Ukuxhatshazwa Kwabantwana Kuza Kuphela Kungekudala!
INGABULA-ZIGCAWU yeConvention on the Rights of the Child, ithi “kwiThe Universal Declaration of Human Rights, iZizwe Ezimanyeneyo zathi umntwana unelungelo lokunyanyekelwa ngendlela ekhethekileyo nelokuncedwa.” Ngokuphathelele indlela ebaluleke ngayo intsapho, yongezelela ithi: “Ukuze akhule kakuhle, umntwana umele akhulele entsatsheni eyonwabileyo, enothando nokuqondana.” Ukanti, oku akwenzeki.
Ukuthetha nje kukodwa ngehlabathi elifanelekileyo lokukhulisa abantwana akwanele. Imilinganiselo yokuziphatha iwohloka ngendlela engathethekiyo, yaye abantu abaninzi bakugqala oku njengento eqhelekileyo. Imithetho yabantu ayinakukuthintela ukonakala nokubawa kwabantu okugqugqisileyo. Kunokuba babathande baze babakhusele abantwana babo, nabazali basoloko befak’ isandla kulo vula-zibhuqe. Ngoko ke, ngaba likho ithemba lokuba ukwenziwa kwabantwana oonongogo kuya kuze kupheliswe?
Nangona le nkqubo yonakeleyo iye yasilela ukuqinisekisa ukuba bonke abantwana bakhulela kwikhaya elinothando yaye bafumana ikamva elinqabisekileyo, kungekudala uMdali wethu uza kuphelisa bonke ubungendawo nokuziphatha okubi, kuquka ukwenziwa kwabantwana oonongogo. Nangona ihlabathi lingakuqondi oko, kungekudala uYehova uThixo uza kungenelela kwimicimbi yoluntu esebenzisa uBukumkani bakhe. Abantu abonakeleyo nabantu abaxhaphaza abanye abayi kusinda kumgwebo kaThixo. Ngabantu abathanda abanye kuphela abaya kusinda baze bahlale kwihlabathi elitsha likaThixo. “Abathe tye bona baya kuhlala emhlabeni, nabangenakusoleka baya kusala kuwo. Bona ke abangendawo, baya kunqunyulwa emhlabeni; ke wona amaqhophololo, aya kuncothulwa kuwo.”—IMizekeliso 2:21, 22.
Khawufan’ ucinge nje indlela ekuya kuba mnandi ngayo xa abantwana nabantu abadala beya kukwazi ukunandipha ubomi kungekho mntu ubaphatha kakubi nobaxhaphazayo ngokwesini! Nkqu nokudandatheka nokwenzakala emzimbeni okubangelwa kukuxhatshazwa nogonyamelo kuya kube kuyinto yezolo. Abo babengamaxhoba okuxhatshazwa ngokwesini baya kuyeka ukucinga ngezinto ezabehlelayo okanye imiphumo yazo. “Izinto zangaphambili aziyi kukhunjulwa, zinganyuki zithi qatha entliziyweni.”—Isaya 65:17.
Ngoko ke, akukho mntwana uya kuzalwa aze aphathwe kakubi okanye axhatshazwe ngokwesini. Ulonwabo, uthando nokuqondana akuyi kuba liphupha nje kuphela. Ngokuphathelele abemi behlabathi elitsha likaThixo, uIsaya 11:9 uthi: ‘Abayi kwenzakalisa okanye bonakalise.’
Ngokwenene, kuya kubakho uvuyo olungathethekiyo xa ubuhlwempu, ukusetyenziswa kakubi kweziyobisi, iintsapho ezingonwabanga, nokuziphatha okubi ziya kuba zingasekho! Kuya kulawula uxolo, ubulungisa nonqabiseko. “Abantu bam baya kuhlala kwindawo yokuhlala enoxolo nakwiindawo zokuhlala zentembelo epheleleyo nakwiindawo zokuphumla ezingaphazamisekiyo.”—Isaya 32:18.
[Ibhokisi/Imifanekiso ekwiphepha 9]
Inyameko Yabazali Inokukuthintela Ukuqhekeka Kweentsapho
● “Abazali bam bandikhuthaza ukuba ndiyisebenzise ngobulumko iminyaka endandisesikolweni ngayo ndize ndiqeqeshelwe umsebenzi othile. Abazange bandinyanzele ukuba ndenze into efunwa ngabo, kodwa bandinceda bandikhuthaza ukuba ndifunde kwizikolo ezinezo zifundo ndizifunayo.”—UTais.
● “Xa mna nodadewethu sisiya evenkileni, umama wayehamba nathi. Wasinceda wasifundisa ukuba songe size singathengi iimpahla ezinobugocigoci obuninzi okanye eziveza umzimba.”—UBianca.
● “Xa sisiya kumatheko okuzonwabisa, abazali bam babedla ngokubuza ukuba kuza kube kukho bani apho, kuza kudlalwa umculo onjani yaye elo theko liza kuqala nini lize liphele nini. Kumatheko amaninzi sasidla ngokuya sonke njengentsapho.”—UPriscila.
● “Xa ndandilusana naxa ndandikwishumi elivisayo, ndandidla ngokuncokola nangantoni na nabazali bam. Omnye endandifunda naye wakuphawula oko waza wathi: ‘Ndiyayithanda indlela oncokola ngokukhululeke ngayo nabazali bakho. Mna andikwazi ukuncokola nomama yaye xa kukho into endifuna ukuyazi, ndidla ngokuyibuza kwabanye abantu.’”—USamara.
● “Ndandonwabe gqitha xa ndandikwishumi elivisayo. Ndandingaboni nto imbi kwabanye abantu yaye ndandisoloko ndihleka. Ndandiziva ndikhululekile xa ndiphakathi kwabahlobo bam yaye ndandikuvuyela ukuncokola nabo ngezinto ezihlekisayo. Abazali bam babeqonda ukuba yindlela endiyiyo leyo yaye abazange bafune ukunditshintsha. Kodwa ngobubele, bandinceda bandibonisa ukuba ndifanele ndilumke ndize ndibe ngolungeleleneyo ngokuphathelele abantu besini esahlukileyo.”—UTais.
● “Njengenkoliso yabantu abaselula, ndaba nomdla kubantu besini esahlukileyo. Utata wandixelela ukuba ndimele ndiqalise ukwenza amadinga xa ndingakanani. Oko akuzange kundikhathaze. Kunoko ndaqonda ukuba abazali bam bandikhathalele yaye bafuna ukundikhusela kwiingozi endinokuhlangabezana nazo.”—UBianca.
● “Ngenxa yomzekelo omhle wabazali bam, umtshato ndandiwugqala njengento eyonwabisayo. Babenolwalamano oluhle yaye bencokola ngokukhululekileyo. Ndikhumbula ukuba xa ndandisenza amadinga, umama wandicebisa ngendlela endifanele ndiziphathe ngayo nendlela oko ekwakuza kuwuchaphazela ngayo umtshato wam.”—UPriscila.
[Umfanekiso okwiphepha 10]
Kwihlabathi elitsha likaThixo, akukho mntwana uya kuze aphathwe kakubi