Uvuyo Nocelomngeni Lokufikisa

IXESHA lokufikisa linokuba lelona xesha limnandi ebomini. Eneneni, kwabaninzi lixesha elimnandi. Yaye abantu abaninzi abadala bayonwaba xa becinga ngemihla yobutsha babo.

Kwangaxeshanye, simele siyiqonde into yokuba siphila ‘kumaxesha amanqam ekunzima ukujamelana nawo.’ (2 Timoti 3:1) Oku kuye kwazisa ingcinezelo engakumbi kulutsha, ingcinezelo engafaniyo naleyo zazijamelene nayo izizukulwana zangaphambili. Mhlawumbi yiloo nto uSabrina Solin Weill, ongumhleli oyintloko wephephancwadi labakwishumi elivisayo, echaza ixesha lokufikisa “njengokuhamba entanjeni kungekho mnatha onokuwela phezu kwawo.” Eneneni, eli xesha lizaliswe ziziphithiphithi linokubangela amava angemyoli, unxunguphalo nokudideka. Lo kaWeill uthi: “Abakwishumi elivisayo kufuneka bajamelane neengxaki zobuntwana nezobuntu obudala ngaxeshanye.”

Ukuba uyafikisa, unokuphumelela njani kucelomngeni ojamelene nalo? Ukuba ungumzali womntwana ofikisayo, yintoni enokukunceda ukhumbule ukuba kwakunjani kuwe ngaloo minyaka inzima yokufikisa, uze ngaloo ndlela ukwazi ukuyiqonda kakuhle imeko ajamelene nayo unyana okanye intombi yakho? Kolu ngcelele lwamanqaku, simema ulutsha nabantu abadala ukuba bakhe bawuphonononge kakuhle lo mbandela wexesha lokufikisa. Oko kuya kunceda ulutsha ukuba lunganeli nje ukunyamezela ngeli xesha linzima kodwa luphumelele.