Ukubonisa Intlonelo Ngeentlanganiso Zethu Ezingcwele
“Ndiza kubazisa entabeni yam engcwele ndize ndibenze babe nemihlali endlwini yam yomthandazo.”—ISAYA 56:7.
1. Ziziphi izizathu ezingokweZibhalo esinazo zokubonisa intlonelo ngeentlanganiso zethu?
UYEHOVA uye wahlanganisa abantu bakhe, amaKristu athanjisiweyo kunye namaqabane awo, ukuze bamnqule ‘entabeni yakhe engcwele.’ Ubenza babe nemihlali ‘endlwini yakhe yomthandazo,’ etempileni yakhe yokomoya, ‘eyindlu yomthandazo yazo zonke iintlanga.’ (Isaya 56:7; Marko 11:17) Oku kubonisa ukuba unqulo lukaYehova lungcwele, lunyulu, yaye lukumgangatho ophakamileyo. Ukubonisa kwethu intlonelo ngeentlanganiso zethu zonqulo, kububungqina bokuba sinembono efana nekaYehova ngokuphathelele izinto ezingcwele.
2. Yintoni ebonisa ukuba uYehova wayeyigqala njengengcwele indawo ayikhethileyo yonqulo, yaye uYesu wabonisa njani ukuba naye wayeyigqala ngendlela efanayo?
2 Ngexesha lamaSirayeli iindawo zonqulo ezazikhethwe nguYehova zazigqalwa njengezingcwele. Umnquba kunye nempahla yawo wawufanele uthanjiswe yaye ungcwaliswe ‘ukuze ube ngowona ungcwele.’ (Eksodus 30:26-29) Amagumbi amabini engcwele ayebizwa ngokuba ‘yiNdawo Engcwele’ ‘neYona Ngcwele.’ (Hebhere 9:2, 3) Kamva umnquba wathatyathelw’ indawo yitempile yaseYerusalem. Njengoko iYerusalem yayisaziwa njengendawo yonqulo lukaYehova, yayibizwa ngokuba ‘sisixeko esingcwele.’ (Nehemiya 11:1; Mateyu 27:53) UYesu naye wayihlonela itempile xa wayesemhlabeni. Wacaphuka gqitha xa wabona indlela abantu ababengayihloneli ngayo itempile, beyenza indawo yoshishino nendlela enqumlelayo.—Marko 11:15, 16.
3. Yintoni ebonisa ukuba iindibano zamaSirayeli zazingcwele?
3 AmaSirayeli ayehlanganisana rhoqo ukuze anqule uYehova aze aphulaphule ukufundwa koMthetho wakhe. Eminye imithendeleko yawo yayibizwa ngokuba ziindibano ezingcwele, nto leyo eyayibonisa ukuba ingcwele. (Levitikus 23:2, 3, 36, 37) Kwindibano yasesidlangalaleni ngexesha likaEzra noNehemiya, abaLevi ‘babecacisela abantu umthetho.’ Ekubeni “bonke abantu babelila njengoko babesiva la mazwi omthetho,” abaLevi “babeyalela abantu bonke ukuba bathi cwaka, besithi: ‘Yithini cwaka! kuba olu suku lungcwele.’” Ngoko amaSirayeli ayewubhiyozela ‘ngemihlali emikhulu’ loo Mthendeleko Weminquba. Ngaphezu koko, “kwakufundwa ngokuvakalayo incwadi yomthetho yoThixo oyinyaniso usuku nosuku, ukususela ngosuku lokuqala de kube lusuku lokugqibela; kwaye baqhubeka besenza umthendeleko iintsuku ezisixhenxe, kwaza ngosuku lwesibhozo kwabakho indibano engcwele, ngokommiselo.” (Nehemiya 8:7-11, 17, 18) Ezi yayizizihlandlo ezingcwele ngokwenene ezazifanele zihlonelwe ngabo babekho.
Iintlanganiso Zethu Zingcwele
4, 5. Yintoni ebonisa ukuba iintlanganiso zethu zingcwele?
4 Enyanisweni, namhlanje uYehova akanaso isixeko esingcwele sokoqobo emhlabeni, esinetempile yonqulo enikezelwe kuye. Noko ke, masingayilibali into yokuba iintlanganiso zonqulo lukaYehova ziziindibano ezingcwele. Kathathu ngeveki siyahlanganisana ukuze sifundisise iZibhalo. ILizwi likaYehova ‘licaciswa ngokucokisekileyo’ yaye njengakwixesha likaNehemiya, ‘iyachazwa intsingiselo yalo.’ (Nehemiya 8:8) Zonke iintlanganiso zethu ziqala zize ziphethwe ngomthandazo, yaye kwezininzi zazo sicula iingoma zokudumisa uYehova. (INdumiso 26:12) Eneneni iintlanganiso zebandla ziyinxalenye yonqulo lwethu, ngoko simele sizigqale ngokunzulu nangentlonelo.
5 UYehova uyabasikelela abantu bakhe abahlanganisene ngenjongo yokumnqula nokufundisisa iLizwi lakhe, nokuze banandiphe ulwalamano oluhle lobuKristu. Sinokuqiniseka ukuba xa sisezintlanganisweni, sikwindawo ‘uYehova ayalela ukuba kubekho intsikelelo kuyo.’ (INdumiso 133:1, 3) Singazinandipha ezi ntsikelelo ngokuthi sibekho ezintlanganisweni yaye sinikel’ ingqalelo. Ngaphezu koko, uYesu wathi: “Apho kukho ababini okanye abathathu abahlanganisene ndawonye egameni lam, ndilapho phakathi kwabo.” Nakuba la mazwi ebhekiswa ngokuyintloko kubadala abangamaKristu abahlanganisene ukuze basingathe iingxaki ezinzulu ezibakho phakathi kwabavakalisi, ayasebenza nakwiintlanganiso zethu. (Mateyu 18:20) Ukuba uKristu ubakho ngomoya oyingcwele xa amaKristu ehlanganisene egameni lakhe, azimelanga na iintlanganiso ezinjalo zigqalwe njengezingcwele?
6. Simele sizigqale njani iindawo zethu zokuhlanganisana, ezinkulu nezincinane?
6 Liyinyaniso elokuba uYehova akahlali kwiitempile ezenziwe ngabantu. Kodwa ke, iiHolo zethu zoBukumkani ziziindawo zonqulo lokwenyaniso. (IZenzo 7:48; 17:24) Sihlanganisana kuzo ukuze sifundisise iLizwi likaYehova, sithandaze kuye, size sicule iingoma zokumdumisa. Kukwanjalo nangeeHolo zethu zeNdibano. Nezinye iindawo ezinkulu zokuhlanganisana—njengeeholo zikawonke-wonke, iiholo zemiboniso, okanye amabala emidlalo aqeshiweyo ukuze kuqhutyelwe iindibano kuwo—ziba ziindawo zonqulo logama zisetyenziselwa iindibano zethu ezingcwele. Simele sizihlonele ezi ndawo zonqulo, enoba zinkulu okanye zincinane, yaye oko kumele kubonakale kwisimo sethu sengqondo nakwindlela esiziphatha ngayo.
Iindlela Zokubonisa Intlonelo Ngeentlanganiso Zethu
7. Yiyiphi indlela esinokubonisa ngayo ukuba siyazihlonela iintlanganiso?
7 Zikho iindlela esinokubonisa ngazo ukuba siyazihlonela iintlanganiso. Enye yazo kukubakho xa kuculwa iingoma zoBukumkani. Ezininzi zazo zinamazwi omthandazo, ngoko zimele ziculwe ngentlonelo. Umpostile uPawulos wacaphula amazwi eNdumiso 22 ngokungathi athethwa nguYesu esithi: “Ndiya kulivakalisa kubazalwana bam igama lakho; phakathi ebandleni ndiya kukudumisa ngengoma.” (Hebhere 2:12) Ngoko sifanele sizimisele ukuba sezihlalweni zethu ngaphambi kokuba usihlalo achaze ingoma size sicamngce ngamazwi engoma leyo njengoko sicula. Ngamana indlela esicula ngayo ingabonisa ukuba sivakalelwa ngendlela efanayo neyomdumisi owabhala wathi: “Ndiya kumbonga uYehova ngentliziyo yam yonke kwiqela lamakholwane abo bathe tye nakuyo indibano.” (INdumiso 111:1) Ewe, ukudumisa uYehova ngengoma kusesinye isizathu esihle sokufika kwangethuba ezintlanganisweni size sihlale de ziphele.
8. Nguwuphi umzekelo oseBhayibhileni obonisa ukuba sifanele sinikel’ ingqalelo ngentlonelo xa kuthandazwa ezintlanganisweni?
8 Enye inkalo yokomoya ebalulekileyo kwiintlanganiso ngumthandazo osuk’ entliziyweni oquka bonke abakhoyo. Ngesinye isihlandlo, amaKristu enkulungwane yokuqala eYerusalem ahlanganisana aza ‘aphakamisa amazwi awo kuThixo ngamxhelo mnye’ ethandaza ngokusuk’ entliziyweni. Ngenxa yoko, akwazi ukuqhubeka ‘elithetha ngenkalipho ilizwi likaThixo’ nangona ayetshutshiswa. (IZenzo 4:24-31) Ngaba ucinga ukuba bakho ababebhadula ngengqondo ngoxa kwakuthandazwa? Ngokuqinisekileyo abakho, kuba bonke babethandaza “ngamxhelo mnye.” Imithandazo eyenziwa ezintlanganisweni ibonisa intlonelo enzulu abanayo bonke abo bakhoyo. Ngoko simele sinikel’ ingqalelo ngentlonelo kuyo.
9. Sinokubonisa njani ngendlela esinxiba nesiziphatha ngayo ukuba siyazihlonela iintlanganiso zethu ezingcwele?
9 Sinokubonisa intlonelo enzulu ngobungcwele beentlanganiso nangendlela esinxiba ngayo. Impahla yethu nendlela esilungisa ngayo iinwele zethu inokuba negalelo elikhulu kwisidima seentlanganiso. Umpostile uPawulos waluleka wathi: “Ndinqwenela ukuba kuyo yonke indawo amadoda aqhubeke ethandaza, ephakamisa izandla ezinyanisekileyo, ngaphandle kwengqumbo nokuxambulisana. Ngokunjalo ndinqwenela ukuba abafazi bazihombise ngesinxibo esilungiswe kakuhle, ngokuthozama nangengqondo ephilileyo, kungekhona ngezimbo zokulukwa kweenwele nokunxitywa kwegolide neeperile nezambatho zeendleko ezinkulu, kodwa ngendlela efanele abafazi abazibanga behlonela uThixo.” (1 Timoti 2:8-10) Xa siye kwiindibano ezinkulu eziqhutyelwa kumabala emidlalo avulekileyo, sinokunxiba ngesidima ngoxa sifake impahla ehambelana nemozulu. Kwakhona ukuhlonela kwethu iindibano ezinjalo kuya kusenza sikuphephe ukuhlafuna itshungama ebudeni bocwangciso. Ukunxiba nokuziphatha ngendlela efanelekileyo ezintlanganisweni kuyamzukisa uYehova uThixo esimnqulayo, kwakunye nabo sikhonza nabo.
Ihambo Efanele Abantu BakaThixo
10. Umpostile uPawulos wabonisa njani ukuba sifanele sibe nemilinganiselo ephakamileyo yokuziphatha xa siye kwiintlanganiso zamaKristu?
10 Kweyoku-1 kwabaseKorinte, isahluko 14, umpostile uPawulos wanikela isiluleko sobulumko ngendlela ezifanele ziqhutywe ngayo iintlanganiso zamaKristu. Waqukumbela ngokuthi: “Zonke izinto mazenzeke ngokundilisekileyo nangolungelelwano.” (1 Korinte 14:40) Iintlanganiso ziyinxalenye ebalulekileyo yebandla lamaKristu, ngoko xa siye kuzo sifanele siziphathe ngendlela efanele abantu bakaYehova.
11, 12. (a) Yintoni efanele ibethelelwe ezingqondweni zabantwana xa beye ezintlanganisweni? (b) Abantwana banokuluvakalisa njani ukholo lwabo ezintlanganisweni?
11 Abantwana, ngokukhethekileyo, bafanele bafundiswe indlela yokuziphatha ezintlanganisweni. Abazali abangamaKristu bafanele babachazele abantwana babo ukuba iHolo yoBukumkani nendawo ekuqhutyelwa kuyo iSifundo Sencwadi Sebandla asizondawo zokudlala. Ziindawo zokunqula uYehova nezokufundisisa iLizwi lakhe. UKumkani uSolomon osisilumko wabhala wathi: “Lulinde unyawo lwakho xa sukuba usiya endlwini yoThixo oyinyaniso; yaye sondela ukuze uve.” (INtshumayeli 5:1) UMoses wafundisa amaSirayeli ukuba ahlanganisane, abantu abadala “nabantwana.” Wathi: “Uze ubahlanganise abantu . . . ukuze baphulaphule nokuze bafunde, bamoyike uYehova uThixo wenu, bakunyamekele ukuwenza onke amazwi alo mthetho. Bafanele baphulaphule noonyana babo abangaziyo, bafunde ukumoyika uYehova.”—Duteronomi 31:12, 13.
12 Ngokufanayo namhlanje, abantwana baya ezintlanganisweni nabazali babo ngenjongo yokuba baphulaphule yaye bafunde. Xa bekwazi ukunikel’ ingqalelo yaye beqonda ezinye zeemfundiso zeBhayibhile ezisisiseko, abantwana banako ukwenza “uvumo lwasesidlangalaleni” lokholo lwabo ngokuthi banikele iimpendulo ezimfutshane. (Roma 10:10) Umntwana omncinane usenokuqala ngokuthetha amazwi ambalwa xa kubuzwa umbuzo awuqondayo. Ekuqaleni usenokuyifunda impendulo yakhe, kodwa ekuhambeni kwexesha usenokuzama ukuphendula ngamazwi akhe. Abantwana bayakuthanda ukuphendula yaye oku kuyingenelo kubo, kanti nabantu abadala bakuvuyela gqitha ukuva abantwana bevakalisa ukholo lwabo ngale ndlela. Ngokuqhelekileyo, abazali babamisela umzekelo abantwana ngokuthi nabo baphendule. Yaye ukuba kunokwenzeka, kuhle ukuba abantwana babe neBhayibhile, iculo, kunye nempapasho efundwayo. Bafanele bafunde ukuziphatha ngentlonelo ezo mpapasho. Konke oku kuya kubethelela ezingqondweni zabantwana ukuba iintlanganiso zethu zingcwele.
13. Sinqwenela ukuba bavakalelwe njani abo beza kwiintlanganiso zethu okokuqala?
13 Noko ke, asifuni ukuba iintlanganiso zethu zifane neecawa zeNgqobhoko. Iintshumayelo zecawa azibangeli mdla yaye zezohanahaniso, okanye ziba nengxolo ngathi kusemjuxuzweni. Sifuna iintlanganiso eziqhutyelwa kwiiHolo zoBukumkani zibangel’ umdla, kodwa zingade zifane neembutho zokuzonwabisa. Sihlanganisana ngenjongo yokunqula uYehova, ngoko iintlanganiso zethu zifanele zisoloko zindilisekile. Sinqwenela ukuba abantu abatyelela okokuqala baze babone indlela eziqhutywa ngayo iintlanganiso nendlela esiziphatha ngayo thina nabantwana bethu, bathi: “Ngokwenene uThixo uphakathi kwenu.”—1 Korinte 14:25.
Ukuhlanganisana Ngokusisigxina
14, 15. (a) Sinokukuphepha njani ‘ukungayikhathaleli indlu yoThixo wethu’? (b) Sele ezaliseka ngayiphi indlela uIsaya 66:23?
14 Njengoko kukhankanyiwe ngaphambili, uYehova uhlanganisa abantu bakhe aze abenze babe nemihlali ‘endlwini yakhe yomthandazo,’ itempile yakhe yokomoya. (Isaya 56:7) UNehemiya othembekileyo wakhumbuza amaYuda ukuba abonise intlonelo ngetempile yokoqobo ngokuthi anikele ngemali. Wathi: “Asifanele singayikhathaleli indlu yoThixo wethu.” (Nehemiya 10:39) Ngoko nathi asifanele singasikhathaleli isimemo sikaYehova sokumnqula ‘endlwini yakhe yomthandazo.’
15 Ebonisa ukubaluleka kokuhlanganisana rhoqo ukuze sinqule, uIsaya waprofeta wathi: “‘Ngokuqinisekileyo kuya kuthi ke ukususela ekuthwaseni kwenyanga ukusa ekuthwaseni kwenyanga nokususela kwisabatha ukusa kwisabatha inyama yonke ifike ukuze iqubude phambi kwam,’ utsho uYehova.” (Isaya 66:23) Oku kuyenzeka namhlanje. Veki nganye enyangeni, amaKristu azahluleleyo ayahlanganisana ukuze anqule uYehova. Ahlanganisana kwiintlanganiso zebandla nakubulungiseleli basentsimini. Ngaba ungomnye wabo beza rhoqo ‘ukuze baqubude phambi kukaYehova’?
16. Kutheni ukuya rhoqo ezintlanganisweni kufanele kube yinto esisigxina ebomini bethu?
16 UIsaya 66:23 uya kuzaliseka ngokupheleleyo kwihlabathi elitsha uYehova athembisa ngalo. Ngelo xesha, “inyama yonke,” ngengqiqo yokoqobo, iya ‘kuqubuda,’ okanye inqule uYehova iveki neveki kwanenyanga nenyanga kude kube ngonaphakade. Ekubeni ukuhlanganisana ukuze sinqule uYehova kuza kuba yinto esisigxina kwinkqubo entsha yezinto, ngaba asifanele siqale kwangoku ukuya rhoqo kwiintlanganiso ezingcwele?
17. Kutheni zibalulekile nje iintlanganiso “ngokungakumbi njengoko [sibona] ukuba imini iyasondela”?
17 Njengoko isiphelo sisondela, sifanele sizimisele ngakumbi kunangaphambili ukuya kwiintlanganiso zamaKristu zonqulo. Ngenxa yentlonelo esinayo ngobungcwele beentlanganiso, asivumeli umsebenzi wengqesho, umsebenzi wesikolo, okanye imfundo yesikolo yangokuhlwa ukuba isenze siphoswe ziintlanganiso zebandla. Ukuhlanganisana kwethu kuyasiqinisa elukholweni. Kwakhona kwenza ukuba sazane ngakumbi, sikhuthazane, yaye sivuselelane “eluthandweni nasemisebenzini emihle.” Kubaluleke kakhulu oku “ngokungakumbi njengoko [sibona] ukuba imini iyasondela.” (Hebhere 10:24, 25) Ngoko ngamana singabonisa intlonelo ngeentlanganiso ezingcwele ngokuthi siye rhoqo kuzo, sinxibe ngokundilisekileyo, yaye siziphathe ngendlela efanelekileyo. Ngaloo ndlela, sibonisa ukuba sinembono efana nekaYehova ngezinto ezingcwele.
Impinda
• Yintoni ebonisa ukuba iintlanganiso zonqulo zabantu bakaYehova zifanele zigqalwe njengezingcwele?
• Yintoni ebonisa ukuba iintlanganiso zethu zingcwele?
• Abantwana banokubonisa njani ukuba bayabuhlonela ubungcwele beentlanganiso?
• Kutheni sifanele siye rhoqo ezintlanganisweni?
[Imifanekiso ekwiphepha 28]
Iintlanganiso zokunqula uYehova zingcwele nokuba ziqhutyelwa phi
[Umfanekiso okwiphepha 31]
Abantwana beza ezintlanganisweni ukuze baphulaphule yaye bafunde