Imbono YeBhayibhile

Indlela Yokuhlangabezana Nokuphelelwa Lithemba

UKUPHELELWA lithemba kuqhelekile ebantwini, ubuncinane ukusa kumkhamo othile. Noko ke, kwabanye iimvakalelo zokuphelelwa lithemba ziba buhlungu de bakhethe ukufa kunokuphila.

IBhayibhile ibonisa ukuba kwanabakhonzi abathembekileyo bakaThixo bayachatshazelwa ziingxaki namaxhala abangela ukuphelelwa lithemba. Ngokomzekelo, khawuqwalasele uEliya noYobhi—bobabini ababenandipha ulwalamano oluhle noThixo. Emva kokubaleka nobomi bakhe kuKumkanikazi ongendawo uIzebhele, uEliya “wacela [kuYehova] ukuba umphefumlo wakhe ufe.” (1 Kumkani 19:1-4) Indoda elilungisa uYobhi yafumana uthotho lweentlekele, kuquka isifo esilizothe ngokugqithiseleyo nokufa kwabantwana bakhe abalishumi. (Yobhi 1:13-19; 2:7, 8) Ukuphelelwa kwakhe lithemba kwabangela ukuba athi: “Bekuya kulunga ukufa kunako konke ukubandezeleka kwam.” (Yobhi 7:15, The New English Bible) Kucacile ukuba, aye anxunguphala ngokugqithiseleyo la madoda athembekileyo kaThixo.

Kwabanye namhlanje, ukuphelelwa lithemba kusenokubangelwa yimiphumo ebuhlungu yokwaluphala, ukufelwa liqabane, okanye iingxaki ezinzulu zemali. Abanye bafumanisa ukuba uxinezeleko olungayekeleliyo, imiphumo yokuziva benzakele, okanye iingxaki zentsapho zibenza babe ngathi bebedukada kwisizikithi solwandle, apho iliza ngalinye litsho kube nzima ukuba bafikelele elunxwemeni. Enye indoda yathi: “Uziva ungaxabisekanga—ngokungathi akukho bani uya kukukhumbula xa ungasekho. Kukho amaxesha apho kunganyamezelekiyo ukuziva ulilolo.”

Kwiinkalo ezithile iimeko ziye ziphucule, zize ziphelise olu xinezeleko. Kodwa kuthekani ukuba iimeko zethu aziyi kuguquka? IBhayibhile inokusinceda njani simelane nokuphelelwa lithemba?

IBhayibhile Inokusinceda

UYehova wayenamandla okubahlaziya uEliya noYobhi kwiinzingo zabo. (1 Kumkani 19:10-12; Yobhi 42:1-6) Hayi indlela okusithuthuzela ngayo namhlanje ukuqonda oko! IBhayibhile ithi: “UThixo uyindawo yokusabela namandla kuthi, uncedo olufumaneka ngokukhawuleza ekubandezelekeni.” (INdumiso 46:1; 55:22) Nangona kusenokubonakala ngathi iimvakalelo zokuphelelwa lithemba ziyasongamela, uYehova uthembisa ukuba uza kusibamba nkqi ngesandla sakhe sasekunene sobulungisa. (Isaya 41:10) Sinokuzenza njani silufumane olu ncedo?

IBhayibhile icacisa ukuba ngomthandazo “uxolo lukaThixo olungaphaya kokuqonda luya kuzilinda iintliziyo [zethu] namandla [ethu] engqondo ngoKristu Yesu.” (Filipi 4:6, 7) Ngenxa yokuxinezeleka sisenokungayiboni indlela yokuphuma kwingxaki esikuyo. Noko ke, ukuba ‘siyazingisa emthandazweni’ uYehova unokuzilinda iintliziyo namandla ethu, esinika amandla esiwafunayo ukuze sinyamezele.—Roma 12:12; Isaya 40:28-31; 2 Korinte 1:3, 4; Filipi 4:13.

Siya kungenelwa ngokuthetha ngokungqalileyo kwimithandazo yethu. Nangona kusenokuba nzima ukuvakalisa oko sikucingayo, sifanele sizive sikhululekile ukuthetha noYehova ngendlela esivakalelwa ngayo noko sikubona njengonobangela waloo ngxaki. Kufuneka simcele asiphe amandla okusixhasa ukutyhubela usuku ngalunye. Sinesi siqinisekiso: “[UYehova] uya kukwenza oko kunqwenelwa ngabo bamoyikayo, nokukhalela kwabo uncedo uya kukuva, yaye uya kubasindisa.”—INdumiso 145:19.

Ukongezelela kumthandazo, sifanele sikuphephe ukuzahlula. (IMizekeliso 18:1) Abanye baye bafumana amandla ngokunceda abanye. (IMizekeliso 19:17; Luka 6:38) Khawucinge ngebhinqa elinguMaria,a elalingaphelelanga nje ekulweni nomhlaza kuphela kodwa elalahlekelwa ngamalungu asibhozo entsapho ngonyaka. UMaria wagqiba ekubeni aphakame ebhedini abuyele koko wayekade ekwenza. Phantse yonk’ imihla wayehamba aye kufundisa abanye ngeBhayibhile, yaye wayesiya rhoqo kwiintlanganiso zamaKristu. Xa ebuyela ekhaya, iimvakalelo zokudandatheka zikaMaria zazibuya ngamandla. Noko ke, ngokunikel’ ingqalelo kwindlela anokunceda ngayo abanye, uMaria uyakwazi ukunyamezela.

Kodwa kuthekani ukuba sikufumanisa kunzima ukuthandaza okanye kubonakala ngathi asinakuze sikwazi ukuyeka ukuzahlula? Kwimeko enjalo sifanele sifune uncedo. IBhayibhile isikhuthaza ukuba sifune “amadoda amakhulu ebandla.” (Yakobi 5:13-16) Enye indoda eyayidandatheka ngokugqithiseleyo ngokuqhubekayo yathi: “Maxa wambi ukuthetha nomntu omthembayo kuyanceda kudambise ingqondo yaye uba nomoya ozolileyo, ukuze ingqondo icinge kakuhle.” (IMizekeliso 17:17) Kakade ke, xa ukuphelelwa lithemba okungapheliyo nokuzingisileyo kubonakalisa ingxaki yezonyango, kusenokufuneka uncedo lweengcali ezinamava.b—Mateyu 9:12.

Nangona zingekho izicombululo ezilula, asifanele siweye amandla kaThixo okusinceda sikwazi ukuhlangabezana neengxaki zethu. (2 Korinte 4:8) Ukuzingisa emthandazweni, ukuphepha ukuzahlula nokufumana uncedo olufanelekileyo kuya kusinceda somelele. IBhayibhile ithembisa ukuba uThixo uya kukutshayela neengcambu ukuphelelwa lithemba. AmaKristu azimisele ukuthembela kuye ngoxa elindele umhla apho ezi ‘zinto zangaphambili zingayi kukhunjulwa.’—Isaya 65:17; ISityhilelo 21:4.

[Imibhalo esemazantsi]