Xolela Ngokusuka Entliziyweni
“UBawo wasezulwini uya kuqhubana nani ngohlobo olufanayo ukuba anixoleli ngamnye umzalwana wakhe ngokusuka ezintliziyweni zenu.”—MATEYU 18:35.
1, 2. (a) Umoni owaziwayo walubonakalisa njani uxabiso lwakhe ngoYesu? (b) Yiyiphi ingongoma eyaphuhliswa nguYesu ngenxa yaloo nto?
KUSENOKWENZEKA ukuba wayengunongogo, ingengomntu onokulindela ukumbona ekhayeni lomntu ozondelele unqulo. Ukuba abanye babemangalisiwe kukumbona apho, babeseza kukhwankqiswa nangakumbi yinto ewayeza kuyenza. Waya kweyona ndoda inemilinganiselo ephakamileyo yokuziphatha waza wabonakalisa uxabiso analo ngemisebenzi yayo, wahlamba iinyawo zayo ngeenyembezi zakhe waza wazosula ngeenwele zakhe.
2 Loo ndoda, uYesu, ayizange imheshe okomshologu lo mfazi, “owayesaziwa esixekweni ukuba ungumoni.” Kodwa uSimon owayengumFarisi, nowayekwangumninimzi, wayexhalabele into yokuba ungumoni. UYesu waphendula ngokubalisa ngamadoda amabini awayenetyala kumbolekisi othile. Enye yayinetyala elikhulu—malunga nomvuzo weminyaka emibini yomntu osebenzayo. Enye yayityala isishumi saloo mali—umvuzo weenyanga ezingaphantsi kwezintathu. Xa omabini la madoda engazange akwazi ukuhlawula, umbolekisi “wawaxolela ngesisa omabini.” Kucacile ukuba, le ndoda eyayityala imali eninzi yayinesizathu esingakumbi sokusabela ngothando. Emva kokuchaza indlela isenzo saloo mfazi esasingena ngayo kulo mba, uYesu walek’ umsundulo ngalo mgaqo: “Lowo uxolelwe kancinane, uthanda kancinane.” Wandula ke wathi kulo mfazi: “Zixolelwe izono zakho.”—Luka 7:36-48.
3. Yintoni esifanele siyiqwalasele ngeziqu zethu?
3 Khawuzibuze ke ngoku, ‘Ukuba bendingulaa mfazi okanye ke ndikwimeko efanayo yaye ndenzelwe inceba, ngaba bendiya kuba ngqwabalala ndize ndingabaxoleli abanye?’ Kusenokwenzeka ukuba uphendula ngokuthi, ‘Ngokuqinisekileyo bendingayi kwenjenjalo!’ Kodwa ke, ngaba ngokwenene ucinga ukuba ungumntu otyekele ekuxoleleni? Ngaba ukuxolela kuyinto yakho? Ngaba udla ngokuxolela lula nje, kwaye ngaba abanye banokukuchaza njengomntu oxolelayo? Masikhe sikhangele isizathu sokuba sifanele sinikele ingqalelo engqalileyo size sizigocagoce kulo mba.
Siyakufuna Ukuxolelwa—Kwaye Siyaxolelwa
4. Sisiphi isibakala esifanele sisivume ngeziqu zethu?
4 Wazi kakuhle ukuba akufezekanga. Nokuba ubunokubuzwa, ubuya kuyivuma loo nto, mhlawumbi ukhumbule amazwi akweyoku-1 kaYohane 1:8 athi: “Ukuba senza ingxelo ethi: ‘Asinasono,’ siyazilahlekisa yaye inyaniso ayikho kuthi.” (Roma 3:23; 5:12) Kwabanye, ukuba nesono kusenokuzibonakalisa ngezono ezinzulu nezimbi kakhulu. Kodwa ke kwanokuba akukhumbuli usona ngolo hlobo, ngokuqinisekileyo zininzi izihlandlo neendlela oye awayifikelela ngazo imilinganiselo kaThixo—wona. Akunjalo?
5. Yintoni esifanele siyibulele kuThixo?
5 Ngenxa yoko, imeko yakho iyafana nje nechazwa ngumpostile uPawulos xa esithi: “Nakuba nanifile kwizigqitho zenu nakwimo yokungaluki kwenyama yenu, uThixo wanenza naphila ndawonye naye [uYesu]. Wasixolela ngobubele zonke izigqitho zethu.” (Kolose 2:13; Efese 2:1-3) Phawula ibinzana elithi ‘wasixolela zonke izigqitho zethu.’ Oko kuquka izinto ezininzi. Ngamnye kuthi unesizathu esivakalayo sokukhunga ngendlela uDavide awenza ngayo: “Ngenxa yegama lakho, Yehova, xolela ubugwenxa bam, ngokuba bukhulu bona.” (Akekeliswe sithi.)—INdumiso 25:11.
6. Yintoni esinokuqiniseka ngayo ngokuphathelele uYehova nokuxolela?
6 Wena—okanye nabani na kuthi—unokwenza njani ukuze axolelwe? Undoqo kukuba uYehova uThixo utyekele ekuxoleleni. Ukuxolela kuluphawu lobuntu bakhe. (Eksodus 34:6, 7; INdumiso 86:5) Ngesizathu esiqondakalayo, uThixo ulindele ukuba sisondele kuye ngomthandazo size sitarhuzise kuye, simcele ukuba asixolele. (2 Kronike 6:21; INdumiso 103:3, 10, 14) Kwaye uye walungiselela isizinzi esingokwasemthethweni soko kuxolelwa—idini lentlawulelo likaYesu.—Roma 3:24; 1 Petros 1:18, 19; 1 Yohane 4:9, 14.
7. Kungayiphi indlela ofanele ufune ukuxelisa uYehova ngayo?
7 Umzekelo kaThixo wokulungela ukuxolela ufanele ukubonise indlela omele ubaphathe ngayo abanye abantu. UPawulos wanikela ingqalelo kule nkalo, ebhala: “Yibani nobubele omnye komnye, ninemfesane yofefe, nixolelana ngesisa kanye njengokuba noThixo wanixolelayo ngesisa ngaye uKristu.” (Efese 4:32) Alithandabuzeki elokuba ingongoma eyayiveliswa nguPawulos yayiquka ukufunda kumzekelo kaThixo, kuba indinyana elandelayo ihlabela mgama isithi: “Yibani ngabaxelisa uThixo, njengabantwana abaziintanda.” (Efese 5:1) Uyayibona phofu indlela ehamba ngayo le nto? UYehova uThixo ukuxolele, ngoko—uPawulos uqiqa ngelithi—nawe unyanzelekile ukuba uxelise Yena uze ube ‘nemfesane yofefe, ubaxolela ngesisa’ abanye. Kodwa khawuzibuze, ‘Ngaba mna ndiyayenza loo nto? Ukuba ngokwemvelo akuyonto yam ukuxolela, ngaba ndisebenzela ukuyiphucula loo nkalo, ndizama ngandlela zonke ukuxelisa uThixo?’
Kufuneka Sisebenzele Ukuxolela
8. Yintoni esifanele siyiqonde ngokuphathelele abo bayila ibandla esikulo?
8 Bekuya kuba yinto entle ukucinga ukuba kwibandla lamaKristu, kubakho izihlandlo ezimbalwa apho kufuneka sithabathe ikhondo lobuthixo lokuxolela. Kodwa ke kwenzeka okuchaseneyo noko. Kuyavunywa ukuba, abazalwana noodade wethu abangamaKristu bazama ngandlela zonke ukulandela umzekelo kaYesu wothando. (Yohane 13:35; 15:12, 13; Galati 6:2) Kudala bezabalazela, ibe basazama nanamhl’ oku, ukulahla indlela yeli hlabathi lingendawo yokucinga, yokuthetha neyokwenza izinto. Bazama ngokwenene ukubonakalisa ubuntu obutsha. (Kolose 3:9, 10) Sekunjalo, asikwazi kusibetha ngoyaba isibakala sokuba ibandla elisehlabathini lonke, kwanebandla ngalinye elisekuhlaleni, liyilwe ngabantu abangafezekanga. Ewe babhetele kunokuba babenjalo ngaphambili, kodwa ke abakafezeki.
9, 10. Kutheni singafanele simangaliswe xa kuvela iingxaki phakathi kwabazalwana?
9 UThixo usichazela kakuhle eBhayibhileni ukuba simele silindele izenzo zokungafezeki kubazalwana noodade wethu abasebandleni. Ngokomzekelo, yiva amazwi kaPawulos abhalwe kwayebaseKolose 3:13 athi: “Qhubekani ninyamezelana yaye nixolelana ngesisa ukuba nabani na unonobangela wokukhalazela omnye. Kwananjengoko noYehova wanixolela ngesisa, yenzani njalo nani.”
10 Apha iBhayibhile isikhumbuza ngokunxibelelana okukhoyo phakathi kokuxolelwa kwethu nguThixo nembopheleleko yethu yokuxolela abanye. Kutheni kulucelomngeni nje oku? Kungenxa yokuba uPawulos wavuma ukuba ubani usenokuba “nonobangela wokukhalazela omnye.” Wayesazi ukuba oonobangela abanjalo babeya kubakho. Basenokuba babekho ngenkulungwane yokuqala, kwanaphakathi ‘kwabangcwele’ abangamaKristu, ‘ababenethemba abalibekelweyo emazulwini.’ (Kolose 1:2, 5) Ngoko ngaba sicinga ukuba akunakwenzeka oko namhlanje ekubeni inkoliso yamaKristu okwenyaniso ingenabo ubungqina bomoya bokuba ‘ingabanyulwa bakaThixo, abangcwele nabathandwayo’? (Kolose 3:12) Kungoko singafanele sigqibe kwelokuba kukho nto ithile engahambi kakuhle ebandleni lethu xa kukho oonobangela bokukhalaza—ukukhathazeka ngenxa yokoniwa okanye ngenxa yokuvakalelwa kukuba soniwe.
11. Yintoni umfundi uYakobi awasilumkisa ngayo?
11 Amazwi kaYakobi, umninawa kaYesu ngonina, abonisa ukuba simele siyilindele into yokuba ubuncinane maxa wambi sinokuhlangabezana neemeko ezifuna sibaxolele abazalwana bethu. “Ngubani na osisilumko noqondayo phakathi kwenu? Makayibonise imisebenzi yakhe ngehambo yakhe entle enobulali bobulumko. Kodwa ukuba ninekhwele elikrakra nokusukuzana ezintliziyweni zenu, musani ukuzigwagwisa nokuxoka nxamnye nenyaniso.” (Yakobi 3:13, 14) Ngaba linokubakho ‘ikhwele elikrakra nokusukuzana’ ezintliziyweni zamaKristu okwenyaniso? Kunjalo kanye, amazwi kaYakobi achaza kakuhle ukuba yayisenzeka loo nto kwibandla lenkulungwane yokuqala ibe iza kwenzeka ke nanamhlanje.
12. Yiyiphi ingxaki eyavela kwibandla lamandulo laseFilipi?
12 Umzekelo waloo nto wawubandakanya amaKristu amabini athanjisiweyo nawayesaziwa ngokuzibhokoxa esebenza ngaxhathalinye noPawulos. Usenokuba uyakhumbula ufunda ngoWodiya noSintike, ababekwibandla laseFilipi. Nangona ingasityebiseli ngeenkcukacha, eyabaseFilipi 4:2, 3 ibonisa ukuba kwakukho ingxaki phakathi kwabo. Ngaba yayiqalise ngokuthi omnye athethe amazwi angawacinganga nahlabayo, ngesenzo esagqalwa njengokwenziwa intlekisa kwesalamane, okanye ke ngomona obangelwa lukhuphiswano? Enoba yayisukele phi na le nto, yaya isiba mandundu kangangokuba yafikelela ezindlebeni zikaPawulos ekude lee eRoma. Kusenokwenzeka ukuba aba dade babini bokomoya babengasathethisani, nto leyo eyabangela ukuba ngamnye acezele kude komnye ezintlanganisweni okanye athethe kakubi ngomnye xa ekunye nabahlobo bakhe.
13. Yintoni ekusenokwenzeka ukuba yasebenza kuWodiya noSintike, kwaye isifundisa ntoni loo nto?
13 Ngaba akukaze uve ngento enjalo, ayifani nento ekhe yenzeka kwabanye abakwibandla okulo okanye nawe owawubandakanyeke kuyo? Kusenokwenzeka ukuba ikho ngoku sithethayo ingxaki enjalo. Yintoni esinokuyenza? Kulaa meko yamandulo, uPawulos wabongoza abo dade bazahluleleyo babini ukuba “babe nengqondo efanayo eNkosini.” Kusenokwenzeka ukuba bavuma ukuwuxubusha lo mbandela, bakhupha iimbilini zabo, bobabini bebonisa ukuba bakulungele ukuxolela, baza ke baxelisa isimo sengqondo sikaYehova sokuxolela. Asinaso isizathu sokucinga ukuba uWodiya noSintike abazange baphumelele, ibe nathi sinokuphumelela. Eso simo sengqondo sokuxolela sinokusetyenziswa ngempumelelo nanamhlanje.
Dala Uxolo—Xolela
14. Kutheni kudla ngokwenzeka yaye kuyeyona nto ilungileyo ukuziyeka zidlule iingxabano?
14 Yintoni kanye kanye efunekayo ukuze uxolele xa unengxaki nomnye umKristu? Ngeliphandle nje, akukho nanye elula kwiindlela onokuzisebenzisa, kodwa ke iBhayibhile inikela imizekelo eluncedo namacebiso asengqiqweni. Eyona nto inconyelwa kakhulu—nangona kungelula ukuyamkela nokuyenza—kukuyilibala nje loo nto, uyiyeke idlule. Xa kuvela ingxaki, njengakwimeko kaWodiya noSintike, umntu ngamnye udla ngokuvakalelwa kukuba ngomnye owonileyo okanye ongoyena unengxaki. Ngoko ke, xa ukwimeko enjalo, usenokucinga ukuba ngomnye umKristu omele abekwe ityala kakhulu okanye odale umonakalo ongakumbi. Noko ke, ngaba akunakuyiyeka yonke nje loo nto uze umxolele? Yiqonde kaloku into yokuba ukuba, kwaye phawula ukuba sithi ukuba, le ngxaki ubukhulu becala okanye iyonke nje ibangelwe ngomnye umKristu, nguwe okwisikhundla sokubek’ ingca kuloo nto uze uyiyeke idlule.
15, 16. (a) UMika wamchaza njani uYehova? (b) Kuthetha ntoni ‘ukudlula esikreqweni’ kukaThixo?
15 Masingaze nje silibale ukuba uThixo ungumzekelo esifanele siwulandele kumba wokuxolela. (Efese 4:32–5:1) Echaza ngomzekelo Wakhe wokubuyeka budlule ubugwenxa, umprofeti uMika wabhala: “Ngubani na onguThixo onjengawe, oxolela ubugwenxa, adlule esikreqweni samasalela elifa lakhe? Akawugcini unaphakade umsindo wakhe; kuba yena uthanda ukwenza inceba.”—Mika 7:18.
16 Xa ichaza uYehova ‘njengodlulayo esikreqweni,’ iBhayibhile ayithi akazikhumbuli izono, mhlawumbi unesifo sokuzilibala izinto ezithile. Masenze umzekelo ngemeko kaSamson nekaDavide, bobabini ababenze ubugwenxa obunzulu. UThixo wakwazi ukuzikhumbula izono zabo emva kweminyaka zenzekile; kwaye sizazi nje ezinye zezono zabo kungenxa yokuba uYehova eyalele ukuba zibhalwe eBhayibhileni. Sekunjalo, uThixo wethu oxolelayo wabenzela inceba bobabini, ebachaza kuthi njengemizekelo yokholo esimele siyixelise.—Hebhere 11:32; 12:1.
17. (a) Sisiphi isimo sengqondo esinokusinceda sidlule kwiimpazamo, okanye kwizinto ezisicaphukisayo, ezenziwa ngabanye? (b) Xa sizabalazela ukwenjenjalo, siya kuba simxelisa njani uYehova? (Bona umbhalo osemazantsi.)
17 Ewe, uYehova wakwazi ‘ukuzikhwelelisa’a izono, kanye njengokuba uDavide wayembongoze ngokuphindaphindiweyo ukuba enjenjalo. (2 Samuweli 12:13; 24:10) Ngaba sinako ukumxelisa uThixo kulo mba, sikulungele ukuzikhwelelisa izinto ezibonisa indelelo nezicaphukisayo ezenziwa ngabo sikhonza nabo ngenxa yokuba bengabantu abangafezekanga? Ngokomzekelo, masithi ukhwele inqwelo-moya ebaleka kwindlela yayo xa iza kusuka. Xa ukhangela ngefestile, kufutshane nendlela ubona ibhinqa olaziyo lisenza isimbo esibonisa indelelo sokukunyonyozela. Uyazi ukuba limele ukuba liyacaphuka yaye linyonyozela wena. Okanye ke lisenokuba alicingi ngawe konke konke. Hayi ke, kuthi njengoko inqwelo-moya ijika yaye isiya iphakama, udlula ngentla kwelo bhinqa, ngoku elisele libonakala lilisuntswana nje. Kwisithuba esingangeyure sele uhambe amakhulu ekhilomitha, kwaye esiya simbo sicaphukisayo selaa bhinqa usishiye kude lee. Ngendlela efanayo, kumaxesha amaninzi kuya kusinceda ukuba sixolele ukuba sizabalazela ukufana noYehova size ngobulumko sizikhwelelise ezo zinto zisicaphukisayo. (IMizekeliso 19:11) Ngaba eso senzo sendelelo asiyi kubonakala singunobenani nje kwiminyaka elishumi ukususela ngoku okanye kwiminyaka engamakhulu amabini ukusa kwiWaka Leminyaka? Kutheni ungasuki usikhwelelise nje?
18. Xa kubonakala kunzima ukuba siyidlule into esicaphukisileyo, liliphi icebiso esinokulisebenzisa?
18 Noko ke, mhlawumbi ngesinye isihlandlo uye wathandaza ngaloo mbandela waza wazama ukuxolela, kodwa hay’bo akuvumi. Umele uthini ke xa kunjalo? UYesu wabongoza ukuba siye kuloo mntu size sizame ukuyizinzisa ngasese loo mbambano ukuze kubekho uxolo. “Ukuba, ngoko, uzisa isipho sakho esibingelelweni yaye ulapho ukhumbule ukuba umzalwana wakho unento nxamnye nawe, sishiye isipho sakho apho phambi kwesibingelelo, uze umke; yenza uxolo kuqala nomzalwana wakho, yaye wandule ke, wakubuya, unikele isipho sakho.”—Mateyu 5:23, 24.
19. Sisiphi isimo sengqondo esifanele sibe naso nesifanele sisiphephe xa sifuna ukudala uxolo nomzalwana wethu?
19 UYesu akazange athi yiya kumzalwana wakho ngenjongo yokumbonisa ukuba wena ulungile yaye oyena mntu ungalunganga nguye. Okunene mhlawumbi nguye owonileyo. Kunqabile ukuba kuthi kanti bekungekho mntu wonileyo macala. Phofu ke, usukelo lwakho alumele lube kukwenza loo mntu avume, ngokungathi kunjalo, azithobe. Ukuba uya unaloo nto engqondweni yakho xa nixubusha loo nto, maninzi gqitha amathuba okuba ungaphumeleli. Kananjalo akuyomfuneko nokuba usukelo lwakho ibe kukuphinda zonke iinkcukacha zaloo nto ikucaphukisileyo okanye oyigqale njengecaphukisayo. Emva kokuba niyixubushe ngomoya ozolileyo wothando lwamaKristu naza nafumanisa ukuba loo ngxaki idalwe kukungaqondani okuthile, nobabini ninokuzama ukuyilungisa loo ngxaki. Kodwa kwanokuba niyayixubusha loo nto kodwa ningade nifikelele kwisivumelwano ngokupheleleyo, ngaba kusoloko kuyimfuneko ukuba nide nivumelane ngokupheleleyo? Ngaba bekungayi kuba bhetele ukuba ubuncinane nobabini nivumelane ukuba ngamnye wenu ufuna ukukhonza uThixo oxolelayo? Xa nijamelene nemeko enjalo, kusenokuba lula ukuba ngamnye athethe la mazwi ngokusuka entliziyweni, “Ndilusizi kuba ukungafezeki kwethu kuye kwaphumela kule ngxabano. Bendicela ukuba sibek’ ingca nje kuyo yonke le nto.”
20. Yintoni esinokuyifunda kumzekelo wabapostile?
20 Khumbula ukuba abapostile babexabana nabo, njengaxa abanye babefuna uzuko olungakumbi. (Marko 10:35-39; Luka 9:46; 22:24-26) Loo nto yadala ukuba kubekho ukujongana ngezikhondo zamehlo, mhlawumbi kwakho nabeva ubuhlungu, okanye abanye bada bakhubeka. Kodwa bakwazi ukuzikhwelelisa ezo ngxabano baza baqhubeka besebenza kunye. Kamva omnye wabo wabhala esithi: “Lowo ubeya kuthanda ubomi nokubona imihla elungileyo, makathintele ulwimi lwakhe koko kubi nemilebe yakhe ekuthetheni inkohliso, kodwa makakhwebuke koko kubi aze enze oko kulungileyo; makafune uxolo aze alusukele.”—1 Petros 3:10, 11.
21. Liliphi icebiso elibalulekileyo elanikelwa nguYesu ngokuphathelele ukuxolela?
21 Ngaphambilana besikhe sathetha ngenqanaba elithile lomjikelo: UThixo uxolele izono ezininzi esiye sazenza kwixesha elidluleyo, ngoko nathi sifanele simxelise size sibaxolele abazalwana bethu. (INdumiso 103:12; Isaya 43:25) Kodwa ke kusekho elinye inqanaba kulo mjikelo. Emva kokumisela umthandazo ongumzekelo, uYesu wathi: “Ukuba niyabaxolela abantu izigqitho zabo, noYihlo wasemazulwini uya kunixolela.” Kwisithuba esingangonyaka emva koko, wayivelisa ngolunye uhlobo le ngongoma, efundisa abafundi bakhe indlela yokuthandaza: “Usixolele amatyala ethu, njengoko nathi sibaxolele abanamatyala kuthi.” (Mateyu 6:12, 14; Luka 11:4) Wandula ke, kwiintsuku ezimbalwa ngaphambi kokuba afe, uYesu wongezelela esithi: “Xa nimile nithandaza, xolelani nakuphi na eninako nxamnye naye nabani na; ukuze noYihlo osemazulwini anixolele izigqitho zenu.”—Marko 11:25.
22, 23. Ukukulungela kwethu ukuxolela kunokulichaphazela njani ikamva lethu?
22 Ewe, ithemba lethu lokuqhubeka sixolelwa nguThixo lixhomekeke ngokuyintloko ekukulungeleni kwethu ukubaxolela abazalwana bethu. Xa kuvela imbambano ethile phakathi kwamaKristu, zibuze, ‘Ngaba ukuxolelwa nguThixo akubalulekanga ngaphezulu lee kunokuzama ukubonisa umzalwana okanye udade wethu ukuba wenze into ephosakeleyo ngesenzo esibonakalisa indelelo, unobenani nje ocaphukisayo, okanye into nje entama ukungafezeki kwabantu?’ Impendulo yaziwa nguwe.
23 Noko ke, kuthekani ukuba le ngxaki ingaphezulu kunento nje ecaphukisayo okanye ingxaki encinane? Yaye kuxa kutheni apho kufanele kulandelwe isiluleko sikaYesu esibhalwe kuMateyu 18:15-18? Lo mba siza kuwuhla amahlongwana kwixa elizayo.
[Imibhalo esemazantsi]
a Omnye umphengululi uthi isikweko sesiHebhere esisetyenziswe kuMika 7:18 “sithatyathwe kwimeko yomhambi odlula engayijonganga kwaukuyijonga into anganqweneli kunikela ingqalelo kuyo. Ingcamango esiyidluliselayo asikokuba uThixo akasiboni isono, okanye usigqala njengento engabalulekanga kuyaphi okanye engabalulekanga nje kwaphela, kodwa sithetha ukuba kwiimeko ezithile akabeki umnwe kuso ngenjongo yokuba akhuphe isohlwayo ngenxa yaso; ithetha ukuba akohlwayi, kodwa uyaxolela.”—ABagwebi 3:26; 1 Samuweli 16:8.
Ngaba Uyakhumbula?
◻ UYehova usibekela njani umzekelo esimele siwulandele xa kufikwa kumba wokuxolela?
◻ Yintoni esimele siyikhumbule ngabo bakwibandla esikulo?
◻ Kwiimeko ezininzi, yintoni esifanele sikwazi ukuyenza xa sidelelwa okanye sicatshukiswa?
◻ Xa kuyimfuneko, yintoni esinokuyenza ukuze sidale uxolo nomzalwana wethu?
[Umfanekiso okwiphepha 15]
Xa uxabana nomnye umKristu, zama ukuyiyeka idlule loo nto; ekuhambeni kwexesha iza kuya isiba ngunobenani nje loo nto