Izicaka Zolungiselelo Zinikela Inkonzo Exabisekileyo

UMPOSTILE UPAWULOS wabhalela ibandla laseFilipi esithi: “UPawulos noTimoti, amakhoboka kaKristu Yesu, babhalela bonke abo bangcwele abaseFilipi abamanyene noKristu Yesu, kunye nabadala nezicaka zolungiselelo.” (Fil. 1:1) Phawula ukuba wakhankanya izicaka zolungiselelo kumbuliso wakhe. Kuyabonakala ukuba kudala la madoda ayephumeza indima ebalulekileyo ekuncediseni abadala ebandleni. Kunjalo ke nakumhla wethu. Izicaka zolungiselelo zincedisa abadala ngezinto eziliqela, kwaye zincedisa ekubeni kubekho ucwangco ebandleni.

² Ngaba uyazazi izicaka zolungiselelo ezisebandleni lakho? Ngaba uyayazi imisebenzi emininzi eyenziwa zizo ukuze kuncedwe wena kunye nalo lonke ibandla? Ngokuqinisekileyo imisebenzi yala madoda iyaxatyiswa nguYehova. UPawulos wathi: “Amadoda awenza kakuhle umsebenzi wawo azenzela igama elihle, atsho athethe ngokukhululekileyo xa ethetha ngokholo lwawo kuKristu Yesu.”—1 Tim. 3:13.

IIMFANELEKO ZEZICAKA ZOLUNGISELELO EZISEZIBHALWENI

³ Kulindeleke ukuba izicaka zolungiselelo ziphile ngendlela efanele amaKristu, zibe ngamadoda anokuthenjwa, kwaye zikwazi ukuwenza kakuhle umsebenzi wazo. Oku kucaca kumazwi kaPawulos akwincwadi yakhe eyayisiya kuTimoti ethetha ngeemfaneleko zezicaka zolungiselelo esithi: “Nezicaka zolungiselelo zifanele zizimisele, zingabi namaqhinga, zingaseli iwayini eninzi, zinganyoluki, zibambelele kwimfihlelo engcwele yokholo zinesazela esicocekileyo. Ngaphezu koko, mazihlolwe kuqala ukuba ziyafaneleka na, yaye ukuba azinakumangalelwa nganto, zingaba zizicaka zolungiselelo. Isicaka solungiselelo sifanele sibe nomfazi omnye, siyikhokele kakuhle intsapho yaso, ingakumbi abantwana baso.” (1 Tim. 3:8-10, 12) Xa zibambelela kwimilinganiselo ephakamileyo eziyibekelweyo, zikhusela ibandla lingagxekwa ngokuphathelele amadoda anikwe iimbopheleleko ezikhethekileyo.

⁴ Enoba ziselula okanye sele zikhulile, nyanga nganye izicaka zolungiselelo ziyashumayela. NjengoYesu, nazo zizimisele entsimini. Ngaloo ndlela, zibonisa umdla uYehova anawo wokuba abantu basindiswe.​—Isa. 9:7.

⁵ Izicaka zolungiselelo zingumzekelo kwindlela yokunxiba, yokuzilungisa, yokuthetha, yokucinga neyokuziphatha. Ziphilile engqondweni, nto leyo ebangela ukuba zihlonitshwe ngabanye. Ukongezelela koko, ziyabuxabisa ubuhlobo bazo noYehova kunye nemisebenzi yebandla.​—Tito 2:2, 6-8.

⁶ La ngamadoda aye ‘ahlolwa ukuba ayafaneleka na.’ Kwanangaphambi kokuba amiselwe, aye abonisa ukuba azinikele ngokwenene. Aye abonakalisa ukuba abeka uBukumkani kuqala ebomini bawo aza azimisela ukwenza imisebenzi yebandla. Ngokwenene ayimizekelo enokuxeliswa ngabanye ebandleni.​—1 Tim. 3:10.

IMISEBENZI YEZICAKA ZOLUNGISELELO

⁷ Izicaka zolungiselelo zenza imisebenzi eyahlukahlukeneyo ukuze kuncedwe abazalwana noodade. Xa zisenza njalo, zincedisa abadala ukuze bona bakwazi ukunyamekela umsebenzi wokufundisa nokwalusa. Xa iqumrhu labadala linika izicaka zolungiselelo imisebenzi, lijonga into isicaka ngasinye esinokukwazi ukuyenza neemfuno zebandla.

⁸ Makhe sijonge eminye yemisebenzi eziyenzayo: Esinye isicaka solungiselelo sinokucelwa ukuba sinyamekele iincwadi zebandla, ukuze kube lula ukuba abantu ebandleni bafumane iincwadi abaza kuzifunda nabaza kuzisebenzisa entsimini. Ezinye zicelwa ukuba zigcine iingxelo, njengeengxelo zemali yebandla okanye ezentsimi. Ezinye zicelwa ukuba zijongane nemibhobho yesandisi-lizwi, zisebenzise izixhobo zokwandisa ilizwi, zibe ngabalindi, zize zincede abadala nangezinye iindlela. Mninzi umsebenzi omele wenziwe ukuze kugcinwe iHolo YoBukumkani isemgangathweni kwaye icocekile, ngoko idla ngokuba zizicaka zolungiselelo ezicelwayo ukuba zincede ekwenzeni le misebenzi.

⁹ Kwamanye amabandla, kusenokubakho izicaka zolungiselelo ezaneleyo ukuze umsebenzi ngamnye wenziwe sisicaka solungiselelo esithile. Kodwa ke kwamanye isicaka solungiselelo esinye sisenokwenza imisebenzi eliqela. Kwezinye iimeko, kuyanceda ukuba nabantu abaninzi abenza umsebenzi othile. Ukuba azanelanga izicaka zolungiselelo eziza kwenza le misebenzi, iqumrhu labadala lisenokulungiselela ukuba kubekho abazalwana ababhaptiziweyo abangumzekelo abaza kwenza eminye yale misebenzi ibalulekileyo. Ngaloo ndlela, baza kufumana amava aza kubanceda xa nabo bezizicaka zolungiselelo. Ukuba abazalwana bambalwa, kunokucelwa oodade abangumzekelo bancedise kwizinto ezithile, nangona bona bengenakumiselwa njengezicaka zolungiselelo. Umntu ongumzekelo ngumntu oziphethe nokhonza ngendlela enokuxeliswa ngabantu. Umisela abanye umzekelo omhle ngokubakho kwiintlanganiso nasentsimini, ngobomi bakhe bentsapho, ngendlela azonwabisa ngayo, ngesinxibo nendlela azilungisa ngayo nangezinye iindlela.

¹⁰ Kumabandla anabadala abambalwa, kunokucelwa izicaka zolungiselelo ezifanelekayo ukuba zihlole umntu oza kubhaptizwa kwimibuzo yeemfundiso zeBhayibhile. Le mibuzo ifumaneka kwiSihlomelo, “iCandelo 1—Izinto Ezikholelwa NgamaKristu.” Ekubeni “iCandelo 2—Indlela Aphila Ngayo AmaKristu” lithetha ngemibandela yomntu eyimfihlo, lona limele lixutyushwe ngumdala.

¹¹ Ngamanye amaxesha, ukuba linesizathu esivakalayo, iqumrhu labadala linokukufumanisa kuluncedo ukutshintsha umsebenzi owenziwa sisicaka solungiselelo liwunike esinye. Sekunjalo, kuluncedo kakhulu ukunika abazalwana umsebenzi omnye kangangexesha elithile ukuze baqhelane nawo yaye bawenze kakuhle.

¹² Kuxhomekeka kwiimeko zasekuhlaleni, kusenokubakho eminye imisebenzi enikwa izicaka zolungiselelo ezenza izinto ngendlela eyenza ‘bonke abantu babone ukuba zihambela phambili.’ (1 Tim. 4:15) Ukuba akukho badala baneleyo, izicaka zolungiselelo zinokucelwa ukuba zincedise umveleli weqela okanye, kwezinye iimeko, zibe zizicaka zamaqela, zisebenze phantsi kweliso labadala. Zinokunikwa iintetho ezithile kwiNtlanganiso Yobomi BamaKristu, ziqhube iSifundo SeBhayibhile Sebandla zize zinikele neentetho zesidlangalala. Izicaka zolungiselelo zinokunikwa neminye imisebenzi xa kukho imfuneko ekhethekileyo naxa zifaneleka. (1 Pet. 4:10) Ukuze zincedise abadala, izicaka zolungiselelo zifanele zizimisele kwimisebenzi yazo.

¹³ Nangona umsebenzi wazo wahlukile kowabadala, nawo uyinxalenye yenkonzo engcwele enikelwa kuThixo kwaye ubalulekile ukuze ibandla lisebenze ngendlela elungeleleneyo. Ethubeni, xa izicaka zolungiselelo ziyenza kakuhle imisebenzi yazo kwaye zifaneleka ukuba zikhonze njengabalusi nabafundisi, zisenokunconyelwa njengabadala ebandleni.

¹⁴ Ukuba ungumzalwana oselula okanye osandokubhaptizwa, ngaba uzimisele ukuba sisicaka solungiselelo? (1 Tim. 3:1) Njengoko kukho abantu abaninzi abangena enyanisweni nyaka ngamnye, kufuneka amadoda anokholo aza kunyamekela amabandla. Bonisa ukuba uzimisele ukusetyenziswa ngokuba nomnqweno wokunceda abanye. Enye indlela yokwenza oku kukucinga ngomzekelo omhle kaYesu. (Mat. 20:28; Yoh. 4:6, 7; 13:4, 5) Umnqweno wakho uza kukhula njengoko uvuyiswa kukupha abanye. (IZe. 20:35) Ngoko ke, yiba livolontiya lokunceda abanye, lokunceda ekunyamekeleni iHolo YoBukumkani okanye lokunikela iintetho kwiNtlanganiso Yobomi BamaKristu. Ukuzimisela ukusetyenziswa kuquka ukuphucula iimpawu zamaKristu ngokuba nocwangciso lokwenza ufundisiso lobuqu. (INdu. 1:1, 2; Gal. 5:22, 23) Ukongezelela, umzalwana ozimisele ukusetyenziswa ubonisa ukuthembeka nokunyaniseka xa enikwe umsebenzi ebandleni.​—1 Kor. 4:2.

¹⁵ Izicaka zolungiselelo zimiselwa ngomoya oyingcwele ukuze kuncedakale ibandla. Ibandla linokubonisa indlela elikuxabisa ngayo ukusebenza nzima kwezicaka zolungiselelo ngokusebenzisana nazo xa zisenza imisebenzi yazo. Xa lisenza njalo, libonisa ukuba liyalixabisa ilungiselelo likaYehova lokugcina ibandla lilungelelene.—Gal. 6:10.