Umhlaba Ongenazigcayiseli

NGUBANI onako ukucombulula ingxaki yezigcayiseli? Njengoko sesibonile, imigudu yabantu ayinako ukuphelisa intiyo, ubuntamo-lukhuni nokubawa. Noko ke, aBafundi beBhayibhile bayaqonda ukuba uMdali unako ukuzisa isicombululo esihlala sihleli. Kodwa uya kukwenza njani oko?

Ukumisela Ibutho Labantu Elinoxolo

Iimfazwe ziliwa ngabantu, kungekhona zizixhobo. Ngoko ke, ukuba sifuna uxolo, sifanele siphelise intiyo ecalucalula abantu babe ziintlanga namaqela ezizwe ezithile. UThixo uthembisa ukukwenza oku ngoBukumkani bakhe, izigidi zabantu ehlabathini lonke eziye zafundiswa ukuba zibuthandazele.—Mateyu 6:9, 10.

IBhayibhile ithetha ngoYehova ‘njengoThixo onika uxolo.’ (Roma 15:33) Uxolo asinika lona uThixo alusekelwanga ekuncitshisweni kwezixhobo nakwizivumelwano, yaye alusekelwanga nakuloyiko lokuziphindezela kotshaba lwelizwe oluxhobe laf’ amacala. Kunoko, uxolo lukaThixo lubandakanya iinguqulelo kwindlela abacinga ngayo abantu nakwisimo sengqondo abanaso ngabanye abantu.

UYehova uThixo uya kufundisa abalulamileyo ngeendlela zakhe zoxolo. (INdumiso 25:9) ILizwi lakhe, iBhayibhile lithembisa ngexesha apho bonke abo baphilayo ‘baya kufundiswa nguYehova, lube lukhulu uxolo loonyana babo.’ (Isaya 54:13) Oku sele kusenzeka ukusa kumkhamo othile. Ehlabathini lonke, amaNgqina kaYehova aziwa ngokukhuthaza uxolo phakathi kwabantu kwanabo baneemvelaphi ezahlukahlukeneyo. Abantu abafundiswe imigaqo ephakamileyo yeBhayibhile bazabalazela ukuphila ngomanyano kungakhathaliseki ukuba kukho imibandela enjani na ebinokuthi ngandlel’ ithile ibahlule. Imfundo yeBhayibhile ibuguqula ngokupheleleyo ubuntu babo ukusuka kobo bentiyo ukusa kobothando.—Yohane 13:34, 35; 1 Korinte 13:4-8.

Ngaphandle kwemfundo, imfuneko yokusebenzisana ehlabathini lonke iye yagqalwa njengesona sitshixo siphambili sokuphelisa izixhobo. Ngokomzekelo, i-International Committe of the Red Cross incomela ukuba ubudlelane bezizwe ngezizwe bukhuthaze ngokumanyeneyo imilinganiselo yokuthintela nokuphelisa uloyiko olubangelwa zizigcayiseli.

UYehova uthembisa ukwenza okungaphezulu ngakumbi kunoko. Umprofeti uDaniyeli waxela kwangaphambili wathi: “Ngemihla yabo kumkani uThixo wezulu uya kumisa ubukumkani obungenakuze bonakaliswe. . . . Buya kuzityumza buziphelise zonke ezi zikumkani, buze bona bume ukusa kwixesha elingenammiselo.”—Daniyeli 2:44.

UBukumkani bukaThixo buya kufeza oko umntu angenakukufeza. Ngokomzekelo, ngokuprofetayo INdumiso 46:9 ithi: “[UYehova] uphelisa iimfazwe kuse esiphelweni somhlaba. Waphula isaphetha nomkhonto; iinqwelo uzitshisa emlilweni.” UBukumkani bukaThixo buya kuzisa imeko-bume apho umntu anokukwazi ukunandipha uxolo lokwenyaniso noMdali wakhe nabanye abantu.—Isaya 2:4; Zefaniya 3:9; ISityhilelo 21:3, 4; 22:2.

UAugusto okhankanywe kwingabula-zigcawu yenqaku elandulela eli, ufumana intuthuzelo kwesi sigidimi seBhayibhile. Abazali bakhe abangamaNgqina kaYehova, bamnceda ukuba abe nokholo kumadinga amangalisayo eBhayibhile. (Marko 3:1-5) Kakade ke, okwangoku kufuneka anyamezele imiphumo ebuhlungu awayifumana ngenxa yokuqhushumba kweso sigcayiseli samngxwelerhayo. Sekunjalo, uAugusto ukhangele phambili kwimini apho idinga likaThixo lomhlaba oyiparadesi liya kuba yinto yokwenene. Umprofeti uIsaya waxela kwangaphambili wathi: “Ngelo xesha aya kuvulwa amehlo eemfama . . . isiqhwala siya kutsiba njengexhama.”—Isaya 35:5, 6.

Kuloo Paradesi izayo, izigcayiseli azisayi kuphinda zibangele uloyiko kwakhona kubomi nakumalungu omzimba. Kunoko, abantu abahlala kuzo zonke iimbombo zomhlaba baya kuhlala benqabisekile. Umprofeti uMika ukuchaza ngale ndlela oku: “Kwaye okunene baya kuhlala, ngamnye phantsi komdiliya wakhe naphantsi komkhiwane wakhe, yaye akuyi kubakho bani ubangcangcazelisayo; kuba wona kanye umlomo kaYehova wemikhosi ukuthethile oko.”—Mika 4:4.

Ngaba ungathanda ukufunda okungakumbi ngamadinga kaThixo njengoko ephuma kwiLizwi lakhe iBhayibhile? Qhagamshelana namaNgqina kaYehova asekuhlaleni, okanye ubhalele kwidilesi efanelekileyo kwezo zidweliswe kwiphepha-5 leli phephancwadi.

[Umfanekiso okwiphepha 8, 9]

Ngaphantsi koBukumkani bukaThixo, izigcayiseli azisayi kuphinda zibangele uloyiko kwakhona