Iziko Loncedo Olungxamisekileyo—ELondon
NGUMBHALI KAVUKANI! EBRITANI
UMPHATHI weeNkonzo Zeenqwelo Zabagulayo zaseLondon uRob Ashford uthi: “Sizama ukufikelela kumntu ogula kakhulu nowenzakeleyo kwisithuba semizuzu nje esibhozo naphi apho ingozi yenzeke khona eLondon ezisiskweri seekhilomitha ezili-1 600 ubukhulu. Siyalufikela olu sukelo ngaphezu kwezihlandlo ezili-75 ekhulwini, nakuba amanani eengozi enyuka nyaka ngamnye.”
Ndamenywa ukuze ndityelele Iziko LaseLondon Lolawulo Lweenqwelo Zabagulayo eliseWaterloo kumzantsi womlambo iThames. Eli ziko, lelona likhulu kwiYurophu iphela, linikela uncedo kubantu abangama-3 000 abafowunela kulo suku ngalunye. Sithetha ngabantu abazizigidi ezisixhenxe, abathetha iilwimi ezingaphezulu kwama-300. Bahlangabezana njani abasebenzi balapha abangama-300 nalo msebenzi?
Oncedwa Kuqala
Ndiye ndabukela njengoko umntu ophendula abantu abacela uncedo kwinombolo yefowuni ethi—999, njengoko le iyinombolo yefowuni yoncedo olungxamisekileyo yaseBritani. Ngokukhawuleza lowo uphendula ifowuni ufumanisa indawo ekuyo ingxaki kunye nesitrato esingena lula kuloo ndawo. Ngoko nangoko, kuvela imaphu kwikhompyutha yakhe. Ukuze abone ukungxamiseka kwale ngozi, ubuza uthotho lwemibuzo eyile: Bangaphi abantu abafuna uncedo? Baneminyaka emingaphi ubudala, yaye ngamadoda okanye ngamabhinqa? Ngaba bafe isiqaqa? Ngaba bayaphefumla? Ngaba baneentlungu esifubeni? Ngaba bayopha?
Njengoko lowo uphendula iifowuni zoncedo ebhala le nkcazelo, ikhompyutha ngokuzenzekelayo ibonisa ukubaluleka kwemfuneko yoncedo ngokuvelisa: umbala obomvu—othetha ukuba ubomi buphakathi kwenyama nozipho, umbala o-orenji—othetha ukuba basengozini kodwa akungxamisekanga kangako; umbala oluhlaza—othetha ukuba akukho mntu ufayo ibe akungxamisekanga kangako. Lowo uphendula le fowuni udlulisela le nkcazelo kugxa wakhe olungiselela ukuba ixhoba elo lifumane uncedo.
Uncedo Kwindawo Yengozi
Kukho iinqwelo zabagulayo ezingama-395 kunye neemoto zoncedo ezikhawulezayo ezingama-60. Xa kuhlatyw’ ikhwelo, eyona moto ikufutshane iyalelwa ukuba iye kwindawo yengozi. Nezithuthuthu zoncedo lokuqala zisoloko zingxangile, kuba zinokuthubeleza kwezona ndawo zixineneyo. Ukongezelela, kukho oogqirha abali-12 nabo abasoloko belinde nantoni na enokwenzeka iiyure ezingama-24 suku ngalunye ukuze bancedise abo boncedo lokuqala.
Ngethuba ndikweli ziko, amapolisa aye anikela ingxelo ngengozi emasikizi eyenzeke kuhola wendlela. Kwakusekho inqwelo yabaguli kakade apho kodwa eli polisa laxelela ikomkhulu lazo. Ngoba? Ukuze azise abantu abasebenza apho ukuba kusenokufuneka uncedo lwehelikopta. Le helikopta ithunyelwa kwiingozi ezahlukeneyo ezinokuba li-1 000 nyaka ngamnye. Isetyenziswa ngaboncedo lokuqala kunye noogqirha abasa abantu abonzakele kakhulu kwisibhedlele iRoyal London Hospital, apho bafumana uncedo olukhawulezileyo.
Ngowama-2004, kuye kwaveliswa elinye ilinge lokunceda abantu—ibhayisekile yabaguli kwisikhululo seenqwelo-moya saseLondon esibizwa ngokuba yiLondon Heathrow. Le ndlela sele isebenza kwiMpuma yesi sixeko. Iqela leengcali zamayeza kunye naboncedo lokuqala babelana ngale mbopheleleko, ngaloo ndlela bekhulula inqwelo yabaguli ukuba incede abanye. Ibhayisekile nganye inesibane esiluhlaza yaye ifakelwe ixilongo elibangela ingxolo xa kukho ingozi, kwakhona zineengxowa ezithwele izixhobo ezinobunzima obuziikhilogram ezingama-35 phakathi kuzo kukho isixhobo sokushukumisa intliziyo ebetha kancinane (defibrillator), ioksijini kunye nesithomalalisi zintlungu.
Kwiintsuku nje ezimbalwa eli qela lebhayisekile liqalile ukusebenza, wawusele ubonakala umsebenzi walo. Kwisikhululo seenqwelo-moya, kwiCandelo 4, kwagula elinye ibhinqa elineminyaka engama-35 ubudala laza layeka nokuphefumla. Aboncedo lokuqala basabela emva kokuba kufowunelwe inombolo ethi 999 kwisithuba nje semizuzwana embalwa, balinika ioksijini eli bhinqa baza balincedisa laphefumla kwakhona. Inqwelo yabaguli yalibalekisela kwisibhedlele esikufutshane. Emva kokuchacha eli bhinqa laya kubulela kwabo boncedo lokuqala ngokusindisa ubomi balo.
Ukunceda Nangezinye Iindlela
Xa abantu befowunela kwinombolo ethi 999 abanye babo abasithethi isiNgesi, ngoko bathunyelwa kumguquleli. Ukufumanisa ukuba lowo ufuna uncedo uthetha luphi ulwimi kunokuba nzima, ngakumbi ukuba lowo uthethayo uthetha ngokukhawuleza ngenxa yoxinezeleko.
Ukuze bakhuthaze abantu ukuba bafunde ngoncedo lokuqala, kukho ifilimu emfutshane eguqulelwe ngesiNgesi nefumaneka kwi-DVD. Eyona nto ifunwa ngamandla kukukhuthaza abantu abahlala eLondon abasuka kwiindawo zaseMzantsi Asia ukuba “bafunde indlela yokuncedisa umntu ongaphefumliyo aphefumle kwakhona,” itsho njalo iLAS News, eyimpapasho yeLondon Ambulance Service. Kwakhona le DVD ibonisa oko kwenzekayo xa kufowunelwa inombolo ethi 999.
Abantu abahlala kumbindi wesixeko saseNgilani bakuvuyela kakhulu ukubona intsabelo ekhawulezileyo yonyango lokuqala, enoba kwenzakele umntu omnye okanye abaninzi, okanye ingozi ingaphantsi komhlaba okanye kurhec’ izulu wesakhiwo. Ngokuphathelele amadoda namabhinqa eeNkonzo Zeenqwelo Zabagulayo zaseLondon, ugqirha olitsha-ntliziyo uthi: “Zezona ngcungela kwezamayeza ndakha ndasebenza nazo ebomini.” Olu lukhuthazo oluhle oluya kwabona bantu baninzi basebenza ngoncedo lokuqala lweenqwelo zabagulayo emhlabeni wonke.
[Ibhokisi ekwiphepha 11]
Iingxaki Noxinezeleko
Abantu abafuna inkcazelo yobuqu, bengaguli okanye benzakele kangako, okanye abantu abafowunele inombolo ethi 999 ngempazamo okanye kuba nje benesithukuthezi, babangela ingxaki kwiziko loncedo lokuqala. Okubi nangakumbi kuxa abanye abaguli kunye nabanye abantu, abaquka izizalwana zabo, baye babathuka beshiya abalilibeleyo abo boncedo lokuqala xa beze kunceda! Lo msindo usenokubangelwa kukuxinezeleka, ukusebenzisa kakubi iziyobisi okanye ukucinga ukuba abo boncedo bathabathe ixesha labo ukuza. Asikho isicombululo esilula kwezi ngxaki, kodwa ukufundisa abantu ngezi zinto kuye kwenza umahluko.
[Imifanekiso ekwiphepha 10]
Eli ziko linceda abantu abangama-3 000 abafowunela kulo suku ngalunye befuna uncedo
[Inkcazelo Ngomfanekiso okwiphepha 10]
Yonke imifanekiso: Courtesy of London Ambulance Service NHS Trust