokwenene olikhoboka elithembekileyo neliyingqondi ethe inkosi yalo yalimisela phezu kwempahla yendlu yayo, ukuze liyinike ukutya kwayo ngexesha elifanelekileyo? Linoyolo elo khoboka ukuba inkosi yalo yakufika ilifumana lisenjenjalo. Inene ndithi kuni, iya kulimisela phezu kwayo yonke impahla yayo.” (Mateyu 24:3, 45-47) ‘Ekufikeni’ kwakhe eze kuhlola “ikhoboka” ngowe-1918, uKristu wafumana intsalela ethanjiswe ngomoya yabafundi abathembekileyo ababesebenzisa eli phephancwadi nezinye iimpapasho ezisekelwe eBhayibhileni ukususela ngowe-1879 ukuze kuveliswe ‘ukutya kokomoya ngexesha elifanelekileyo.’ Wabamkela njengomkhonzi wakhe oyilwa ngabantu abahlukahlukeneyo, okanye “ikhoboka,” ibe ngowe-1919 wabaphathisa yonke impahla yakhe yasemhlabeni.
Ukunyamekela Impahla KaKristu Yasemhlabeni
6, 7. (a) Ngawaphi amanye amagama uYesu awalibiza ngawo “ikhoboka” elithembekileyo lakhe? (b) Kubandakanya ntoni ukusebenzisa kukaYesu igama elithi “igosa”?
6 Kwiinyanga nje ezimbalwa ngaphambi kokuba uYesu anikele esi siprofeto somqondiso wobukho bakhe, kuquka ubukho ‘bekhoboka’ elimela yena apha emhlabeni, wathetha ngeli “khoboka” esebenzisa esinye isigama xa wayethetha ngeembopheleleko zalo. UYesu wathi: “Ngubani ngokwenene elo gosa lithembekileyo, elo liyingqondi, inkosi yalo eya kulimisela phezu kweqela layo labalindi ukuhlala lilinika umlinganiselo walo wokutya ngexesha elifanelekileyo? Eneneni ndithi kuni, iya kulimisela phezu kwayo yonke impahla yayo.”—Luka 12:42, 44.
7 Kwezi ndinyana ikhoboka kuthiwa ligosa, igama eliguqulelwe kwelesiGrike elithetha “umphathi wendlu.” Amalungu egosa ayengaz’ ukuba liqela nje lee nkcuba-buchopho ezicacisa iindinyana ezibangel’ umdla eBhayibhileni. Ukongezelela ekulungiseleleni ukutya kokomoya “ngexesha elifanelekileyo,” “igosa elithembekileyo” laliza kumiselwa phezu kwabo bonke abalindi bakaKristu, limiselwe ukuba longamele zonke izilangazelelo zakhe ezilapha emhlabeni, “yonke impahla yakhe.” Zaziza kuquka ntoni ezi mpahla?
8, 9. Yiyiphi “impahla” elimiselwe ukuba liyongamele ikhoboka?
8 Umsebenzi wekhoboka uquka ukongamela izakhiwo ezisetyenziswa ngabalandeli bakaKristu ukuze baqhubeke nemisebenzi yabo yobuKristu, njengekomkhulu lehlabathi neeofisi zamasebe zamaNgqina kaYehova, neendawo zawo zokunqula—iiHolo zoBukumkani neeHolo zeNdibano—ezisehlabathini lonke. Okona kubalulekileyo, kukuba ikhoboka livelela ucwangciso lokomoya olwakhayo lweBhayibhile kwiintlanganiso eziqhutywa veki nganye neendibano ezinkulu nezincinane eziqhutywa ngamaxesha athile. Kwezi ntlanganiso, kuxutyushwa inzaliseko yeziprofeto zeBhayibhile, neendlela zokusebenzisa imigaqo yeBhayibhile kubomi bethu bemihla ngemihla.
9 Imbopheleleko yegosa iquka ukongamela owona msebenzi ubalulekileyo wokushunyayelwa ‘kweendaba ezilungileyo zobukumkani’ nokwenza ‘abafundi abantu beentlanga zonke.’ Oku kubandakanya ukufundisa abantu ukuba bagcine zonke izinto uKristu, iNtloko yebandla, ayalela ukuba zenziwe kweli xesha lesiphelo. (Mateyu 24:14; 28:19, 20; ISityhilelo 12:17) Umsebenzi wokushumayela nokufundisa uye wavelisa “isihlwele esikhulu,” amaqabane athembekileyo entsalela yabathanjiswa. Ezi “zinto zinqwenelekayo zazo zonke iintlanga” ngokuqinisekileyo zimele zibalwe phakathi “kwempahla” exabisekileyo kaKristu enyanyekelwa likhoboka elithembekileyo neliyingqondi.—ISityhilelo 7:9; Hagayi 2:7.
IQumrhu Elilawulayo Elimela Udidi Lwekhoboka
10. Liliphi iqumrhu elalisenza izigqibo ngenkulungwane yokuqala, ibe oko kwaba nayiphi imiphumo emabandleni?
10 Imbopheleleko enzima yekhoboka elithembekileyo ngokuqinisekileyo yayiza kubandakanya ukwenza izigqibo. Kwibandla lamaKristu lenkulungwane yokuqala, abapostile nabadala eYerusalem babemela udidi lwekhoboka, besenza izigqibo ezichaphazela lonke ibandla. (IZenzo 15:1, 2) Izigqibo zequmrhu elilawulayo lenkulungwane yokuqala zazithunyelwa amabandleni ngeeleta nangabameli abahambahambayo. AmaKristu enkulungwane yokuqala ayekuvuyela ukufumana olu lwalathiso lucacileyo, ibe intsebenziswano yawo nequmrhu elilawulayo yabangela uxolo nomanyano.—IZenzo 15:22-31; 16:4, 5; Filipi 2:2.
11. Ngubani osetyenziswa nguKristu namhlanje ukwalathisa ibandla lakhe, yaye simele silijonge njani eli qela lamaKristu athanjisiweyo?
11 NjengakumaKristu enkulungwane yokuqala, namhlanje kukho iqela elincinane labaveleli abathanjisiweyo ababumba iQumrhu Elilawulayo labalandeli bakaKristu emhlabeni. UKristu iNtloko yebandla, walathisa la madoda athembekileyo “ngesandla sasekunene” njengoko esongamela umsebenzi woBukumkani. (ISityhilelo 1:16, 20) Kwibali lobomi bakhe, uAlbert Schroeder, ilungu leQumrhu Elilawulayo elisandula ukugqiba ikhondo lalo lasemhlabeni, wathi: “IQumrhu Elilawulayo lidibana qho ngoLwesithathu, livule intlanganiso ngomthandazo lize licele ulwalathiso lomoya kaYehova. Kwenziwa umgudu wokwenene ukuqinisekisa ukuba wonke umcimbi ophethweyo nazo zonke izigqibo ezenziwayo zivisisana neLizwi likaThixo iBhayibhile.”b Sinokuwathemba la maKristu athanjisiweyo. Mayela neQumrhu Elilawulayo simele sithobele umyalelo kampostile uPawulos othi: “Bathobeleni abo bakhokelayo phakathi kwenu nize nibalulamele, kuba bahlala beyilindile imiphefumlo yenu.”—Hebhere 13:17.
Ukuhlonela Ikhoboka Elithembekileyo Neliyingqondi
12, 13. Ziziphi izizathu ezikwiZibhalo zokuba sihlonele ikhoboka elithembekileyo?
12 Isizathu esingundoqo sokuhlonela ikhoboka elithembekileyo kukuba xa sisenjenjalo, sihlonela iNkosi yalo, uYesu Kristu. UPawulos wabhalela amaKristu athanjisiweyo wathi: “Lowo wabizwa engokhululekileyo ulikhoboka likaKristu. Nathengwa ngexabiso.” (1 Korinte 7:22, 23; Efese 6:6) Ukuba ke siluthobela ngokunyanisekileyo ulwalathiso lwekhoboka elithembekileyo neQumrhu Elilawulayo, sithobela uKristu, iNkosi yeli khoboka. Ngokuhlonela kwethu ikhoboka elisetyenziswa nguKristu ukongamela impahla yakhe yasemhlabeni ‘sivuma ekuhleni ukuba uYesu Kristu uyiNkosi nto leyo eluzuko kuThixo uYise.’—Filipi 2:11.
13 Esinye isizathu esikwiZibhalo sokuhlonela ikhoboka elithembekileyo kukuba amaKristu athanjisiweyo asemhlabeni achazwa njengafuzisela “itempile” kaYehova ahlala kuyo ‘ngokomoya.’ Ekubeni kunjalo, ‘angcwele.’ (1 Korinte 3:16, 17; Efese 2:19-22) Lolu didi lwetempile engcwele uYesu aye waluphathisa impahla yakhe yasemhlabeni, nto leyo ethetha ukuba amalungelo neembopheleleko ezithile ebandleni lamaKristu anikwe eli qela lekhoboka. Ngenxa yesi sizathu, bonke ebandleni bayijonga njengenkonzo engcwele ukulandela nokuxhasa ulwalathiso oluvela kwikhoboka elithembekileyo neQumrhu Elilawulayo. Ewe, “ezinye izimvu” zikugqala kulilungelo ukunceda ikhoboka elithembekileyo ekunyamekeleni izilangazelelo zeNkosi.—Yohane 10:16.
Ukulixhasa Ngokunyaniseka
14. Njengokuba uIsaya waprofetayo, ezinye izimvu zihamba njani emva kodidi lwekhoboka elithanjisiweyo zize zisebenze ‘njengabasebenzi abangahlawulwayo’?
14 Ukuzithoba kwezinye izimvu kumalungu athanjisiweyo oSirayeli wokomoya kwaxelwa kwangaphambili kwisiprofeto sikaIsaya esithi: “Utsho uYehova ukuthi: ‘Abasebenzi abangahlawulwayo baseYiputa nabarhwebi baseTiyopiya namaShebha, amadoda amade, baya kuza kuwe, babe ngabakho. Baya kuhamba emva kwakho; baya kuza besemakhamandeleni, baqubude kuwe. Baya kuthandaza kuwe, besithi, “Eneneni uThixo umanyene nawe, yaye akakho omnye; akakho omnye uThixo.”’” (Isaya 45:14) Ngokufuziselayo, namhlanje ezinye izimvu zilandela udidi lwekhoboka elithanjisiweyo neQumrhu Elilawulayo, zithobela ulwalathiso lwalo. ‘Njengabasebenzi abangahlawulwayo’ ezinye izimvu zisebenzisa amandla nobuncwane bazo ukuze zixhase umsebenzi wokushumayela owenziwa ehlabathini lonke uKristu awawunika abalandeli bakhe abathanjisiweyo abalapha emhlabeni.—IZenzo 1:8; ISityhilelo 12:17.
15. Isiprofeto sikaIsaya 61:5, 6 siluchaza njani ulwalamano oluphakathi kwezinye izimvu noSirayeli wokomoya?
15 Ezinye izimvu ziyakuvuyela ukukhonza uYehova ngaphantsi kolwalathiso lodidi lwekhoboka neQumrhu Elilawulayo. Abathanjiswa zibagqala njengamalungu ‘oSirayeli kaThixo.’ (Galati 6:16) ‘Njengabasemzini’ ‘nabaphambukeli’ bokomfuziselo abanxulumana noSirayeli wokomoya, ‘bangabalimi nabasebenzi zidiliya’ ngaphantsi kolwalathiso, ‘lwababingeleli bakaYehova’ ‘nabalungiseleli bakaThixo’ abathanjisiweyo. (Isaya 61:5, 6) Banenzondelelo ekushumayeleni iindaba ezilungileyo zoBukumkani nokwenza abafundi abantu bazo zonke iintlanga. Bazinikele benceda udidi lwekhoboka ngokwalusa nokunyamekela izimvu ezisandul’ ukuba nomdla.
16. Yintoni eyenza ezinye izimvu zinyaniseke zixhasa ikhoboka elithembekileyo neliyingqondi?
16 Ezinye izimvu ziyaqonda ukuba ziye zanganelwa ekuzibhokoxeni kwekhoboka elithembekileyo ukuze lizinike ukutya kokomoya ngexesha elifanelekileyo. Ziyavuma ukuba, ukuba bekungekho ngenxa yokuzibhokoxa kwekhoboka elithembekileyo neliyingqondi, ngezinolwazi oluncinane okanye zingazi nowathwethwa ngeenyaniso ezixabisekileyo zeBhayibhile, njengolongamo lukaYehova, ukungcwaliswa kwegama lakhe, uBukumkani, amazulu amatsha nomhlaba omtsha, umphefumlo, imeko yabafi, noko bakuko ngokwenene uYehova, uNyana wakhe, nomoya oyingcwele. Ngenxa yombulelo ongazenzisiyo nokunyaniseka, ngokuzithandela ezinye izimvu ziyabaxhasa “abazalwana” bakaKristu abathanjisiweyo abalapha emhlabeni ngeli xesha lesiphelo.—Mateyu 25:40.
17. Yintoni elibone kufanelekile ukuba liyenze iQumrhu Elilawulayo, kwaye yintoni eza kuxutyushwa kwinqaku elilandelayo?
17 Ekubeni lincipha inani labathanjiswa, abanakukwazi ukubakho kuwo onke amabandla ukuze baqiniseke ukuba impahla kaKristu iphathwa kakuhle. Ngenxa yoko, iQumrhu Elilawulayo limisela amadoda phakathi kwezinye izimvu ukuze avelele kwiiofisi zamasebe, kwisithili, kwisiphaluka nasemabandleni amaNgqina kaYehova. Ngaba isimo sengqondo sethu kwaba balusi bangaphantsi siyakuchaphazela ukunyaniseka kwethu kuKristu nakwikhoboka elithembekileyo lakhe? Lo mbuzo uza kuxutyushwa kwinqaku elilandelayo.
[Imibhalo esemazantsi]
a Ukuze ufumane iinkcukacha ngalo mbandela, funda IMboniselo, kaMatshi 1, 2004, iphepha 13-18, nekaDisemba 1, 1992, iphepha 13.
b Eli bali likwinkupho kaMatshi 1, 1988, yeli phephancwadi, iphepha 10-17.
Imibuzo Yokuzikhumbuza
• Ngubani iNkokeli yethu, kwaye yintoni ebonisa ukuba iyazazi izinto ezenzeka emabandleni?
• Xa kwakuhlolwa “itempile” ngoobani abafunyanwa besenza umsebenzi wekhoboka elithembekileyo, kwaye baphathiswa ntoni?
• Ziziphi izizathu ezikwiZibhalo zokuba sixhase ikhoboka elithembekileyo?
[Imifanekiso ekwiphepha 23]
“Impahla” eyonganyelwa “ligosa” iquka izinto eziphathekayo, ucwangciso lokomoya nomsebenzi wokushumayela
[Umfanekiso okwiphepha 25]
Ezinye izimvu zixhasa udidi lwekhoboka elithembekileyo ngokushumayela ngenzondelelo