Abantu Abaselula Bayabuza . . .
Yintoni Ephosakeleyo Ngokukopa?
“Wonk’ umntu uyazi ukuba ukukopa kuphosakele, kodwa yeyona ndlela ilula.”—UJimmy, oneminyaka eli-17 ubudala.
NGABA wakha wazama ukukopa kumntu ofunda naye eklasini xa nibhala iimviwo? Ukuba kunjalo, akuwedwa. UJenna, okwibanga le-10, uthetha ngabantwana abaninzi afunda nabo eklasini abangenantloni zokukopa: “Baqhayisa ngendlela abakwenza ngayo oku,” itsho njalo le ntwazana. “Bakuthela nqa xa ungakopi!”
Kolunye uhlolisiso olwenziwa eUnited States, ama-80 ekhulwini olutsha olukwishumi elivisayo olufumana amanqaku aphezulu eklasini lwavuma ukuba luyakopa, yaye abangama-95 ekhulwini kwaba “ngqondo-ngqondo” abazange babhaqwe. Emva kokwenza uhlolisiso kubafundi abangaphezu kwama-20 000, abakumabanga aphakathi nabakumabanga aphakamileyo, iJosephson Institute of Ethics yafikelela kwesi sigqibo: “Ngokuphathelele ukunyaniseka nokuthembeka, izinto ziya zisiba mbi ngokuba mbi.” Abahlohli bothuswa kukubona indlela ekuxhaphake ngayo ukukopa kwabafundi! UGary J. Niels, oyinqununu yesikolo wada wathi: “Abona bambalwa ngaba bangakopiyo.”
Abazali abaninzi balindele ukuba abantwana babo bawenze kakuhle umsebenzi wabo wesikolo. Noko ke, ngelishwa bayayityeshela imilinganiselo yabo yokunyaniseka, ngokukopa. Ziziphi iindlela ezintsha abazisebenzisayo? Kutheni olunye ulutsha lubhenela ekukopeni? Kutheni ufanele uwuphephe lo mkhwa?
Ukukopa Ngokusebenzisa Izixhobo Zobugcisa
Abantwana abakopayo namhlanje basebenzisa iindlela ezahlukahlukeneyo. Eneneni, ukukopa umsebenzi owenzelwa ekhaya okanye ukufumana intluva akuyonto xa kuthelekiswa neendlela ezichuliweyo zokukopa ezisetyenziswa namhlanje. Basebenzisa iipager ukuze babuze iimpendulo kubantu abakwenye iindawo ekude; iicalculator ezinenkcazelo “engakumbi”; iikhamera ezincinane ezifihlwe ezimpahleni, ukuze babuze ngazo imibuzo kumntu okwenye indawo; izixhobo ezisebenza ngelitha elibomvu ezidlulisela umyalezo kubafundi abaseklasini; kwanamajelo e-Internet aneempendulo phantse zazo zonke izifundo!
Abahlohli bayazama ukuphelisa ukukopa, kodwa le asiyondlwan’ iyanetha. Ngapha koko, asingabo bonke abafundi—okanye abafundisi-ntsapho—abavumelanayo kumba wokukopa. Ngokomzekelo, xa iqela labafundi lisenza umsebenzi othile wesikolo, umahluko phakathi kwentsebenziswano nokuqhathana usenokungabonakali kakuhle. Kuphinde kubekho abo basebenzisa amathuba xa kusetyenzwa njengeqela, bona balale emqokozweni. UYuji ongumfundi wakwanokholeji uthi: “Abanye baba bafundi bangamanqenerha—abafuni kwenza nto!” “Emva koko bafumana amanqaku alingana nawabanye. Ndicinga ukuba noko kukukopa!”
Yintoni Ebangela Ukuba Bakope?
Kolunye uhlolisiso, kwaboniswa ukuba esona sizathu siphambili sibangela ukuba abafundi abaninzi bakope kukungazilungiseleli kwangaphambili. Abanye abafundi, babangelwa ngumoya wokhuphiswano osesikolweni okanye ngabazali abalindele ukuba abantwana babo baphume emagqabini, bafikelela kwisigqibo sokuba ayikho enye indlela abanokwenza ngayo. USam oneminyaka eli-13 ubudala uthi: “Akukho nto ibaluleke njengokufumana amanqaku aphezulu kubazali bam. Baye bandibuze: ‘Ufumene amanqaku amangaphi kwizibalo? Ufumene amanqaku amangaphi kwiphepha lesiNgesi?’ Ndiyayicaphukela ke loo nto!”
Abanye babhenela ekukopeni kuba besoloko bephenjelelwa ukuba bafumane amanqaku aphezulu. Incwadi ethi The Private Life of the American Teenager ithi: “Kukho ukungalungelelani kule nkalo, xa abafundi besoloko bephenjelelwa ukuba bafumane amanqaku aphezulu abakunandiphi nokufunda kuba eyona nto iphambili ikhuthazwayo kukufumana amanqaku aphezulu, maxa wambi oko kude kwenze umfundi anganyaniseki.” Abafundi abaninzi bayavumelana kule nkalo. Ngapha koko, akukho mntu ufuna ukungapasi xa kubhalwa uviwo. UJimmy ofunda kwisikolo samabanga aphakamileyo uthi: “Abanye abantu baye boyike kakhulu bacinge ukuba abazukupasa. Kwanokuba bayazazi iimpendulo, bayakopa ukuze baqiniseke ukuba iimpendulo zabo zichanile.”
Kuba bebaninzi abantu abalalanisayo kwimilinganiselo yokunyaniseka, ukukopa kusenokubonakala kungeyongozi. Yaye maxa wambi kusenokubonakala kuyingenelo. UGreg oneminyaka eli-17 ubudala uthi: “Izolo eklasini ndibone omnye umntwana ekopa xa besibhala uviwo. Namhlanje xa utitshala ebuyisa amaphepha ethu, uye wafumana amanqaku angaphezu kwawam.” Abanye baphenjelelwa kukuba bebaninzi oontanga babo abakopayo. UYuji uthi: “Abanye abafundi bavakalelwa kukuba ‘ukuba abanye bayakopa, nam ndimele ndikope.’” Kodwa ngaba yinyaniso leyo?
Umgibe Okhohlisayo
Thelekisa ukukopa nobusela. Ngaba ngenxa yokuba bebaninzi abantu ababhenela ebuseleni loo nto yenza ubusela bamkeleke? ‘Kakade akunjalo,’ usenokutsho—ingakumbi ukuba yimali yakho le ibiwayo! Xa sikopa, sithabathela kuthi uzuko olungasifanelanga—mhlawumbi side sixhaphaze abo banyanisekileyo. (Efese 4:28) UTommy osandul’ ukuphumelela kwisikolo samabanga aphakamileyo uthi: “Ayilunganga le nto. Uthi, ‘Ndiyazazi ezi zifundo,’ ukanti eneneni akuzazi. Ngaloo ndlela uyaxoka.” Ngokuphathelele lo mba, kumaKolose 3:9 iBhayibhile ithi ngokucacileyo: “Musani ukuxokisana.”
Ukukopa kunokumkhobokisa umntu yaye kusenokuba nzima ukwahlukana nako. UJenna uthi: “Abantu abakopayo bayaqonda ukuba akukho mfuneko yokuba bafunde ukuze bapase, ngenxa yoko baxhomekeka ekukopeni. Yaye xa kungekho mntu banokuxhomekeka kuye abakwazi kuzimela.”
Umgaqo ofumaneka kumaGalati 6:7, wenza ubani azikis’ ukucinga: “Loo nto ayihlwayelayo umntu, uya kuvuna kwayona.” Ukukopa esikolweni kunokubangela ukuba umntu abe nesazela, angathenjwa ngabahlobo bakhe, yaye kunokudodobalisa ingqondo ingakwazi ukufunda ngenxa yokungaqheli ukufunda. Ngokufanayo nomhlaza obulalayo, ukuziqhelisa ukukhohlisa kunokuchaphazela nezinye iinkalo zobomi kuze konakalise ulwalamano oluxabisekileyo. Ngokuqinisekileyo, kuya kuluchaphazela ulwalamano lwakho noThixo, ongayithandiyo inkohliso.—IMizekeliso 11:1.
Abo baxhomekeke ekukopeni bayazikhohlisa. (IMizekeliso 12:19) Ngendlela abenza ngayo bafana nabalawuli abanganyanisekanga besixeko samandulo saseYerusalem: “Senze ubuxoki baba yindawo yethu yokusabela yaye sizifihle ngokuxoka.” (Isaya 28:15) Noko ke, enyanisweni umntu okopayo akanakumfihlela uThixo oko akwenzayo.—Hebhere 4:13.
Musa Ukukopa!
Kwiimeko ezininzi ulutsha lwenza imigudu luze lusebenzise ubuchule obuninzi ukuze lukwazi ukukopa—buchule obo belunokubusebenzisa ekufundeni ngaphandle kokusebenzisa inkohliso. Njengoko uAbby oneminyaka eli-18 ubudala esitsho, “ukuba bebenokwenza imigudu yokufunda efana naleyo bayenzayo xa bekopa, mhlawumbi bebeya kufumana amanqaku aphezulu.”
Kuyavunywa ukuba, umnqweno wokufuna ukukopa usenokuba namandla. Kodwa umele uwuphephe lo mgibe! (IMizekeliso 2:10-15) Unokukwenza njani oku? Okokuqala, khumbula isizathu sokuba ube sesikolweni—uze kufunda. Enyanisweni, kusenokubonakala kungeyongenelo kangako ukuqokelela ulwazi ekusenokwenzeka ukuba akusokuze ulusebenzise. Kodwa xa umntu ebhenela ekukopeni, unokudodobalisa ingqondo yakhe ingakwazi ukufunda izinto ezintsha aze angakwazi ukusebenzisa ulwazi oluyingenelo kuye. Ukuze ukwazi ukuqonda okuthile kufuneka uzibhokoxe. IBhayibhile ithi: “Thenga inyaniso, ungathengisi ngayo—ubulumko, ingqeqesho nokuqonda.” (IMizekeliso 23:23) Ewe, kufuneka ugqale ukufunda nokulungiselela njengento enzulu. “Kufuneka uwenze umsebenzi wakho,” ucebisa ngelitshoyo uJimmy. “Oko kuya kukwenza uqiniseke ukuba uyazazi iimpendulo.”
Liyinyaniso elokuba, maxa wambi usenokungazazi zonke iimpendulo, yaye oku kusenokubangela ukuba ufumane amanqaku aphantsi. Sekunjalo, ukuba akulalanisi kwimigaqo yakho, unokuyibona into omawuyenze ukuze uphucule.—IMizekeliso 21:5.
UYuji, okhankanywe ngaphambilana, ngomnye wamaNgqina kaYehova. Uchaza oko akwenzayo xa abo afunda nabo bemphembelela ukuba akope: “Okokuqala—ndiyabaxelela ukuba ndiliNgqina,” utsho njalo lo mfana. “Oko kuluncedo kakhulu kuba bayazi ukuba amaNgqina kaYehova ngabantu abanyanisekileyo. Xa umntu esithi mandimxelele impendulo xa sibhala uviwo, ndiye ndale. Kamva, ndiyamxelela isizathu sokuba ndingavumi.”
UYuji uyavumelana namazwi kampostile uPawulos awawathetha kumaHebhere: “Sinqwenela ukuziphatha ngokunyaniseka kwizinto zonke.” (Hebhere 13:18) Ukunamathela kwakho kwimilinganiselo ephakamileyo yokunyaniseka nokungavumi ukukopa kubangela ukuba amanqaku amahle owafumanayo axabiseke ngokwenene. Xa uvela esikolweni, uphathela abazali bakho esinye sezipho ezixabisekileyo onokubapha zona—ubungqina bokuba ugqibelele njengomKristu. (3 Yohane 4) Ngaphezu koko, uhlala unesazela esicocekileyo yaye uvuyiswa kukwazi ukuba uvuyisa intliziyo kaYehova uThixo.—IMizekeliso 27:11.
Noko ke, kungakhathaliseki ukuba kuyinto exhaphake kangakanani na ukukopa, wena musa ukukopa! Ngokwenjenjalo, uya kulondoloza ulwalamano lwakho nabanye, yaye okubaluleke ngakumbi, uya kulondoloza ulwalamano lwakho noThixo wenyaniso, uYehova.—INdumiso 11:7; 31:5.
[Amagama acatshulweyo akwiphepha 22]
Ngokufuthi, umntu okopayo udla ngokungaqondi ukuba uyeba
[Amagama acatshulweyo akwiphepha 22]
Ngokufuthi, ukukopa kubangela ukuba umntu abandakanyeke nakwezinye izenzo ezinzulu zokunganyaniseki
[Amagama acatshulweyo akwiphepha 23]
Umntu okopayo akanakumfihlela uThixo oko akwenzayo
[Umfanekiso okwiphepha 23]
Ukufundisisa ngaphambi kokuba ubhale uviwo kuya kukwenza uqiniseke ngento oyenzayo