Iziqhushumbisi—Ingozi Yehlabathi Lonke
AMAWAKA amadoda, amabhinqa, nabantwana abangenatyala kumazwe angaphezu kwama-60 aye angxwelerheka, ibe kwamanye itshoba liye lalal’ umbethe, nyanga nganye ngenxa yeziqhushumbisi. Kuqikelelwa ukuba izigcayiseli zemfazwe ziye zabulala okanye zangxwelerha abantu abangakumbi kunakwiimfazwe zemichiza, zokwemvelo nezenyukliya. Ngokutsho kombutho wophando iHuman Rights Watch, abantu abamalunga nama-30 000 baye bangxwelerhwa ziziqhushumbisi eKhambodiya kuphela.
Ezi ziqhushumbisi zincinane ziye zatyalwa emhlabeni kwiimfazwe ezahlukahlukeneyo, yaye uninzi lwazo alukhange lususwe. Kuqikelelwa ukuba kukho ezimalunga ne-100 lezigidi eziqhushekwe emhlabeni kumazwe angaphezu kwama-60. Zisenokuqhushumba nje ngokunyathelwa ibe ziyathandwa ezimfazweni ngenxa yokuba azibizi mali ininzi yaye ziyasebenza. Olunye uhlobo lubiza ii-R10 kuphela. Olunye, olukhupha iibholana zentsimbi ezingama-700 luze lubulale ukusa kumgama oziimitha ezingama-40, ama-R93 kuphela. IThe New York Times inikela ingxelo yokuba zifunwa kakhulu, kangangokuba sithetha nje amazwe angama-48 enza yaye athengisa iintlobo zazo ezahlukeneyo ezingama-340. Ibe suku ngalunye kutyalwa ezingakumbi kunezo zisuswayo ngabo basusa iziqhushumbisi.
Ukuphelisa iziqhushumbisi kunzima yaye kubiza imali eninzi, ekubeni imikhosi emininzi ingagcini zingxelo zokuba zityalwe phi na; yaye ezi ziqhushumbisi ngokwandayo zenziwa ngamaplanga, ngeplastiki nangezinye izinto ezingakwaziyo ukufunyanwa ngezixhobo ezenziwe ngentsimbi. Ilungu lebhunga likarhulumente waseUnited States uPatrick Leahy, owayalela ukuba kuvalwe ukuthunyelwa kwezi zixhobo kwamanye amazwe, wathi: “ENetherlands, abantu basabulawa ziziqhushumbisi zaseJamani ezazityalwe kwiMfazwe Yehlabathi II. Khawucinge indlela ekukubi ngakumbi ngayo eAfghanistan, eKhambodiya, eAngola, eBosnia nakuwo onke amanye amazwe ekuye kwatyalwa kuwo iziqhushumbisi ezininzi.”
Kuphela lihlabathi elitsha likaThixo eliya kucombulula iingxaki ezinjalo. ILizwi lakhe lithembisa oku: “[UThixo] ulophelisa iimfazwe kude kuse eziphelweni zehlabathi; waphula isaphetha, angqumze umkhonto, atshise iinqwelo zokulwa ngomlilo.”—INdumiso 46:9.