Uxinezeleko Lwasemva Kwesiganeko Esihlasimlis’ Umzimba—Luyintoni?

KWIMINYAKA ELIQELA EYADLULAYO, uxinezeleko ngokuqhelekileyo lwalubizwa ngokuba kukunyukelwa zizibilini okanye ukuba namaphaphu aphezulu yaye lwaphandwa ngokunxulumene nabo bakhe balwa iimfazwe. Izinto zitshintshile kule mihla. Akunyanzelekanga ukuba ube lijoni ukuze ube nePTSD. Ikufumana xa usinde kwisiganeko esihlasimlis’ umzimba.

Esi siganeko sisenokuba yimfazwe, okanye uthile ukhe wazama ukukudlwengula okanye mhlawumbi usinde kwingozi yenqwelo-mafutha. Uxwebhu olunenkcazelo evela kwiNational Center for PTSD, eUnited States, luthi: “Ukuze umntu abe nePTSD, udla ngokuba ebebandakanyeke kwisiganeko esihlasimlis’ umzimba.” Yaye esi siganeko “sidla ngokuquka ukuphants’ ukwenzakala okanye ukubandezeleka EMZIMBENI.”

UJane, okhankanywe kwinqaku elingaphambili uthi: “Ndiye ndafumanisa ukuba iziganeko ezenzeka ngequbuliso zibangela amadlala athile akrale, yaye la madlala abangela izivamvo ukuba ziyoyike ngokugqithiseleyo ingozi. Ngokuqhelekileyo amadlala ayatsama emva kokuba ingozi idlule, kodwa kwabo banePTSD, ahlala ekralile.” Eso siganeko sedlula, kodwa ukoyika okwakukho ngelo xesha akupheli engqondweni kaJane, kanye njengesinama ndokunamathela.

Ukuba uye wasinda kwisiganeko esihlasimlis’ umzimba yaye uthwaxwa yimiphumo efanayo, kubalulekile ukuqonda ukuba akuwedwa. Kwincwadi yakhe awayibhala ngokuphathelele ukudlwengulwa, umbhali uLinda E. Ledray uthi iPTSD “yindlela abasabela ngayo ngokuqhelekileyo abantu abaphilileyo abebephantsi kwemeko eyoyikisayo abebengenakuyilawula.”

Sekunjalo ukuthi iPTSD iqhelekile akuthethi kuthi wonke umntu osinde kwisiganeko esihlasimlis’ umzimba umele abe nayo. ULedray uthi: “Uhlolisiso lowe-1992 lwafumanisa ukuba, iveki nje emva kokuba umntu edlwengulwe, ama-94 ekhulwini aba nePTSD yaye emva kweeveki ezilishumi elinesibini ama-47 ekhulwini aqhubeka ekuloo meko. Ama-50 ekhulwini amabhinqa awaya kwiSexual Assault Resource Service eMinneapolis ngowe-1993 aba nePTSD kunyaka omnye emva kokudlwengulwa.”

Olo hlolisiso lubonisa ukuba iPTSD ixhaphakile, ngaphezu kokuba abantu abaninzi benokuyiqonda loo nto. Ihlasela iindidi ezahlukeneyo zabantu, emva kweziganeko ezininzi ezahlukeneyo. Umbhali uAlexander C. McFarlane noLars Weisaeth bathi: “Uhlolisiso lwakutshanje luye lwabonisa ukuba izenzo ezihlasimlis’ umzimba zidla ngokwehlela abahlali ngexesha loxolo, kwakunye namajoni namaxhoba emfazwe, kwanokuba abo basinde kwezo ziganeko baba nePTSD.” Kwaneendlela zezonyango okanye isifo sentliziyo ziye zabangela iPTSD kwabanye abantu.

Aba babhali bacatshulwe ngasentla bathi: “IPTSD sisigulo esixhaphake gqitha.” Bahlabela mgama besithi: “Uhlolisiso olungacetywanga olwenziwa kwabakwishumi elivisayo baseMerika abali-1 245 lwabonisa ukuba abangama-23% babengamaxhoba okubethwa nokuxhatshazwa ngokwesini, abanye ke babengamangqina okuzibonela kusenziwa ugonyamelo kwabanye. Omnye kwabahlanu kwaba bakwishumi elivisayo bachaziweyo baba nePTSD. Oku kubonisa ukuba malunga ne-1,07 lezigidi zabakwishumi elivisayo eUnited States ngoku lunePTSD.”

Ukuba la manani achanile, oko kuthetha ukuba kukho abaninzi abakwishumi elivisayo abanesi sigulo kwilizwe nje elinye! Banokuncedwa njani abo bantu, kwakunye nezinye izigidi ezininzi zabanye abanale ngxaki ehlabathini lonke?

Yintoni Enokwenziwa?

Ukuba uvakalelwa kukuba wena okanye umntu othile omaziyo usenokuba unePTSD, hlolisisa la macebiso alandelayo.

Zabalazela ukuzenzela ucwangciso lwezinto zokomoya. UJane uthi: “Ndandibakho rhoqo kwiintlanganiso ezikwiHolo yethu yoBukumkani yasekuhlaleni. Kwanakuba ndandingakwazi ukunikela ingqalelo koko kwakuthethwa, ndandisazi ukuba uYehova uThixo ufuna ndibe lapho. Abo basebandleni babenothando yaye belukhuthazo gqitha, yaye uthando nomdla abawubonakalisayo wawuthetha lukhulu kum ngalo lonke ixesha endandisentlungwini ngalo.” UJane wongezelela ngelithi: “Enye into eyandincedayo kukufunda iindumiso. Ngandlel’ ithile imithandazo yabo baxinezelekileyo yayibonakala ichaza indlela endivakalelwa ngayo. Xa ndingakwazi ukuvakalisa oko ndifuna ukukutsho emthandazweni, ndandisuka nje ndithi ‘Amen.’”

Musa ukuzibandeza ekukhuthazeni lo unale ngxaki. Ukuba unomntu omthandayo ohlangabezana nenkumbulo engathandekiyo yesenzo esihlasimlis’ umzimba, qonda ukuba akazenzisi okanye akazami kusokolisa. Ngenxa yokungabi nazimvakalelo, ukuxhalaba okanye ukuba nomsindo, usenokubonakala engasabeli ngendlela obunokuthanda ngayo kwimigudu yakho yokumxhasa. Kodwa musa ukunikezela! IBhayibhile ithi, “iqabane lokwenyaniso lithanda ngamaxesha onke, yaye lingumzalwana ozalelwe ixesha lokubandezeleka.”—IMizekeliso 17:17.

Lowo unengxaki umele aqonde aze aphephe iindlela zokuhlangabezana nale meko ezingezozabulumko nezinokubangela omnye umonakalo. Ezi ndlela ziquka ukusebenzisa iziyobisi ezingekho mthethweni nokuzinkcinkca ngotywala. Nangona utywala neziyobisi zisenokungathi zinika isiqabu sokwexeshana, zisenokukhawuleza zenze iimeko zibe mandundu. Zidla ngokubangela ukuba uzikhethe kwabanye abantu, ungafuni kuncedwa mntu, uziphose emsebenzini, ube nomsindo ongalawulekiyo, utye ngokungalawulekiyo okanye uyilawule ngokugqith’ emgceni indlela otya ngayo, uziphalaze kwanezinye iindlela.

Dibana nogqirha oyingcaphephe. Kusenokwenzeka ukuba lo mntu akanayo iPTSD, kodwa ukuba kuthe kanti unayo, lukho unyango olunokumnceda.a Ukuba uncedwa yingcaphephe ethile, nyaniseka kuyo uze ucele uncedo lokulwa nawuphi na kule mikhwa ingasentla.

Khumbula: Amanxeba asemzimbeni adla ngokunyangeka kuqala, kodwa abantu abanePTSD banokwenzakala ngeendlela ezininzi emzimbeni, engqondweni nangokweemvakalelo. Inqaku elilandelayo liya kuxubusha ngezinye iindlela umguli kwanabanye abahlala naye abanokuncedisa ngayo ekuchacheni kwakhe kwaye liya kuxubusha nangethemba labo banengxaki yomothuko osemva kwesiganeko esihlasimlis’ umzimba.

[Umbhalo osemazantsi]

[Ibhokisi/Umfanekiso okwiphepha 22]

Iimpawu Zoxinezeleko Lwasemva Kwesiganeko Esihlasimlis’ Umzimba

Abaninzi abasinde kwiziganeko ezihlasimlis’ umzimba bafumanisa ukuba ziphinda zivuke ezi ziganeko ezingqondweni zabo. Ngokuqhelekileyo, aba basinde kwezi ziganeko abakwazi kuyilawula le meko okanye bayinqande ingenzeki. Le miphumo isenokuquka:

• Inkumbulo ngesiganeko eso—kube ngathi esi siganeko siyenzeka kwakhona

• Ukuphupha kakubi

• Utyekelo lokuphazanyiswa yingxolo engaphaya kwengqondo okanye umntu obavele ngasemva bengalindelanga

• Ukungcangcazela nokubila

• Uvalo olungongoza ngamandla nokuba nengxaki yokuphefumla

• Ukuphazamiseka xa ekhunjuzwa esi siganeko sihlasimlis’ umzimba yinto ayibonayo, ayivayo, ayijojayo okanye ayingcamlayo

• Ukuxhalaba okanye ukoyika—imvakalelo yokungathi ingozi ibuyile kwakhona

• Ingxaki yokungakwazi ukulawula indlela avakalelwa ngayo kuba izinto ezimkhumbuzayo zikhokelela ekuxhalabeni, kumsindo okanye ukuphazamiseka

• Ukuba nengxaki yokunikela ingqalelo okanye ukungakwazi ukucinga kakuhle

• Ukuba nengxaki yokozela okanye ukulala

• Ukuba nezibilini eziphezulu nokuhlala ulumkele ingozi

• Ukungasebenzi kweemvakalelo okanye ukungabi nazo

• Ukuba nengxaki yokungabathandi abantu okanye ukungabi nazimvakalelo

• Ukuvakalelwa ngathi izinto ezikungqongileyo aziqhelekanga okanye asizizo ezokwenene

• Ukuphelelwa ngumdla kwizinto owawunomdla kuzo ngaphambili

• Ukuba nengxaki yokukhumbula izinto ezibalulekileyo eziye zenzeka ebudeni besenzo esihlasimlis’ umzimba

• Ukuziva bengeyonxalenye yezinto ezibangqongileyo nezinto ezenzeka kubo

[Imifanekiso ekwiphepha 21]

Iziganeko ezahlukahlukeneyo ezihlasimlis’ umzimba zinokubangela iPTSD