Imbono YeBhayibhile
Ngaba Uthethathethwano Lunokuzisa Uxolo Ehlabathini?
NGABA uya kulangazelela ukuphela kwazo zonke iimfazwe? Ngokuqinisekileyo kumele kuthethathethwane ukuze kuconjululwe ungquzulwano oluphakathi kwelizwe elithile namazwe ngamazwe. Abantu abaninzi bavakalelwa kukuba ukuba iinkokeli zehlabathi bezinokusebenza ngaxhathalinye, iimfazwe beziya kuphela. Mhlawumbi, uye wadaniswa yimiphumo yothethathethwano. Sele iziinkulungwane oonozakuzaku betyikitya izivumelwano, befikelela kwizigqibo, bebamba neengqungquthela kodwa zimbalwa kakhulu izinto eziye zaconjululwa ngokusisigxina.
IBhayibhile ithetha kakhulu ngothethathethwano noxolo. Iphendula le mibuzo ilandelayo: Zintoni ezithintela uthethathethwano ekubeni luvelise uxolo? Ngaba amaKristu afanele abe nenxaxheba kulo? Lunokubakho njani uxolo oluhlala luhleli?
Yintoni Ethintela Uxolo?
Iingxelo eziliqela zeBhayibhile zibonisa indlela uthethathethwano olunokuluzisa ngayo uxolo. Ngokomzekelo, uAbhigali weyisela uDavide nomkhosi wakhe ukuba bangaziphindezeleli kwabendlu yakhe. (1 Samuweli 25:18-35) UYesu wenza umzekeliso wokumkani owathuma igqiza loonozakuzaku ukuba baye kucela uxolo. (Luka 14:31, 32) Ewe, iBhayibhile iyavuma ukuba intlobo ezithile zothethathethwano zinokukulungisa ukungaboni ngasonye. Kodwa, kutheni uthethathethwano ludla ngokungaphumeleli?
IBhayibhile yaxela kwangaphambili ngokuchanileyo ukuba amaxesha ethu ayeya kuzaliswa ziinkathazo. Ngenxa yempembelelo engendawo kaSathana uMtyholi, abantu babengayi ‘kuyifuna kwaphela imvisiswano, beziindlobongela, abangathandi kulunga, abangcatshi, abaneentloko ezilukhuni, abakhukhumele likratshi.’ (2 Timoti 3:3, 4; ISityhilelo 12:12) Ukongezelela, uYesu waprofeta wathi isiphelo sale nkqubo yezinto sasiya kubonakala “ngeemfazwe neengxelo zeemfazwe.” (Marko 13:7, 8) Ngubani onokukhanyela ukuba iimfazwe zigqugqisile? Ekubeni kunjalo, ngaba kuyamangalisa ukuba amalinge okwenza uxolo phakathi kwezizwe edla ngokuphanza?
Kwakhona, uze ukhumbule ukuba: ngoxa oonozakuzaku besenokuzama ngazo zonke iindlela ukuphepha ungquzulwano, eyona njongo iphambili yomntu ngamnye kukuthenga emithiyo ngenethole. Leyo yeyona njongo iphambili yothethathethwano lwezopolitiko. Ngaba amaKristu afanele abe nenxaxheba kwizinto ezinjalo?
AmaKristu Nothethathethwano
IBhayibhile icebisa isithi: “Musani ukukholosa ngezidwangube, nangonyana womntu wasemhlabeni, lowo ungenalo usindiso.” (INdumiso 146:3) Oku kuthetha ukuba enoba ziyintoni na iintshukumisa zabo, oonozakuzaku behlabathi abanabo ubuchule okanye amandla okuzisa isicombululo esiya kuhlala sihleli.
Xa uYesu wayevavanywa nguPontiyo Pilato, wathi: “Ubukumkani bam abuyonxalenye yeli hlabathi. Ukuba ubukumkani bam bebuyinxalenye yeli hlabathi, abalindi bam bebeya kulwa ukuze ndinganikelwa kumaYuda. Kodwa ubukumkani bam abusuki kulo mthombo.” (Yohane 18:36) Iinzame zokuzisa uxolo zidla ngokuthintelwa yintiyo yobuhlanga nokuzingca kwezobupolitika. Ngenxa yoko, amaKristu okwenyaniso ayakuphepha ukubandakanyeka kwiimbambano zehlabathi nothethathethwano.
Ngaba oku kuthetha ukuba amaKristu akakhathali yaye akanamdla kwimicimbi yehlabathi? Ngaba akazikhathalelanga izinto ezenza abantu babandezeleke? Akunjalo. Ngokwahlukileyo koko, iBhayibhile ichaza abanquli bokwenyaniso bakaThixo njengabantu “abancwinayo nabagcumayo” ngenxa yezinto ezimbi ezenzekayo. (Hezekile 9:4) AmaKristu athembele kuThixo ukuba azise uxolo njengoko ethembisile. Ngaba ukuphela kwemfazwe kuthetha uxolo kuwe? Ngokuqinisekileyo uBukumkani bukaThixo buya kukwenza oko. (INdumiso 46:8, 9) Ukongezelela, buya kuqinisekisa ukuba kukho ukhuseleko nokuba bonke abantu abahlala emhlabeni baya konwaba. (Mika 4:3, 4; ISityhilelo 21:3, 4) Uxolo olukumgangatho ophezulu ngolo hlobo alunakuze lufumaneke ngothethathethwano okanye ngemigudu yeentlangano zabantu “zokugcina uxolo.”
Isiprofeto seBhayibhile namava exesha elidluleyo abonisa ngokucacileyo ukuba ukukholosa ngothethathethwano olwenziwa ngabantu ukuze kubekho uxolo kunokuphumela ekudaneni. Abo bathembele kuYesu Kristu baze baxhase uBukumkani bukaThixo baza kuwubona uzalisekiswa umnqweno wabo wokufumana uxolo lokwenene. Ukongezelela koko, baya kulunandipha ngonaphakade!—INdumiso 37:11, 29.
[Amagama acatshulweyo akwiphepha 15]
Enoba ziyintoni na iintshukumisa zabo, oonozakuzaku behlabathi abanabo ubuchule okanye amandla okuzisa isicombululo esiya kuhlala sihleli
[Inkcazelo Ngomfanekiso okwiphepha 14]
Ngezantsi: Photo by Stephen Chernin/Getty Images