Igama LikaThixo Livusa Impikiswano

NGUMBHALELI KAVUKANI! ENETHERLANDS

ABAGUQULELI beBhayibhile entsha yesiDatshi baye bavusa impikiswano phakathi kwabaphengululi beBhayibhile namarhamente. Ube yintoni unobangela? Ube sisigqibo sabo sokusebenzisa igama elithi Heer, okanye Nkosi endaweni yegama likaThixo.

NgoDisemba 1998, iiveki nje ezimbalwa emva kokuba abaguquleli bepapashe isampulu yoko bakubhalileyo, iqela lamabhinqa eKerk en Wereld (ICawa Nehlabathi), umbutho wamaProtestanti, wafaka isikhalazo ngeleta. Wawukhalazela ntoni? Wawuvakalelwa kukuba igama elithi “Nkosi” lalibhekisela “kumadoda” kuphela. Kungekudala emva koko amanye amaqela—amaKatolika namaProtestanti—athelela kwesi sikhalazo. NgoFebruwari 1999, abaphengululi abathathu bavakalisa olwabo uluvo bathi bakhetha ukuguqulela oonobumba abane besiHebhere begama likaThixo ngendlela eqhelekileyo ethi YHWH. Kungekudala emva koko, abaphengululi beBhayibhile, abaguquleli kunye nabafundi bezakwalizwi bahlanganisana eAmsterdam ukuze baxubushe ngale nyewe. Ngaphambi nje kokuba kuqukunjelwe le ngxoxo, onke amaqela acelwa ukuba avotele igama afuna lisetyenziswe.

Phantsi komxholo othi “Ngenxa Yentlonelo NgoThixo, Makungaliwa Ngegama LikaThixo,” iphephandaba iNieuwsblad van het Noorden lachaza iziphumo: “Igama elithi NKOSI livotelwe ngabantu abasixhenxe kuphela. Kodwa namanye amagama amela uThixo akakhange afumane iivoti ezininzi: iGama (1), uNdinguye (3), uSolufefe (6), Ongabizwayo (7), Ophilayo (10) Ongunaphakade (15). Yaye eliphumelelayo lelithi . . . YHWH!” NgoMatshi 5, 2001, iKomiti Eliliso yabaguquleli beBhayibhile entsha igqibe kwelokuba isebenzise igama elithi HEER (NKOSI) ngoonobumba abancinane ukumela igama likaThixo.

Oku kuphikisana kubalaselisa ingongoma yokuba ngaphandle kwako nje ukungavisisani ngegama likaThixo elimele lisetyenziswe ngesiDatshi, abaphengululi bayavumelana ukuba uThixo unalo igama. NgesiHebhere igama lakhe libunjwa ngoonobumba besiHebhere abane, abangaba, יהוה, okanye YHWH. Iinguqulelo zeBhayibhile zesiDatshi zangaphambili nezikhoyo ngoku ziye zaliguqulela njani egama elithi YHWH?

Indoda engumDatshi uNicolaas Goetzee wapapasha uhlelo lweBhayibhile eyayixhaswa ngurhulumente iStaten eyaguqulelwa ngowe-1762. Kwiphepha elinomxholo yathi: “Kwakhona, ngenxa yezizathu ezivakalayo nezaziwayo, siye salishiya lingaguqulelwanga iGama likaThixo leSikhumbuzo elithi YEHOVA.” Bambi abaguquleli abadumileyo bamaDatshi—abanjengoNjingalwazi uNicolaas Beets noPetrus Augustus de Genestet—nabo baye basebenzisa igama elithi Yehova.

Okubangel’ umdla kukuba, INguqulelo Yehlabathi Elitsha YeZibhalo Ezingcwelea isebenzisa igama elithi Yehova kwiindawo ezifanelekileyo. Isihlomelo seNguqulelo Yehlabathi Elitsha yesiDatshi sithi “iyaqhubeka isebenzisa igama elithi ‘Yehova’ kuba abantu baqhelene neli gama kangangeenkulungwane. Ngaphezu koko, igcine . . . oonobumba abane begama likaThixo abangaba, YHWH.” Ngaloo ndlela INguqulelo Yehlabathi Elitsha iye yanceda izigidi zazi inyaniso ngegama likaThixo.

[Umbhalo osemazantsi]