Abantu Abaselula Bayabuza . . .

Ndinokuphumelela Njani Njengesithethi?

“Yayingathi abantu bayabona xa ndisenza impazamo naxa ndisoyika. Ndandingakwazi ukunikel’ ingqalelo kwinto endiyithethayo. Ndandivakalelwa kukuba bayandihleka.”—USandy.a

IHOLO enkulu yesikolo izel’ imi ngeembambo. Kubizwa igama lakho aze onke amehlo athi ntsho kuwe. Loo mgama mfutshane wokuya eqongeni ukhangeleka ngathi ziikhilomitha ezininzi. Izandla zakho ziyabila, amadolo agevezele uze umlomo wome. Ubila ube lithontsi. Hayi indlela okuziintloni ngayo oku! Iba ngathi umi phambi kweqela lamajoni aza kukudubula ufe.

Simele sivume ukuba: Uninzi lwethu alukuthandi ukuthetha phambi kwabanye abantu. (Yeremiya 1:5, 6) Bambi bade bathi baxolele ukufa kunokuthetha phambi kwabanye! Noko ke, nokuba ukoyika kangakanani na ukuthetha phambi kwabanye, kukho izizathu ezibambekayo zokuba ube nomdla kulo mbandela. Makhe siqwalasele ezinye zazo nendlela onokuphumelela ngayo njengesithethi.

Xa Kufuneka Uthethe Phambi Kwabanye

“Wonk’ umntu kufuneka abe nobuchule bokuthetha phambi kwabanye.” Sitsho njalo isibhengezo sezifundo zokuthetha phambi kwabanye. Ewe, ngeny’ imini kuza kufuneka uthethe phambi kwabanye. Kwizikolo ezininzi kubakho amaxesha axa abafundi kufuneka bathethe phambi kwabanye. Ibhinqa eliselula elinguTatiana lithi: “Zininzi izihlandlo ekwakufuneka ndithethe ngazo phambi kwabanye abafundi.” Kudla ngokufuneka abafundi bathethe ngencwadi abayifundileyo, bathethe nabanye abafundi besebenzisa izinto ezahlukahlukeneyo okanye babandakanyeke kwiingxubusho.

Xa sele usebenza, usenokucelwa ukuba ufundise iqela labasebenzi, uthengise into ethile, okanye ucacise ingxelo yemali kubaphathi. Enyanisweni, imisebenzi emininzi ifuna ube nobuchule bokuthetha, njengaxa usebenza kumajelo eendaba, ungumphathi, ummeli okanye umthengisi.

Noko ke, kuthekani ukuba ukhetha ukuba ngumsebenzi nje oqhelekileyo okanye ukuba ngunobhala? Nalapho, ukuwufumana kwakho umsebenzi kuxhomekeke ekukwazini kwakho ukuzithethela. Ukukwazi ukuzithethela kunokukunceda naxa sele usebenza. Emva kokugqiba kwakhe isikolo, uCorrine wasebenza kangangeminyaka emithathu njengeweyitala. Uthi: “Xa ukwazi ukuzithethela, abantu bakugqala njengomntu okhulileyo okwaziyo ukusingatha iimbopheleleko. Usenokude ufumane umsebenzi obhetele, umvuzo oncumisayo okanye intlonelo.”

Okokugqibela, kudla ngokufuneka ukuba amaKristu aselula athethe nabanye ngonqulo lwawo. (Hebhere 10:23) UTaneisha uthi: “Kubalulekile ukuba ukwazi ukuthetha into evakalayo. Sinelungelo elingathethekiyo lokushumayela iindaba ezilungileyo zoBukumkani bukaThixo.” (Mateyu 24:14; 28:19, 20) AmaKristu aselula ‘akayeki ukuthetha ngezinto azibonileyo nazivileyo’ ebandleni nakubulungiseleli bawo.—IZenzo 4:20; Hebhere 13:15.

Ngoko ukufunda ubuchule bokuthetha kunokukunceda ngeendlela ezahlukahlukeneyo. Sekunjalo, usenokuziva umadolw’ anzima ukuthetha phambi kwabanye. Ngaba ikho into enokukunceda woyise olo loyiko? Ewe, ikho.

Ukoyisa Uloyiko

UGqr. Morton C. Orman onceda abantu boyise uloyiko nosisithethi esivunyiweyo uthi: “Akuyomfuneko ukuba ube sisilumko okanye ube ungumntu ofezekileyo ukuze uphumelele. Injongo yokuthetha nabanye abantu yile: kukudlulisela inkcazelo ebalulekileyo.” Ngamany’ amazwi, nikel’ ingqalelo kule nto uthetha ngayo kungekhona kuwe okanye kuloyiko onalo. Ngenkulungwane yokuqala, abanye abantu babevakalelwa kukuba umpostile uPawulos akalociko, kodwa babemphulaphula kuba wayesoloko enento ebalulekileyo yokuthetha. (2 Korinte 11:6) Ngokufanayo, ukuba uthetha ngento ebalulekileyo oyikholelwayo, usenokungabonakali ukuba wothukile.

URon Sathoff, naye osisithethi esivunyiweyo esiqeqesha izithethi unikela eli cebiso: Ungakugqali njengoxanduva ukuthetha phambi kwabanye. Yiba ngathi uyancokola. Zama ukufikelela umphulaphuli ngamnye uthethe naye ngokungathi uyancokola. Yiba ‘nomdla wobuqu’ kubantu othetha nabo, uze uthethe nabo ngendlela eqhelekileyo. (Filipi 2:3, 4) Ukuba uthetha ngokungathi uyancokola, uya kuziva ukhululekile.

Abantu badla ngokoyika ukuhlazeka okanye ukugxekwa ngabaphulaphuli. ULenny Laskowski, isithethi esivunyiweyo esiqeqesha ezinye izithethi usikhumbuza ukuba abaphulaphuli badla ngokuba nomdla wento eza kuthethwa. Lo kaLaskowski uthi: “Bafuna ukuba uphumelele.” Ngoko musa ukoyika. Ukuba kunokwenzeka, babulise abantu oza kuthetha nabo xa befika. Zama ukubajonga njengabahlobo, kungekhona iintshaba.

Kwakhona khumbula ukuba, asinto imbi ukoyika. Enye ingcali ithi: “Ngokwahlukileyo kwingcamango eqhelekileyo, kuhle ukoyika.” Ngoba? Ukoyika ngomlinganiselo othile kubonisa ukuba uthobekile, nto leyo eya kukunceda ungazithembi ngokugqithiseleyo. (IMizekeliso 11:2) Iimbaleki, iimvumi nabadlali beqonga abaninzi bathi ukuba nendawana yoloyiko kubangela ukuba uyenze kakuhle nayiphi na into oyenzayo, kunjalo nangokuthetha phambi kwabanye.

Amacebiso Anokukunceda Uphumelele

Ngokusebenzisa la macebiso namanye angakhankanywanga apha, amanye amaKristu aselula aye ancedakala xa kufuneka athethe phambi kwabanye esikolweni, emsebenzini nasemabandleni awo. Khawubone ukuba akanakukunceda kusini na amanye ala macebiso.

UJade: “Wubeke ngamazwi akho umbandela. Zixelele ukuba umbandela othetha ngawo uza kubakha abanye. Ukuba uvakalelwa kukuba umbandela othetha ngawo ubalulekile, nabaphulaphuli baza kuvakalelwa ngendlela efanayo.”

URochelle: “Ndikufumanise kuluncedo ukuzifota ngevidiyo. Kundipha ithuba lokubona iimpazamo zam, yaye kuluncedo. Kwakhona, khetha umbandela owuthandayo. Oko kuza kuvakala kwintetho yakho.”

UMargrett: “Ndifumanise ukuba xa ndibhala amanqaku amafutshane kunokubhala yonke into endiza kuyithetha, ndiye ndithethe ngendlela eqhelekileyo ndize ndibe ngathi ndiyancokola. Kwakhona ukutsala umoya ngaphambi kokuba ndithethe kundenza ndingoyiki kangako.”

UCorrine: “Ungoyiki ukubhuda. Wonk’ umntu uyazenza iimpazamo. Kufuneka nje wenze okusemandleni akho.”

Kakade ke, kuyo yonk’ into, njengemidlalo, ezobugcisa okanye umculo, akukho nto idlula amava nokuziqhelisa. UTatiana ucebisa ukuba uwulungiselele kuselithuba umbandela oza kuthetha ngawo ukuze ube nexesha elaneleyo lokuziqhelanisa nawo. Yaye unganikezeli. Uthi: “Okukhona ndiye ndithetha phambi kwabanye, kokukhona kuya kusiba lula.” Noko ke, kukho omnye umthombo woncedo ongafanelanga uwulibale, ingakumbi xa kufuneka uthethe ngonqulo lwenyaniso.

Uncedo Oluvela Kwesona Sithethi Sibalaseleyo

Ngoxa wayeselula, uDavide owayeza kuba yinkosi yakwaSirayeli, wayesele esaziwa ‘njengesithethi esinengqiqo.’ (1 Samuweli 16:18) Kwakubangelwa yintoni oko? Ngokucacileyo, ngoxa wayeselula uDavide wachitha ixesha elininzi esalusa iigusha, yaye wancedwa ngumthandazo wanolwalamano olusondeleyo nesona Sithethi Sibalaseleyo, uYehova uThixo. (INdumiso 65:2) Kamva, olu lwalamano lwamnceda wakwazi ukuthetha ngokucacileyo, ngokungqalileyo nokweyisela abanye naphantsi kwezona meko zinzima.—1 Samuweli 17:34-37, 45-47.

Unokuqiniseka ukuba ngoxa unqula uThixo, uya kukunceda ukwazi ukweyisela abanye njengoko wenzayo ngoDavide, akunike “ulwimi lwabafundileyo.” (Isaya 50:4; Mateyu 10:18-20) Ewe, ngokuwasebenzisa ngokupheleleyo amathuba okukunceda uphucule ubuchule bakho bokuthetha phambi kwabanye, uya kuba sisithethi esiphumelelayo!

[Umbhalo osemazantsi]

[Ibhokisi ekwiphepha 18]

Ukuqeqeshelwa Ukuthetha Phambi Kwabanye

Kumabandla amaNgqina kaYehova ehlabathini lonke, veki nganye kubakho isikolo esisekelwe eBhayibhileni esibizwa ngokuba siSikolo Sobulungiseleli Sobuthixo. Abafundi baba neengxubusho, banikela iintetho phambi kwebandla yaye mntu ngamnye uyancedwa enze inkqubela. Ngaba esi sikolo siluncedo? Zivele amava kaChris oneminyaka eli-19 ubudala.

Uthi: “Ngaphambi kokuba ndibhalise kwesi sikolo, ndandingakhululeki xa ndiphakathi kwabantu. Ndandingatsho ukuba ndingaze ndime phambi kweqela labantu. Kodwa abanye abantu ebandleni bandikhuthaza bathi nokuba ndingabhuda baza kukuvuyela oko, ekubeni besazi ukuba kunzima kum ukuma phambi kwabantu. Yaye emva kokuba ndinikele intetho, babedla ngokundicoma. Oko kwandinceda kakhulu.”

Namhlanje, emva kweminyaka emihlanu wabhalisa kwesi sikolo, uChris ulungiselela ukunikela intetho yemizuzu engama-45 okwesihlandlo sokuqala. Ngaba ulisebenzisa ngokuzeleyo eli lungiselelo lesi sikolo?

[Imifanekiso ekwiphepha 16, 17]

Ukuba sisithethi kunokukunceda kuzo zonke iinkalo zobomi