Ngaba Ihlabathi Liya Kumanyana?

KWIMINYAKA yakutshanje zizigidi zabantu eMpuma Yurophu nakwezinye iindawo eziye zabandezeleka ngenxa yemiphumo yemfazwe ebangelwa kukungamanyani. Ukanti, ngoxa kanye kwakuqhubeka ungquzulwano lwenkohlakalo olunjalo, amawaka abantu akuloo mazwe adlavulwe yimfazwe ayekwazi ukuhlakulela aze alondoloze umanyano lokwenyaniso phakathi kwawo. Khawuqwalasele nje le mizekelo imbalwa.

Ngowe-1991 isihlwele sabantu bezizwe ngezizwe esimalunga nama-15 000 sasihlanganisene eZagreb, eCroatia. Elinye ipolisa elalilapho lachukumiseka laza lathi: “Bekuya kuba kuhle ukuba oku kwenzeka kweli bala lemidlalo bekuya kuboniswa kumajelo eendaba, kanye kule ndawo, apho sibona abemi baseSerbia, eCroatia, eSlovenia, eMontenegre, nabanye behleli kunye ngoxolo.” Lubangelwa yintoni olu manyano lungaqhelekanga?

Ngowe-1993 kwaqhutywa indibano yezizwe ngezizwe enkulu kunaleyo, eyayinomxholo othi “Imfundiso Yobuthixo,” eKiev, isixeko esilikomkhulu laseUkraine. Incopho yababekho yayimalunga nama-65 000. Iphepha lokuqala le-Evening Kiev lanikela le ngxelo: “AmaNgqina kaYehova . . . amanyaniswe kungekhona nje ziibheji zawo ezizuba ezibhalwe ‘Imfundiso Yobuthixo’ kodwa lukholo lokwenyaniso.”

Imfundiso Yobuthixo—Amandla Abangela Umanyano

Ngaba iyakumangalisa into yokuba amaNgqina kaYehova amanyane ngoxa engqongwe kukungamanyani okugqugqisileyo? UNjingalwazi Wojciech Modzelewski wasePoland uchaza isizathu ngokuphawula oku ngamaNgqina: “Oyena ndoqo kwisimo sengqondo sawo esinoxolo kukulandela kwawo imigaqo etyhilwe eBhayibhileni.” Enyanisweni, ehlabathini lonke amaNgqina amanyaniswe yimfundiso yobuthixo yoMdali, uYehova uThixo. Yiyiphi loo mfundiso?

UYesu Kristu walatha kowona mgaqo ubalulekileyo wokumanyanisa xa wathi ngokuphathelele abalandeli bakhe: “Abayonxalenye yehlabathi.” Ewe, kuyo yonk’ indawo amaNgqina kaYehova amanyaniswa kukungathabathi cala kwawo. Oku kuvisisana namazwi kaYesu xa wathandaza esithi: “Ndenza isicelo . . . ukuze bonke babe banye, kanye njengoko wena, Bawo, umanyene nam yaye nam ndimanyene nawe, ukuze nabo bamanyane nathi.”—Yohane 17:16-21.

Ukungathabathi cala ngawona mandla abangela ukuba amanyane kuba kushukumisela amaNgqina akuzo zonke iindawo zehlabathi ukuba aphile ngendlela eyaxelwa ngumprofeti uIsaya ngabo bonke abo uThixo aya ‘kubayalela ngeendlela zakhe.’ UIsaya wachaza ukuba abantu abanjalo babeya ‘kuwakhanda amakrele abo abe ngamakhuba nemikhonto yabo ibe zizikere zokuthena imithi.’ Lo mprofeti wahlabela mgama esithi: “Uhlanga aluyi kuphakamisela uhlanga ikrele, zingayi kuphinda zifunde nemfazwe kwakhona.”—Isaya 2:2-4.

Umanyano noxolo olwalubonwa kwiindibano zamaNgqina kaYehova kwiMpuma Yurophu ebudeni beshumi leminyaka elidlulileyo lubonisa ukuba isiprofeto sikaIsaya sele sizalisekiswa ngokomlinganiselo omncinane. EYurophu nakwezinye iindawo, ngokomfuziselo amaNgqina aye awakhanda amakrele awo aba ngamakhuba nemikhonto yawo yaba zizikere zokuthena imithi. Ngenxa yoko, namhlanje anandipha uxolo nomanyano kweli hlabathi liziintlaba-zahlukane. Akumangalisi ke ngoko ukuba omnye umhleli wephephandaba wakha wathi: “Ukuba lonke ihlabathi beliphila ngemigaqo [yeBhayibhile] yamaNgqina [kaYehova] bekuya kuphela ukuphalala kwegazi nentiyo, yaye uthando beluya kulawula njengokumkani”! Ngaba oko kuya kuze kwenzeke?

Indlela Eliya Kumanyana Ngayo Ihlabathi

Ukuze kuziswe umanyano kwihlabathi lonke, kufuneka imigudu engakumbi kuneyeqaqobana nje labantu abaneenjongo ezintle. Kukwafuneka norhulumente onamandla okuphelisa impembelelo yabo balwa nomanyano noxolo. Enyanisweni, uYesu wafundisa abalandeli bakhe ukuba bathandazele urhulumente onjalo bathi: “Mabufike ubukumkani bakho. Makwenzeke ukuthanda kwakho nasemhlabeni, njengasezulwini.” (Mateyu 6:10) Ewe, uYesu wabonisa ukuba ngurhulumente kaThixo kuphela, “ubukumkani bamazulu,” obunokuzisa isicombululo kwiingxaki zehlabathi—kuquka ingxaki yokungabikho komanyano.—Mateyu 4:17.

UYesu Kristu nguKumkani wobu Bukumkani bamazulu. Ngaphantsi kolawulo lwakhe abantu abasemhlabeni baya kufumana ixesha loxolo nomanyano olungenakuthelekiswa nanto. Olu umanyano lwehlabathi lonke aluyi kuza ngenxa yeendlela ezithile zoqoqosho ezenziwe ngabantu. Ngurhulumente wehlabathi olawulwa ‘yiNkosana yoXolo’ kuphela onokukwazi ukwenza oko.—Isaya 9:6, 7.

Ukungabikho kokusesikweni okukhoyo ngoku, okusoloko kubangelwa bubuhlwempu nokusetyenziswa kakubi kwegunya, akuyi kunyanyezelwa yiNkosana yoXolo. IBhayibhile ithembisa oku: “Bonke ookumkani baya kuqubuda kuye; ke zona zonke iintlanga ziya kumkhonza. Kuba uya kumhlangula lowo ulihlwempu ukhalela uncedo, kwanalowo uxhwalekileyo nabani na ongenamncedi. Uya kuwukhulula umphefumlo wabo kwingcinezelo nakugonyamelo. . . . Kuya kubakho ukudla okuziinkonzo okuninzi emhlabeni; encotsheni yeentaba kuya kubakho ukuphuphuma.”—INdumiso 72:11, 12, 14, 16.

Nokungabikho kwemisebenzi kuya kuba yinto yexesha elidluleyo phantsi kolawulo lukaKristu. Umprofeti uIsaya usichazela oku: “Abayi kwakha kuhlale abanye; abayi kutyala kudle abanye. Kuba njengemihla yomthi iya kuba njalo imihla yabantu bam; nomsebenzi wezandla zabanyuliweyo bam baya kuwusebenzisa ngokupheleleyo.” (Isaya 65:22) Khawufan’ ucinge, wonk’ ubani emhlabeni uya kukwazi ukwenza umsebenzi oluncedo nowanelisayo!

Umanyano Lokwenyaniso—Luya Kubakho Nini?

Kodwa luya kuqalisa nini ulawulo lukaKristu phezu kwalo mhlaba? Ephendula loo mbuzo, uYesu Kristu walatha kwixesha eliphawulwa ziimfazwe, iingxelo zeemfazwe, izifo, iinyikima zomhlaba, nezinye iziganeko. Ukanti, walatha nenkalo efanelekileyo—ukushunyayelwa kweendaba ezilungileyo zoBukumkani bukaThixo emhlabeni wonke. (Mateyu 24:3-14; Luka 21:11) UYesu wathi, ezi ziganeko ziya kufikelel’ incopho ‘kwimbandezelo enkulu’ eya kuzisa utshintsho olupheleleyo kulawulo lomhlaba. (Mateyu 24:21) Funda intetho yakhe ebhalwe kuMateyu isahluko 24 noLuka isahluko 21. Thelekisa iimeko awazichaza kwangaphambili noko ukubonayo ehlabathini. Unokubona ngokucacileyo ukuba ngoku siphila kwixesha elingaphambi nje kokungenelela kukaThixo kulawulo lwabantu. UBukumkani bakhe, uYesu Kristu anguKumkani kubo, buya kuthabathela kubo ulawulo. Ihlabathi elimanyeneyo lingaphambili!

Umbuzo osaseleyo ngothi, Yintoni omele uyenze ukuze ubone esi sithembiso sizaliseka? Ekubeni iBhayibhile inendima ebalulekileyo kolu lindelo loluntu lwekamva, kuya kuba bubulumko ukwenza umgudu wokwazi iBhayibhile ngakumbi. Ngoko ke, amaNgqina kaYehova aya kukuvuyela ukuza kwikhaya lakho ukuze akuqhubele isifundo seBhayibhile sekhaya sesisa.a Ukuba uyakwamkela oku, kungekudala uya kubona ukuba ukumanyana kwehlabathi yinto enokwenzeka yaye nawe unganenxaxheba kulo!

[Umbhalo osemazantsi]

[Imifanekiso ekwiphepha 16, 17]

Ehlabathini jikelele, amaNgqina kaYehova anandipha umanyano oluphawulekayo

IKiev, eUkraine

IZagreb, eCroatia

[Umfanekiso okwiphepha 18]

Injongo kaThixo yeyokuba uluntu lube yintsapho enye yomhlaba wonke emanyeneyo