Ukubonisa Uthando Ngamaxesha Anzima
NGUMBHALI KAVUKANI! ENIGERIA
ICAWA, umhla kaJanuwari 27, 2002, yabizwa ngokuba yiCawa Yobusuku Obungenanyanga eLagos, eNigeria. Ugqabhuko-dubulo olwenzeka kwindawo yokugcina izixhobo engaphantsi komhlaba lwatsho kwashukuma umhlaba kuso sonke eso sixeko kwalephuza namadangatye. Kangangeeyure eziliqela, iingceba zezo bhombu zazintinga emoyeni kumgama weekhilomitha ezintathu yaye loo nto yabatsho banxunguphala abemi beso sixeko.
Kwasasazeka amarhe awabenza bonyukelwa zizibilini abantu. Izitrato zazaliswa ngabantu ababesoyika bebaleka kodwa bengazi neyona bayibalekayo bengazi nalapho baya khona. Ngobo busuku, amakhulu abantu kuquka abantwana abaninzi ababetyhwatyhwa baya kuziphosa kumjelo wamanzi barhaxwa bafa. Olo gqabhuko-dubulo lwatshabalalisa lwaza lonakalisa izindlu, izikolo nezakhiwo zamashishini, yaye amawaka abantu asala engenandawo yakufihla intloko nomsebenzi. Kuqikelelwa ukuba ngabantu abali-1 000 abaphulukana nobomi kuloo ntlekele. Kamva lanyuka elo nani.
Kamva kwafunyanywa iibhombu neerocket ezingekadubuli ezimalunga ne-1 350 kwimizi ekufuphi nendawo yokugcina izixhobo zomkhosi apho lwenzeka khona olu gqabhuko-dubulo. Enye indoda yafumana isixhobo esenziwe ngesinyithi kwigumbi layo lokuhlala. Ingazi ukuba yibhombu, yasithabatha yasifaka kwinqwelo-mafutha yayo yasisa kwabasemagunyeni.
Yakuba ivile ngolu gqabhuko-dubulo, iofisi yesebe yamaNgqina kaYehova eNigeria yakhawuleza yaqhagamshelana nomnye umdala waseLagos yaza yayalela abaveleli abahambahambayo abali-16 ukuba bahlole imeko yamaNgqina aseLagos amalunga nama-36 000. Yathumela isigidi seenaira (malunga ne-R100 000) yaza yayalela ukuba kusekwe ikomiti yohlangulo eyayiza kunceda amaxhoba.
Ngenxa yolo gqabhuko-dubulo, kwenzakala enye indoda eliNgqina; kwafa oodade ababini; kwaza kwabakho umonakalo kwiiHolo zoBukumkani ezimbini nakwimizi yeentsapho ezingama-45.
Kwiintsuku ezintandathu emva kolo gqabhuko-dubulo, ngoFebruwari 2, 2002, kwaqhambuka iingxwabangxwaba zobuhlanga kwimimandla eyahlukahlukeneyo yeso sixeko. Ngokutsho kweRed Cross, kwezo ngxwabangxwaba kwafa abantu abali-100, kwenzakala abangama-430, abangama-3 000 baphulukana namakhaya abo yaye kwatshiswa izindlu ezingama-50. Ikomiti yohlangulo eyayinyamekela amaxhoba ‘eCawa Yobusuku Obungenanyanga’ yakhawuleza yakhangela abazalwana abangamaKristu abakuloo mmandla.
Kwakungekabikho Ngqina lifileyo njengoko inkoliso yawo yayikwindibano yesiphaluka xa kwakuqalisa loo ngxwabangxwaba. Noko ke, abantu abakumabandla amahlanu akuloo ndawo bafika bengenazindlu. Ngokukhawuleza, abazalwana abangamaKristu abanika indawo yokufihla intloko. Omnye ugqirha oliNgqina kunye nomfazi wakhe bavula ikhaya labo ukuze kuhlale abantu abangenamakhaya abangama-27.
AmaNgqina aseLagos angazange achatshazelwe lolo gqabhuko-dubulo nezi ngxwabangxwaba anikela ngokutya, impahla yokunxiba nempahla yendlu. Umveleli wesixeko wathi: “Abazalwana baseLagos banikele ngezinto ezininzi ngakumbi kunezo zifunwa ngamaxhoba ezi ntlekele.” Kwade kwafuneka ukuba iofisi yesebe ibhalele amabandla icele ukuba ayeke ukunikela ekubeni zazanele izinto ezifunekayo. Izinto eziseleyo ezazizalise iilori ezintathu zaya kugcinwa kwiofisi yesebe.
Abadala bebandla batyelela amaxhoba amaninzi neentsapho zabo bafileyo. Bazama ukuzithuthuzela besebenzisa iZibhalo. Ikomiti yohlangulo yalungiselela ukuba kulungiswe amakhaya onakeleyo. Yanika amaxhoba ezo ntlekele impahla yendlu, yokunxiba nokutya yaza yafunela abo bangenamakhaya indawo yokuhlala. Le komiti yanceda iintsapho ezingama-90 nabanye abantu abaliqela.
Amaxhoba amaninzi achukumiseka gqitha luncedo alufumeneyo. Elinye iNgqina lathi kumalungu ekomiti yohlangulo: “Lo gama nje ndisadla amazimba, uYehova ndiza kumenza ‘indawo yokusabela namandla am’!”—INdumiso 46:1, 2.
Abantu abangengawo amaNgqina bayibona indlela anyamekelana ngayo amaNgqina kaYehova ngamaxesha anzima. Umalume welinye iNgqina elafayo kuloo ntlekele wathi kubadala bebandla lomtshana wakhe: “Ndiza kuphinda ndize kunibulela ngokusuka emazantsi entliziyo yam nokuze ndifunde okungakumbi.” Wafika wathi kwintsapho yakhe: “Intle gqitha into endiyibone eLagos. Nditsho nezalamane azikhange ziyenze into eyenziwe ngaba bantu.”
[Umfanekiso okwiphepha 13]
Ilori ezele ntli zizinto zoncedo
[Umfanekiso okwiphepha 13]
Abanye babantu abancedwayo
[Umfanekiso okwiphepha 14]
Esi sibini sanceda abantu abangama-27 ababengenandawo yokufihl’ intloko
[Umfanekiso okwiphepha 14]
AmaNgqina alungisa amakhaya onakeleyo
[Inkcazelo Ngomfanekiso okwiphepha 13]
Top: Sam Olusegun-The Guardian