Lisifumbathele Ntoni Ikamva?
UMNTU uyinxalenye nje yale ngxaki inkulu. Zonke izidalwa ezisemhlabeni zinendawo yazo, ngokwendima eziyinikwe nguThixo. Zininzi izinto esabelana ngazo nezidalwa ezisingqongileyo—ngaphezu kwako konke, ubomi ngokwabo. Ngenxa yesi sizathu, abantu abaninzi bayayiva ilahleko enkulu xa ezinye izinto eziphilayo ziphela.
Isazinzulu uAnthony C. Janetos, wathi xa wayebhala kwiphephancwadi iConsequences: “Abaninzi baya kuvuma ukuba njengebutho labantu sinembopheleleko yokukhusela indawo ehlala izinto eziphilayo kwesi sijikelezi-langa, nokulondoloza ubuncwane bezinto eziphilayo ngenxa yentlalo-ntle yangoku neyekamva yabantu. Ukuze senze loo nto kufuneka sikuqonde ukuxabiseka kwezinto eziphilayo ezahlukeneyo—indlela eziluncedo ngayo kwimvelo nendlela esinokuzisebenzisa ngayo—nokuzimisela ukuzilondoloza.”
Kwenziwa Ntoni Ngaloo nto?
Enyanisweni, inkxalabo yehlabathi lonke ngokuphela kwezinto eziphilayo yenze abameli bakarhulumente namanye amaziko adibanise iintloko aze enze Isindululo Esiphathelele Izinto Eziphilayo Ezahlukeneyo. Esi sivumelwano sithi ukulondolozwa kwezinto eziphilayo ezahlukeneyo kuxhalabisa wonke umntu.
Zithabatha inyathelo elingakumbi lokuqonda izinto eziphilayo ezahlukeneyo, izazi ngezinto eziphilayo ehlabathini lonke ziye zamisela unyaka wama-2001-2 njengeminyaka yeInternational Biodiversity Observation Year (IBOY). UDiana Wall, isazi ngezinto eziphilayo eColorado State University ongusihlalo weIBOY uthi: “Ukuhlola izinto eziphilayo ezahlukeneyo kuya kuza neengenelo ezininzi ngokuveliswa kweembewu ezintsha nemichiza enokusetyenziselwa amayeza, ukuphucula izityalo okanye ukuhlaziywa kwemihlaba engcolisiweyo.” Lo kaWall wongezelela ngelithi: “Okona kubaluleke ngakumbi kukuba, ukufumanisa indawo ehlala ezinye izinto eziphilayo, indima ezinayo kumanyano lwendalo nendlela esinokuzilondoloza ngayo kunokusinceda ekwenzeni izigqibo ezifanelekileyo ngokuphathelele umhlaba, imilambo neelwandlekazi.”
Kufuneka Utshintsho Olusisiseko
Nangona kuye kwenziwa inkqubela encomekayo, imigudu enjalo iye yalungisa iimpawu kunoonobangela. Ngokutsho kwabaphengululi, xa kungoku umntu akanaxesha laneleyo. Njengoko uRuth Patrick, weAcademy of Natural Sciences of Philadelphia, ePennsylvania, eUnited States, wayecinga ngoko wakubiza ngokuba “kukupheliswa kwezinto eziphilayo ezahlukeneyo,” waqukumbela ngelithi “ixesha lixhatshwe yinja . . . Kumele kunyathelelwe phezulu.” Ukuze kuliwe le nto yokuphela kwezinto, ngokukhawuleza imele ijongwe ngokutsha indlela umntu asiphatha ngayo esi sijikelezi-langa nezinto ezikuso. Kufanele kubhinqw’ omfutshane kulungiswa lo monakalo. IWorld Resources Institute ithi: “Ngoko ke, ingxaki yokulondoloza izinto eziphilayo ezahlukeneyo ayinakubekelwa bucala kwiingxaki eziphambili zenkqubela . . . yezentlalo.”
Ukufikelela olo sukelo kufuna utshintsho olusisiseko kwibutho labantu. Incwadi ethi Caring for the Earth ithi ukuze ikwazi ukufezwa kakuhle le ndima kufanele kubekho “imilinganiselo, ezoqoqosho nebutho labantu elahlukileyo kwelikhoyo namhlanje.”
IBhayibhile ibonisa ngokucacileyo ukuba abantu abanakukwazi ukubangela olo tshintsho. UYeremiya 10:23 uthi: “Ndazi kakuhle, Yehova, ukuba ayikho semntwini wasemhlabeni indlela yakhe. Asikokomntu ohambayo ukwalathisa inyathelo lakhe.” (IMizekeliso 20:24) Ngokuqinisekileyo le nyaniso yenziwe yacaca ukutyhubela imbali, yaye imiphumo yokutyeshela kwabantu lo mgaqo ibe ‘ngamaxesha amanqam ekunzima ukujamelana nawo’ ekuthethwe ngawo kweyesi-2 kuTimoti 3:1-5. Kwakhona olu ngcelele lweendinyana lusibonisa ukuba la maxesha amanqam abangelwa kukucinga phosakeleyo kwabantu. Ngenxa yoko, de abantu batshintshe, izicombululo kwiingxaki esinazo zezokwexeshana.
Xa kwakusenziwa udliwano-ndlebe nesazinzulu esidumileyo ehlabathini uGqr. Jane Goodall sathi ukutshatyalaliswa kwendawo yokuhlala “kusoloko kunxulumene nokubawa nokuthanda izinto eziphathekayo kumazwe asele ehambele phambili.” Yaye ingcaphephe ngezityalo uPeter Raven, owayesakuba ngusosiba weU.S. National Academy of Sciences, walumkisa ngelithi “ukungazi, ukungakhathali, ubuhlwempu nokubawa kubangela iingxaki ezithungelanayo ezisongela ngokutshintsha uMhlaba ube kwembi ingxaki.” Ngenxa yoko, eminye imilinganiselo ekufuneka itshintshiwe iquka ukuba ngoondim phambili, ukubawa, ukungazi, ukwenza phambi konyawo nokuzingca.
Ukukhuselwa Ngokupheleleyo Kwezinto Eziphilayo Ezahlukeneyo
Kuyaqondakala ukuba, uMdali wezinto eziphilayo ezahlukahlukeneyo ngendlela emangalisayo unomdla gqitha kwikamva lendalo yakhe. IBhayibhile isixelela ukuba kungekudala uThixo uya kuthabatha inyathelo ‘lokonakalisa abo bawonakalisayo umhlaba.’—ISityhilelo 11:18.
Ngaba uThixo uya kuzibuyisela ebomini izinto eziphilayo ezaphelayo ngenxa yokonakalisa komntu umhlaba? Ukuba uMdali unqwenela ukuba iindidi zezilwanyana eziphelileyo zibekho emhlabeni, ngokuqinisekileyo unokuphinda azidale kwikamva. Kunjalo ke nangezityalo ezingasekhoyo. Kodwa ekubeni iBhayibhile ingasixelelanga nto, bekungayi kuba bubulumko ukuziqhekez’ intloko ngaloo nto.
Siqinisekile ukuba ulawulo lukaThixo luya kuza neentsikelelo kuyo yonke into ephilayo emhlabeni. Umdumisi uthi: ‘Umhlaba mawuvuye. Malududume ulwandle noko kuluzalisileyo. Mayigcobe intsimi noko konke okukuyo. Kwangaxeshanye yonke imithi yehlathi mayimemelele ngovuyo.’—INdumiso 96:11, 12.