Ithemba Kwabo Banesifo Samathambo

UGQR. FATIMA MILI uthi: “Isifo samathambo asingonobangela uphambili wokufa njengesifo sentliziyo okanye umhlaza, kodwa sinegalelo elikhulu kubomi obuphilayo.” Isifo samathambo sinokuchaphazela zonke iinkalo zobomi bomntu. Ziziphi ezinye iingxaki abajamelene nazo abo banesifo samathambo? Ngaba kunokwenzeka ukuba bahlangabezane nazo?

UKatia,a oneminyaka engama-28 ubudala, waseItali, uthi: “Ukususela oko kwafunyaniswa ukuba ndinesifo samathambo ndiseneminyaka engama-20 ubudala, bonke ubomi bam butshintshile. Kwanyanzeleka ndiyeke umsebenzi endandiwenza ndaza ndancama ubulungiseleli bexesha elizeleyo ngenxa yeengqaqambo.” Bonke abantu abanesifo samathambo bayaqaqanjelwa. UAlan oneminyaka engama-63 ubudala waseNgilani uthi: “Kusoloko kukho iingqaqambo emzimbeni wakho, nangona zisenokungabi buhlungu kangako.” Ukudinwa lolunye ucelomngeni. USarah oneminyaka engama-21 ubudala uthi: “Nakuba unokumelana neentlungu nokudumba, udinwa ngendlela engathethekiyo.”

Intlungu Ekwiimvakalelo

Ngokutsho kukaSetsuko oneminyaka engama-61 ubudala waseJapan, ukuwa uvuka neentlungu ezingapheliyo “kunokukutheza iimvakalelo nasengqondweni.” Kaloku, kunzima nokuphakamisa usiba okanye imfonomfono! UKazumi oneminyaka engama-47 ubudala, ukhala ngelithi: “Mna ndoyiswa kukwenza izinto ezinokwenziwa nangumntwana nje oqhelekileyo.” UJanice, oneminyaka engama-60 ubudala ongasakwaziyo ukuma nokuhamba ixesha elide uthi: “Kuyadimaza ukungakwazi ukwenza izinto owawukade uzenza.”

Ukusikelwa umda ngolo hlobo kunokukudandathekisa kuze kukwenze uzive ungento yanto. UGaku, oneminyaka engama-27 ubudala, ungomnye wamaNgqina kaYehova yaye uthi: “Ukungakwazi ukuba nenxaxheba ngokupheleleyo kumsebenzi wokuhambisa ivangeli okanye ukungakwazi ukuphumeza izabelo zebandla kundenza ndizive ndingaxabisekanga kwaphela.” UFrancesca, ekukudala esilwa nesifo samathambo eseneminyaka emibini ubudala, uthetha “ngokuzibona ezika ekuphelelweni lithemba.” Oko kuphelelwa lithemba kunokukuchaphazela kakhulu ngokomoya. UJoyce, oliNgqina laseMzantsi Afrika, uyavuma ukuba waqala ngokucezela kude kwiintlanganiso zamaKristu. Uthi: “Ndandingakwazi nje ukujongana naye nabani na.”

Kwakhona umntu onesi sifo usenokuzixhalabisa gqitha ngekamva—oyike ukuba uya kuze angakwazi ukuhamba kufuneke axhomekeke kwabanye, oyike ukuba akukho mntu uza kumnyamekela, oyike nokuwa aze athi qwatha amathambo, oyike nokuba akazi kukwazi ukunyamekela intsapho yakhe. UYoko, oneminyaka engama-52 ubudala, uvuma ngelithi: “Xa ndibona ukugogeka, ndiye ndoyike ukuba izinto ziza kuthabath’ unyawo.”

Namalungu entsapho asenokukhathazeka gqitha, kukuthi mini nganye ajamelane nokubandezeleka komntu amthandayo. Ezinye izibini zisenokuba neengxaki ezinzulu kumtshato wazo. Elinye ibhinqa laseNgilani, uDenise, lithi: “Emva kweminyaka eli-15 sitshatile, umyeni wam wathi, ‘Andisayingenanga le nto yesi sifo sakho samathambo!’ Wandishiya nentombi yethu eneminyaka emi-5 ubudala.”

Ngaloo ndlela isifo samathambo silucelomngeni olukhulu kwabo banaso neentsapho zabo. Noko ke, abaninzi bahlangabezana naso ngempumelelo! Makhe siphos’ iliso kwindlela abanye abakwenza ngayo oko.

Ukuhlonela Isibakala Sokuba Usikelwe Umda

Ukuphumla ngokwaneleyo kubalulekile xa unesifo samathambo; loo nto inokuphungula ukudinwa. Noko ke, loo nto ayithethi ukuba ufanele uyeke izinto obudla ngokuzenza. UTimothy uthi: “Kufuneka uzigcine uxakekile ukuze ungalawulwa ingqondo sisifo samathambo kuba xa sikwenza loo nto, uza kugovalala ubhuqwe ziintlungu.” Ingcali ngesifo samathambo uWilliam Ginsburg, weKliniki yaseMayo uthi: “Kukho umahluko phakathi kokusebenza gqitha nokusebenza kancinane. Maxa wambi kuye kufuneke abantu bakhunjuzwe ukuba khe behlise isantya baqwalasele isifo abanaso.”

Oku kunokuquka ukutshintsha indlela okujonga ngayo ukusikelwa umda kwakho. UDaphne, waseMzantsi Afrika, uthi: “Kuye kwafuneka ndijonge izinto ngobunjalo bazo ndize ndazi ukuba amandla am okwenza izinto ezithile akakapheli; kufuneka nje ndehlise isantya xa ndizenza. Kunokuba ndixhalabe okanye ndidandatheke, ndithatha kancinane ngexesha.”

Kwakhona kulungile ukuqhelana nezinto ezithile ezinokukuncedisa, mhlawumbi ufune icebiso ngazo kugqirha wakho. UKeiko uthi: “Siye safakela isinyusi. Ukujija amaqhosha kwenzakalisa izihlahla zam, ngoko siye sawatshintsha. Ngoku ndiyakwazi ukuzivula zonke iingcango ngokuzityhala ngentloko. Sifakele olunye uhlobo lweempompo ukuze ndikwazi ukwenza eminye imisebenzi yekhaya.” Omnye onesifo samathambo ogama linguGail uthi: “Izitshixo zenqwelo mafutha nezendlu yam zixokonyezelwe kumqheba omkhulu, nto leyo eyenza kube lula ukuzijija. Inkcaza nebrashi yam zinemiqheba emide endikwaziyo ukuyijika xa ndichaza.”

Ukuxhaswa Yintsapho—“Inqaba Yamandla”

UCarla, waseBrazil uthi: “Ukuxhaswa ngumyeni wam kuye kwaluncedo gqitha. Isibakala sokuba eye wandipheleka ukuya kwagqirha siye sandinika inkalipho. Sayifumanisa sobabini indlela esi sifo esiwuchaphazela ngayo umzimba wam, iimpawu zaso, nonyango oluya kuba yimfuneko. Ndandiziva bhetele kuba wayeyiqonda imeko endikuyo.” Ewe, amadoda okanye abafazi abakwamkelayo ukusikelwa umda kwamaqabane abo nabakulungeleyo ukufunda ngemeko yawo banokuba ngumthombo omangalisayo wamandla nokhuthazo.

Ngokomzekelo uBette, wenza imisebenzi yokucoca xa isifo samathambo sabangela ukuba umyeni wakhe ayeke ukuba ngumakhi. Umyeni kaKazumi akazange aphelele nje ekumnyamekeleni kodwa wenza umsebenzi wekhaya awayengenakuwenza. Ngaphezu koko, waqeqesha abantwana babo ukuba bancede kangangoko babenako. Uthi uKazumi: “Umyeni wam ebeyinqaba yamandla. Ngaphandle koncedo lwakhe, ngeyimandundu imeko yam.”

Ibhinqa eligama linguCarol laseOstreliya, linikela esi silumkiso: “Ulumke ungazibekeli umsebenzi omninzi gqitha. Ndiye ndizive ndingakwazi kwenza nto xa ndingakwazi ukunyamekela intsapho.” Xa inikelwa ngokuqonda nolwazelelelo, inkxaso yentsapho inokuba yinqaba yamandla kwabo banesi sifo.

Uncedo Lokomoya

UKatia uthi: “Xa umntu enesifo esifana nesi, uyazixelela ukuba akakho umntu oyaziyo into ajamelene nayo. Loo nto yenza kubaluleke ukuba umntu aphethukele kuYehova uThixo, esazi ukuba uyiqonda ngokwenene imeko yethu yomzimba nengokweemvakalelo. (INdumiso 31:7) Ukuba nolwalamano oluhle naye kuye kwandinika uxolo lwengqondo lokuba ndikwazi ukunyamezela isigulo sam.” IBhayibhile imbiza kakuhle uYehova xa isithi, ‘nguThixo wentuthuzelo yonke, osithuthuzelayo kuyo yonke imbandezelo yethu.’—2 Korinte 1:3, 4.

Ngenxa yoko umthandazo unokuba ngumthombo onamandla wentuthuzelo kumntu oneentlungu ezingapheliyo. UKazumi uthi: “Ebudeni bobusuku obude bokungakwazi ukulala ngenxa yeentlungu, ndineenyembezi ndiye ndayiphalaza kuYehova imbilini yam, ndimcela ukuba andinike amandla okunyamezela iintlungu andinike nobulumko bokujamelana neenzingo zam. Ngaphandle kwamathandabuzo uYehova uye wandiphendula.” NoFrancesca uye waxhaswa ngothando nguThixo. Uthi: “Ndiye ndawabona ezaliseka la mazwi akweyabaseFilipi 4:13: ‘Ezintweni zonke ndinamandla ngenxa yalowo undomelezayo.’”

Amaxesha amaninzi, uYehova uThixo unikela inkxaso ngebandla lamaKristu. Ngokomzekelo uGail, ubalisa ngoncedo awalufumana kubazalwana noodadewabo bokomoya kwibandla lasekuhlaleni lamaNgqina kaYehova. Uthi uGail: “Uthando lwabo lwandinceda ndaphelisa udandatheko.” Ngendlela efanayo, xa uKeiko wabuzwa lo mbuzo, “Ngaba ikho into oyicingayo ebintle ebomini bakho?” waphendula ngelithi: “Ewe, luthando novelwano endilufumene ebandleni!”

Kwibandla lamaNgqina kaYehova, abaveleli bayakhokela ekunikeleni loo nkxaso. USetsuko uthi: “Ndiphelelwa ngamazwi okuchaza indlela okuvuyisa ngayo kumntu ogulayo xa abadala bemphulaphula baze bamthuthuzele.” Noko ke, njengoko uDaniel onesifo samathambo esikhumbuza, “abazalwana noodadewethu bokomoya banokusinceda kuphela xa sibavumela ukuba benjenjalo.” Ngoko ke, kubalulekile ukuba abo banesi sifo basoloko beqhagamshelana namaKristu abakhonza nawo, besenza konke okusemandleni abo ukuya kwiintlanganiso zebandla. (Hebhere 10:24, 25) Kulapho banokulufumana khona ukhuthazo lokomoya olunokubanceda banyamezele.

Ukubandezeleka Kuya Kuphela

Abo banesifo samathambo banombulelo kwabezamayeza ngenkqubela abaye bayenza ukuza kuthi ga ngoku. Noko ke, kwanolona nyango lusemgangathweni alukabi lulo olokwenene. Ekugqibeleni, abo banesi sifo banokufumana intuthuzelo engakumbi kwithemba likaThixo lehlabathi elitsha.b (Isaya 33:24; ISityhilelo 21:3, 4) Kwelo hlabathi “isiqhwala siya kutsiba njengexhama.” (Isaya 35:6) Isifo samathambo nazo zonke ezinye izifo ezithwaxa uluntu ziya kuphela ngonaphakade! UPeter, onesifo samathambo omqolo uthi: “Nangona ndikwimeko emaxongo kodwa likho ithemba.” Ibhinqa elingumKristu eligama linguGiuliana nalo lithi: “Suku ngalunye oludlulayo ndiba ngathi ndiphumelele idabi, usuku olunye ludlule ngaphambi kokufika kwesiphelo!” Ewe, alifikanga ligalelekile ixesha apho kungasayi kuphela isifo samathambo kuphela kodwa nako konke okunye ukubandezeleka!

[Imibhalo esemazantsi]

[Imifanekiso ekwiphepha 10]

Zininzi izixhobo zokunceda abanesi sifo bayenze kakuhle imisebenzi yabo

[Umfanekiso okwiphepha 12]

Inkxaso enothando inokufumaneka kwiintlanganiso zamaKristu