Kutheni Kukho Ukuphelelwa Lithemba Okungaka?

ITHEMBA lobomi obulunge ngakumbi—lizalisekile ekugqibeleni! Abantu abaninzi ababehlala kwindawo eyayibizwa ngokuba yiMpuma Jamani bacinga ukuba oku kwenzekile xa uDonga LwaseBerlin lwawayo ngoNovemba wowe-1989. Noko ke, kwisithuba esingaphezulwana konyaka kamva bakhalaza ngelithi “bakufumanisa kunzima ngakumbi ukumelana neemeko ezingqongqo zolawulo-melo lobukapitali kunobomi obukhuselwe luDonga LwaseBerlin.” Oko kwaba nawuphi umphumo? Ukuphoxeka nokukhula kokuphelelwa lithemba.

Ugonyamelo emakhaya nakwimimandla abantu abahlala kuyo lusenokubanyanzelela ekubeni bashiye amakhaya befuna unqabiseko, kodwa bambalwa abalufumanayo. Bambi basenokude bagqibele ngokuhlala phakathi kwabo bangenamakhaya abahlala ezitratweni zesixeko. Kwamanye amazwe uninzi lwaba lugqibela ngokuba sengxakini yokuquqa kwiiofisi zaseburhulumenteni. Ngenxa yokungabi namakhaya kuba bengaphangeli, abanakuqeshwa kuba abanakhelingi yendawo abahlala kuyo. Oonontlalo-ntle baseburhulumenteni bayazama ukunceda, kodwa kuthabatha ithuba ukucombulula iingxaki. Kulapho ke ekuthi kubekho ukunxunguphala nokuphelelwa lithemba.

Ukuphelelwa lithemba kukhokelela amabhinqa amaninzi ekwenzeni izinto ezimbi gqitha. Kwingxelo eyayinomxholo othi Women and Crime in the 1990s, umhlohli wezomthetho uGqr. Susan Edwards uyachaza: “Kukho ukubandakanyeka kwamabhinqa aselula [kubunongogo] okubangelwa ngokungqalileyo kukungabi nandlela yokuziphilisa, ingekuko ukungaqeqesheki okanye imvelaphi yawo.” Ngokufanayo, abafana abashiya amakhaya besiya kufuna umsebenzi ngokufuthi abawufumani. Bambi, ngenxa yokuphelelwa lithemba, bagqibela ngokuthengisa ngemizimba yabo kumafanasini ukuze bafumane ukutya nekhusi, besiba zizinto zokudlala zamaqela eendlobongela angcolileyo.

Iinzima zezobupolitika, ugonyamelo, ubunzima bezoqoqosho, zonke zinokubangela ukuphelelwa lithemba ngeendlela ezahlukahlukeneyo. Kwanabantu abafundileyo abakhuselekanga njengoko befuna ukulondoloza ubomi babo bobunewunewu ngoxa behlangabezana neengxaki zemali ezandayo. Oku kunawuphi umphumo? “Ingcinezelo nje inokwenza isilumko senze ngobudenge,” njengoko uKumkani uSolomon wamandulo watshoyo!a (INtshumayeli 7:7, NW) Eneneni, ukuphelelwa lithemba kukhokelela abaninzi ukuba babhenele kwesona sicombululo singqongqo—ukuzibulala.

Esona Sicombululo Singqongqo

Ukuxhaphaka kokuzibulala phakathi kwabantu abaselula kubonisa ukuba nabo bayachatshazelwa ngubhubhani wokuphelelwa lithemba. Umbhali wemihlathi yeendaba waseBritani wabuza: “Yintoni ebangela ukuba kwixesha lethu kubekho ukuphelelwa lithemba okungaka kwabeshumi elivisayo?” Kuphando olwenziwa kubantwana abakubudala obuphakathi kweminyaka esi-8 neli-16 abaye balaliswa ezibhedlele emva kokuzama ukutya ityhefu, uGqr. Eric Taylor weZiko Lokunyanga Izifo Zengqondo laseLondon uthi: “Enye into ekhwankqisayo yayilinani labantwana ababengenathemba ngezinto.” EBritani kuthelekelelwa ukuba ngabantu abali-100 000 abatya ityhefu ngabom kodwa bangafi nyaka ngamnye nto leyo ebonisa ukufuna kwabo uncedo olungxamisekileyo.

Elinye iziko laseBritani lokunceda abantu laqalisa iphulo lokubaphulaphula ngenyameko abo baphelelwe lithemba. Ngale ndlela abacebisi balo bathi baza kunikela “iindlela ezizezinye zokuphepha ukufa.” Kanti, bayavuma ukuba abakwazi ukuzicombulula iingxaki ezenza abantu baphelelwe lithemba.

Iphephandaba iThe Sunday Correspondent lithi inani labantu abazibulalayo libonisa “umgangatho wobukheswa nokungabikho kokusondelelana kwibutho labantu.” Kutheni liphakame kangaka inani labantu abazibulalayo namhlanje? Eli phephandaba lakhankanya “ukungabi namakhaya, ukusela ngokugqithisileyo, ukusongelwa nguGawulayo nokuvalwa kwezibhedlele zengqondo” njengoothunywashe ababangela abantu baphelelwe lithemba ngokokude bagqale ukuzibulala njengekuphela kwesicombululo.

Ngaba likho naliphi na ithemba lokuphelisa ukuphelelwa lithemba? Ewe! Amazwi kaYesu ahlaziyayo athi: “Sukani nime, niziphakamise iintloko zenu.” (Luka 21:28) Wayethetha ukuthini? Liyintoni ithemba?

[Umbhalo osemazantsi]